Ko Te Tapuakina ʼa Sehova ʼe Ina Faka Koloaʼia Tatou
1 ʼI te agamāhani, ʼe fakafuafua te maʼuli lelei ʼa he tahi ki te lahi ʼo tona totogi. Koia ki te tokolahi ʼe nātou faka ʼuhiga te hahaʼi maʼu meʼa, ʼe ko he ʼu hahaʼi ʼe nātou fiafia ʼaupito pea mo maʼuli fīmālie. Kae ʼe nātou faihala ʼaupito ʼi tanatou manatu ʼaē ʼe lava totogi te fiafia ʼaki te paʼaga. (Tnk. 5:12) ʼE mole fiafia fualoa te hahaʼi ʼaē “kua nātou fakatuʼutuʼu ke nātou maʼu koloā.” (1 Tim. 6:9, MN ) Kae ko te kau kaugana ʼa Sehova ʼe nātou fiafia moʼoni pea ʼe lahi age tanatou maʼu koloā ʼi te hahaʼi ʼo te malamanei. (Taag. 10:22; Apk. 2:9) ʼO feafeaʼi?
2 Te Fakamoʼoni ʼo Totatou Maʼu Koloā: ʼE tou maʼu te ʼu koloā ʼaē ko te fakasiosio fakalaumālie, pea mo te mahino ki te Folafola ʼa te ʼAtua, ia te Tohi-Tapu. ʼAki tana kautahi fakakelekele, ʼe akoʼi tuʼumaʼu tatou e Sehova ʼo ʼuhiga mo ia pea mo Tona ʼAlo, ke fua lelei tuʼumaʼu kia tatou. Ko te mahino totonu ʼaia ʼe ina faka fealagia mai ke tou fakaōvi kia Sehova pea ke tou felogoi lelei mo ia. (Skp. 4:8) ʼI tatatou fakakeheʼi te meʼa ʼaē ʼe lelei pea mo te meʼa ʼaē ʼe kovi, pea ʼi tatatou maʼuliʼi te ʼu lao ʼa te ʼAtua, ʼe ko he puipui ʼaia ʼo tatou mai te ʼu faʼahiga mahaki pea mo ʼihi tuʼutāmaki. ʼE tou falala ko Sehova ʼe tokaga anai kia tatou, ke tou maʼu he maʼuli fakafeauga pea mo he ʼatamai tokalelei.—Mat. 6:33.
3 ʼE tou maʼu te tokalelei pea mo te logo tahi ʼi totatou famili fakalaumālie, koteʼuhi ʼe tou maʼuliʼi te ʼu fua ʼo te laumālie maʼoniʼoni ʼo te ʼAtua. ʼAki te logo tahi ʼi te ʼofa, ʼe mole tonu ʼi he temi ke tou manatu ʼe līʼakina anai tatou e te ʼAtua peʼe ko totatou ʼu tēhina mokā tou tuʼutāmaki anai.—Kal. 6:10.
4 ʼE ʼi ai te ʼuhiga moʼoni ʼo totatou maʼuli pea mo totatou ʼu fakatuʼutuʼu. ʼE tou faka ʼuhiga ohage ko he pilivilesio taulekaleka tatatou kau ki te faka mafola ʼo te logo lelei ʼi te kele katoa. Heʼe tou maʼu ai te fiafia tologa mokā tou tokoni ki te hahaʼi ke nātou felogoi lelei mo te ʼAtua, pea ke nātou kau fakatahi mo tatou ki te tauhi maʼa. Ko totatou koloā lahi ʼaē ko te minisitelio, ʼe ina faka maʼuhigaʼi ia Sehova pea ʼe tou maʼuli fiafia heʼe tou lagolago ki te tāpuhā ʼo tona huafa. ʼE tou taupau he manatu lelei, heʼe tou ʼiloʼi ko tatatou ʼamanaki ki te ka haʼu ʼe kua vave hoko mai.
5 Tou Fakahā Totatou Loto Fakafetaʼi: ʼOfa pe ke tou fakafetaʼi tuʼumaʼu ki te ʼu tapuakina ʼa Sehova, heʼe ina faka fealagia mai kia tatou ke lahi age tatatou ʼu koloā ʼi te ʼu koloā ʼo te hahaʼi. (Taag. 22:4) ʼI te ʼaho fuli tou metitasioʼi te ʼu meʼa ʼaē ʼe tou maʼu moʼo fakafetaʼi kia Sehova, ʼo ʼuhiga mo tona manavaʼofa pea mo tou haga pipiki ʼāteaina pe kia te ia.