‘Koutou Haga Haʼele Fakatahi Mo Kilisito’
“Koia, ʼi takotou kua tali ia Kilisito Sesu te ʼAliki, koutou haga haʼele fakatahi mo ia.”—Kolose 2:6.
1, 2. (a) ʼE fakamatala feafeaʼi e te Tohi-Tapu te maʼuli ʼa Enoke ʼi tana tauhi agatonu kia Sehova? (b) Ohage ko tona fakahā ia Kolose 2:6, 7, ʼe tokoni feafeaʼi mai ia Sehova kia tatou ke tou haʼele mo ia?
NEʼE kua koutou sio koa la ki he kiʼi toe tagata ʼe haʼele mo tana tāmai? ʼE faʼifaʼitakiʼi e te kiʼi tamasiʼi te ʼu meʼa fuli ʼaē ʼe fai e tana tāmai, pea ʼe hā tana fiafia ʼi tona fofoga; ʼe tokoni tana tāmai kia ia ʼi ʼona tafa, pea ʼe hā ʼi tona fofoga tona ʼofa. ʼO toe feiā aipe, ʼe fakaʼaogaʼi e Sehova te fakatā ʼaia moʼo fakahā te maʼuli ʼaē ʼe tou maʼu ʼi tatatou tauhi agatonu kia te ia. Ohage la, ʼe ʼui e te Folafola ʼa te ʼAtua ko te tagata agatonu ko Enoke “neʼe haʼele mo te ʼAtua [moʼoni].”—Senesi 5:24; 6:9.
2 Ohage pe ko te tokoni ʼa he tāmai lototokaga ki tona foha ke haʼele mo ia, neʼe foaki mai e Sehova kia tatou te tokoni ʼaē ʼe lelei tokotahi. Neʼe ina fekauʼi mai tona ʼAlo ʼulu tokotahi ki te kele. Lolotoga tona maʼuli katoa ʼi te kele, neʼe fakafofoga lelei ʼaupito e Sesu Kilisito tana Tāmai ʼaē ʼi selo. (Soane 14:9, 10; Hepeleo 1:3) Koia, ke feala hatatou haʼele mo te ʼAtua, ʼe tonu ke tou haʼele mo Sesu. Neʼe tohi fēnei e te ʼapositolo ko Paulo: “Koia, ʼi takotou kua tali ia Kilisito Sesu te ʼAliki, koutou haga haʼele fakatahi mo ia, ʼo koutou fakatauaka pea mo koutou lagaʼi ake koutou ia te ia, pea mo koutou liliu ʼo tutuʼu mālohi ʼi te tui, ohage pe ko te meʼa ʼaē neʼe akoʼi atu kia koutou, ʼo koutou fonu ʼi te tui ʼaki he fakafetaʼi.”—Kolose 2:6, 7.
3. ʼO mulimuli ki te meʼa ʼaē ʼe ʼui ia Kolose 2:6, 7, he koʼe ʼe feala ke tou ʼui ko te haʼele fakatahi mo Kilisito ʼe mole gata ʼaki pe te papitema?
3 ʼI tanatou fia haʼele fakatahi mo Kilisito, pea mo nātou faiga ʼaē ke nātou mulimuli ki tana faʼahiga haʼele haohaoa, ko te kau ako Tohi-Tapu fakamalotoloto ʼe nātou papitema. (Luka 3:21; Hepeleo 10:7-9) ʼI te malamanei ʼi te taʼu 1997, ko te toko 375 000 tupu neʼe nātou fakahoko te faʼahi maʼuhiga ʼaia—ko tona fakafuafua ko te toko 1 000 tupu ʼi te ʼaho fuli. ʼE ko he meʼa fakafiafia te tuputupu ʼaia! Kae ʼe fakahā e te ʼu palalau ʼa Paulo ʼaē ʼe tou maʼu ia Kolose 2:6, 7, ko te haʼele fakatahi mo Kilisito ʼe mole gata ʼaki pe te papitema. Ko te kupu faka Keleka ʼaē neʼe fakaliliu ʼaki te kupu “haga haʼele,” ʼe ina fakahā he gāue ʼe tonu ke fai hoholo. Tahi ʼaē meʼa, ʼe toe ʼui e Paulo ko meʼa e fā ʼe tonu ke tou fai ke feala hatatou haʼele mo Kilisito: ke tou fakatauaka ia Kilisito, mo lagaʼi ake tatou ia te ia, mo tou tutuʼu mālohi ʼi te tui pea mo fonu ʼi te fakafetaʼi. Tou vakavakaʼi te ʼu faʼahi takitahi ʼaia pea mo fakatokagaʼi peʼe tokoni feafeaʼi mai kia tatou ke hoko atu tatatou haʼele fakatahi mo Kilisito.
ʼE Koutou ‘Fakatauaka Koa Ia Kilisito’?
4. Koteā tona faka ʼuhiga ke tou ‘fakatauaka ia Kilisito’?
4 ʼUluaki, ʼe tohi e Paulo ʼe tonu ke tou ‘fakatauaka ia Kilisito.’ (Vakaʼi ia Mateo 13:20, 21.) Koteā ʼaē ʼe feala ke fai e he tahi ke fakatauaka ia Kilisito? ʼE mole tou sio ki te ʼu aka ʼo he fuʼu ʼakau, kae ʼe nātou maʼuhiga ki te fuʼu ʼakau ʼaia, heʼe nātou faka fealagia ke tuʼu mālohi, pea ʼe nātou fafaga te fuʼu ʼakau ʼaia. ʼO toe feiā aipe, ʼi te kamata ʼe malave kia tatou te faʼifaʼitaki pea mo te fai akonaki ʼa Kilisito kae ʼe mole sio kiai he tahi, pea ʼe liliu ʼo pipiki mālohi ki tatatou ʼatamai pea mo totatou loto, ʼo nātou fafaga ai pea mo fakamālohiʼi ai tatou. Kapau ʼe tou tuku ki te ʼu meʼa ʼaia ke nātou takitaki tatatou ʼu manatu, mo tatatou ʼu gāue, pea mo tatatou ʼu tonu, pea ʼe uga ai tatou ke tou foaki totatou maʼuli kia Sehova.—1 Petelo 2:21.
5. ʼE lava feafeaʼi hatatou “maʼu he holi mālohi” ki te meʼa kai fakalaumālie?
5 Neʼe ʼofa ia Sesu ki te ʼatamai mālama ʼaē neʼe haʼu mai te ʼAtua, pea neʼe ina fakatatau ki he meʼa kai. (Mateo 4:4) Koia, ʼi tana Akonaki ʼi te Moʼuga, neʼe ina fakaʼaogaʼi te ʼu vaega e 21 ʼo te ʼu tohi kehekehe e valu ʼo te Tauhi ʼĀfea. Moʼo mulimuli ki tana faʼifaʼitaki, ʼe tonu ke tou fai ohage ko tona fakaloto mālohiʼi mai tatou e Petelo—ke tou “maʼu he holi mālohi” ki te meʼa kai fakalaumālie “ohage ko he ʼu fānau meamea.” (1 Petelo 2:2) Ka fia kai he kiʼi tamasiʼi, pea ʼe ina fakahā lelei tana holi mālohi ke kai. Kapau ʼi te temi nei, ʼe mole tou holi feiā ki te meʼa kai fakalaumālie, pea ʼe fakaloto mālohiʼi tatou e te ʼu palalau ʼa Petelo ke tou “maʼu” te holi ʼaia. ʼO feafeaʼi? ʼE feala ke tokoni mai kia tatou te pelesepeto ʼaenī ʼaē ʼe tou maʼu ia Pesalemo 34:8: “Koutou ʼahiʼahi pea koutou sio ko Sehova ʼe lelei.” Kapau ʼe tou “ ʼahiʼahi” tuʼumaʼu te Folafola ʼa te ʼAtua, te Tohi-Tapu, ʼo lagi tou lau he ʼu vaega ʼi te ʼaho fuli, pea ʼe tou sio ai anai ʼe tou mālolohi ai pea mo tou lelei ai ʼi te faʼahi fakalaumālie. ʼAki te temi, ʼe tuputupu anai tatatou holi ki te Folafola.
6. He koʼe ʼe maʼuhiga ke tou metitasio ki te ʼu meʼa ʼaē ʼe tou lau?
6 Kae ʼe maʼuhiga ke hifo lelei te meʼa kai mokā tou ʼosi kai. Koia ʼe tonu ke tou metitasio ki te ʼu meʼa ʼaē ʼe tou lau. (Pesalemo 77:11, 12) Ohage la, ʼi tatatou lau te tohi Te tagata ʼaē ʼe lahi tokotahi ʼo te ʼu temi fuli, ʼe lahi anai te ʼaoga ʼo te ʼu kapite fuli mo kapau ʼe tou fai te fehuʼi ʼaenī kia tatou: ‘ ʼI te fakamatala ʼaenī, koteā ʼaē ʼe ʼau ako ai ʼo ʼuhiga mo te ʼulugaaga ʼo Kilisito, pea ʼe lava feafeaʼi haku faʼifaʼitakiʼi te faʼahi ʼaia ʼi toku maʼuli?’ Ko te faʼahiga metitasio ʼaia ʼe tokoni anai kia tatou ke tou maʼuliʼi te ʼu meʼa ʼaē ʼe tou ako. Pea kapau ʼe tonu ke tou fai he tonu, pea ʼe feala ke tou feʼekeʼaki pe koteā anai te meʼa ʼaē ka fai e Sesu. Kapau ʼe tou fai he tonu ʼo mulimuli ki te faʼahi ʼaia, pea ʼe tou fakahā ai kua tou tauaka moʼoni ia Kilisito.
7. Koteā te manatu ʼaē ʼe tonu ke tou maʼu ʼo ʼuhiga mo te meʼa kai fakalaumālie mālohi?
7 ʼE toe uga tatou e Paulo ke tou fakaʼaogaʼi “te meʼa kai mālohi,” te ʼu moʼoni loloto ʼo te Folafola ʼa te ʼAtua. (Hepeleo 5:14) Ko te ʼuluaki fakatuʼutuʼu ʼaē ka tou fai ʼo ʼuhiga mo te faʼahi ʼaia, ʼe lagi ko te lau ʼo te Tohi-Tapu katoa. ʼOsi ʼaia pea ʼe ʼi ai leva he tahi ʼu kupu tāfito ʼe feala ke tou ako, ohage la ko te sakilifisio faitotogi ʼo Kilisito, te ʼu fuakava kehekehe ʼaē neʼe fai e Sehova mo tana hahaʼi, peʼe ko he ʼu logo faka polofeta ʼi te Tohi-Tapu. ʼE lahi te ʼu meʼa ʼe feala ke tou ako, ʼe tokoni anai kia tatou ke tou kai pea mo fakahifo te meʼa kai fakalaumālie mālohi. He koʼe ʼe tonu ke tou maʼu te faʼahiga ʼatamai mālama ʼaia? ʼE mole tou fai te faʼahi ʼaia ke feala ai hatatou laupisi, kae ke fakatuputupu tatatou ʼofa kia Sehova pea mo tou fakaōvi lelei kia te ia. (1 Kolonito 8:1; Sake 4:8) Kapau ʼe tou holi mālohi ke tou maʼu te ʼatamai mālama ʼaia, ʼo tou maʼuliʼi, mo fakaʼaogaʼi moʼo tokoni ki te hahaʼi, pea ʼe tou faʼifaʼitakiʼi moʼoni anai kia Kilisito. ʼE tokoni anai te faʼahi ʼaia kia tatou ke tou fakatauaka fakalelei ia te ia.
ʼE Koutou ‘Laga Koa Ia Koutou Ia Kilisito’?
8. Koteā tona faka ʼuhiga ke ‘lagaʼi ake tatou ia Kilisito’?
8 ʼO ʼuhiga mo te lua faʼahi ʼo tatatou haʼele fakatahi mo Kilisito, ʼe hiki vave atu ia Paulo ki te tahi fakatā—mai te fakatā ʼo te fuʼu ʼakau ki te fakatā ʼo he falefata. Ka tou manatu ki he laga ʼo he falefata, pea ʼe mole tou manatu pe ki tona ʼu fakatafito kae ʼe tou toe manatu foki ki te fale ʼaē ka fakatuʼu, pea mo te gāue kinakina ʼaē ʼe maʼua ke fai. ʼO toe feiā aipe, ʼe tonu ke tou gāue kinakina moʼo fakatuputupu ia tatou te ʼu kalitate pea mo te ʼu aga ʼaē ʼe tatau mo Kilisito. ʼE tokagaʼi e te hahaʼi te gāue kinakina ʼaia, ohage ko tona tohi fēnei e Paulo kia Timoteo: ‘Ke ʼiloga ki te hahaʼi fuli tau lakalaka ki muʼa.’ (1 Timoteo 4:15; Mateo 5:16) Koteā te ʼu gāue faka Kilisitiano ʼaē ʼe feala ai ke tou tuputupu?
9. (a) Ke feala hatatou faʼifaʼitakiʼi ia Kilisito ʼi tatatou minisitelio, koteā te ʼu fakatuʼutuʼu ʼaē ʼe ʼaoga ke tou fai? (b) ʼE tou ʼiloʼi feafeaʼi ʼe loto e Sehova ke tou fiafia ʼi tatatou minisitelio?
9 Neʼe fakatotonu mai e Sesu ke tou fai faka mafola pea ke tou akoʼi te logo lelei ki te hahaʼi. (Mateo 24:14; 28:19, 20) Neʼe ina tuku mai te faʼifaʼitaki haohaoa, ʼo fai faka mafola ʼaki he lototoʼa pea neʼe fua lelei tana gāue. ʼE mahino ia, ʼe mole feala anai ke tatau te lelei ʼo te ʼu meʼa ʼaē ʼe tou fai ʼi te ʼu meʼa ʼaē neʼe ina fai. Kae neʼe tuku mai e te ʼapositolo ko Petelo te fakatuʼutuʼu ʼaenī kia tatou: “Koutou tāpuhā ʼi tokotou ʼu loto ia Kilisito ʼaē ko te ʼAliki, koutou nonofo teuteu tuʼumaʼu moʼo tali kia nātou ʼaē ʼe nātou fehuʼi atu te tupuʼaga ʼo takotou falala, kae koutou tali ʼaki he agamālū pea mo he fakaʼapaʼapa lahi.” (1 Petelo 3:15) Kapau ʼe koutou manatu ʼe mole koutou “nonofo teuteu tuʼumaʼu moʼo tali” ki te hahaʼi, ʼaua naʼa koutou lotovaivai. Koutou fai he ʼu fakatuʼutuʼu fakapotopoto ʼe tokoni atu anai kia koutou ke koutou aʼu māmālie ki te faʼahi ʼaia. Kapau ʼe koutou teuteu fakatomuʼa, pea ʼe feala ai anai ke koutou fetogi takotou ʼu fai palalau pea mo fakaʼaogaʼi he vaega e tahi peʼe lua. ʼE feala ke koutou fakatuʼutuʼu ke lahi age te ʼu tohi faka Tohi-Tapu ʼaē ʼe koutou tufa, ke lahi age te ʼu ʼaʼahi ʼaē ʼe koutou fai, peʼe ke koutou kamata he ako Tohi-Tapu. ʼE mole tonu pe ke faka maʼuhigaʼi te lahi ʼo te ʼu meʼa ʼaē ʼe koutou fai—ohage ko takotou ʼu hola, peʼe ko te ʼu tohi ʼaē ʼe koutou tufa, peʼe ko takotou ʼu ako—kae ʼe tonu ke maʼuhiga age te lelei ʼo takotou fai te ʼu meʼa ʼaia. Kapau ʼe tou fai he ʼu fakatuʼutuʼu fakapotopoto pea mo tou faiga ke tou fakahoko, pea ʼe tokoni anai te faʼahi ʼaia kia tatou ke tou fakaʼaogaʼi totatou temi ki te minisitelio. ʼE ko te meʼa ʼaia ʼaē ʼe loto kiai ia Sehova—ke tou tauhi kia te ia “ ʼaki he loto fiafia.”—Pesalemo 100:2; vakaʼi ia 2 Kolonito 9:7.
10. Koteā te ʼu gāue faka Kilisitiano ʼaē ʼe tonu ke tou fai, pea ʼe tokoni feafeaʼi te ʼu meʼa ʼaia kia tatou?
10 ʼE toe ʼi ai foki mo te ʼu gāue ʼe tou fai ʼi te kokelekasio ʼe lagaʼi ake tatou ia Kilisito. Ko te faʼahi ʼaē ʼe maʼuhiga tāfito, ʼe ko tatatou feʼofaniʼaki, heʼe ko te fakaʼiloga ʼaia ʼo te kau Kilisitiano moʼoni. (Soane 13:34, 35) ʼI te kei fai ʼo tatatou ako, tokolahi ia tatou neʼe tou ʼoʼofa kia ia ʼaē neʼe ina fai tatatou ako. Kae ʼi te temi nei, ʼe feala koa ke tou mulimuli ki te tokoni ʼo Paulo, ke tou “faka fālahi,” ʼo tou feʼiloʼiʼaki mo ʼihi ʼi te kokelekasio? (2 Kolonito 6:13) ʼE toe ʼaoga foki ki te kau tagata ʼāfea totatou ʼoʼofa pea mo totatou loto fakafetaʼi kia nātou. Kapau ʼe tou gāue tahi mo nātou, mo tou kumi pea mo tou tali tanatou ʼu tokoni faka Tohi-Tapu, ʼe tou fakamaʼamaʼa anai tanatou gāue kinakina. (Hepeleo 13:17) Tahi ʼaē meʼa, ʼe tokoni anai te faʼahi ʼaia ke tou lagaʼi ake tatou ia Kilisito.
11. Koteā te manatu fakapotopoto ʼaē ʼe tonu ke tou maʼu ʼo ʼuhiga mo te papitema?
11 Ko te papitema ʼe ko he lakaga fakafiafia! Kae ki muli age, ʼe mole tonu ke tou ʼamanaki ʼe tou fiafia tuʼumaʼu anai ʼi te ʼu lakaga fuli ʼo totatou maʼuli. Ko te faʼahi tāfito ʼo tatatou lagaʼi ake tatou ia Kilisito, ʼe ko hatatou “haʼele fakalelei ʼi te ala pe ʼaia.” (Filipe 3:16) ʼE mole faka ʼuhiga leva ke tou maʼu he faʼahiga maʼuli ʼe mole fakafiafia pea mo tou loto fītaʼa. Kae ʼe faka ʼuhiga ia ke tou haʼele fakahagatonu—ko tona faka ʼuhiga, ke tou maʼu he ʼu agamāhani lelei ʼi te faʼahi fakalaumālie pea mo tou taupau ʼi te temi fuli pe. Koutou manatuʼi, “ko ʼaē ka faʼa kātaki anai ʼo kaku ki te fakaʼosi, ʼe ko ia ia ʼaē ka maʼuli anai.”—Mateo 24:13.
ʼE Koutou ‘Tutuʼu Mālohi Koa ʼi Te Tui’?
12. Koteā tona faka ʼuhiga ke tou “tutuʼu mālohi ʼi te tui”?
12 ʼI tana tolu palalau ʼo ʼuhiga mo tatatou haʼele fakatahi mo Kilisito, ʼe uga tatou e Paulo ke tou “tutuʼu mālohi ʼi te tui.” ʼE tou lau fēnei te ʼu palalau ʼaia ʼi te tahi Tohi-Tapu, “ ʼiloʼi papau ʼo ʼuhiga mo te tui,” koteʼuhi ko te kupu faka Keleka ʼaē neʼe fakaʼaogaʼi e Paulo ʼe feala ke faka ʼuhiga ki he “fakamoʼoni, pea ʼe ko he meʼa ʼe mole feala ke toe fakafifihi.” ʼI te tuputupu ʼo tatatou ʼatamai mālama, ʼe tou maʼu ai te tahi ʼu fakamoʼoni, ko tatatou tui kia Sehova ʼAtua ʼe fakatafito lelei pea, ʼi tona fakahagatonu, ʼe fakatuʼu lelei. ʼE hoko ʼaki ai te tuputupu ʼo tatatou tutuʼu mālohi. ʼAki te temi, ʼe faigataʼa anai ki te mālama ʼa Satana ke ina fakavaivaiʼi tatou. ʼE tou manatuʼi ai te tokoni ʼa Paulo ke “tou haga faiga ki te ʼuhiga hahaʼi fakapotopoto.” (Hepeleo 6:1) Ko te fakapotopoto ʼe ʼalutahi mo te tuʼu mālohi.
13, 14. (a) ʼI te ʼuluaki sēkulō, koteā te ʼu meʼa ʼaē neʼe feala ke tuʼutāmaki ai te tuʼu mālohi ʼa te kau Kilisitiano ʼo Kolose? (b) Koteā ʼaē neʼe lagi tuʼaniaʼi e te ʼapositolo ko Paulo?
13 Neʼe hoko ki te kau Kilisitiano ʼo te ʼuluaki sēkulō ʼo Kolose, te ʼu meʼa neʼe feala ke lave kovi ki tanatou tutuʼu mālohi. Neʼe fakatokagaʼi fēnei e Paulo: “Koutou tokakaga, heʼe lagi feala ke ʼi ai he tahi ʼe ina toho anai koutou ki he hele, ʼaki te filosofia pea mo te ʼu kākā ʼaē ʼe vaʼiganoa, ʼo mulimuli ki te talatuku faka tagata, ʼo mulimuli ki te ʼu meʼa tāfito ʼo te malamanei, kae mole mulimuli kia Kilisito.” (Kolose 2:8) ʼO ʼuhiga mo te kau Kolose ʼaē neʼe kua liliu ko he hahaʼi ʼo “te puleʼaga ʼo te ʼAlo ʼo te ʼofa [ʼa te ʼAtua],” neʼe mole loto e Paulo ke toho nātou pea mo fakahēʼi nātou mai te ʼu tapuakina fakalaumālie ʼaē neʼe nātou maʼu. (Kolose 1:13) Koteā ʼaē neʼe feala ke ina fakahalaʼi nātou? ʼE fakahā e Paulo neʼe ko te “filosofia,” pea ʼe hā tuʼa tahi te kupu ʼaia ʼi te Tohi-Tapu. Neʼe talanoa koa ʼo ʼuhiga mo te ʼu tagata fai filosofia Keleka, ohage ko Platon mo Socrate? Logope la ko te ʼu tagata ʼaia neʼe feala ke fakatupu tuʼutāmaki ki te kau Kilisitiano moʼoni, kae ʼi te temi ʼaia, ko te kupu “filosofia” neʼe lahi tona faka ʼuhiga. ʼI te agamāhani, neʼe faka ʼuhiga ki te ʼatu kūtuga pea mo te ʼu akonaki kehekehe—māʼia mo te ʼu akonaki faka lotu. Ohage la, ko te kau Sutea ʼo te ʼuluaki sēkulō ko Josèphe pea mo Philon, neʼe nā fakahigoaʼi tanā lotu ko he filosofia—ke lahi ai te fia ʼiloʼi ʼa te hahaʼi.
14 Ko ʼihi ʼu filosofia ʼaē neʼe lagi tuʼaniaʼi e Paulo, neʼe ko he ʼu filosofia faka lotu. Ki muli age, ʼi te kapite pe ʼaia ʼo tona tohi ki te kau Kolose, neʼe ina ʼui fēnei kia nātou ʼaē neʼe faiakonaki, “ ʼAua naʼa [koutou] toʼo, peʼe [koutou] ʼahiʼahi, peʼe [koutou] fāfā kiai,” ʼo faka ʼuhiga ki te ʼu fakatuʼutuʼu ʼo te Lao Faka Moisese ʼaē neʼe fakagata ʼaki te mate ʼo Kilisito. (Loma 10:4) ʼO hilifaki ki te ʼu filosofia faka pagani, neʼe toe ʼi ai mo te tahi ʼu meʼa neʼe feala ke tuʼutāmaki ai te maʼuli fakalaumālie ʼo te kokelekasio. (Kolose 2:20-22) Neʼe fai e Paulo te fakatokaga ʼo ʼuhiga mo te filosofia ʼaē neʼe kau ki “te ʼu meʼa tāfito ʼo te mālama.” Ko te ʼu akonaki hala ʼaia ʼe haʼu mai te tagata.
15. ʼE lava feafeaʼi hatatou tekeʼi te ʼu manatu ʼaē ʼe mole fakatafito ki te Tohi-Tapu, ʼaē ʼe tautau hoko kia tatou?
15 Ko te faka maʼuhigaʼi ʼo he ʼu manatu fakatagata ʼe mole fakatafito ki te Folafola ʼa te ʼAtua, ʼe feala ke lave kovi ki te tuʼu mālohi ʼo he Kilisitiano. Mo tatou foki ia ʼaho nei, ʼe tonu ke tou tokakaga ki te ʼu meʼa ʼaia. Neʼe uga fēnei e te ʼapositolo ko Soane: “Kau ʼofaina, ʼaua naʼa koutou tui ki te folafola fuli ʼaē ʼe haʼu mai te laumālie, kae ke koutou ʼahiʼahiʼi te ʼu folafola ʼaē ʼe haʼu mai te laumālie ke koutou ʼiloʼi ai peʼe haʼu moʼoni mai te ʼAtua.” (1 Soane 4:1) Koia, kapau ʼe faiga e hakotou kaugā ako ke koutou manatu ko te mulimuli ki te ʼu lekula ʼo te Tohi-Tapu ʼe ko he meʼa kua ʼāfea ia, peʼe kapau ʼe faiga e takotou vāhaʼa fale ke koutou fia maʼu koloā, peʼe kapau ʼe uga koutou e hakotou kaugā gāue ʼaki he aga fakakākā ke mole koutou mulimuli ki takotou leʼo ʼo loto ʼaē neʼe akoʼi ʼaki te Tohi-Tapu, peʼe kapau ʼe fai e he Kilisitiano he ʼu valoki peʼe ko he ʼu palalau ʼe mole fakaloto mālohi ʼo ʼuhiga mo ʼihi ʼi te kokelekasio ʼo fakatafito ki tana ʼu manatu, pea ʼaua pe naʼa koutou tali te ʼu meʼa ʼaia. Koutou fakafisi ki te ʼu meʼa ʼaē ʼe mole ʼalutahi mo te Folafola ʼa te ʼAtua. Kapau ʼe tou fai te ʼu meʼa ʼaia, pea ʼe tou haga nonofo mālohi anai ʼi tatatou haʼele fakatahi mo Kilisito.
“ ʼO Koutou Fonu ʼi Te Tui ʼAki He Fakafetaʼi”
16. Koteā te fā puani ʼo te haʼele fakatahi mo Kilisito, pea koteā te fehuʼi ʼaē ʼe feala ke tou fai?
16 Ko te fā puani ʼo te haʼele fakatahi mo Kilisito ʼaē ʼe fakahā e Paulo, ʼe ko tatatou “fonu ʼi te tui ʼaki he fakafetaʼi.” (Kolose 2:7) Ko te kupu “fonu” ʼe ina fakamanatuʼi mai kia tatou te hake ʼo te vaitafe. Ko tona faka ʼuhiga kia tatou kau Kilisitiano, ke hoko atu tatatou fakafetaʼi peʼe ke liliu ko he meʼa ʼe tou fai māhani. ʼE feala ke tou fai fuli te fehuʼi ʼaenī: ‘ ʼE ʼau loto fakafetaʼi koa?’
17. (a) He koʼe ʼe feala ke tou ʼui ʼe lahi te ʼu meʼa ʼaē ʼe feala ke tou loto fakafetaʼi kiai, māʼiape la ʼi te ʼu temi faigataʼa? (b) Koteā te ʼu meʼa ʼofa ʼe foaki mai e Sehova, ʼe feala ke koutou loto fakafetaʼi tāfito kiai?
17 ʼE moʼoni, ʼe lahi te ʼu meʼa ʼe feala ke tou loto fakafetaʼi lahi ai kia Sehova ʼi te ʼaho fuli pe. Māʼia pe la mo te ʼu temi faigataʼa, ʼe lagi ʼi ai pe he ʼu kiʼi meʼa ʼe nātou fakafimālie ai tatou. Ko he agalelei ʼo hata kaumeʼa. ʼE fakaloto fīmālie kita e he tahi ʼe kita ʼofa ai. Ka kita moe lelei ʼi te pōʼuli, pea ʼe kita ʼala ake ʼaki he lotomālohi. Ko he meʼa kai lelei ʼe ina fakafimālieʼi takita pakupaku. Ko te tagi ʼa te manulele, mo te kata ʼo he kiʼi tamasiʼi, mo te lau ʼātea ʼo te lagi, pea mo he matagi fakamokomoko—te ʼu meʼa fuli ʼaia pea mo te tahi age ʼu meʼa ʼe hoko ʼi he ʼaho katoa. Kae ʼe faigafua hatatou mole tokagaʼi te ʼu meʼa ʼofa ʼaia. ʼE mole tonu koa la ke tou fakamālo ʼo ʼuhiga mo te ʼu meʼa ʼaia? ʼE foaki mai te ʼu meʼa fuli ʼaia e Sehova, te Matapuna ʼo “te meʼa ʼofa lelei fuli pea mo te mōlaga haohaoa fuli.” (Sake 1:17) Pea neʼe ina foaki mai he ʼu meʼa ʼofa ʼe lahi age ʼi te ʼu meʼa ʼaia—ohage la ko te maʼuli. (Pesalemo 36:9) Pea tahi ʼaē meʼa, neʼe ina foaki mai te faigamālie ʼaē ke tou maʼuli ʼo heʼegata. Ke feala hana foaki mai te meʼa ʼofa ʼaia, neʼe fai e Sehova te sakilifisio lahi ʼaupito, ʼi tana fekauʼi mai tona ʼAlo ʼulu tokotahi, “ia ia ʼaē neʼe ʼofa tāfito ki ai.”—Tāʼaga Lea 8:30; Soane 3:16.
18. ʼE lava feafeaʼi hatatou fakahā tatatou loto fakafetaʼi kia Sehova?
18 ʼE moʼoni te ʼu palalau ʼaenī ʼo te tagata fai pesalemo: “ ʼE ko he meʼa lelei te fai ʼo he ʼu fakafetaʼi kia Sehova.” (Pesalemo 92:1) ʼO toe feiā aipe, neʼe fakamanatuʼi fēnei e Paulo ki te kau Kilisitiano ʼo Tesalonika: “Ia meʼa fuli pe koutou fai he ʼu fakafetaʼi.” (1 Tesalonika 5:18; Efesi 5:20; Kolose 3:15) ʼE feala kia tatou takitokotahi, ke tou fakatotonu ke lahi age tatatou loto fakafetaʼi. ʼE mole tonu pe ke tou faikole ʼo kole ki te ʼAtua te meʼa ʼaē ʼe ʼaoga kia tatou. ʼE ko he meʼa lelei tatatou talanoa kiai ʼi tatatou ʼu faikole. Kae koutou fakakaukauʼi age muʼa mo kapau ko hakotou kaumeʼa ʼe hoki palalau atu pe mokā ʼe ʼaoga kia ia he meʼa! Koia, he koʼe koa ʼe mole koutou faikole kia Sehova moʼo fakafetaʼi kia te ia pea mo fakavikiviki kia te ia? ʼE leleiʼia moʼoni e Sehova te ʼu faikole ʼaia ʼi tana fakasiosio ki te mālama ʼaenī ʼaē ʼe mole loto fakafetaʼi! Ko te tahi fua lelei ʼo te ʼu faikole ʼaia, heʼe tokoni mai kia tatou ke tou sioʼi te ʼu ʼaluʼaga lelei ʼo te maʼuli, ʼo tou manatuʼi ai ʼe lahi tatatou ʼu tapuakina.
19. ʼE fakahā feafeaʼi e te ʼu palalau ʼa Paulo ia Kolose 2:6, 7, ʼe feala kia tatou fuli ke tou haga tuputupu ʼi tatatou haʼele fakatahi mo Kilisito?
19 ʼE mole fakaofoofo koa la te takitaki fakapotopoto ʼaē ʼe feala ke tou maʼu ʼi he vaega pe e tahi ʼo te Folafola ʼa te ʼAtua? Ko te tokoni ʼa Paulo ke tou haga haʼele fakatahi mo Kilisito, ʼe ko he meʼa ʼe tonu ke tou tokagaʼi e tatou takitokotahi. Tou fakatotonu ke tou ‘fakatauaka ia Kilisito,’ mo ‘lagaʼi ake tatou ia te ia,’ mo “tutuʼu mālohi ʼi te tui,” pea mo ‘fonu ʼi te fakafetaʼi.’ ʼE maʼuhiga tāfito te ʼu tokoni ʼaia kia nātou ʼaē neʼe hoki papitema. Kae ʼe toe ʼaoga kia tatou fuli. Koutou manatuʼi te tuputupu tuʼumaʼu ʼo te aka tāfito ʼo te fuʼu ʼakau pea mo te hakehake māmālie ʼo he laga falefata. Koia ʼe mole he temi ʼe gata ai tatatou haʼele mo Kilisito. ʼE lahi te ʼu faʼahi ʼe tonu ke tou tuputupu ai. ʼE tokoni mai anai ia Sehova kia tatou pea mo ina tapuakina anai tatou, koteʼuhi ʼe ina loto ke tou haga haʼele fakatahi mo ia pea mo tona ʼAlo ʼofaina ʼo talu ai.
ʼE Koutou Tali Feafeaʼi Anai?
◻ Koteā te ʼu meʼa ʼaē ʼe pipiki ki tatatou haʼele fakatahi mo Kilisito?
◻ Koteā te faka ʼuhiga ʼo tatatou ‘fakatauaka ia Kilisito’?
◻ ʼE lava feafeaʼi hatatou ‘lagaʼi ake tatou ia Kilisito’?
◻ He koʼe ʼe maʼuhiga ʼaupito ke tou “tutuʼu mālohi ʼi te tui”?
◻ He koʼe ʼe tonu ke tou ‘fonu ʼaki te fakafetaʼi’?
[Paki ʼo te pasina 10]
ʼE mole tou sio ki te ʼu aka ʼo te fuʼu ʼakau, kae ʼe nātou fafaga te fuʼu ʼakau pea mo nātou faka fealagia ke tuʼu mālohi