Koteā ʼAē ʼe Lava Tokoni Mai Ke Tou Mālohi ʼi Te Tui?
1 Talu mai tatatou kau ki te kautahi ʼa Sehova, kua tou fiafia lahi ʼi tatatou tuputupu ʼi te faʼahi fakalaumālie! Kae ʼe maʼua ke hoko atu tatatou tuputupu ʼaia, ke feala ai hatatou ‘tauaka, mo lagaʼi ake, pea mo mālohi ʼi te tui.’ (Kol. 2:6, 7) Neʼe tuputupu te tokolahi ʼi te faʼahi fakalaumālie, kae ko ʼihi neʼe nātou hēʼia he neʼe mole nātou “mālohi ʼi te tui.” (1 Ko. 16:13, MN) ʼE ʼi ai te ʼu meʼa ʼe tonu ke tou fai ke mole hoko kia tatou te faʼahi ʼaia. Koteā ʼaē ʼe tonu ke tou fai?
2 Tou Gāue Tuʼumaʼu ʼi Te Faʼahi Fakalaumālie: Koutou fakatuʼutuʼu he polokalama lelei ʼi te faʼahi fakalaumālie ʼi te kautahi ʼa Sehova, heʼe tou maʼu fuli ai te ʼu meʼa ʼaē ʼe ʼaoga kia tatou ʼi te faʼahi fakalaumālie. ʼE fakaloto mālohiʼi tatou e te ʼu fono, mo te ʼu fakatahi lalahi, ke tou tuputupu pea mo tou mālohi ʼi te faʼahi fakalaumālie, mo kapau foki ʼe tou kau tuʼumaʼu kiai ke tou maʼu ai he ʼu tapuakina. (Hep. 10:24, 25) Ko te lau tuʼumaʼu ʼo te Tohi-Tapu, mo Te Tule Leʼo pea mo te Réveillez-vous ! pea mo te ʼu tohi ʼaē ʼe talanoa ai ki te meʼa kai fefeka ʼo te Folafola ʼa te ʼAtua, ʼe ina faka fealagia anai ke loloto pea mo mālohi tatatou ʼu aka fakalaumālie. (Hep. 5:14) ʼE tou maʼu anai he ʼu tapuakina heʼegata kapau ʼe tou fai hatatou ʼu fakatuʼutuʼu fakalaumālie, pea mo tou faiga mālohi moʼo fakahoko te ʼu fakatuʼutuʼu ʼaia.—Filp. 3:16.
3 Te Tokoni ʼo Nātou ʼAē Kua Fakapotopoto: ʼI te kokelekasio, koutou fakakaugā mo nātou ʼaē kua fakapotopoto ʼi te faʼahi fakalaumālie. Koutou faiga ke koutou feʼiloʼiʼaki mo te kau tagata ʼāfea, heʼe ko nātou tāfito ʼaē ʼe feala ke nātou fakaloto mālohiʼi koutou. (1 Tes. 2:11, 12) Koutou tali te ʼu tokoni fuli pea mo te ʼu manatu fuli ʼaē ʼe feala ke nātou foaki atu. (Ef. 4:11-16) ʼE toe fia tokoni mo te ʼu tēhina faifekau faka minisitelio ki ʼihi ke nātou mālolohi ʼi te tui, koia koutou ʼolo ki te ʼu tēhina ʼaia ke nātou fakaloto mālohiʼi koutou.
4 ʼE tonu koa ke tokoni atu he tahi ki takotou minisitelio? Koutou fakahā age ki te kau tagata ʼāfea pea mo koutou kole tokoni. ʼE lagi tohi anai koutou ki te polokalama tokoni ʼaē ʼe fai e te kau pionie. Neʼe hoki koutou papitema koa? Koutou ako te tohi Notre ministère, pea kapau ʼe koutou mulimuli ki te ʼu meʼa ʼaē ʼe tuʼu ai, pea ʼe koutou tuputupu anai ʼo liliu ko he ʼu hahaʼi ʼe fakapotopoto ʼi te faʼahi fakalaumālie. ʼE koutou maʼu fānau koa? Koutou haga fakaloto mālohiʼi nātou ʼi te faʼahi fakalaumālie.—Ef. 6:4.
5 Kapau kua tou aka pea mo mālohi ʼi te tui, pea ʼe tou felogoi lelei anai mo Sehova pea ʼe tou fakakaugā fakafiafia anai mo tatatou ʼu tēhina. ʼE tokoni mai te ʼu faʼahi ʼaia ke tou tauʼi te ʼu kākā ʼa Satana, pea ʼe tou fakamālohi ai tatatou ʼamanaki ki he ka haʼu ʼe heʼegata.—1 Pet. 5:9, 10.