Kotou Fakahagahaga Lelei ʼAkotou ʼu Faiga
1. ʼE fakaʼuhiga feafeaʼi ia 1 Kolonito 9:26 ki te fai fakamafola?
1 Neʼe tohi fēnei e te ʼapositolo ko Paulo: “Pea kia au, e au lele, kae e mole au hoko lele feia pe; e au fuhu, kae e mole ta noa pe te aele.” (1 Ko. 9:26) Neʼe talanoa ia Paulo ki tana ʼu faiga fakamālotoloto ki te ʼu fakatuʼutuʼu fakalaumālie. Kae, ʼi te agamāhani, ʼe toe fakaʼaogaʼi te ʼu kupu ʼaia ki te fai fakamafola. ʼE tou fia fakahagahaga fakapotopoto ʼatatou ʼu “ta,” peʼe ko ʼatatou ʼu faiga ke fua lelei age. ʼO feafeaʼi?
2. ʼE tou lava faʼifaʼitaki feafeaʼi ia te fai fakamafola ʼa Paulo mo te ʼu kau fakamafola evaselio ʼi te ʼuluaki sēkulō ʼi tatatou filifili lelei ia te temi pea mo te ʼu koga meʼa ʼaē ʼe tou fai fakamafola ai?
2 Kotou ʼOlo Ki Te ʼu Koga Meʼa ʼAē ʼe Maʼu Ai Te Hahaʼi: ʼI te ʼuluaki sēkulō, neʼe fakamafola e Paulo mo ʼihi ʼu kau fakamafola evaselio ʼi te ʼu koga meʼa ʼaē neʼe maʼu ai te hahaʼi. (Gaue 5:42; 16:13; 17:17) Koia, kapau ʼe tou maʼu te hahaʼi ʼi te afiafi ʼi totatou telituale, ʼe ko he temi lelei ke tou fai fakamafola ai ʼi te ʼu ʼapi. ʼE hahaʼi koa ia te ʼu taulaga kā ʼi te māfoatā peʼe ko te ʼu hili hoʼatā i te temi ʼaē ʼe ʼolo ai ia te hahaʼi ʼo gāue peʼe ʼi te temi ʼaē ʼe natou liliu ai ki ʼonatou ʼapi? Ko te temi fea aē ʼe hahaʼi ai te ʼu fale koloa ʼo totatou telituale? ʼE ko te ʼu temi lā ʼaia ʼaē ʼe feala ke fua lelei ai ia te fagonogono ʼi te ala.
3. ʼE tou lava fakahagahaga lelei feafeaʼi ʼatatou ʼu faiga ʼi tatatou gāueʼi ia totatou telituale?
3 Kotou Gāueʼi Fakalelei Ia Te Telituale: ʼE toe maʼuhiga foki ke tou fakahagahaga lelei ʼatatou ʼu faiga ki te faʼahiga gāueʼi ʼo totatou telituale. Ohagē lā, ʼe mole tou ʼolo fakapupu anai ki he koga meʼa pē e tahi, heʼe puli ai ia te temi moʼo faigaʼi ke fakatuʼutuʼu ia te kūtuga, koia ʼaē ʼe lelei age ai ke vaheʼi ia te kūtuga ʼaia. Tatau aipē, mo kapau ʼe tou gāue ʼi te tuʼa kolo, ʼe tou fai fakavilivili anai ia te telituale kātoa pea ʼe lahi age anai ia te ʼu fealagia ʼaē ke tou fai palalau ai mo te hahaʼi mo kapau ʼe mole lahi fau te ʼu motokā. ʼE feala koa ke kotou kole hakotou telituale ʼe ovi atu ki tokotou ʼapi, moʼo fakasiʼisiʼi ia te temi feʼaluʼaki?
4. Koteā ʼaē ʼe tokoni mai anai ke tou liliu ko “ni tautai tagata” popoto?
4 Neʼe fakatatau e Sesu ia te kau fakamafola evaselio ki “ni tautai tagata.” (Mko. 1:17) Ko te fakatuʼutuʼu ʼa te tagata tautai ʼe mole faiga pē ke ʼalu ʼo gelu kae ʼe faiga tāfito ke maʼu he ika. Koia, ko te ʼu tagata tautai popoto ʼe ʼolo ʼo gelu ʼi te ʼu temi pea mo te ʼu koga meʼa ʼaē ʼe ikaʼia ai, pea ʼe fakavilivili ai ia te gelu. Eī, ʼe natou fakaʼaogaʼi fakalelei ia tonatou mālohi. ʼE tou fakahā koa ia te taʼi faʼafai ʼaia ʼi tatatou minisitelio?—Hep. 6:11.