Ko Sehova​—⁠ʼE Lahi Tona Mālohi

“ ʼI te lahi ʼo te mālohi, heʼe toe mālohi foki ia ʼi tona māfimāfi, ʼe mole puli he tahi ia nātou.”​—⁠Isaia 40⁠:⁠26.

1, 2. (a) Koteā te mālohi ʼaē ʼe fakalogo kiai totatou maʼuli? (b) Koutou fakamahino pe koʼe ʼe ko Sehova te Matapuna tāfito ʼo te mālohi fuli.

KO TE tokolahi ia tatou, kua lagi tou māhani ki te hila. Ohage la ʼe mole tou tokagaʼi pe la te hila ʼaē ʼe ina faka haʼele te mataʼi hila, pea mo te ʼu masini fakamāfana, pea mo te tahi ʼu masini. Ka tuʼusi te hila pea hoki tou manatuʼi ai tona maʼuhiga, pea ʼe mahino ai kia tatou ʼe mole toe haʼele lelei anai te ʼu kolo mo kapau ʼe mole haʼele te hila. Ko te faʼu ʼo te hila ʼe fakalogo ki te matapuna tāfito ʼo te mālohi ʼo te kele​—⁠te laʼā.a ʼI te sekonita fuli, ko te laʼā ʼaē ʼe hage ko he masini ʼe ina faʼu te mālohi faka nukeleʼea, ʼe ina fakaʼaogaʼi ia tane e nima miliona ʼo te carburant faka nukeleʼea moʼo foaki ki te kele te mālohi ʼaē ʼe ʼaoga ki te maʼuli.

² ʼE haʼu maifea te mālohi ʼo te laʼā? Ko ai ʼaē neʼe ina faʼu te fale hila ʼaia ʼo te lagi? Ko Sehova ʼAtua. ʼE talanoa kia te ia te Pesalemo 74⁠:16 ʼo ina ʼui fēnei: “ ʼE ko koe ʼaē neʼe ke teuteuʼi te meʼa fakamālama, ei te laʼā.” Ei, ko Sehova te Matapuna tāfito ʼo te mālohi fuli, pea ʼe ko te Matapuna ʼo te ʼu meʼa maʼuli fuli. (Pesalemo 36⁠:⁠9) ʼE mole tonu ke tou ʼui neʼe haʼu feiā pe te mālohi ʼaia. ʼAki te polofeta ko Isaia, ʼe fakamanatuʼi mai e Sehova ke tou mamata ki te ʼu meʼa ʼo te lagi, ohage ko te laʼā pea mo te ʼu fetuʼu, pea ke tou metitasioʼi pe neʼe nātou tupu feafeaʼi. “Hiki ʼokotou ʼu mata ki ʼoluga pea koutou sio. Ko ai koa ʼaē neʼe ina fakatupu te ʼu meʼa ʼaia? Ko Ia ʼaē neʼe ina fakaʼasi mai ki tuʼa ʼonatou kautau ʼo fai pe ki tona tokolahi, pea ina pāui fuli nātou ʼi ʼonatou higoa. ʼI te lahi ʼo te mālohi, heʼe mālohi foki ʼi tona māfimāfi, ʼe mole puli he tahi ia nātou.”​—⁠Isaia 40⁠:26; Selemia 32⁠:⁠17.

3. Koteā te ʼu fua lelei ʼaē ʼe tou maʼu ʼaki te ʼu fakahāhā ʼo te mālohi ʼo Sehova?

³ Mai tona ʼuhiga ʼaē ʼe lahi ʼaupito te mālohi ʼo Sehova, koia ʼe tou lava falala ai ko te laʼā ʼe ina haga foaki mai anai te mālama pea mo te māfana ʼaē ʼe ʼaoga ki totatou maʼuli. Kae ʼe mole ko totatou maʼuli fakasino pe ʼaē ʼe fakalogo ki te mālohi ʼo te ʼAtua. Ko totatou totogi mai te agahala pea mo te mate, mo tatatou ʼamanaki ki te ka haʼu pea mo tatatou falala kia Sehova, ʼe toe fakalogo foki ki tana fakaʼaogaʼi tona mālohi. (Pesalemo 28:​6-9; Isaia 50⁠:⁠2) ʼE lahi te ʼu faʼifaʼitaki ʼi te Tohi-Tapu ʼe nātou fakamoʼoni ki te mālohi ʼo Sehova moʼo fakatupu pea mo toe totogi, moʼo hāofaki tana hahaʼi pea mo fakaʼauha tona ʼu fili.

Ko Te Mālohi ʼo Te ʼAtua ʼe Hā Lelei ʼi Te ʼu Meʼa ʼAē Neʼe Fakatupu

4. (a) Neʼe malave feafeaʼi kia Tavite te ʼu meʼa ʼaē neʼe ina sioʼi ʼi te lagi? (b) Koteā te meʼa ʼaē ʼe fakahā e te ʼu meʼa ʼo te lagi ʼo ʼuhiga mo te mālohi fakaʼatua?

⁴ Neʼe fakamahino mai e te ʼapositolo ko Paulo, ko te ‘mālohi heʼegata [ʼo totatou Tupuʼaga] ʼe mahino kiai te ʼatamai ʼaki te ʼu meʼa ʼaē kua faʼu.’ (Loma 1⁠:20) ʼI he ʼu sēkulō ki muʼa atu, ʼe mahino ia ko te tagata fai pesalemo ko Tavite, ʼi tana lolotoga tauhi ōvi, neʼe ina tau sioʼi te lagi ʼi te pōʼuli, ʼo ina fakatokagaʼi te fakatalakitupua ʼo te ʼatulaulau pea mo te māfimāfi ʼo tona Tupuʼaga. Neʼe ina tohi fēnei: “Ka ʼau mamata ki tau ʼu lagi, te ʼu gāue ʼo tou ʼu nima, te māhina pea mo te ʼu fetuʼu ʼaē neʼe ke teuteuʼi, koteā te ʼuhiga ʼo te tagata ʼaē ka mate ke ke manatuʼi ia ia, pea mo te foha ʼo te tagata kelekele ke ke taupau lelei ia ia?” (Pesalemo 8⁠:​3, 4) Logope la neʼe mole faʼa lahi te ʼu meʼa ʼaē neʼe ina ʼiloʼi ʼo ʼuhiga mo te lagi, kae neʼe mahino kia Tavite, ko ia neʼe ko he meʼa noa pe ia mokā fakatatau mo te Tupuʼaga ʼo totatou ʼatulaulau. Ia ʼaho nei, ʼe lahi age te ʼu meʼa ʼaē ʼe ʼiloʼi e te hahaʼi sivi fetuʼu ʼo ʼuhiga mo te ʼatulaulau pea mo te mālohi ʼaē ʼe gāue ai. Ohage la, ʼe nātou ʼui, ʼi te sekonita fuli, ko te laʼā ʼe ina fakatupu te mālohi ʼe tatau mo te ʼu teau miliona miliale tane ʼo te TNT (trinitrotoluène).b Ko te kiʼi koga veliveli pe ʼo te mālohi ʼaia ʼe fakaaʼu mai ki te kele; kae ʼe feʼauga moʼo fakamaʼuli ai ia meʼa fuli. Kae ko te laʼā, ʼe mole ko te fetuʼu ʼaē ʼe mālohi tokotahi ʼi te lagi. Ko ʼihi age fetuʼu ʼe nātou fakatupu ʼi te sekonita pe e tahi te mālohi ʼe tatau mo te mālohi ʼo te laʼā ʼi te ʼaho katoa. Koia koutou fakakaukauʼi age te mālohi lahi ʼo Ia ʼaē neʼe ina fakatupu te ʼu fetuʼu! Neʼe tonu Eliu ʼi tana ʼui ʼaē: “ ʼO ʼuhiga mo te Māfimāfi, ʼe mole heʼeki tou kaku ki ai; ʼe mālohi ʼaupito ia.”​—⁠Sopo 37⁠:⁠23.

5. ʼI te ʼu gāue ʼa Sehova, koteā te ʼu meʼa ʼaē ʼe fakamoʼoni ki tona mālohi?

⁵ Kapau ʼe tou ‘sivi te ʼu gāue ʼa te ʼAtua’ ohage ko tona fai e Tavite, ʼe tou sio anai ki te ʼu fakamoʼoni ʼo tona mālohi ʼi te potu fuli pe​—⁠ʼi te matagi mo te ʼu peau, ʼi te mana mo te ʼuhila, ʼi te ʼu vaitafe pea mo te ʼu moʼuga taulekaleka. (Pesalemo 111⁠:2; Sopo 26⁠:​12-​14) Tahi ʼaē meʼa, ʼe fakamanatuʼi e Sehova kia Sopo, ko te ʼu manu ʼe ko te tahi ʼaia fakamoʼoni ʼo tona mālohi. Ohage la ko Pehemote, peʼe ko te hippopotame. Neʼe ʼui e Sehova kia Sopo: “Ko tona mālohi ʼe ʼi tona ʼu kogaloto . . . Ko tona ʼu hui mālohi ʼe hage ko he ʼu kauʼi ukamea.” (Sopo 40⁠:​15-18) Neʼe ʼiloʼi lelei e te hahaʼi ʼo te temi muʼa, te mālohi fakamataku ʼo te vitulo vao, pea neʼe faikole Tavite ke hāofaki ia ia mai “te gutu ʼo te laione pea mo te ʼu tala ʼo te ʼu vitulo vao.”​—⁠Pesalemo 22⁠:21; Sopo 39⁠:​9-11.

6. Koteā ʼaē ʼe fakatātā e te vitulo ʼi te Tohi-Tapu, pea koteā tona tupuʼaga? (Koutou vakaʼi te kiʼi nota ʼi te lalo pasina.)

⁶ ʼUhi ko tona mālohi, ʼe fakaʼaogaʼi e te Tohi-Tapu te vitulo moʼo fakatātā te mālohi ʼo Sehova.c ʼI te meʼa ʼaē neʼe hā ki te ʼapositolo ko Soane ʼo ʼuhiga mo te hekaʼaga faka hau ʼo Sehova, neʼe sio ai ki te ʼu meʼa maʼuli e fā, pea ko te tahi ia nātou ʼaia neʼe fofogaʼi vitulo. (Apokalipesi 4⁠:​6, 7) ʼE mahino ai, ko te mālohi ʼe ko he kalitate ʼo Sehova ʼi te ʼu kalitate e fā ʼaē ʼe fakatātā e te ʼu kelupimi. Ko te tahi ʼu kalitate ʼe ko te ʼofa, mo te poto pea mo te faitotonu. Mai tona ʼuhiga ʼaē, ko te mālohi ʼe ko he kalitate maʼuhiga ʼo te ʼulugaaga ʼo te ʼAtua, ʼe tou ʼiloʼi lelei anai te ʼAtua mo kapau ʼe tou mahino lelei ki tona mālohi pea mo tana faʼahiga fakaʼaogaʼi, pea ʼe toe feala anai ke tou faʼifaʼitakiʼi ia ia ʼi tatatou fakaʼaogaʼi lelei te mālohi fuli ʼaē ʼe tou maʼu.​—⁠Efeso 5⁠:⁠1.

“Ko Sehova ʼo Te ʼAtu Kautau, Te Māfimāfi”

7. ʼE tou ʼiloʼi feafeaʼi ʼe mālo anai te lelei ʼi te agakovi?

⁷ ʼI te Tohi-Tapu, ko Sehova ʼe fakahigoaʼi ko te “ ʼAtua Māfimāfi,” pea ko te higoa ʼaia ʼe ina fakamanatuʼi mai, ʼe mole tonu ke galo kia tatou tona mālohi peʼe tou lotolotolua ki tana lava mālo ʼi tona ʼu fili. (Senesi 17⁠:1; Ekesote 6⁠:⁠3) Logope la ʼe mālohi te mālama agakovi ʼa Satana, kae ia mata ʼo Sehova, “ko te ʼu puleʼaga ʼe nātou hage ko he mosiʼi vai ʼi he pākete, pea ʼe nātou hage ko he efu ʼi he meʼa fua.” (Isaia 40⁠:15) ʼUhi ko te mālohi fakaʼatua ʼaia, ʼe tou tui papau ai ʼe mālo anai te lelei ʼi te agakovi. Logola te mafola ʼo te agakovi ʼi totatou temi, kae ʼe feala ke tou loto fīmālie ʼi tatatou ʼiloʼi ʼaē, ko “Sehova ʼo te ʼatu kautau, te Māfimāfi ʼo Iselaele,” ʼe ina molehi anai te agakovi ʼo talu ai.​—⁠Isaia 1⁠:24; Pesalemo 37⁠:​9, 10.

8. Koteā te ʼu kautau ʼaē ʼe puleʼi e Sehova ʼi selo, pea koteā te faʼifaʼitaki ʼaē ʼe hā ai tonatou mālohi?

⁸ ʼE hā tuʼa 285 ʼi te Tohi-Tapu te kupuʼi palalau ko “Sehova ʼo te ʼatu kautau,” pea ʼe ko te tahi ʼaia fakamanatuʼi mai ʼo te mālohi ʼo te ʼAtua. Ko te ʼu “kautau” ʼaē ʼe talanoa ai kiai, ʼe faʼufaʼu e te ʼu laumālie ʼaē ʼe puleʼi e Sehova. (Pesalemo 103⁠:​20, 21; 148⁠:⁠2) ʼI te po pe e tahi, neʼe matehi e te ʼaselo e tokotahi te toko 185 000 kau solia Asilia ʼaē neʼe nātou ʼamanaki ʼohofiʼi ia Selusalemi. (2 Hau 19⁠:35) Kapau ʼe tou manatuʼi te mālohi ʼo te ʼatu kautau fakalaumālie ʼa Sehova, pea ʼe mole tou mataku anai kia nātou ʼaē ʼe fakafeagai mai. Neʼe mole tuʼania te polofeta ko Eliseo ʼi te temi ʼaē neʼe ʼatakai ia ia e te foʼi solia katoa neʼe nātou kumi ia ia, koteʼuhi ʼo kehe ia mo tana kaugana, neʼe sio ʼaki te ʼu mata ʼo te tui ʼe lagolago kia ia te ʼatu kautau ʼo selo.​—⁠2 Hau 6:​15-​17.

9. Ohage ko Sesu, he koʼe ʼe tonu ke tou falala ki totatou puipui e te ʼAtua?

⁹ ʼO toe feiā pe, neʼe ʼiloʼi e Sesu neʼe feala ki te ʼu ʼaselo ke nātou tokoni age kia te ia ʼi te ʼōloto ʼo Setesemane, ʼi te temi ʼaē neʼe ʼolo age ai kia te ia te hahaʼi kaugamālie mo tanatou ʼu heletā pea mo te ʼu ʼakau. ʼI tana ʼosi fakatotonu kia Petelo ke ina toe ʼai tana heletā ki tona ʼaiʼaga, neʼe ʼui age e Sesu, kanapaula neʼe ʼaoga pea neʼe feala Hana pāui ki tana Tāmai ke ina fekauʼi mai “ia lesio aselo e hogofulu-ma-lua.” (Mateo 26⁠:​47, 52, 53) Kapau ʼe tou mahino feiā ki te ʼatu kautau ʼa te ʼAtua, pea ʼe tou falala anai ki tana lagolago kia tatou. Neʼe tohi fēnei e te ʼapositolo ko Paulo: “Koia, kotea e tou lau anai kia mea aia? Kapau e kau te Atua mo tatou, pe ko ai ae e fakafehagai mai kia tatou?”​—⁠Loma 8⁠:⁠31.

10. ʼE fakaʼaogaʼi e Sehova tona mālohi kia ai?

¹⁰ Koia ʼe lahi te ʼu tupuʼaga ke tou falala ai ki te puipui ʼa Sehova. ʼE ina fakaʼaogaʼi tuʼumaʼu tona mālohi moʼo fai te meʼa ʼaē ʼe lelei, pea ʼe ʼalutahi mo tona tahi ʼu kalitate​—⁠te faitotonu, te poto pea mo te ʼofa. (Sopo 37⁠:23; Selemia 10⁠:12) Ko te hahaʼi maʼu tuʼulaga ʼe nātou gaohi koviʼi tuʼumaʼu te hahaʼi māsisiva pea mo te hahaʼi agavaivai pea mo faʼao tonatou ʼu koloā, kae ko Sehova ʼe ina “fakatuʼu ake ia ia ʼaē ʼe veliveli mai te efu” pea ʼe ‘lahi tona mālohi moʼo hāofaki.’ (Pesalemo 113:​5-7; Isaia 63⁠:⁠1) Ohage ko tona mahino kiai ia Malia, te faʼe agavaivai pea mo fia mālalo ʼa Sesu, ko “te Mafimafi” ʼe ina fakaʼaogaʼi tona mālohi maʼa te hahaʼi ʼaē ʼe manavasiʼi kia te ia, pea ʼe ina faka mālaloʼi te kau fialahi kae ina hikihiki te hahaʼi agavaivai.​—⁠Luka 1⁠:​46-53.

ʼE Fakahā e Sehova Tona Mālohi Ki Tana Kau Kaugana

11. ʼI te taʼu 1513 ʼi muʼa ʼo totatou temi, koteā te fakamoʼoni ʼo te mālohi fakaʼatua ʼaē neʼe sio kiai te kau Iselaele?

¹¹ ʼI te ʼu lakaga kehekehe, neʼe fakahā e Sehova tona mālohi ki tana kau kaugana, ohage ko te meʼa ʼaē neʼe hoko ʼi te Moʼuga ʼo Sinai ʼi te taʼu 1513 ʼi muʼa ʼo totatou temi. ʼI te lolotoga ʼo te taʼu ʼaia, neʼe kua sio te kau Iselaele ki te ʼu fakamoʼoni ʼo te mālohi ʼo te ʼAtua. Neʼe hā te nima mālohi ʼo te ʼAtua ʼi tana fakahoko te ʼu tautea e hogofulu, pea neʼe hā ai te vaivai ʼo te ʼu ʼatua ʼo Esipito. Mole fualoa, pea neʼe toe hā tona mālohi fakaʼatua ʼi te fakalaka faka milakulo ʼa te kau Iselaele ʼi te Tai Kula, pea mo te fakaʼauha ʼo te foʼi solia ʼa Falaone. Hili kiai māhina e tolu, ʼi te vaʼe Moʼuga ʼo Sinai, neʼe fakaafe e Sehova te kau Iselaele ke nātou liliu ko tona “koloā makehe ʼi te lotolotoiga ʼo te ʼu hahaʼi fuli.” Pea neʼe nātou fai te fakapapau ʼaenī: “Ko meʼa fuli ʼaē kua folafola kiai ia Sehova, ʼe mātou lotolelei ke mātou fai.” (Ekesote 19:​5, 8) Pea neʼe fakahā age e Sehova tona mālohi. Neʼe mana ai te lagi pea mo hila, pea neʼe pupuhi mālohi te fakatagi pupuhi, pea neʼe galulu pea mo kohu te Moʼuga ʼo Sinai. Neʼe tutuʼu mamaʼo ai te hahaʼi pea mo matataku ʼaupito. Kae neʼe ʼui age e Moisese, ko te ʼu meʼa ʼaia neʼe hoko ʼe tonu ke ina akoʼi age kia nātou te manavasiʼi ki te ʼAtua, ke nātou fakalogo ki tonatou ʼAtua moʼoni pe e tahi ko Sehova.​—⁠Ekesote 19⁠:​16-19; 20⁠:​18-20.

12, 13. Koteā te ʼu meʼa ʼaē neʼe tupu ai te līaki e Elia tana gāue, pea neʼe feafeaʼi tona fakaloto mālohiʼi e Sehova?

¹² ʼI ni ʼu sēkulō ki muli age, ʼi te temi ʼo Elia, neʼe hoko ʼi te Moʼuga ʼo Sinai te tahi meʼa neʼe hā ai te mālohi fakaʼatua. Neʼe kua sio te polofeta ki te mālohi ʼo te ʼAtua. Lolotoga taʼu e tolu vaelua, neʼe “māpunuʼi [e te ʼAtua] te lagi” ʼuhi ko te ʼapositasia ʼa te puleʼaga ʼo Iselaele. (2 Fakamatala 7⁠:13) ʼI te lolotoga ʼo te taʼi laʼā ʼaia, neʼe fafaga ia Elia e te ʼu kāleva ʼi te liuʼa ʼo Kelite, pea ki muli age neʼe fakafonu faka milakulo te falena pea mo te lolo ʼa te fafine vitua moʼo fafaga ʼaki ia Elia. Tahi ʼaē, neʼe foaki e Sehova kia Elia te mālohi moʼo fakatuʼuake te tama ʼa te fafine vitua ʼaia. Moʼo fakaʼosi, neʼe hoko te ʼahiʼahi ʼi te moʼuga ʼo Kalemeli, moʼo fakahā pe ko ai te ʼAtua moʼoni, pea neʼe to ifo te afi mai te lagi ʼo ina tutu te sakilifisio ʼa Elia. (1 Hau 17:​4-​24; 18⁠:​36-​40) Kae mole fualoa kiai, neʼe mataku Elia pea mo lotovaivai he neʼe fia matehi ia ia e Sesapele. (1 Hau 19:​1-4) Neʼe hola mai te fenua he neʼe manatu ia kua ʼosi tana gāue faka polofeta. Moʼo fakafimālieʼi pea mo fakaloto mālohiʼi ia ia, neʼe fakahā age ki ai e Sehova tona mālohi fakaʼatua.

¹³ Neʼe nono Elia ʼi te ʼana, pea neʼe sio ki te fakamoʼoni ʼo te ʼu mālohi faka natula e tolu ʼaē ʼe puleʼi e Sehova: te matagi, mo te mafuike pea mo te afi. Kae mokā palalau Sehova kia Elia, neʼe palalau ʼaki “te leʼo ʼe fakatokatoka pea mo mālū.” Neʼe ina hinoʼi kia ia te tahi gāue pea mo ina fakahā age ki ai ʼe kei toe tana toko 7 000 kau atolasio agatonu ʼi te fenua. (1 Hau 19:​9-​18) Kapau ʼe tou lotovaivai ohage ko Elia heʼe mole he fua ʼo totatou minisitelio, pea ʼe feala ke tou kole kia Sehova “te malohi tauʼoluga pau”​—⁠te mālohi ʼaē ʼe feala ke ina fakaloto mālohiʼi tatou ke tou haga faka mafola tuʼumaʼu te logo lelei.​—⁠2 Kolonito 4⁠:⁠7.

ʼE Fakamoʼoni Mai e Te Mālohi ʼo Sehova ʼe Hoko Anai Tana ʼu Fakapapau

14. Koteā ʼaē ʼe hā ʼi te huafa ʼa Sehova, pea koteā te pikipikiga ʼo tona huafa pea mo tona mālohi?

¹⁴ Ko te mālohi ʼo Sehova ʼe toe pipiki ki tona huafa, pea mo te fakahoko ʼo tona finegalo. Ko te huafa makehe ʼo Sehova, ko tona faka ʼuhiga “ ʼE Ina Fakahoko,” pea ʼe hā ʼaki mai ʼe ina fia Fakahoko tana ʼu fakapapau. ʼE mole he tahi pe ko he meʼa ʼe feala ke ina tāʼofi te ʼAtua ke ʼaua naʼa ina fakahoko tana ʼu fakatuʼutuʼu, tatau aipe peʼe ʼui e ʼihi hahaʼi lotolotolua ʼe mole feala ke hoko. Ohage ko tona ʼui e Sesu ki tana kau ʼapositolo, “ki te Atua e ina fealagia te meafuape.”​—⁠Mateo 19⁠:⁠26.

15. Neʼe toe fakamanatuʼi feafeaʼi kia Apalahamo pea mo Sala, ʼe mole he meʼa ʼe faigataʼa fau kia Sehova?

¹⁵ Tou manatuʼi te faʼifaʼitaki ʼo Apalahamo pea mo Sala ʼaē neʼe fakapapau age e Sehova kia nāua, ʼe ina fakaliliu anai tonā hākoga ko te puleʼaga lahi. Kae neʼe mole nā maʼu fānau lolotoga te temi fualoa. Neʼe kua nā matutuʼa ʼi te temi ʼaē neʼe ʼui age ai e Sehova kua vave hoko tana fakapapau, pea neʼe kata ai ia Sala. Neʼe tali fēnei age e te ʼaselo: “ ʼE ʼi ai koa he meʼa ʼe faigataʼa fau ki te ʼAtua?” (Senesi 12:​1-3; 17:​4-8; 18⁠:​10-​14) Hili kiai sēkulō e fā, neʼe fakatahiʼi e Moisese ʼi te Mafa ʼo Moape te hākoga ʼo Apalahamo​—⁠ʼaē neʼe liliu ʼi te temi ʼaia ko he puleʼaga lahi​—⁠pea neʼe ina fakamanatuʼi age kia nātou neʼe fakahoko e te ʼAtua tana fakapapau. Neʼe ʼui fēnei e Moisese: “ ʼE ke hoko atu tou maʼuli, koteʼuhi neʼe ʼofa [ia Sehova] ki tau ʼu kui, pea neʼe ina fili ai tonatou hāko, pea ʼaki tona mālohi lahi neʼe ina fakamavae koe mai Esipito ʼi ʼona mata, ʼo ina kapu ʼi ʼou muʼa te ʼu puleʼaga ʼe lahi age mo mālohi age ia koe, ke ina fakahū koe, pea mo foaki atu tonatou fenua ko hou tofiʼa ohage ko te ʼaho ʼaenī.”​—⁠ Teutalonome 4:​37, 38.

16. He koʼe neʼe fakafisi te kau Satuseo ki te fakatuʼuake ʼo te kau mate?

¹⁶ ʼI he ʼu sēkulō ki muli age, neʼe fakatonutonuʼi e Sesu te kau Satuseo ʼaē neʼe mole nātou tui ki te fakatuʼuake. He koʼe koa neʼe mole nātou fia tui ki te fakapapau ʼa te ʼAtua ke ina toe fakamaʼuli te kau mate? Neʼe ʼui age e Sesu: “[ʼE] mole koutou iloi te Tohi-tapu mo te Mafimafi o te Atua.” (Mateo 22⁠:29) Ko te Tohi-Tapu ʼe ina fakapapau mai ‘ko nātou fuli ʼaē ʼe nonofo ʼi te ʼu falemaka fakamanatu ʼe nātou logo anai ki [te leʼo ʼo te Foha ʼo te tagata] pea ʼe nātou hū mai anai ki tuʼa.’ (Soane 5⁠:​27-29, MN) Kapau ʼe tou ʼiloʼi te meʼa ʼaē ʼe ʼui e te Tohi-Tapu ʼo ʼuhiga mo te toe fakatuʼuake, pea ʼaki tatatou falala ki te mālohi ʼo te ʼAtua ʼe tou tui papau ʼe toe fakatuʼuake anai te kau mate. “ ʼE ina fakaʼauha moʼoni anai te mate ʼo talu ai, . . . he neʼe ʼui totonu e Sehova.”​—⁠Isaia 25⁠:⁠8.

17. Ko te ʼaho fea ʼaē ʼe maʼuhiga ai anai ke makehe tatatou falala kia Sehova?

¹⁷ ʼI te ka haʼu ʼaē kua ōvi mai, ʼe ko he temi anai ki te hahaʼi fuli ke nātou maʼu he falala makehe ki te mālohi faka hāofaki ʼo te ʼAtua. Ko Satana te Tevolo, ʼe ina ʼohofiʼi anai te hahaʼi ʼa te ʼAtua heʼe hage anai ʼe mole he tahi ʼe ina puipui nātou. (Esekiele 38⁠:​14-16) ʼE fakahā anai e te ʼAtua tona mālohi lahi maʼa tatou, pea ʼe tonu anai ke ʼiloʼi e te hahaʼi fuli ko ia ia Sehova. (Esekiele 38⁠:​21-23) ʼI te temi nei, ʼe tonu ke tou fakaloto mālohiʼi totatou tui, pea mo tatatou falala ki te ʼAtua Māfimāfi ke ʼaua naʼa tou vaivai ʼi te temi maʼuhiga ʼaia.

18. (a) Koteā te ʼu lelei ʼaē ʼe tou maʼu mokā tou metitasio ki te mālohi ʼo Sehova? (b) Koteā te fehuʼi ʼaē ka tou vakaʼi anai ʼi te lua alatike?

¹⁸ ʼE mahino papau ia, ʼe lahi te ʼu tupuʼaga ke tou metitasio ki te mālohi ʼo Sehova. ʼI tatatou vakaʼi tana ʼu gāue, ʼe uga ai tatou ke tou vikiʼi totatou Tupuʼaga Lahi ʼaki he agavaivai, pea ke tou fai he ʼu kole fakafetaʼi heʼe ina fakaʼaogaʼi tona mālohi ʼaki te ʼofa pea mo te poto. ʼE mole feala anai hatatou matataku mo kapau ʼe tou falala kia Sehova ʼo te ʼatu kautau. ʼE mole vaivai anai tatatou tui ki tana ʼu fakapapau. Kae ke koutou manatuʼi neʼe fakatupu tatou ki te paki ʼo te ʼAtua. Koia ʼe toe ʼi ai mo totatou mālohi​—⁠kae ʼe faka tuʼakoi. ʼE tou lava faʼifaʼitakiʼi feafeaʼi totatou Tupuʼaga mokā tou fakaʼaogaʼi totatou mālohi? Ko te lua alatike ʼe ina tali anai ki te fehuʼi ʼaia.

[Nota ʼi te lalo pasina]

Koteā Takotou Tali Ki Te ʼu Fehuʼi ʼAenī?

• Ko te ʼu meʼa ʼaē neʼe fakatupu, ʼe nātou fakamoʼoni feafeaʼi ki te mālohi ʼo Sehova?

• Koteā te ʼu kautau ʼaē ʼe feala ke fakaʼaogaʼi e Sehova moʼo lagolago ki tana hahaʼi?

• Koteā te ʼu lakaga ʼaē neʼe fakahā ai e Sehova tona mālohi?

• He koʼe ʼe feala hatatou tui ʼe fakahoko anai e Sehova tana ʼu fakapapau?

[Paki ʼo te pasina 10]

“Hiki ʼokotou ʼu mata ki ʼoluga pea koutou sio. Ko ai ʼaē neʼe ina fakatupu te ʼu meʼa ʼaia?”

[Haʼuʼaga ʼo te paki]

Photo by Malin, © IAC/RGO 1991

[Paki ʼo te pasina 13]

Ko te metitasio ki te ʼu fakamoʼoni ʼo te mālohi ʼo Sehova, ʼe ina fakatuputupu tatatou tui ki tana ʼu fakapapau