Tou Fakaʼaogaʼi Te Pepa Lotu ʼi Te Temi Faigamālie Fuli Pē
1. ʼE ʼaoga kiteā te pepa lotu ʼE Kotou Fia ʼIloʼi Koa Te Moʼoni?
1 Neʼe tā tāfito te pepa lotu ʼE Kotou Fia ʼIloʼi Koa Te Moʼoni? moʼo tokoni kiā tātou ke tou kamata he ʼu ako Tohi-Tapu mo te hahaʼi. ʼE ko he tahi foki ʼaia meʼa gāue lelei ke tou fakaʼaogaʼi moʼo tō te fulumeto ʼo te moʼoni. (Tnk. 11:6) Koʼenī he ʼu faʼahiga fai ke feala ai hatatou fakaʼaogaʼi lelei te pepa lotu.
2. ʼE tou lava fakaʼaogaʼi feafeaʼi te pepa lotu moʼo kamata ʼaki he fai palalau?
2 Moʼo Kamata ʼAki He Fai Palalau: ʼE kita lava fakatoʼo age te pepa lotu ki te tagata ʼo te ʼapi, ʼo kita fakahā age ki ai te ʼu fehuʼi e ono ʼaē ʼe tuʼu ʼi te takafi, pea mo fehuʼi fēnei age: “Ko te fehuʼi fea ʼi te ʼu fehuʼi ʼaenī neʼe kua ke fai?” ʼI tana kua ʼosi tali atu, kotou fakahā age te tali ʼa te Tohi-Tapu ʼaē ʼe tuʼu ʼi te kiʼi pepa lotu ki he fehuʼi ʼi te ʼu fehuʼi ʼa te tagata ʼo te ʼapi pea mo lau age he vaega Tohi-tapu ʼe tuʼu ai. Lau age pea mo fakamahino fakanounou age te tuʼa pāsina, pea mo tuku age te tohi Te Ako Mai Te Tohi-Tapu. Tatau aipē peʼe mole ina toʼo te tohi, kae neʼe kua kotou tuku age te pepa lotu, ʼaē kā feala ai anai ki te ʼu moʼoni ke tō ki tona loto.—Mat. 13:23.
3. Kapau ʼe maʼumaʼua fau he loto fale, koteā ʼaē ʼe lagi lelei ke tou fai?
3 Kapau ʼe Maʼumaʼua Fau Te Loto Fale: ʼE lagi feala anai hakita ʼui fēnei age: “Mai tona ʼaluʼaga ʼaē ʼe mole ko he temi lelei ʼaenī ʼe mā ʼomai ai, ʼe lagi feala pē haku tuku atu te pepa lotu ʼaenī. ʼE tuʼu ai te ʼu fehuʼi maʼuhiga e ono ʼe fai māhani e te tokolahi, pea ʼe ʼi ai mo tona ʼu tali Fakatohi-tapu. Kā au toe liliu mai anai, pea ʼe ke fakahā mai anai pe koteā tau manatu kiai.”
4. Koteā ʼaē ʼe tou lava palalau kiai mokā ʼe tou tuku te pepa lotu ki he tahi ʼi te fai fagonogono ʼi te ala?
4 Kā Kita Fai Fagonogono ʼi Te Ala: ʼE feala hakita ʼui fēnei age: “Mālo. Neʼe kua ke fai koa he fehuʼi ʼi te ʼu fehuʼi ʼaenī? [Tuku ke fai mai hana tali.] ʼE tohi ʼi te pepa lotu te ʼu tali ʼe tāsilo lelei mo ʼaoga, pea ʼe tou maʼu ʼi te Tohi-Tapu.” Kapau ʼe mole fakavilivili ia ia ʼaē ʼe fai palalau mo kita, pea ʼe lagi lelei ke kita fai palalau mo ia ki he tali ʼi te ʼu tali ʼaē ʼe tuʼu ʼi te pepa lotu pea mo tuku age te tohi Te Ako Mai Te Tohi-Tapu?
5. Koteā ʼaē ʼe tou lava fai ʼi ʼihi temi mo te pepa lotu mokā ʼe lāvaki te ʼapi?
5 Te ʼu ʼApi ʼe Lāvaki: ʼI ʼihi telituale, ʼi te agamāhani ʼe tuku e te ʼu kaugā fagona he tohi mokā natou fakatokagaʼi ʼe mole he tahi ʼi te ʼapi. Kapau ko he agamāhani ʼaia ʼo takotou kōkelekāsio, pea he koʼē ʼe mole kotou tuku muʼa te pepa lotu ʼE Kotou Fia ʼIloʼi Koa Te Moʼoni? Kā kita toe liliu ki te ʼapi ʼaia, ʼe feala hakita ʼui fēnei: “ ʼI tamā ʼomai ki henī neʼe ke puli, koia neʼe mā tuku atu ai te pepa lotu ʼaenī ʼi tou muʼa matapā. Ko te fehuʼi fea ʼi te ʼu fehuʼi ʼaenī ʼe ke fia maʼu anai hona tali kiai?”
6. He koʼē ʼe ko he meʼa gāue lelei ki te fai fakamafola te pepa lotu ʼE Kotou Fia ʼIloʼi Koa Te Moʼoni?
6 Ko te pepa lotu ʼE Kotou Fia ʼIloʼi Koa Te Moʼoni?, ʼe talanoa ki te moʼoni pea ʼe faigafua tona lau mo nounou. ʼE fakahagahaga tāfito tona tā kiā nātou ʼaē ʼi te ʼu lotu fuli pea mo te ʼu agaʼi fenua fuli. ʼE faigafua pē tona fakahā; ʼe feala pē lā mo te kau tūpulaga pea mo te kau fai fakamafola foʼou ke natou kau ki tona tufa. ʼE tou fakaʼaogaʼi koa te pepa lotu ʼaia ʼi te ʼu temi faigamālie fuli pē?