Neʼe Kua Tou Logo Kiai!
1 ʼE moʼoni te faʼahi ʼaia! ʼE fakahā liuliuga e Sehova te ʼu manatu ʼi tana Folafola heʼe fua lelei ki tana hahaʼi. Neʼe fakahā liuliuga e Sesu tana ʼu akonaki ʼo ʼuhiga mo te ʼu agaaga kehekehe ʼo te Puleʼaga. Ko tana kau ʼapositolo, neʼe nātou vakaʼi tuʼumaʼu te ʼu manatu fakalaumālie ʼaia mo nātou ʼaē neʼe kua pipiki mālohi ki te moʼoni.—Loma 15:15; 2 Pet. 1:12, 13; 3:1, 2.
2 ʼI totatou temi, ko te kautahi ʼa Sehova neʼe ina fai he ʼu fakatuʼutuʼu ke vakaʼi liuliuga he ʼu manatu maʼuhiga ʼi te ʼu fono ʼo te kokelekasio. Neʼe vakaʼi liuliuga ʼihi tohi ʼa te Sosiete. Ei, ʼe maʼuhiga ke tou logo ki he ʼu manatu neʼe kua tou logo kiai!
3 ʼE Maʼuhiga Ke Fakamanatuʼi Tuʼumaʼu Mai Kia Tatou: Ko te ʼu fakamanatu ʼa Sehova ʼe ʼaoga moʼo fakaloloto tatatou mahino ki te moʼoni, pea mo avahi totatou ʼatamai, pea mo fakamālohiʼi tatou ke tou haga kumi te ʼu meʼa fakalaumālie. (Pes. 119:129) Ka tou toe vakaʼi te ʼu lekula pea mo te ʼu pelesepeto ʼa te ʼAtua, pea ʼe hage ʼe tou sioʼata. ʼE feala ai hatatou sivi ia tatou totonu, pea ke ʼaua naʼa tou liliu ko he ʼu hahaʼi “e [nātou] galoi” te ʼu meʼa ʼaia.—Skp. 1:22-25.
4 Kapau ʼe mole tou haga manatuʼi te moʼoni, pea ʼe ʼi ai te tahi ʼu meʼa ʼe nātou uga anai totatou loto. Ko te ʼu fakamanatu ʼa te ʼAtua ʼe ko he ʼu tokoni moʼo tauʼi te ʼu fakaneke ʼo te mālama ʼa Satana. (Pes. 119:2, 3, 99, 133; Filp. 3:1) Ko te ʼu fakamanatu ʼaē ʼe fai tuʼumaʼu mai kia tatou ki te fakahoko ʼo te ʼu fakatuʼutuʼu ʼa te ʼAtua, ʼe nātou uga tatou ke tou “alaala.” (Mko. 13:32-37) Ko te fakahā liuliuga mai ʼo te ʼu moʼoni faka Tohi-Tapu, ʼe ko he tokoni ke tou nonofo ʼi te ala ʼaē ʼe ina taki ki te maʼuli heʼegata.—Pes. 119:144.
5 Tou Fakaʼaogaʼi Te ʼu Tokoni Ke ʼAoga Kia Tatou Takitokotahi: ʼE tonu ke tou ‘fakahaga totatou loto ki te ʼu fakamanatu ʼa te ʼAtua.’ (Pes. 119:36) Ka fakatuʼutuʼu ʼi te fono ke vakaʼi he manatu kua tou māhani kiai, pea ʼe tonu ke tou teuteuʼi fakatomuʼa, mo tou vakaʼi te ʼu vaega faka Tohi-Tapu ʼaē ka fakaʼaogaʼi, pea mo tou fakakaukauʼi pe koteā tona ʼaoga kia tatou. ʼAua naʼa tou meʼa noaʼi peʼe tou manatu ʼe mole hona ʼaoga ke tou teuteuʼi te Fakamanatu ʼo Te Ako Faka Minisitelio Faka Teokalatike. (Luka 8:18) Tahi ʼaē meʼa, ʼaua naʼa tou fakaʼaoʼaoganoa ki te ʼu moʼoni tāfito ʼaē ʼe fakahā liuliuga ʼi te ʼu fono.—Hep. 5:11.
6 ʼOfa pe ke tou lototahi mo te manatu ʼaenī ʼa te tagata fai pesalemo: “Neʼe ʼau fiafia ʼi te ala ʼo tau ʼu fakamanatu, ohage pe ko taku fiafia ʼi te ʼu meʼa fuli ʼaē ʼe maʼuhiga.” (Pes. 119:14) Ei, kua tou logo ki te ʼu meʼa maʼuhiga ʼaia, pea ʼe lagi tou toe logo pe anai kiai. Koteā tona tupuʼaga? Heʼe ʼiloʼi e Sehova, ʼe ʼaoga te faʼahi ʼaia kia tatou!