Te Tohi Mai Te Kolesi Pule
Naʼi Kaugā Fakamoʼoni ʼa Sehova:
ʼE ko he toe pilivilēsio ʼe tou maʼu ʼaē ko te fua ʼo te huafa ʼo Sehova, te Tuʼi ʼAliki ʼo Te ʼAtulaulau! Ko te huafa ʼaia ʼe heʼegata, ʼe mole feala ke puli ʼi he temi, pea ʼe mole hona tatau. Neʼe ko Sehova totonu ʼaē neʼe ina foaki mai ia tona huafa ke tou fua, pea ʼe ʼiloʼi tāfito tātou ʼaki ia te huafa ʼaia talu mai te taʼu 1931. (Isa. 43:10) ʼE tou fiameʼameʼa ʼi tatatou fakahā ko tātou ko te kau Fakamoʼoni ʼa Sehova.
ʼE faiga tuʼumaʼu pē e te Tēvolo ke ina molehi ia te huafa ʼo te ʼAtua. Ko te ʼu puleʼaga, ʼaē ʼe ina puleʼi, ʼe natou manukinuki ki te huafa ʼo Sehova. Ko Papiloni Lahi, te puleʼaga fakamālamanei ʼo te lotu hala, ʼe fehiʼa ki te huafa ʼo te ʼAtua pea neʼe ina molehi ʼi te ʼu tuʼuga fakaliliu ʼo te Tohi-Tapu. Kae ko Sesu neʼe ina fakamaʼuhigaʼi ia te huafa ʼo tana Tamai, ʼo ina fakamuʼamuʼa ʼi te faikole ʼaē neʼe ina akoʼi age ki tana kau tisipulo. Neʼe ina ʼui fēnei: “ ʼE tonu ke kotou faikole fēnei: ‘Ko tamatou Tamai ʼe ʼi selō, ke tapuhā tou huafa.’ ” (Mat. 6:9) Ki muli age, ʼi tana faikole fakamālotoloto ki tana Tamai, neʼe ina ʼui fēnei: “Neʼe au fakaʼilo tou huafa ki te kau tagata ʼaē neʼe ke foaki mai kiā te au, mai te lotolotoiga ʼo te mālamanei.” (Soa. 17:6) ʼI tatatou fia mulimuli ki te faʼifaʼitaki lelei ʼa Sesu, ʼe lahi age tatatou fia palalau ki te huafa ʼo Sehova ʼi te kele kātoa.
Ko te vaega Tohi-Tapu ki te taʼu 2009, “Ko te fai ʼo he fagonogono ʼe kātoa ʼo ʼuhiga mo te logo lelei,” neʼe ina uga tātou ke tou fakahoko ke kātoa totatou minisitelio. (Gāue 20:24) ʼE mahino ia, neʼe tapuakina lahi e Sehova tatatou ʼu faiga ʼi te taʼu gāue ʼaenī kua hili. Ko he fakamoʼoni fakaofoofo neʼe foaki ʼi te mālamanei kātoa, ʼo fakakolōliaʼi ai pea mo fakamaʼuhigaʼi ai ia te huafa ʼo Sehova. Ko te laka foʼou ʼo te kau fai fakamafola, ʼaē neʼe toko 7 313 173 neʼe natou fakatahiʼi tonatou ʼu leʼo ʼi tanatou fai fakamafola pea mo akoʼi ia te hahaʼi loto moʼoni, ʼaē ʼe natou kumi he ʼu puleʼaki ki tonatou ʼu tuʼuga faigataʼaʼia ʼo te ʼaho fuli. Ko te hahaʼi ʼe toko 18 168 323 neʼe natou kau ki te ʼAho Fakamanatu ʼo Te Mate ʼo Kilisito, ʼo fakahā ai ko te ʼu toko lauʼi miliona hahaʼi ʼe kei feala ke natou pāuiʼi ia te huafa ʼo Sehova ʼi muʼa ʼo te fakaʼosi ʼo te tuʼu agakovi ʼaenī.
ʼI te kei fakagafua e Sehova, ʼe tou hoko atu anai te fakamafola ʼo te logo lelei ʼo te Puleʼaga ʼaki he faʼafai, ʼo tou fakaʼaogaʼi te ʼu fealagia fuli moʼo maʼu te hahaʼi ʼi totatou ʼu telituale. (Mat. 24:14; Mko. 13:10) Peʼe tou fai fakamafola ʼi te ʼu ʼapi, ʼi te ala, peʼe ko he fagonogono faigamālie, peʼe tou faitohi peʼe tou fai telefoni, ʼofa pē ke tou faiga ke ʼiloʼi e te hahaʼi tokolahi ʼaupitō ia te huafa ʼo Sehova, mo tona finegalo, pea mo tana fakatuʼutuʼu.
ʼE tou tui papau kua vave pē te fakatapuhā e Sehova ia tona huafa. (Esk. 36:23) Kua ovi mai te temi ʼaē kā mole tou toe logo anai ki te hahaʼi fuli ʼaē ʼe natou laukovi ki te huafa ʼo te ʼAtua. ʼE ko he ʼaho fakakolōlia anai maʼa te ʼu kaugana agatonu fuli ʼa Sehova, ʼaē ʼe natou fakahā ia te huafa ʼo Sehova pea mo lagolago ki tana pule faʼitaliha ʼi te ʼatulaulau!
Neʼe hā lelei ia te tokaga ʼofa ʼa Sehova ki tana hahaʼi ʼaki ia te ʼu Fakatahi Fakamālamanei pea mo Fakatisitilike ʼaē ko tona kupu tāfito: “Kotou Nonofo ʼAlaʼala!” pea neʼe fai teitei pē ʼi te mālamanei kātoa ʼi te taʼu 2009. Ko te ʼu fakatahi ʼaia ʼaē neʼe ko he ʼu fakatahi maʼuhiga ʼo totatou hisitolia fakateokalatike, neʼe natou uga ia tātou ke lahi age tatatou mahino ki te ʼaoga ʼaē ke tou nonofo ʼalaʼala ki te ʼaho ʼo Sehova.—Mko. 13:37; 1 Tes. 5:1, 2, 4.
ʼE moʼoni, ʼe agalelei ia Sehova kiā tātou; ʼe ina fakafonu totatou loto ʼaki te fiafia. ʼE ina fakatakoto tātou ʼi he ʼu koga meʼa lunaʼia ʼe mahu ai te luna pea mo ina takitaki tātou ki te ʼu koga meʼa mālōlōʼaga ʼaē ʼe tatafe lelei ai te vai.—Pes. 23:1, 2; 100:2, 5.
Kotou haga tui papau ki te tapuakiʼi ʼo koutou e Sehova ʼi te lahi tuʼumaʼu ʼo takotou ʼu gāue ki te Puleʼaga ʼaē ʼe kotou fai maʼa Ia ʼi te ʼu māhina kā hoko mai!
ʼE matou ʼofa atu,
Tokotou ʼu tehina,
Te Kolesi Pule ʼa Te Kau Fakamoʼoni ʼa Sehova