ʼE Tou Lava Fai Te ʼu Meʼa ʼAē ʼe Fakamaʼua Mai e Sehova
1. ʼI ʼihi temi, koteā ʼaē ʼe feala ke tou logoʼi, pea koteā tona tupuʼaga?
1 Ko te faʼahiga maʼuli ʼaē ʼe lelei tāfito ʼi totatou temi, ʼe ko te mulimuli ki te ʼu lao ʼa Sehova pea mo tana ʼu pelesepeto, pea ʼe tokoni mai ke tou fakatuʼu he fakatafito lelei ki totatou ka haʼu heʼegata. (Pes. 19:7-11; 1 Tim. 6:19) Kae ko te mālama ʼa Satana ʼe ina faka ogosia ʼaupito ia tatou. Ko te tahi faigataʼaʼia ʼe ko totatou kakano agahala. ʼI tatatou faiga ʼaē ke tou fai totatou ʼu maʼua faka Tohi-Tapu, e lagi feala ʼi ʼihi temi ke tou logo gaʼegaʼe. (Pes. 40:12; 55:1-8) ʼE feala pe ke tou feʼekeʼaki peʼe feala koa ke tou fakahoko te ʼu meʼa fuli ʼaē ʼe fakamaʼua mai e Sehova. ʼI te ʼu temi ʼaia, koteā ʼaē ʼe lava tokoni mai ke tou taupau he fakasiosio poto ʼi te faʼahi fakalaumālie?
2. He koʼe ʼe tou ʼui ko Sehova ʼe fakapotopoto ʼi te ʼu meʼa ʼaē ʼe ina fakamaʼua mai?
2 Ko Te ʼu Fakatotonu ʼa Sehova ʼe Mole Mamafa Fau: Ko te ʼu meʼa ʼaē ʼe fakamaʼua mai e Sehova, ʼe ko he ʼu meʼa ʼe feala ke tou fai. Ko tana ʼu fakatotonu ʼe mole mamafa fau, kae ʼe fua lelei kia tatou. (Teu. 10:12, 13; 1 Soa. 5:3) ʼE ina ʼiloʼi totatou ʼu vaivaiʼaga fakatagata, heʼe ina “manatuʼi ko tatou ko te ʼu efu.” (Pes. 103:13, 14) ʼAki he loto manavaʼofa, ko te ʼAtua ʼe ina tali totatou ʼu faiga ke tou tauhi kia te ia, logola ʼe tuʼakoi ʼuhi ko totatou ʼu ʼaluʼaga. (Lev. 5:7, 11; Mko. 14:8) ʼE ina fakaafe tatou ke tou tuku age totatou ʼu kavega kia te ia, pea ʼe ina fakapapau mai ʼe ina faka fealagia anai ke tou nonofo agatonu.—Pes. 55:22; 1 Ko. 10:13.
3. ʼE fakaloto mālohiʼi feafeaʼi tatou e Sehova ke tou faʼa kātaki?
3 ʼE Tonu Ke Tou Faʼa Kātaki: Ko te ʼu fakamatala ʼaē ʼe tou maʼu ʼi te Tohi-Tapu ʼo ʼuhiga mo te ʼu tagata agatonu ohage ko Elia, Selemia, pea mo Paulo, ʼe hā ʼaki mai neʼe tonu ke nātou faʼa kātaki. (Hep. 10:36) Neʼe tokoni Sehova kia nātou ʼi te ʼu temi faigataʼa pea mo te ʼu temi ʼaē neʼe nātou lotovaivai ai. (1 Hau 19:14-18; Sel. 20:7-11; 2 Ko. 1:8-11) Pea ʼe tou maʼu he lotomālohi ʼaki te nofo agatonu ʼo totatou ʼu tēhina ʼo totatou temi. (1 Pet. 5:9) Ko te metitasio ki te ʼu faʼifaʼitaki ʼaia, ʼe lava tokoni mai ke ʼaua naʼa tou lotovaivai.
4. He koʼe ʼe maʼuhiga ke tou haga manatuʼi te ʼu fakapapau ʼa te ʼAtua?
4 Ko te falala ki te ʼu fakapapau ʼa Sehova ʼe ko “he taula ki totatou nefesi.” (Hep. 6:19, MN ) Neʼe ina uga ia Apalahamo pea mo Sala ke nā tali te kole age ʼa Sehova ke nā mavae ʼi tonā ʼapi kae nā ʼolo ʼo ‘nonofo faka matāpule ʼi te kele ʼo te fakapapau.’ Ko te falala ʼaia neʼe ina faka fealagia kia Moisese ke tapiki ʼaki he lototoʼa ki te tauhi moʼoni, pea mo ina faka fealagia kia Sesu ke ina maʼu he lotomālohi moʼo kātakiʼi te pou fakamamahi. (Hep. 11:8-10, 13, 24-26; 12:2, 3) Kapau ʼe tou haga taupau tuʼumaʼu ʼi totatou loto te fakapapau ʼa te ʼAtua ʼo ʼuhiga mo he mālama foʼou pea mo faitotonu, pea ʼe feala ai anai mo tatou ke tou nonofo agatonu.—2 Pet. 3:11-13.
5. He koʼe ʼe feala ke fakatupu lotomālohi hatatou fakakaukauʼi te ʼu gāue agatonu ʼaē neʼe tou fai ki muʼa atu?
5 Ko te tahi faʼahi ʼaē ʼe feala ke ina fakaloto mālohiʼi tatou ʼi tatatou tauhi, ko tatatou manatuʼi tatatou ʼu gāue agatonu ʼo te temi muʼa, mo totatou maʼuli faka sakilifisio pea mo totatou lototoʼa. (Hep. 10:32-34) ʼE ina toe fakamanatuʼi mai te fiafia ʼaē ʼe tou maʼu mokā tou foaki age kia Sehova te meʼa ʼaē ʼe ina kole mai—ke tou tauhi kia te ia ʼaki totatou loto katoa.—Mat. 22:37.