Ko Sehova ʼe Feala Ke Ina Fakamālohiʼi Koutou
“ ʼE ina foaki te mālohi ki ʼaē ʼe vaivai; pea ʼe ina fakalahi te mālohi katoa ki ʼaē ʼe mole hona mālohi.” —Isaia 40:29.
1, 2. Koteā he ʼu fakamoʼoni ʼe tou maʼu ʼo ʼuhiga mo te lahi ʼo te mālohi ʼo Sehova?
KO SEHOVA ʼe ko he ʼAtua ʼe “mālohi ʼaupito.” ʼE feala ke tou sisio ki he fakamoʼoni ʼo te “mālohi heʼegata pea mo te ʼuhiga ʼo te ʼAtua” ʼi te matalelei ʼaupito ʼo te ʼu meʼa fakakelekele ʼaē neʼe ina fakatupu. Ko nātou ʼaē ʼe mole nātou fia fakamoʼoni ki te faʼahiga fakamoʼoni ʼaia ki tona ʼuhiga Tupuʼaga ʼe mole honatou hāoʼaga.—Pesalemo 147:5; Loma 1:19, 20.
2 Ko te mālohi ʼo Sehova ʼe ʼāsili age tona ʼiloga lelei mai ʼaki te sivisivi loloto e te kau poto lalahi te ʼatulaulau, mo tona ʼu galaxies ʼaē ʼe mole feala hona lau ʼaē ʼe fālō ia kilometa ʼe lauʼi miliale. ʼI he po ʼe māhina, koutou haga ki te lagi pea mo koutou mamata peʼe mole koutou logoʼi te meʼa ʼaē neʼe logoʼi e te tagata fai pesalemo: “Ka ʼau mamata ki tau ʼu lagi, ʼaē ko te gāue ʼo tou ʼu tuhi, te māhina pea mo te ʼu fetuʼu ʼaē neʼe ke gaohi, koteā te ʼuhiga ʼo te tagata ʼaē ʼe tonu ke mate ʼi he ʼaho ke ke manatuʼi ia ia, pea mo te foha ʼo te tagata ʼaē neʼe toʼo mai te kele ke ke taupau lelei ia ia?” (Pesalemo 8:3, 4) ʼI tokaga lelei leva ʼa Sehova ki te tagata! Neʼe ina foaki ki te ʼuluaki tagata mo te ʼuluaki fafine he nofoʼaga matalelei ʼi te kele. Māʼiape la mo te kele neʼe ʼi ai te fealagia ʼaē—ke ina fakahomo te lauʼakau, ke ina foaki he meʼa kai ʼe ʼaoga, ko he meʼa kai ʼe mole ʼuli. Ko te tagata mo te manu ʼe nā toʼo tonā mālohi ʼi te faʼahi fakasino mai te mālohi ʼaia ʼo te ʼAtua ʼaē ʼe ʼiloga lelei.—Senesi 1:12; 4:12; 1 Samuele 28:22.
3. ʼO mole gata ʼaki pe te ʼu meʼa fakakelekele ʼo te ʼatulaulau, koteā he tahi age meʼa ʼe ina fakahā te mālohi ʼo te ʼAtua?
3 ʼO mole gata ʼaki pe te fakaofoofo ʼo te ʼu lagi pea mo te matalelei ʼo te lauʼakau ʼo toe feiā ki te ʼu manu ʼo te kele, ko te ʼu faʼahi ʼaia ʼe nātou toe fakahā lelei mai foki kia tatou te mālohi ʼo te ʼAtua. Neʼe tohi fēnei e te ʼapositolo ko Paulo: “Ko tona ʼu kalitate fakapulipuli ʼe ʼiloga kehe pe ia talu mai te fakatupu ʼo te malamanei, heʼe mahino kiai te ʼatamai ʼuhi ko te ʼu meʼa ʼaē neʼe faʼu, ʼio, tona mālohi heʼegata pea mo tona ʼuhiga ʼatua.” (Loma 1:20) Kae ʼe ʼi ai te tahi age fakamoʼoni ʼo tona mālohi ko he fakamoʼoni ʼe tau mo tatatou tokaga pea mo tatatou fakavikiviki. ʼE feala pe ke koutou feʼekeʼaki pe ‘Koteā ʼaē ʼe ina fakahā te mālohi ʼo te ʼAtua ʼo lahi age ʼi tona fakahā e te ʼatulaulau?’ ʼE ko Sesu Kilisito te tali ʼo te fehuʼi. ʼIo, ʼaki te takitaki ʼa te laumālie ʼe ʼui e te ʼapositolo ko Paulo ko Kilisito ʼaē neʼe tutuki ʼe “ko te mālohi ʼo te ʼAtua pea mo te poto ʼo te ʼAtua.” (1 Kolonito 1:24) ʼE feala pe ke koutou fai te fehuʼi ʼaenī ‘Koteā tona tupuʼaga? Pea ʼe koteā tona pikipikiga mo toku maʼuli ʼi te temi nei?’
Ko Te Mālohi Neʼe ʼIloga ʼAki Tona ʼAlo
4. Neʼe hā feafeaʼi te mālohi ʼo te ʼAtua ʼaki tona ʼAlo?
4 Ko te mālohi ʼo te ʼAtua neʼe ʼuluaki hā lelei mai ʼi te temi ʼaē neʼe ina fakatupu ai tona Foha ʼulu tokotahi, ʼo ina fakatupu ki tona paki. Ko te Foha fakalaumālie ʼaia neʼe kaugana kia Sehova ohage ko he “fafine gāue faiva” ʼaki tana fakaʼaogaʼi te mālohi ʼo te ʼAtua ʼaē neʼe lahi ʼaupito moʼo fakatupu ʼo te ʼatu meʼa fuli ʼaē. (Tāʼaga Lea 8:22, 30) Neʼe faitohi fēnei ia Paulo ki tona ʼu tēhina Kilisitiano ʼi Kolose: “ ʼAki ia ia neʼe fakatupu ai ia meʼa fuli ʼi te lagi pea mo te kele, te ʼu meʼa ʼaē ʼe hā mo te ʼu meʼa ʼaē ʼe fakapulipuli . . . Ko meʼa fuli neʼe fakatupu ʼaki ia ia pea maʼa ia.”—Kolose 1:15, 16.
5-7. (a) ʼI te temi kua hili, neʼe feafeaʼi te pipiki ʼo te hahaʼi ki te fakahā ʼo te mālohi ʼo te ʼAtua? (b) Koteā he tupuʼaga ke tou falala ai ko te mālohi ʼo te ʼAtua ʼe feala ke ʼiloga ʼi te kau Kilisitiano ʼi te temi nei?
5 ʼE tou kau ki te ‘ ʼu meʼa ʼaē neʼe fakatupu ʼi te kele.’ ʼE feala koa ki te mālohi ʼo te ʼAtua ke maʼu ia tatou tagata? ʼI te ʼu felogoi ʼa te ʼAtua mo te hahaʼi heʼe haohaoa, ʼi ʼihi temi ko Sehova neʼe ina foaki te mālohi makehe ki tana ʼu kaugana ke nātou fakahoko tana ʼu fakatuʼutuʼu. Neʼe ʼiloʼi e Moisese ko te maʼuli ʼo te hahaʼi heʼe haohaoa, ʼi te agamāhani, ʼe ko taʼu e 70 peʼe 80. (Pesalemo 90:10) Kae neʼe feafeaʼi ʼo ʼuhiga mo Moisese totonu? Neʼe maʼuli ia taʼu e 120, kae “ko tona mata neʼe mole fakapōʼuli ia, pea ko tona mālohi neʼe mole mavae ia.” (Teutalonome 34:7) Logope la ko te meʼa ʼaia ʼe mole ina faka ʼuhiga leva ko te ʼAtua ʼe ina faka fealagia ki tana ʼu kaugana takitokotahi ke nātou maʼuʼuli ʼo loaloaga feiā peʼe ke nātou taupau aipe te taʼi mālohi ʼaia, ʼe ko he fakamoʼoni ia ko Sehova ʼe feala pe ke ina fakamālohiʼi te tagata.
6 Ki muli mai, ʼe fakahā e te meʼa ʼaē neʼe fai e te ʼAtua ki te ʼohoana ʼo Apalahamo te fealagia ʼaē ke ina fakamālohiʼi te ʼu tagata pea mo te ʼu fafine. “Neʼe foaki age kia Sala te fealagia ʼaē ke ina fānauʼi he hāko, logope la tana kua fakalaka ʼi te taʼu ʼaē ʼe faka tuʼakoi ki te maʼu fānau, koteʼuhi neʼe falala ia kia ia ʼaē neʼe ina fai te fakapapau.” Kae koutou fakatokagaʼi pe neʼe feafeaʼi te haga ʼa te ʼAtua ʼo fakamālohiʼi te kau fai fakamāu pea mo ʼihi age ʼi Iselaele: “Ko Seteone, ko Palake, ko Samisoni, ko Sefeteo, ko Tavite ʼo toe feiā aipe kia Samuele pea mo te tahi age kau polofeta, ʼaē . . . mai he ʼaluʼaga vaivai neʼe fakaliliu ia nātou ke nātou mālolohi ʼaupito.”—Hepeleo 11:11, 32-34.
7 ʼE toe feala pe ke tou maʼu he mālohi feiā ia tatou. ʼIo, e lagi mole feala ke tou ʼamanaki ʼi te temi nei ki he hāko ʼe tupu faka milakulo, peʼe lagi mole feala anai ke tou maʼu te mālohi ohage ko Samisoni. Kae ohage ko te meʼa ʼaē neʼe talanoa kiai ia Paulo ʼo ʼuhiga mo te hahaʼi fuli pe ʼo Kolose, ʼe feala ke tou mālolohi. ʼE mahino papau ia, neʼe faitohi ia Paulo ki ni ʼu tagata, mo ni ʼu fafine, pea mo ni tamaliki, ohage ko nātou ʼaē ʼe tou maʼu ʼi te ʼu kokelekasio ʼi te temi nei, pea neʼe ina ʼui ko nātou neʼe “fakamālohiʼi nātou ʼaki te mālohi katoa.”—Kolose 1:11.
8, 9. ʼI te ʼuluaki sēkulō, neʼe feafeaʼi te ʼiloga lelei ʼo te mālohi ʼo te ʼAtua ʼaki ni ʼu hahaʼi neʼe hage ko tatou?
8 Lolotoga te minisitelio fakakelekele ʼo Sesu, neʼe fakahā fakalelei e Sehova ko tona mālohi neʼe lolotoga gāue ʼaki tona ʼAlo. Ohage la, ʼi te moʼi temi neʼe maʼopoʼopo age te tokolahi kia Sesu ʼi Kapenaume, “neʼe ia te ia te mālohi ʼo Sehova ke ina fai ai he ʼu fakamālōlō.”—Luka 5:17.
9 ʼI te hili pe ʼaē ʼo tona fakatuʼuake, neʼe fakaloto mālohiʼi e Sesu tana kau tisipulo ʼi tana ʼui age ʼaē ʼe nātou ‘maʼu anai te mālohi mokā hifo age anai te laumālie maʼoniʼoni kia nātou.’ (Gāue 1:8) Neʼe moʼoni te faʼahi ʼaia! ʼE fakamatala e te tagata fai hisitolia ʼi te hili pe ʼaia ʼo kiʼi ʼaho ki te Penikosite ʼo te taʼu 33 ʼo totatou temi: “ ʼAki he mālohi ʼe lahi ʼaupito ko te kau ʼapositolo neʼe nātou haga fai aipe te fakamoʼoni ʼo ʼuhiga mo te fakatuʼuake ʼo te ʼAliki ko Sesu.” (Gāue 4:33) Ko Paulo totonu neʼe ko he tahi neʼe fakamālohiʼi ki te gāue ʼaē neʼe hinoʼi age e te ʼAtua ke ina fai. ʼI te hili ʼaē ʼo tana liliu ko he Kilisitiano pea mo te toe fealagia ʼaē ki ai ke sio, neʼe “ ʼāsili age pe te mālohi ʼaē neʼe ina maʼu pea neʼe mole kei ʼiloʼi e te kau Sutea he meʼa ke nātou ʼui age ʼaki tana fakamahino fakapotopoto age ʼaē kia nātou ko ia ʼaia ʼe ko Kilisito.”—Gāue 9:22.
10. Neʼe feafeaʼi te ʼaoga ʼo te mālohi ʼo te ʼAtua kia Paulo?
10 ʼI tatatou fakatokagaʼi te mālohi ʼi te faʼahi fakalaumālie pea mo te mālohi ʼi te faʼahi ʼo te fakakaukau ʼaē neʼe tonu ke ina maʼu moʼo fakahoko te ʼu folau faka misionea e tolu ʼo fagona ʼi te ʼu kilometa ʼe lauʼi afe, ʼe mahino papau ia neʼe ʼaoga ʼaupito kia Paulo he mālohi ʼe fakalaka ʼi te mālohi māhani. Neʼe felāveʼi foki mo te tuʼuga ʼahiʼahi kehekehe, ʼo ina ʼutaki te pilisoni ʼo tau mo te mamahi. Neʼe lava feafeaʼi ke ina fai te meʼa ʼaia? Neʼe fēnei tana tali: “Neʼe tuʼu ōvi ia te ʼau te ʼAliki, ʼo ina fakafonu ʼau ʼaki te mālohi, ke feala ʼaki ia ʼau, ke katoa te fakahoko ʼo te gāue faka mafola.”—2 Timoteo 4:6-8, 17; 2 Kolonito 11:23-27.
11. ʼO ʼuhiga mo te mālohi ʼo te ʼAtua, koteā te ʼamanaki neʼe talanoa kiai Paulo ʼo ʼuhiga mo tona ʼu kaugā kaugana ʼaē ʼi Kolose?
11 Koia ʼe mole fakapuna’maʼuli ʼi te temi ʼaē neʼe faitohi ai Paulo ki tona “ ʼu tēhina ʼaē ʼe tahi mo Kilisito” ʼi Kolose, neʼe ina fakamoʼoni age kia nātou ʼe feala honatou “fakamālohiʼi ʼaki te mālohi katoa ʼi te fakafuafua ʼo te mālohi ʼaē tau mo te kolōlia [ʼo Sehova] ke feala ai ke katoa tanatou ʼutaki pea ke nātou faʼa kātaki aipe ʼaki he loto fiafia.” (Kolose 1:2, 11) Logope la ko te ʼu palalau ʼaia, neʼe ʼuluaki faka ʼuhiga ki te kau Kilisitiano fakanofo, ko nātou fuli ʼaē ʼe nātou muliʼi te ala ʼo Kilisito ʼe feala ke ʼaoga ʼaupito kia nātou te meʼa ʼaē neʼe tohi e Paulo.
Neʼe Fakamālohiʼi ʼi Kolose
12, 13. Neʼe koteā te ʼaluʼaga ʼi te temi ʼaē neʼe fai ai te tohi ki te kau Kolose, pea neʼe koteā te tali neʼe fai age kiai?
12 Ko te kokelekasio ʼo Kolose, ʼaē neʼe tuʼu ʼi te polovasia Loma ʼo Asia, ʼe mahino ia neʼe faʼufaʼu te kokelekasio ʼaia ʼaki te fai faka mafola ʼa te Kilisitiano agatonu ʼaē neʼe higoa ko Epaphras. ʼE ʼui ʼi te temi ʼaē neʼe fagono ai ki te pilisoniʼi ʼo Paulo ʼi Loma ʼi te taʼu 58 ʼo totatou temi, neʼe fakatotonu e Epaphras ke ʼalu ʼo ʼaʼahi te ʼapositolo pea mo fakaloto mālohiʼi ia ia ʼaki he fakamatala lelei ʼo ʼuhiga mo te ʼofa pea mo te lotomālohi ʼo tona ʼu tēhina ʼi Kolose. Neʼe lagi toe fai e Epaphras he fakamatala totonu ʼo ʼuhiga mo te ʼu fihifihia ʼaē neʼe hoko ʼi te kokelekasio ʼo Kolose, ʼaia neʼe ʼaoga ke fakatonutonuʼi. ʼI tona tahi age faʼahi, neʼe logoʼi e Paulo neʼe tonu ke ina fai he tohi moʼo fakaloto mālohiʼi pea mo tokoniʼi. Mo koutou pe la, ʼe feala ke koutou maʼu he fakaloto mālohi ʼi te kapite 1 ʼo te tohi ʼaia, koteʼuhi ʼe ina fakahā lelei peʼe lava feafeaʼi kia Sehova hana fakamālohiʼi tana ʼu kaugana.
13 ʼE feala pe ke koutou fakakaukauʼi pe neʼe feafeaʼi te loto ʼo te ʼu tēhina mo tuagaʼane ʼi te temi ʼaē neʼe ʼui age ai e Paulo kia nātou ʼi tana tohi ko nātou “ko te ʼu tēhina agatonu ʼe nātou tahi mo Kilisito.” Neʼe tau mo nātou ke vikiʼi ʼuhi ko tanatou ‘ ʼofa ʼaē ki te kau maʼoniʼoni fuli’ pea ʼuhi ko tanatou ‘fakahā lelei te fua ʼo te logo lelei ʼo te puleʼaga’ talu mai te temi ʼaē neʼe nātou liliu ai ko ni ʼu Kilisitiano! ʼE feala koa ke toe ʼui feiā ʼo ʼuhiga mo totatou ʼu kokelekasio, pea mo tatou takitokotahi?—Kolose 1:2-8.
14. Neʼe koteā te loto ʼo Paulo ʼo ʼuhiga mo te kau Kolose?
14 Neʼe malave mālohi ki te ʼapositolo ko Paulo te fakamatala ʼaē neʼe ina maʼu koia la ʼaē neʼe ina ʼui ki te kau Kolose neʼe haga faikole aipe maʼa nātou mo ina kole ke nātou “fonu ʼi te mālama totonu ʼo ʼuhiga mo te finegalo ʼa te [ʼAtua] ʼi te poto pea mo te ʼatamai fakalaumālie katoa, ke feala ai hanatou haʼele ʼo leleiʼia nātou e Sehova.” Neʼe faikole ke nātou “fakahā he fua lelei ʼaki te gāue lelei fuli pe pea ke nātou tuputupu ʼi te faʼahi ʼo te ʼatamai mālama totonu ʼo ʼuhiga mo te ʼAtua, ʼo fakamālohiʼi nātou ʼaki te mālohi katoa ʼi te fakafuafua ʼo tona mālohi ʼaē tau mo te kolōlia ke feala ai ke katoa tanatou ʼutaki pea ke nātou faʼa kātaki fualoa aipe ʼaki he loto fiafia.”—Kolose 1:9-11.
Ko He Fakaloto Mālohi ʼi Te Temi Nei
15. ʼE lava feafeaʼi ke tou fakahā te aga ʼaē neʼe ʼiloga ʼi te meʼa ʼaē neʼe tohi e Paulo ki te kau Kolose?
15 ʼI faʼifaʼitaki lelei foki neʼe tuku mai e te ʼapositolo ko Paulo kia tatou! Ko ʼotatou ʼu tēhina ʼi te kele katoa ʼe ʼaoga kia nātou tatatou ʼu faikole ke feala ai hanatou faʼa kātaki pea mo taupau aipe tanatou fiafia logope la tonatou ʼu mamahi. Ohage ko Paulo, ʼe tonu ke tou fakakeheʼi ʼi tatatou ʼu faikole mo kapau ʼe tou maʼu ni ʼu logo ko ʼotatou ʼu tēhina ʼi he tahi age ʼu kokelekasio peʼe ʼi he tahi age ʼu fenua ʼe nātou tau mo ni ʼu faigataʼaʼia. E lagi feala pe ko he kokelekasio ʼe tau mo he tuʼutāmaki ʼi te ʼu tuʼutāmaki ʼaē ʼe hoko ki te kele peʼe ko he ʼu faigataʼaʼia ʼi te faʼahi fakalaumālie. Peʼe feala pe ko he kau Kilisitiano ʼe nātou nofo ʼutaki ʼi he fenua ʼe mamahi ʼuhi ko te tau faka sivile peʼe ko te fematehiʼaki ʼa ni ʼu telepi. ʼI te faikole ʼe tonu ke tou kole ki te ʼAtua ke tokoni ki ʼotatou ʼu tēhina “ke tau tanatou haʼele mo Sehova,” ke nātou haga fakahā aipe te fua lelei ʼo te Puleʼaga lolotoga tanatou nofo ʼutaki, pea ke nātou tuputupu ʼi te mālama. ʼI te faʼahi ʼaia ko te ʼu kaugana ʼa te ʼAtua ʼe nātou maʼu te mālohi ʼo tona laumālie “ ʼi tonatou fakamālohiʼi ʼaki te mālohi katoa.” Ke mahino lelei kia koutou ko takotou Tāmai ʼe fagono anai pea mo tali atu anai kia koutou.—1 Soane 5:14, 15.
16, 17. (a) ʼI te meʼa ʼaē neʼe tohi e Paulo, koteā he ʼu meʼa ʼe tonu ke tou fakafetaʼi kiai? (b) Neʼe feafeaʼi te fakahāo ʼo te hahaʼi ʼa te ʼAtua pea mo te fakamolemoleʼi ʼo nātou?
16 Neʼe faitohi ia Paulo ki te kau Kolose neʼe tonu ke nātou ‘fakafetaʼi ki te Tāmai ʼaē neʼe ina fakaliliu ia nātou, ke tau mo nātou te kau ʼaē ki te tōfiga ʼo te kau maʼoniʼoni ʼi te mālama.’ Ke tou fakafetaʼi mo tatou, ki tatatou Tāmai ʼe ʼi selo ʼuhi ko totatou tuʼulaga ʼi tana fakatuʼutuʼu, peʼe ko te faʼahi faka selo ʼo tona Puleʼaga peʼe ko tona faʼahi fakakelekele. Neʼe feafeaʼi te fakaliliu e te ʼAtua te ʼu hahaʼi agahala ke nātou matalelei ʼi tana manatu? Neʼe fēnei te faitohi ʼa Paulo ki tona ʼu tēhina fakanofo: “Neʼe ina faka ʼāteaina tatou mai te pule ʼa te fakapōʼuli pea mo ina hiki ia tatou ki te puleʼaga ʼo te ʼAlo ʼo tona ʼofa, ʼaki ia ia ʼe tou maʼu totatou ʼāteaina ʼaki te totogi, te fakamolemole ʼo ʼatatou ʼu agahala.”—Kolose 1:12-14.
17 Tatau aipe pe koteā hatatou ʼamanaki, peʼe ko te kele peʼe ko te lagi, ʼe tou fakafetaʼi ki te ʼAtua ʼi te ʼaho fuli pe ʼuhi ko totatou fakahāo mai te tuʼu agakovi ʼaenī ʼo te fakapōʼuli ʼaē neʼe hoko ʼaki tatatou tui ki te sakilifisio faitotogi maʼuhiga ʼaē neʼe foaki e Sehova ʼaki tona ʼAlo ʼofaina. (Mateo 20:28) Ko te kau Kilisitiano ʼaē neʼe fakanofo ʼaki te laumālie neʼe nātou maʼu te ʼu fua lelei mai te totogi ʼaē ʼe ʼi ai tona faka ʼuhiga makehe kia nātou ke feala ai honatou ‘hiki ki te puleʼaga ʼo te ʼAlo ʼo te ʼofa ʼo te ʼAtua.’ (Luka 22:20, 29, 30) Kae ko te “tahi ʼu ōvi” ʼe nātou toe maʼu pe foki mo nātou te lelei ʼo te totogi ʼo māʼiape la ʼi te temi nei. (Soane 10:16) ʼE feala ke nātou maʼu te fakamolemole ʼa te ʼAtua ke feala ai hanatou maʼu he tuʼulaga agatonu ʼi ʼona muʼa ohage ko hona ʼu kaumeʼa. ʼE lahi ʼaupito tanatou lagolago ki te kalagaʼi ʼo “te logo lelei ʼaia ʼo te Puleʼaga” ʼi te temi fakaʼosi ʼaenī. (Mateo 24:14) ʼO hilifaki ki te meʼa ʼaia, ʼe nātou maʼu te ʼamanaki taulekaleka ʼaupito ʼaē ko tanatou liliu anai ʼo faitotonu ʼaupito pea mo haohaoa ʼi te faʼahi fakasino, ʼi te hili ʼaē ʼo te Pule ia Taʼu e Afe ʼa Kilisito. ʼI takotou lau te fakamatala ʼaē ʼe tuʼu ʼi te tohi ʼo te Fakahā 7:13-17, koutou vakaʼi peʼe mole koutou ʼio koa ko te ʼu ʼaluʼaga ʼaē ʼe fakamatala ʼi ai ʼe ko he ʼu fakamoʼoni anai ʼo te kua hāofaki pea mo tonatou kua tapuakina.
18. Ko te fakatahitahi fea ʼaē ʼe tuʼu ia Kolose, ʼaē ʼe kei lolotoga fakahoko e te ʼAtua?
18 Ko te tohi ʼa Paulo ʼe tokoni mai kia tatou ke tou fakafuafua totatou maʼua ʼaē ki te tagata ʼaē ʼe lahi tokotahi ʼaē neʼe heʼeki maʼu ʼi te kele. Koteā te meʼa neʼe lolotoga fakahoko e te ʼAtua ʼaki ia Kilisito? “[Neʼe ko te] toe fakatahiʼi age kia te ia ia te ʼu meʼa fuli ʼaē ʼo ina fakahoko te tokalelei ʼaki te taʼataʼa ʼaē neʼe ina liligi ʼi te pou fakamamahi, ʼo mole ina lauʼia peʼe ko te ʼu meʼa ʼo te lagi peʼe ko te ʼu meʼa ʼo te kele.” Ko te fakatuʼutuʼu ʼa te ʼAtua ʼe ko te toe faigaʼi ke ʼalutahi katoa te fakatupu fuli mo ia, ohage ko te temi ki muʼa atu ʼo te talagataʼa ʼi Eteni. Ko Ia ʼaē neʼe fakaʼaogaʼi moʼo fakatupu ʼo meʼa fuli, ʼe ko Ia pe ʼaia, ʼaē ʼe toe fakaʼaogaʼi ʼi te temi nei moʼo fakahoko ʼo te fakatahitahi ʼaia.—Kolose 1:20.
Koteā Te Tupuʼaga ʼo Te Fakaloto Mālohiʼi?
19, 20. Ko totatou maʼoniʼoni pea mo totatou haohaoa ʼe fakalogo kiteā?
19 Ko tatou ʼaē kua tou toe fakatahi mo te ʼAtua ʼe ʼi ai totatou ʼu maʼua. ʼI muʼa atu neʼe tou agahala pea mo tou mamaʼo mai te ʼAtua. Kae ʼi te temi nei, ʼaki tatatou tui ki te sakilifisio ʼa Sesu pea mo totatou ʼu ʼatamai ʼaē ʼe mole kei haga ki te ʼu gāue ʼaē ʼe kovi, ʼe tou maʼuʼuli ʼi he ʼaluʼaga “maʼoniʼoni pea mo haohaoa, ʼo hala ʼi he fakakovi ʼi muʼa ʼo te [ʼAtua].” (Kolose 1:21, 22) Koutou fakakaukauʼi age muʼa, ohage pe neʼe ko te mole ufiufi ʼa te ʼAtua ki te kau fakamoʼoni agatonu ʼaia ʼo te ʼu temi ʼāfea, ʼe mole toe ufiufi ʼo ʼuhiga mo tatou, ke tou fetapā ia te ia ko totatou ʼAtua. (Hepeleo 11:16) ʼI te temi nei, ʼe mole ʼi ai he tahi ʼe feala ke ina fakakoviʼi tatou ʼe hala tatatou fua tona huafa māʼoluga, peʼe tou matataku ʼi te fakahā ʼo te huafa ʼaia ki te ʼu potu taupotu ʼo te kele!
20 Kae koutou fakatokagaʼi ko Paulo neʼe ina hoko atu ʼo fēnei ia Kolose 1:23: “Kehe pe foki, ke koutou nonofo ʼi te tui, ʼo tutuʼu lelei ʼi te tafitoʼaga pea mo mālolohi pea mo ʼaua naʼa koutou mavae kehe ʼi te logo lelei ʼaē neʼe koutou fagono kiai, ʼaē neʼe faka mafola ʼi te ʼu meʼa katoa ʼaē neʼe fakatupu ʼaē ʼe ʼi te lalo lagi.” Koia la ʼaē ko te faʼahi maʼuhiga, ʼe fakalogo ki tatatou nofo agatonu kia Sehova, ʼo muliʼi te ʼu fakaʼiloga ʼo te ala ʼo tona ʼAlo. Neʼe lahi ʼaupito te ʼu meʼa neʼe fai e Sehova mo Sesu maʼa tatou! ʼOfa pe ke tou fakahā totatou ʼofa kia nāua ʼaki te muliʼi ʼo te tokoni ʼa Paulo.
21. He koʼe ʼe ʼi ai he tupuʼaga lahi ke tou punamaʼuli ai ʼi te temi nei?
21 Ko te kau Kilisitiano ʼo Kolose ʼe mahino ia, neʼe nātou punamaʼuli ʼi tanatou fagono ʼaē ‘ko te logo lelei ʼaē neʼe nātou fagono kiai’ kua “faka mafola ʼi te ʼu meʼa katoa ʼaē neʼe fakatupu ʼaē ʼe ʼi te lalo lagi.” ʼI te temi nei ʼe lahi age te fiafia ʼaki te fagono ʼaē ki te potu kua aʼu kiai te faka mafola ʼo te logo lelei ʼo te Puleʼaga e te kau Fakamoʼoni ʼaē kua laka ʼi te toko fā vaelua miliona ʼi te ʼu fenua e 230 tupu. ʼI te ʼu taʼu fuli pe ʼe teitei pe ko te toko 300 000 mai te ʼatu fenua kehekehe ʼe nātou liliu ʼo fakatahi lelei ki te ʼAtua!—Mateo 24:14; 28:19, 20.
22. Tatau aipe peʼe tou tau mo ni ʼu mamahi, koteā te meʼa ʼaē ʼe feala ke fai e te ʼAtua maʼa tatou?
22 Logope la ko Paulo, ʼe mahino ia, neʼe nofo ia ʼi te pilisoni ʼi te temi ʼaē neʼe ina fai ai te tohi ki te kau Kolose, neʼe mole ʼi ai he faʼahi neʼe lāuga ai ʼuhi ko tona pilisoniʼi. Kae, neʼe ina ʼui fēnei: “ ʼE ʼau fiafia nei ʼi taku mamahi ʼuhi ko koutou.” Neʼe ʼiloʼi e Paulo pe neʼe koteā te faka ʼuhiga ʼo te “ ʼutaki katoa pea mo te faʼa kātaki ʼaki he loto fiafia.” (Kolose 1:11, 24) Kae neʼe ina toe ʼiloʼi pe foki neʼe mole ina lavaʼi te meʼa ʼaia ʼaki pe tona mālohi. Ko Sehova ʼaē neʼe ina fakamālohiʼi ia ia! ʼE toe feiā aipe ia ʼaho nei. Ko te toko lauʼi afe Fakamoʼoni neʼe pilisoniʼi pea mo fakatagaʼi neʼe mole puli tanatou fiafia ʼi te kaugana ʼaē kia Sehova. Kae, neʼe nātou mahino lelei leva pea mo nātou leleiʼia te moʼoni ʼaupito ʼaē ʼo te ʼu palalau ʼa te ʼAtua ʼaē ʼe tuʼu ia Isaia 40:29-31: “ ʼE ina foaki te mālohi ki ʼaē ʼe vaivai . . . pea ko nātou ʼaē ʼe falala kia Sehova ʼe nātou toe mālolohi anai.”
23, 24. Koteā te misitelio tapu ʼaē ʼe talanoa kiai ia Kolose 1:26?
23 Ko te minisitelio ʼo te logo lelei ʼo te Puleʼaga ʼe talanoa tāfito kia Kilisito ʼo hā ʼaki mai neʼe ko he faʼahi maʼuhiga ʼaupito kia Paulo. Neʼe loto ia ke leleiʼia e nātou ʼaē, te maʼuhiga ʼo te tuʼulaga ʼo Sesu ʼi te fakatuʼutuʼu ʼa te ʼAtua, koia neʼe talanoa ai ki te meʼa ʼaia ohage ko he “misitelio tapu ʼaē neʼe fufū talu mai te ʼu tuʼu ʼāfea ʼo te ʼu faʼahiga meʼa pea mo te ʼu taʼiake ʼo te temi kua hili.” Kae neʼe mole tonu ke liliu ko he meʼa fakalilolilo ʼo talu ai. Neʼe toe hoko fēnei e Paulo: “ ʼI te temi nei kua hā ia ki tana kau maʼoniʼoni.” (Kolose 1:26) ʼI te temi ʼaē neʼe hoko ai te agatuʼu ʼi Eteni, neʼe foaki e Sehova te fakapapau ʼo ʼuhiga mo ni ʼu meʼa ʼe lelei age ʼe hoko anai, ʼo ina fakakikite ‘ko te hāko ʼo te fafine ʼe ina fakavolu anai te ʼulu ʼo te gata.’ (Senesi 3:15) Neʼe koteā te faka ʼuhiga ʼo te meʼa ʼaia? Lolotoga he ʼu taʼiake, lolotoga he ʼu sēkulō, ko te meʼa ʼaia neʼe ko he misitelio ia. Hili ʼaia pea neʼe haʼu leva ia Sesu, pea neʼe ina “faka mālamagia te maʼuli pea mo te heʼe popo ʼaki te logo lelei.”—2 Timoteo 1:10.
24 ʼIo, ko te “misitelio tapu” ʼe faka ʼuhiga tāfito kia Kilisito pea mo te Puleʼaga faka Mesianike. Neʼe talanoa Paulo ki “te ʼu meʼa ʼi te lagi,” ʼo faka ʼuhiga kia nātou ʼaē ʼe kau anai ki te pule ʼa te Puleʼaga pea mo Kilisito. ʼE fakaʼaogaʼi anai ia nātou ʼaia moʼo ʼaumai ʼo he ʼu tapuakina lahi ʼaupito ki te “ ʼu meʼa [fuli] ʼo te kele,” ia nātou ʼaē ʼe nātou maʼu anai te palatiso heʼegata ʼi ai. Koia, ʼe koutou sisio ai anai ki te tau mo feʼauga ʼo te talanoa ʼa Paulo ki “te ʼu koloā faka kolōlia ʼo te misitelio tapu ʼaia.”—Kolose 1:20, 27.
25. Ohage ko tona fakatuʼu ia Kolose 1:29, ʼe tonu anai ke feafeaʼi tatatou aga ʼi te temi nei?
25 Neʼe sio fakatomuʼa ia Paulo ki tona tuʼulaga ʼi te Puleʼaga. Kae neʼe mahino ia ki ai neʼe mole ko he meʼa ia neʼe feala ke hoʼi fakatalitali noa pe kiai kae mole ina fai hina meʼa. “ ʼE ʼau gāue kinakina, ʼo ʼau faiga ʼo mulimuli pe ki tana gāue ʼaē ʼe gāue ʼaki te mālohi ia te ʼau.” (Kolose 1:29) Koutou fakatokagaʼi ko Sehova, ʼaki ia Kilisito, neʼe ina fakaliliu ia Paulo ke mālohi ke feala ai hana fakahoko te minisitelio ʼaē ʼe ina hāofaki te maʼuli. Ko Sehova ʼe feala pe ke ina toe fakahoko te meʼa ʼaia kia tatou ʼi te temi nei. Kae ʼe tonu ke tou fai te fehuʼi ʼaenī kia tatou, ‘ ʼE kei ʼau maʼu koa te faʼahiga manatu ʼo ʼuhiga mo te fai faka mafola ʼaē neʼe ia te ʼau ʼi te temi ʼaē neʼe ʼau ʼuluaki ako ai te moʼoni?’ Koteā takotou tali? Koteā ʼaē ʼe feala ke tokoni kia tatou takitokotahi ke tou haga ‘gāue kinakina pea mo faiga ʼo mulimuli pe ki te gāue ʼo te mālohi ʼo te ʼAtua kia tatou’? Ko te alatike ʼaē ka hoa mai ʼe talanoa anai ki te faʼahi maʼuhiga ʼaia.
Neʼe Koutou Tāʼofi Maʼu Koa?
◻ He koʼe ʼe feala ke tou ʼiloʼi papau ko Sehova ʼe feala ke ina fakahā tona mālohi maʼa te hahaʼi?
◻ Neʼe koteā te ʼaluʼaga ʼi te temi ʼaē neʼe fai ai te ʼu palalau ʼa Paulo ʼi te kapite 1 ʼo Kolose?
◻ E feafeaʼi te fakahoko e te ʼAtua te fakatahitahi ʼaē neʼe talanoa kiai Kolose 1:20?
◻ ʼAki tona mālohi, Koteā ʼaē ʼe feala ke fai e Sehova ʼaki ia tatou?