Neʼe Mole Nātou Faka Logona Tonatou ʼu Higoa
ʼE MOLE fakahā mai e te Tohi-Tapu te ʼu higoa ʼo te hahaʼi ʼaē neʼe nātou laga te tule ʼiloa pea mo fakaufiufi ʼo Papele. ʼE ʼui fēnei e te Tohi-Tapu: “Pea neʼe ʼui maʼa nātou: ‘Tou ʼolo ʼo laga he kolo, pea mo he tule ʼe aʼu tona tumutumu ki te lagi, pea tou faka logona totatou higoa, talia naʼa tou mavetevete ʼi te fuga kele katoa.’ ”—Senesi 11:4.
Ko ai ia “nātou” ʼaia? Neʼe hoko te meʼa ʼaia ia taʼu e 200 ki muli age, ka kua ʼosi hoko te Tulivio. ʼI te temi ʼaia, ko Noe ʼaē neʼe teitei taʼu 800, neʼe nofo ʼi te lotolotoiga ʼo tona ʼu hōloga ʼaē ʼe toko lauʼi afe. Neʼe nātou palalau fuli pe ki te lea e tahi pea mo nātou nonofo fakatahi ʼi te koga meʼa ʼaē neʼe nofo ai ia Noe pea mo tona ʼu foha ʼi te fakaʼosi ʼo te Tulivio. (Senesi 11:1) Kua liliu te hahaʼi ʼo kaugamālie pea ko ʼihi ia nātou neʼe ʼolo ki te Potu Hahake, ʼo nātou “maʼu ai te mafa ʼo te fenua ʼo Sinea.”—Senesi 11:2.
ʼE Mole Hoko Tanatou Fakatuʼutuʼu
Ko te mafa ʼaia ʼaē neʼe fakatotonu ai e te hahaʼi ke nātou agatuʼu ki te ʼAtua. ʼO feafeaʼi? Neʼe fakahā e te ʼAtua tana fakatuʼutuʼu ʼi tana fakatotonu ki te ʼuluaki taumatuʼa ke ‘nā fanaunau, pea nā liliu ʼo hahaʼi, pea nā fakafonu te kele.’ (Senesi 1:28) Neʼe toe fai te folafola ʼaia kia Noe pea mo tona ʼu foha ʼi te hili ʼo te Tulivio. Neʼe fakatotonu age e te ʼAtua kia nātou: “Kia koutou ʼu tagata, koutou fanaunau pea koutou liliu ʼo hahaʼi, pea ke koutou fakafonu te kele pea ke koutou liliu ai ʼo kaugamālie.” (Senesi 9:7) Moʼo fakafeagai ki te fakatotonu ʼa Sehova, neʼe laga e te hahaʼi he kolo ke ʼaua naʼa nātou “mavetevete ʼi te fuga kele katoa.”
Neʼe toe kamata laga e te hahaʼi he tule moʼo ‘faka logona tonatou higoa.’ Neʼe nātou ʼamanaki ke nātou fakaʼosi te laga ʼo te tule kae neʼe mole lava te faʼahi ʼaia. ʼE fakahā mai e te Tohi-Tapu neʼe fai e Sehova ke nātou lea kehekehe ʼo mole kei nātou femahinoʼaki. ʼE ʼui fēnei e te fakamatala ʼaē neʼe tohi ʼaki te takitaki ʼo te laumālie maʼoniʼoni: “Koia, neʼe faka mavetevete e Sehova ia nātou mai te potu ʼaia ke nātou ʼolo ki te fuga kele katoa, pea ʼaki te temi neʼe fakagata tanatou laga ʼo te kolo.”—Senesi 11:7, 8.
ʼE hā lelei te mole iku ʼo te fakatuʼutuʼu ʼaia he neʼe mole liliu ʼo “logona,” peʼe ʼiloa, te ʼu higoa ʼo te ʼu hahaʼi ʼaē neʼe nātou laga te tule. ʼI tona fakahagatonu, ʼe mole ʼiloʼi tonatou ʼu higoa pea kua nātou pupuli ʼi te hisitolia ʼo te tagata. Kae e feafeaʼi kia Nimelote, te mokoliha ʼo Noe? ʼE mole ko ia koa la ʼaē neʼe ina takitaki te agatuʼu ki te ʼAtua? ʼE mole ʼiloa koa la tona higoa?
Ko Nimelote—Neʼe Agatuʼu Pea Mo Manuki Ki Te ʼAtua
ʼE mahino papau ia, neʼe ko Nimelote te pule ʼo te agatuʼu ʼaia. ʼE fakahā mai ia Senesi kapite 10, neʼe ko “he tagata kapu manu mālohi pea neʼe fakafeagai kia Sehova.” (Senesi 10:9) ʼE toe ʼui foki e te Tohi-Tapu, neʼe “ko te ʼuluaki tagata ʼaē neʼe liliu ko he tagata mālohi ʼi te kele.” (Senesi 10:8) Ko Nimelote neʼe ko he tagata tau agamālohi. Neʼe liliu ia ko te ʼuluaki tagata pule ʼi te hili ʼo te Tulivio, ʼo ina fakanofo hau ia ia totonu. Pea neʼe ko he tagata laga fale. ʼO mulimuli ki te Tohi-Tapu, neʼe ina laga te ʼu kolo e valu, ʼo kau kiai mo Papele.—Senesi 10:10-12.
Koia, ʼe mahino papau ia, ko Nimelote—te tagata agatuʼu ki te ʼAtua, te hau ʼo Papele, pea mo te tagata ʼaē neʼe laga kolo—neʼe kau ki te laga ʼo te tule ʼo Papele. Neʼe mole ina faka logona koa la tona higoa? ʼO ʼuhiga mo te higoa ko Nimelote, neʼe tohi fēnei e E. F. C. Rosenmüller ʼaē ʼe ina sivisivi te ʼu meʼa ʼo te Potu Hihifo: “Neʼe maʼu e Nimelote tona higoa ʼaia ʼuhi ko te kupu [ma·radhʹ], ʼe mulimuli tona faka ʼuhiga ki te faka Hepeleo, ‘neʼe agatuʼu,’ ‘neʼe mavae.’ ” Pea ʼe toe fakamahino e Rosenmüller “ ʼe ko he agamāhani ʼo te hahaʼi ʼo te Potu Hihifo tanatou fakahigoaʼi tonatou ʼu hahaʼi maʼu tuʼulaga ʼaki te ʼu higoa ʼaē neʼe foaki age kia nātou ʼi tanatou ʼosi mate, koia la ʼaē ʼe ʼalutahi ai te ʼu higoa mo te ʼu meʼa ʼaē neʼe fai e te hahaʼi.”
ʼI te manatu ʼa ʼihi hahaʼi sivisivi, neʼe mole foaki kia Nimelote tona higoa ʼaia ʼi tona ʼaho tupu. Kae ko te higoa ʼaia neʼe foaki age ki ai moʼo faka ʼalutahi mo tana agatuʼu, ʼi tana ʼosi fai te aga ʼaia. Ohage la, ʼe ʼui fēnei e C. F. Keil: “Ko te higoa ʼaenī ko Nimelote mai te kupu [ma·radhʹ] ʼaē ʼe faka ʼuhiga ‘ ʼe tou agatuʼu anai,’ ʼe hā ʼaki ai tana fakafeagai mālohi ki te ʼAtua. ʼE tonu ʼaupito te higoa ʼaia, koia ʼe hā mai ai ko te ʼu hahaʼi ʼaē neʼe nonofo ʼi tona temi, neʼe nātou fakahigoaʼi feiā ia ia, pea neʼe liliu ko tona higoa.” ʼI te kiʼi nota ʼi te lalo pasina, ʼe fakaʼaogaʼi e Keil te meʼa ʼaē neʼe tohi fēnei e te tagata fai hisitolia ko Jacob Perizonius: “ ʼI taku manatu, ko te tagata ʼaia [ia Nimelote], neʼe ko he tagata kapu manu aga fekai pea neʼe lagolago kia ia tona ʼu kaumeʼa. Neʼe lau tuʼumaʼu te kupu ʼaenī ‘nimelote, nimelote,’ ʼo ina fai tuʼa lua, pea ko tona faka ʼuhiga, ‘Tou agatuʼu! Tou agatuʼu!’ moʼo uga he tahi ʼu hahaʼi ke nātou agatuʼu. Koia ki muli age, neʼe fakahigoaʼi ia ia e te hahaʼi, ʼo toe feiā pe mo Moisese, ʼaki te higoa ʼaia.”
ʼE mahino ia, neʼe mole faka logona e Nimelote tona higoa. ʼE mole ʼiloʼi te higoa ʼaē neʼe foaki age kia ia ʼi tona ʼaho tupu. Neʼe puli tona higoa ʼi te hisitolia, ohage ko te ʼu higoa ʼo te ʼu hahaʼi ʼaē neʼe nātou muliʼi ia ia. ʼE mole ʼi ai hona hōloga ke ina toʼo tona higoa. ʼE mole fakavikiviki he tahi kia ia peʼe faka kolōliaʼi, kae neʼe tupu ʼaki ai hona fakalainoaʼi. ʼAki te higoa ko Nimelote, ʼe ʼiloʼi anai ʼo talu ai, neʼe ko te tagata agavale ʼaē neʼe agatuʼu kia Sehova ʼAtua.