ʼE Koutou Umiuminoa Koa?
1 ʼE mole tou punamaʼuli mokā tou sio ki he kiʼi tamasiʼi ʼe tapiki mālohi ki tana faʼe peʼe ki tana tāmai. ʼI takita kei veliveli, ʼe ko he agamāhani hakita umiuminoa. Māʼia mokā nātou lalahi, ko te tokolahi ʼe nātou umiuminoa, heʼe ko tonatou natula ʼaia. Koteā ʼaē ʼe feala ke koutou fai, mo kapau ʼe fakatupu kovi tokotou umiuminoa ki takotou minisitelio?
2 Koutou Tauʼi Tokotou Umiuminoa: ʼE maʼuhiga ke koutou tokagaʼi “te ʼuhigaʼi tagata fufū ʼo te loto.” (1 Pet. 3:4, MN ) Koutou fakamālohiʼi tokotou ʼofa ki te ʼAtua pea mo tokotou kāiga. Koutou tui papau, ko te fakahoko ʼo te gāue fai faka mafola, ʼe ko he faʼahi lelei ʼaia moʼo fakahā tokotou ʼofa faka sakilifisio. Koutou fai tuʼumaʼu hakotou ako takitokotahi pea mo haga ʼolo ki te ʼu fono. Koutou faikole tuʼumaʼu, pea koutou kole tāfito ke tokoni atu ia Sehova. Ko he tui mālohi pea mo he loto falala kia te ia, ʼe ina fakatuputupu anai takotou tui, pea mo foaki atu “he lototoʼa katoa moʼo tala te folafola ʼa te ʼAtua ʼaki he lotomālohi.”—Filp. 1:14.
3 ʼAua naʼa koutou manatu ʼe mole koutou lavaʼi te gāue ʼaia. Neʼe lagi manatu feiā ia Timoteo, he neʼe fakaloto mālohiʼi ia ia e Paulo “ke aua naa fehia he tahi ki [tana] kei tupulaga,” ʼo ina fakamanatuʼi age, “nee mole foaki mai kia tatou e te Atua he laumalie o te mataku; kae o te malohi.” (1 Tim. 4:12; 2 Tim. 1:7) Neʼe fakaʼaogaʼi katoa e Sehova ia Timoteo, pea ʼe ina fakaʼaogaʼi anai mo koutou, mo kapau ʼe koutou haga haʼele ki muʼa ʼaki he falala katoa kia te Ia.—Pes. 56:11.
4 Ko te tuagaʼane neʼe ina metitasioʼi te vaega faka Tohi-Tapu ʼo Mateo 10:37, pea neʼe tokoni kia ia, heʼe ʼaki tana umiuminoa neʼe mataku ʼi tona ʼohoana ʼaē neʼe fakafeagai kia ia. ʼAki tana faʼa kātaki, neʼe liliu ai te minisitelio ko he meʼa faigafua kia ia, pea ʼaki te temi, ko tona ʼohoana, mo tana faʼe, pea mo tona ʼu tokolua, neʼe nātou tali fuli te moʼoni!
5 ʼE Maʼuhiga Ke Kita Teuteu: ʼE toe ʼāsili anai takotou falala, mo kapau ʼe koutou teuteuʼi lelei takotou minisitelio. Koutou toʼo he faʼifaʼitaki faigafua ʼi te kiʼi kaupepa Te ʼu Tokoni Ki Te ʼu Fai Palalau peʼe ko te ʼu Minisitelio ʼāfea, ʼo koutou akoako liuliuga ke koutou manatuʼi lelei. Koutou maʼu he ʼu manatu lelei, kae ʼaua naʼa koutou hoko tuʼania. Koutou gāue mo ʼihi, ke koutou maʼu ai te lototoʼa. Koutou manatuʼi, ʼi te ʼu matapā ʼe koutou felāveʼi anai mo te tokolahi ʼe nātou umiuminoa, ohage ko koutou, kae ʼe ʼaoga te logo ʼo te Puleʼaga ki te hahaʼi fuli.
6 ʼAua naʼa koutou lotovaivai, mo kapau ʼe koutou umiuminoa. Kapau ʼe koutou faiga fakamalotoloto, pea ʼe tokoni atu anai ia Sehova ke koutou liliu ʼo faiva ʼi te faka mafola ʼo te logo lelei. Pea ʼe koutou fiafia ai anai ʼi tokotou minisitelio.—Taag. 10:22.