Tou Tokoni Kia Natou ʼAe ʼe Mole Natou Tali Ia Te Tohi Te Ako Mai Te Tohi-Tapu
1. ʼE tali koa e te hahaʼi fuli ia te tohi Te Ako Mai Te Tohi-Tapu? Kotou fakamahino.
1 Ke feala ki he tahi ke liliu ʼo tauhi kia Sehova, ʼe tonu ke ina iloʼi pe kotea ʼae ʼe tuʼu ʼi te Tohi-Tapu. Kaʼe ʼe kau ʼihi ki he lotu ʼe mole ko he lotu Fakakilisitiano peʼe mole natou tui ko te Tohi-Tapu ʼe ko te Folafola ʼa te ʼAtua. Pea ko ʼihi leva ʼe mole natou tui ʼe ʼi ai he ʼAtua pea ʼe mole natou fakaʼapaʼapa ki te Tohi-Tapu. Kotea he ʼu tohi ʼe feala ke tokoni kia natou ʼae ʼe mole natou tali anai ia te tohi Te Ako Mai Te Tohi-Tapu? Ko te ʼu tokoni ʼae ʼe hoa mai neʼe fakatafito ki te ʼu tala manatu ʼa he kau faifakamafola mai ia fenua ʼe 20.
2. Kapau ʼe ui mai e he tahi ʼe mole tui ʼe ʼi ai te ʼAtua, kotea ʼae ʼe tonu ke tou faiga ke tou iloʼi, pea kotea tona tupuʼaga?
2 Ko Natou ʼAe ʼe Mole Tui ʼe ʼi Ai Te ʼAtua: Kapau ʼe ui atu e he tahi ʼe mole tui ʼe ʼi ai te ʼAtua, pea ʼe lelei ke tou faiga ke tou iloʼi tona tupuʼaga. ʼE tui koa ki te evolisio? ʼE mole kei tui koa ki te ʼAtua ʼuhi ko te ʼu aga heʼe faitotonu ʼi te malamanei peʼe ko te malualoi ʼo te ʼu lotu? ʼE haʼu koa mai he fenua ʼe tapuʼi ai te tui ki te ʼAtua? Lagi mole fakafisi ʼosi ia ʼe ʼi ai te ʼAtua, kaʼe lagi kia ia ʼe mole he ʼaoga ʼo tana tui ki te ʼAtua. Neʼe tokagaʼi e te kau faifakamafola, ka natou fehuʼi age ki he tahi pe ko tana manatu ʼaia talu mai fualoa, pea ʼe ina fakamahino. Koia, kotou fakalogo pea ʼaua naʼa kotou tuʼusi tana palalau. Ka kua tou mahino pe ko ʼe ʼe mole tui ʼe ʼi ai te ʼAtua, ʼe feala leva ke tou iloʼi pe feafeaʼi hatatou tali pea mo te tohi fea ʼae ke tou foaki age.—Taag. 18:13.
3. ʼE feafeaʼi hatatou fakaha tatatou fakaʼapaʼapa ki he tahi pea mo tana lotu?
3 ʼI takotou tali, kotou tokakaga naʼa hage ʼe kotou tauʼi ia tana manatu. Koʼeni te tokoni ʼe tou maʼu mai Amelika: “ ʼE maʼuhiga ʼaupito ke tou fakaʼapaʼapa ki te loto faʼitaliha ʼa te hahaʼi ʼo ʼuhiga mo te lotu ʼae ʼe natou fia kau ki ai. ʼE mole tou faiga anai ke tou fakafihiʼi ʼanatou manatu, kaʼe ʼe lelei age ke tou fai he ʼu fehuʼi ke fakakaukauʼi ai te hahaʼi pea ke natou mahino leva.” Ohage la, ʼi te ʼosi fakalogo ʼa te taupau feʼaluʼaki moka fakaha age e he tahi tana manatu, pea ʼe ina kamata fenei tana tali: “Neʼe kua ke fakakaukauʼi koa la ia te manatu ʼaeni?”
4. ʼE tou lava tokoni feafeaʼi ki te kau Putisi?
4 Tokolahi te kau Putisi ʼe mole natou iloʼi te ʼAtua. Ko ʼihi kau faifakamafola ʼi Pilitania ʼe natou fakaʼaogaʼi te kaupepa lahi La paix et le bonheur durables : comment les trouver moka natou palalau mo natou ʼaia. Hili tanatou vakaʼi mo natou ʼaia te ʼu ʼuluaki palalau ʼo te kaupepa lahi ʼaia, ʼe natou faipalalau ki te kapite “Existe-t-il vraiment un Créateur Très-Haut ?” pea hili ʼaia, ʼe natou vakaʼi te kapite “Un guide bénéfique pour tous les humains.” ʼOsi tanatou vakaʼi ʼaia, pea feala leva ke natou palalau ki te tohi Te Ako Mai Te Tohi-Tapu pea mo natou ui fenei: “Tatau aipe pe ʼe mole ke tui ki te ʼAtua, kaʼe ʼe fua lelei anai kia koe moka ke ako te Tohi-Tapu heʼe tuʼu ai te ʼu tokoni ʼe ʼaoga anai ki tou maʼuli.” Ohage la, ko te pionie ʼi Amelika ʼe faifakamafola ʼi te telituale Siaina, neʼe ina ui fenei: “Tokolahi ʼi tamatou telituale ʼe natou fia lau. Pea ʼi te agamahani, ka matou toe ʼaʼahi natou, pea neʼe kua natou ʼosi lau fuli te tohi ʼae neʼe matou tuku age. Kaʼe ʼe mole natou mahino pe kotea te fakaʼuhiga ʼo te fai ʼo he ako Tohi-Tapu. Koia, ʼe au ʼuluaki tuku muʼa kia natou te kaupepa lahi Logo Lelei heʼe feala ai ke matou faipalalau ki ai.” Pea ko te taupau ʼo te siliko ʼe ina ʼaʼahi te ʼu kokelekasio lea Fakasiaina ʼi Amelika, ʼe ina ui ʼe feala pe te fakaha age ia te tohi Te Ako Mai Te Tohi-Tapu ʼi tatatou ʼuluaki faipalalau. Kaʼe ʼe lagi lelei ke kamata te ako ʼi te kapite 2, ʼae ʼe talanoa ai ʼo ʼuhiga mo te Tohi-Tapu, kaʼe mole ko te kapite 1 ʼae ʼe talanoa ai ʼo ʼuhiga mo te ʼAtua.
5. He ko ʼe ʼe maʼuhiga ke tou faʼa kataki?
5 ʼE maʼuhiga ke tou faʼa kataki koteʼuhi ʼe mole tui atu aipe he tahi ki te ʼAtua. ʼI tatatou kamakamata faipalalau mo ia, ʼe mole lagi manatu tahi anai mo tatou ʼe ʼi ai te Tupuʼaga. Kaʼe ʼaki te temi, ʼe fakamoʼoni anai ʼe lagi ʼe ʼi ai te Tupuʼaga, peʼe mahino anai pe ko ʼe ʼe tui ʼihi ki te faʼahi ʼaia.
6. He ko ʼe ʼe lagi mole fia logo ʼihi ʼo ʼuhiga mo te Tohi-Tapu?
6 Ko Natou ʼAe ʼe Mole Fia Logo Peʼe Mole Falala Ki Te Tohi-Tapu: Kaʼe ʼi ʼihi temi, maʼia mo he tahi ʼe tui ki te ʼAtua ʼe mole ina fia iloʼi pe kotea ʼae ʼe tuʼu ʼi te Tohi-Tapu heʼe mole tui ia ʼe ko te Folafola ʼa te ʼAtua. ʼE lagi maʼuli ʼi he fenua ʼe mole lotu Fakakilisitiano pea mo tui ko te Tohi-Tapu ʼe ko he tohi ia ʼa te ʼu lotu Fakakilisitiano. Peʼe lagi maʼuli ʼi he fenua ʼe ui ʼe lotu Fakakilisitiano kaʼe ʼi tana manatu ʼe mole ʼaoga kia ia te ʼu tokoni ʼa te Tohi-Tapu. ʼE tou lava tokoni feafeaʼi kia natou ʼaia ke natou fia iloʼi te Tohi-Tapu pea ke lagi natou tali ke natou ako te tohi Te Ako Mai Te Tohi-Tapu?
7. Kotea ʼae ʼe feala ke tou fai ke tupu ai te fia logo ʼa te hahaʼi ʼo ʼuhiga mo te Tohi-Tapu?
7 Neʼe tohi fenei e te filiale ʼo Grèce: “Ko te tokoni lelei ʼae ʼe feala ke tou fai kia natou ʼae mole fia logo ʼo ʼuhiga mo te Tohi-Tapu ʼe ko hatatou avahi te Tohi-Tapu pea mo fakaha age pe kotea ʼae ʼe tuʼu ai. Tokolahi te kau faifakamafola neʼe natou tokagaʼi ʼe malave malohi age te ʼu manatu ʼi te Tohi-Tapu ki te loto ʼo te hahaʼi ʼi te ʼu palalau ʼae ʼe natou fai. (Hep. 4:12) ʼI tanatou lau te huafa ʼo te ʼAtua ʼi te Tohi-Tapu neʼe natou fia iloʼi lahi age ai ʼo ʼuhiga mo te Tohi-Tapu.” Neʼe tohi fenei e te filiale ʼo Initia: “ ʼE lahi te kau Inituisi ʼe natou leleiʼia te moʼoni ʼae ʼo ʼuhiga mo te maʼuli pea mo te mate, ʼo toe feia foki mo te fakapapau ʼi te Tohi-Tapu ʼo he malama ʼe mole toe ʼi ai anai he fakapalatahi.” Pea ka palalau ʼihi kau faifakamafola ki te hahaʼi ʼo ʼuhiga mo he ʼu fihifihia neʼe hoko ʼi tonatou fenua, pea ʼe natou maʼu ai he faigamalie ke natou fakaha pe kotea ʼae ʼe ui ʼi te Tohi-Tapu ʼo ʼuhiga mo te ʼu gaue ka fai anai e te Puleʼaga ʼo te ʼAtua moʼo fetogi te ʼu aluʼaga ʼaia.
8. Kotea ʼae ʼe feala ke tou ui kia natou ʼae ʼe mole fakaʼapaʼapa ki te Tohi-Tapu ʼuhi ko te ʼu lotu?
8 Kapau ʼe mole fakaʼapaʼapa he tahi ki te Tohi-Tapu ʼuhi ko te ʼu lotu, kotou fakaha age neʼe fakaʼaogaʼi hala e te ʼu lotu ia te Tohi-Tapu pea mo te ʼu akonaki ʼae ʼe tuʼu ai. Neʼe tohi fenei e te filiale ʼo Initia: “ ʼI ʼihi temi, ʼe tonu ke tou tokoni ki te hahaʼi ke natou mahino ʼe mole mulimuli te ʼu lotu fuli ki te Tohi-Tapu.” Neʼe fakaha e te filiale ʼaia ko te kau Inituisi ʼe natou punamaʼuli moka natou lau te kapite 4 ʼo te kaupepa lahi Quel est le but de la vie ? Comment le découvrir ?, ʼae ʼe fakamahino ai te faiga ʼa te ʼu lotu ke natou fakaʼaogaʼi hala te Folafola ʼa te ʼAtua pea mo tanatou kumi ʼae ke natou maumauʼi. Ko te pionie ʼi Brésil ʼe ina ui fenei ki te hahaʼi: “He ko ʼe ʼe mole kotou kumi ke kotou iloʼi te ʼu manatu ʼae ʼe tuʼu ʼi te Tohi-Tapu? Tokolahi neʼe natou fai te faʼahi ʼaia, pea neʼe mole fakamaʼua kia natou ke natou kau ki he lotu. ʼE mahino ia ʼe kotou punamaʼuli anai ʼi te ʼu meʼa ʼae ka kotou ako.”
9. He ko ʼe ʼe mole tonu ke tou lotovaivai moka mole fia logo he tahi ki te ʼu manatu ʼae ʼe tuʼu ʼi te Tohi-Tapu?
9 ʼE sio ia Sehova ki te loto ʼo te hahaʼi takitokotahi. (1 Sam. 16:7; Taag. 21:2) ʼE ina taki mai te hahaʼi loto faitotonu ki te tauhi moʼoni. (Soa. 6:44) Tokolahi ia natou ʼaia neʼe mole natou iloʼi ʼe ʼi ai te ʼAtua peʼe neʼe mole natou iloʼi te Tohi-Tapu. ʼAki tatatou faifakamafola, ʼe tou foaki ai te faigamalie ke “fakamauli te tagata fuli, pea ke natou kaku ki te iloi katoa o te mooni.” (1 Tim. 2:4) Koia, ʼaua naʼa kotou lotovaivai moka mole fia logo ʼihi ki te ʼu manatu ʼae ʼe tuʼu ʼi te Tohi-Tapu! Kotou fakaʼaogaʼi te tahi ʼu tohi ʼae ʼe kotou maʼu ʼi takotou lea moʼo fakatupu tanatou fia logo. ʼAki te temi, ʼe lagi feala anai ke kotou hoko atu takotou faipalalau ki te tohi ʼae ʼe tonu ke fakatafito ki ai te ʼu ako Tohi-Tapu, ʼae ko te tohi Koteā ʼAē ʼe Akoʼi Moʼoni Mai ʼi Te Tohi-Tapu?
[Paki ʼo te pasina 4]
ʼE feala ke ke ʼahiʼahi te ʼu faʼahi ʼaeni mo kapau ʼe ui atu e he tahi ʼe mole tui ʼe ʼi ai te ʼAtua:
• Ke ke kumi te tupuʼaga ʼa tana manatu feia, ʼo ke fehuʼi fenei age: “ ʼE ko tau manatu koa ʼaia talu mai fualoa?”
• Kapau ko he Putisi, ke ke fakaʼaogaʼi te kaupepa lahi La paix et le bonheur durables : comment les trouver, ʼi te ʼu pasina 9-12.
• Kapau ʼe tui ki te evolisio, ʼe feala ke ʼaoga atu ia te ʼu tohi ʼaeni:
Te ʼu alatike ʼi te Réveillez-vous ! ʼi te kupu tafitō: “Hasard ou conception ?”
Te foʼi ʼata Les merveilles de la création révèlent la gloire de Dieu
Te ʼu kaupepa lalahi Une vie pleinement satisfaisante : comment ?, kapite 4; mo te La vie a-t-elle été créée ?, pea mo Cinq questions à se poser sur lʼorigine de la vie
• Kapau ʼe mole kei tui ki te ʼAtua ʼuhi ko te ʼu aga heʼe faitotonu pea mo te ʼu mamahi, ʼe feala ke ʼaoga ia te ʼu tohi ʼaeni:
Te tohi Y a-t-il un Créateur qui se soucie de vous ?, ʼi te kapite 10
Te ʼu kaupepa lalahi ʼE Tokaga Moʼoni Koa Te ʼAtua Kia Tatou? te faʼahi 6, pea mo Quel est le but de la vie ?, te faʼahi 6
• ʼE feala ke ke hoko atu ki te tohi Te Ako Mai Te Tohi-Tapu moka ke tokagaʼi kua ina tali te manatu ʼae ʼe ʼi ai te ʼAtua. ʼE lelei ke ke kamata ʼi te kapite 2 peʼe ko he tahi age kapite ʼe ina leleiʼia.
[Paki ʼo te pasina 5]
ʼE feala ke ke ʼahiʼahi te ʼu faʼahi ʼaeni mo kapau ʼe mole tui ki te Tohi-Tapu:
• Vakaʼi te ʼu kapite 17 mo 18 ʼo te tohi La vie : comment est-elle apparue ? Évolution ou création ?
• Kapau ʼe ko he Inituisi, fakaʼaogaʼi te kaupepa lahi Pourquoi adorer Dieu en amour et en vérité ?
• Kapau ʼe ko he Sutea, fakaʼaogaʼi te kaupepa lahi Connaîtrons-nous un jour un monde sans guerre ? ʼi te ʼu pasina 3-11.
• Faipalalau ki te ʼu lelei ʼe feala ke ina maʼu moka ʼe mulimuli ki te ʼu tokoni ʼa te Tohi-Tapu. Ko te ʼu tohi ʼaeni ʼe feala ke ke fakaʼaogaʼi moʼo fakaha ki he tahi te ʼaoga ʼo te ʼu tokoni ʼa te Tohi-Tapu:
Te ʼu alatike ʼi te Réveillez-vous ! ko tona kupu tafitō: “De lʼaide pour les familles”
Te foʼi ʼata La Bible : une force dans votre vie
Te ʼu kaupepa lalahi Te ʼu Logo Lelei Mai Te ʼAtua!, ako 9 mo te 11; mo te Un livre pour tous, ʼi te ʼu pasina 22-26; pea mo Une vie pleinement satisfaisante : comment ?, te faʼahi 2
Kapau ʼe ko he Putisi, fakaʼaogaʼi te kaupepa lahi La voie qui mène à la paix et au bonheur, ʼi te ʼu pasina 3-7.
Kapau ko he Mahometa, fakaʼaogaʼi te kaupepa lahi La vraie foi : le chemin qui mène au bonheur, te faʼahi 3.
Kapau ʼe ke faifakamafola ʼi he telituale ʼe mole fakaʼapaʼapa ai te hahaʼi ki te Tohi-Tapu, ʼe lagi lelei ke mole ke ui age ʼe toʼo mai te Tohi-Tapu ia te ʼu palalau ʼae ʼe ke fai, kaʼe ke fai ia te faʼahi ʼaia hili tau ʼaʼahi tuʼa lahi he tahi.
• Ke ke fakamahino pe neʼe hoko feafeaʼi te ʼu lea fakapolofeta ʼae ʼe tuʼu i te Tohi-Tapu. ʼE feala ke ke fakaʼaogaʼi te ʼu tohi ʼaeni:
Te foʼi ʼata La Bible : un récit historique exact, des prophéties dignes de foi
Te kaupepa lahi Un livre pour tous, ʼi te ʼu pasina 27-29
• ʼE feala ke ke hoko atu ki te tohi Te Ako Mai Te Tohi-Tapu ʼi te temi pe ʼae ʼe ina fehuʼi atu ai pe kotea te manatu ʼa te Tohi-Tapu ʼo ʼuhiga mo he faʼahi.
[Paki ʼo te pasina 6]
Kapau ʼe ui atu e he tahi “ ʼE mole au tui au ʼe ʼi ai te ʼAtua,” ʼe feala ke ke ui fenei:
• “ ʼE feala la haku fakamahino fakanounou atu pe kotea ʼae neʼe tupu ai taku tui ʼe ʼi ai te Tupuʼaga?” Pea ke fakaha age he ʼu manatu mai te tohi Comment raisonner, ʼi te ʼu pasina 84-86, peʼe ke fakatuʼutuʼu ke ke toe liliu age mo he tohi neʼe ke leleiʼia.
• “Kaʼe kapau la ʼe ʼi ai he ʼAtua, ʼe ke loto anai ke feafeaʼi te ʼAtua?” Tokolahi te hahaʼi ʼe natou tali ʼe natou fia fakaovi ki he ʼAtua ʼe ʼofa, mo faitotonu pea mo manavaʼofa, he ʼAtua ʼe mole fakapalatahi. Fakaha age ʼi te Tohi-Tapu ʼe maʼu e te ʼAtua ia te ʼu kalitate ʼaia. (ʼE lagi feala ke ke toe fakaʼaogaʼi ia te kapite 1 ʼo te tohi Te Ako Mai Te Tohi-Tapu, ʼo ke kamata ʼi te palakalafe 6.)
Kapau ʼe ui atu e he tahi “ ʼE mole au tui au ki te Tohi-Tapu,” ʼe feala ke ke ui fenei:
• “Tokolahi ʼe natou manatu ohage ko koe. ʼE manatu e ʼihi ʼe mole maʼu ʼi te Tohi-Tapu he ʼu manatu fakasienesia peʼe mole ʼaoga ia te ʼu tokoni ʼae ʼe tuʼu ai. Kaʼe ʼe au fia iloʼi pe neʼe kua ke lau koa la ia te Tohi-Tapu? [Tuku ke fai mai hana tali. Pea ke fakaha age te ʼu ʼuluaki palalau ʼae ʼe tuʼu ʼi te pasina 3 ʼo te kaupepa lahi Un livre pour tous, pea ke foaki age.] Tokolahi ʼe mole natou fakaʼapaʼapa ki te Tohi-Tapu heʼe neʼe fakaʼaogaʼi hala e te ʼu lotu. ʼI taku toe liliu mai, ʼe au fia palalau anai mo koe ki te faʼahi ʼaia ʼe tuʼu ʼi te pasina 4 mo te 5.”
• “Tokolahi ʼe natou manatu ohage ko koe. ʼE feala la ke au fakaha atu he manatu ʼi te Tohi-Tapu neʼe au punamaʼuli ki ai? [Lau ia Sopo 26:7 peʼe ko Esaia 40:22, ʼae ʼe fakaha ai ʼe tuʼu ʼi te Tohi-Tapu te ʼu manatu neʼe fakamoʼoni e te sienesia.] ʼE toe maʼu ʼi te Tohi-Tapu te ʼu tokoni poto maʼa te ʼu famili. ʼI taku toe liliu mai, ʼe au fia fakaha atu anai he tokoni ʼi te ʼu tokoni ʼaia.”
• “ ʼE au fakamalō atu ʼi tau fakaha mai tau manatu. Kapau neʼe fai e te ʼAtua he tohi maʼa te malamanei, ʼi tau manatu, kotea la te ʼu manatu ʼae ʼe feala ke tou maʼu ai?” Pea ke fakaha he vaega ʼi te Tohi-Tapu ʼe alu tahi mo tana tali.