Kotou Mamata Ki Te Lelei ʼo Takotou Gāue Kinakina

1-3. (a) Koteā te manatu ʼa te hahaʼi tokolahi ʼo ʼuhiga mo tanatou gāue? (b) Koteā te manatu ʼi te Tohi-Tapu ʼo ʼuhiga mo te gāue ʼe ina fakalotomālohiʼi tātou kiai, pea koteā te ʼu fehuʼi ʼaē kā tou vakaʼi anai ʼi te kāpite ʼaenī?

IĀ ʼAHO nei, maʼa te hahaʼi tokolahi ʼi te mālamanei, ko te gāue ʼe mole ko he meʼa fakatupu fiafia. ʼUhi ko tanatou fai ʼi te ʼaho kātoa ia he gāue ʼe mole natou leleiʼia, koia ʼaē ʼe mole natou fia ʼolo ai ʼo gāue ʼi te ʼaho fuli. ʼE lava uga feafeaʼi ia nātou ʼaē ʼe natou maʼu ia te taʼi manatu ʼaia ke natou leleiʼia tanatou gāue pea mo natou maʼu ai honatou fiafia?

² ʼE fakalotomālohiʼi tātou ʼi te Tohi-Tapu ke tou maʼu ia he manatu ʼe lelei ʼo ʼuhiga mo te gāue kinakina. ʼE ʼui ʼi te Tohi-Tapu, ko te gāue pea mo tona ʼu fua ʼe ko he fakapale. Neʼe tohi fēnei e Salomone: “Ke kai . . . te tagata fuli pē, ʼio ke ʼinu, pea mo mamata ki te lelei ʼo tana gāue kinakina kātoa. ʼE ko te meʼa ʼofa ia ʼo te ʼAtua.” (Tagata Tānaki 3:13) Ko Sehova, ʼaē ʼe ʼofa kiā tātou pea mo fia foaki tuʼumaʼu mai pē ia te meʼa ʼaē ʼe lelei kiā tātou, ʼe loto ia ke tou fiafia ʼi te ʼu gāue ʼaē ʼe tou fai pea mo te ʼu fua ʼaē ʼe tou maʼu mai tatatou gāue kinakina ʼaia. Ke tou nonofo ʼi tona ʼofa, ʼe tonu ke tou mulimuli ki tana manatu pea mo tana ʼu pelesepeto ʼo ʼuhiga mo te gāue.—Tagata Tānaki 2:24; 5:18.

³ ʼI te kāpite ʼaenī, ʼe tou vakaʼi anai te ʼu fehuʼi e fā: ʼE tou lava mamata feafeaʼi ki te lelei ʼo tatatou gāue kinakina? Ko te ʼu faʼahiga gāue fea ʼaē ʼe mole lelei ke kau kiai ia te kau Kilisitiano moʼoni? ʼE feafeaʼi hatatou aga fakapotopoto ʼo ʼuhiga mo tatatou ʼu gāue fakamālama pea mo tatatou ʼu gāue fakalaumālie? Pea koteā te gāue maʼuhiga ʼaupitō ʼaē ʼe feala ke tou fai? Kae tou vakaʼi age muʼa ia te faʼifaʼitaki ʼa te ʼu tagata gāue lalahi tokotahi e lua ʼi te ʼatulaulau, ia Sehova ʼAtua pea mo Sesu Kilisito.

TE TAGATA GĀUE MĀFIMĀFI PEA MO TE TAGATA TUFUGA FAIVA

4, 5. ʼE fakahā feafeaʼi ʼi te Tohi-Tapu ko Sehova ʼe ko he tahi ʼe fua tana ʼu gāue?

⁴ Ko Sehova ʼe ko te Tagata Gāue Māfimāfi. ʼE ʼui fēnei iā Senesi 1:1: “ ʼI te kamataʼaga neʼe fakatupu e te ʼAtua ia te lagi pea mo te kele.” ʼI te temi ʼaē neʼe fakaʼosi ai e te ʼAtua tana ʼu gāue ʼo ʼuhiga mo te ʼu meʼa ʼaē neʼe ina fakatupu ʼi te kele, neʼe ina ʼui neʼe “lelei ʼaupitō.” (Senesi 1:31) ʼE feala pē ke tou ʼui, neʼe fiafia ʼaupitō ia ʼi te ʼu gāue fuli ʼaē neʼe ina fai ʼi te kele. ʼE mahino ia ko Sehova, “te ʼAtua fiafia,” neʼe fiafia lahi ʼi te fua ʼo tana ʼu gāue.—1 Timoteo 1:11.

⁵ Ko totatou ʼAtua ʼe faʼa gāue pea ʼe gāue tuʼumaʼu pē ia. Fualoa ki muli age, ʼi te kua ʼosi fakatupu ʼo meʼa fuli ʼaē ʼi te kele, neʼe ʼui fēnei e Sesu: “Ko taku Tamai neʼe gāue tuʼumaʼu ʼo kaku mai ki te temi nei.” (Soane 5:17) Koteā te ʼu gāue ʼaē neʼe lolotoga fai e te Tamai? Mai tona nofoʼaga ʼi selō, ʼe mahino ia neʼe ina takitaki aipē te hahaʼi pea mo tokaga kiā nātou. Neʼe ina fakatuʼu “he fakatupu foʼou,” ko he ʼu Kilisitiano neʼe fakanofo ʼaki te laumālie māʼoniʼoni, ʼaē kā natou kaugā hau anai mo Sesu ʼi selō. (2 Kolonito 5:17) Neʼe lolotoga gāue ia moʼo fakahoko ia tana fakatuʼutuʼu ʼaē ʼo ʼuhiga mo te mālamanei, ke feala kiā nātou ʼaē ʼe ʼofa kiā te ia ke natou maʼu ia te maʼuli heʼegata ʼi te mālama foʼou. (Loma 6:23) ʼE mahino ia, neʼe lagi fiafia ʼaupitō ia Sehova ki te ʼu fua ʼo tana gāue ʼaia. Ko te ʼu toko lauʼi miliona hahaʼi neʼe natou tali ia te logo ʼo te Puleʼaga, he neʼe taki mai nātou e te ʼAtua ki te moʼoni pea mo natou fetogi tonatou maʼuli ke tupu ai hanatou nonofo ʼi tona ʼofa.—Soane 6:44.

6, 7. Koteā te ʼu gāue kinakina ʼa Sesu neʼe ina fai talu mai fualoa?

⁶ Ko te gāue kinakina ʼa Sesu neʼe kamata ia talu mai fualoa. ʼI muʼa ʼo tana tupu tagata ʼi te kele, neʼe ko te “tufuga faiva” ʼa te ʼAtua ʼi te fakatupu ʼo meʼa fuli ʼaē “ ʼi te lagi pea mo te kele.” (Tāʼaga Lea 8:22-31; Kolose 1:15-17) ʼI tana maʼuli ʼaē ʼi te kele, neʼe hoko atu pē ia te gāue kinakina ʼaē ʼa Sesu. ʼI tana kei veliveli, neʼe ina akoako ia te gāue laga fale, ʼo tupu ai tona fakahigoaʼi ko “te tagata tufuga ʼakau.”a (Maleko 6:3) Ko he gāue neʼe kinakina ʼaupitō pea neʼe tonu ke poto ʼi te ʼu faʼahi kehekehe, tāfito lā heʼe ʼi te temi ʼaia neʼe mole heʼeki maʼu ni ʼu tutuʼu, mo he ʼu meʼa gāue, pea mo he ʼu masini hila moʼo fai te ʼu taʼi gāue ʼaia. ʼE kotou fakakaukauʼi age koa ia Sesu ʼe ʼalu ʼo kumi mai hana ʼu papa, ʼe lagi tonu muʼa ke ina taʼaga he ʼu fuʼu ʼakau pea mo toho mai ia te ʼu ʼakau ʼaia ki te faʼahi ʼaē kā fai ai tana gāue? ʼE feala koa hakotou fakakaukauʼi age ia Sesu ʼe ina laga he ʼu fale, ʼo ina teuteuʼi te ʼu papa ʼo te ʼato pea mo hili te ʼu papa ʼaia ʼo te ʼato, ʼe ina fai mo te ʼu matapā, pea mo faʼu te ʼu meʼa ʼaē ʼe ʼaoga ki te fale? ʼE mahino ia neʼe logoʼi e Sesu ʼi tona loto ia te fiafia ʼaē ʼe maʼu mai te fai fakalelei ʼo he gāue kinakina.

⁷ Neʼe faʼa gāue ia Sesu ʼi tana fai ʼo tona minisitelio. Iā taʼu e tolu vaelua, neʼe tokaga tāfito pē ia ki te fai ʼo te gāue ʼaia ʼaē neʼe maʼuhiga ʼaupitō. ʼI tana loto ʼaē ke logo he tokolahi ki te logo lelei, neʼe ina fakaʼaogaʼi ia tona temi kātoa ki te fai fakamafola, ʼo ʼala ake kae kei hegihegi ʼo gāue ʼo aʼu ki te pōʼuli. (Luka 21:37, 38; Soane 3:2) Neʼe fagona “ki te ʼu kolo lalahi pea mo te ʼu kolo liliki, ʼo fai fakamafola pea mo kalagaʼi te logo lelei ʼo te puleʼaga ʼo te ʼAtua.” (Luka 8:1) ʼE feala pē ke tou ʼui, neʼe fai e Sesu ia kilometa ʼe lauʼi teau moʼo tala ia te logo lelei ki te hahaʼi, ʼo haʼele ʼi te ʼu ala ʼe efuʼia.

8, 9. Neʼe mamata feafeaʼi ia Sesu ki te lelei ʼo tana gāue kinakina?

⁸ Neʼe mamata koa ia Sesu ki te lelei ʼo tana gāue kinakina ʼi te minisitelio? ʼEī! Neʼe ina tūtū te ʼu pulapula ʼo te moʼoni ʼo te Puleʼaga, pea mavae ia kae ina tuku mai te ʼu gāueʼaga kua tokalelei ki te taʼukai. ʼI tana fai ʼaē ia te gāue ʼa te ʼAtua, neʼe maʼu aipē e Sesu ia te toe mālohi pea mo mākona aipē, moʼo fakahoko ia te gāue ʼa te ʼAtua. (Soane 4:31-38) Kotou fakakaukauʼi age muʼa ia te fiafia ʼaē neʼe lagi ina logoʼi ʼi te fakaʼosi ʼo tona minisitelio ʼi te kele. Neʼe kua feala pē hana ʼui fakahagatonu fēnei ki tana Tamai: “Neʼe au fakakolōliaʼi koe ʼi te kele, ʼo au fakaʼosi te gāue ʼaē neʼe ke tuku mai ke au fai.”—Soane 17:4.

⁹ ʼE mahino ia, ko Sehova pea mo Sesu ʼaē ʼe ko he ʼu faʼifaʼitaki lahi ʼaia ʼo he kau gāue, neʼe nā mamata ki te lelei ʼo tanā gāue kinakina. Ko totatou ʼofa ʼaē kiā Sehova ʼe ina uga anai tātou ke tou “liliu ko he kau faʼifaʼitaki ʼo te ʼAtua.” (Efesi 5:1) Ko totatou ʼofa ʼaē kiā Sesu ʼe ina uga anai tātou ke tou “mulimuli lelei ki tona ʼu tapugā vaʼe.” (1 Petelo 2:21) Tou vakaʼi ʼi te temi nei peʼe feafeaʼi hatatou lava mamata mo tātou ki te lelei ʼo tatatou gāue kinakina.

ʼE TOU LAVA MAMATA FEAFEAʼI KI TE LELEI ʼO TATATOU GĀUE KINAKINA?

10, 11. Koteā ʼaē ʼe feala ke tokoni mai ke tou maʼu ai he manatu ʼe lelei ʼo ʼuhiga mo tatatou gāue?

¹⁰ ʼE maʼu e te kau Kilisitiano moʼoni tanatou gāue fakamālama. ʼE tou fia maʼu foki he fiafia ʼi tatatou gāue ʼaia, kae ʼe feala ke liliu ko he fihifihia lahi mo kapau ʼe mole tou faʼa leleiʼia ia te gāue ʼaē ʼe tou fai. ʼE lava feafeaʼi hatatou mamata ki te lelei ʼo tatatou gāue ʼi he ʼaluʼaga fēia?

¹¹ Tou maʼu he manatu ʼe lelei. ʼE mole feala anai ʼi te temi fuli ke tou fetogi tatatou gāue, kae ʼe feala ke tou fetogi ia tatatou faʼahiga manatu ʼo ʼuhiga mo te gāue. Ko te metitāsio ki te manatu ʼa te ʼAtua ʼe feala ke tokoni mai ke tou maʼu he manatu ʼe lelei ʼo ʼuhiga mo te gāue. Ohagē lā, kapau ko koutou ʼe ko he pule fāmili pea ʼe feala pē ʼaki takotou gāue ke kotou foaki ki tokotou fāmili ia te ʼu meʼa ʼaē ʼe ʼaoga kiā nātou ʼi te faʼahi fakasino, tatau aipē mo kapau ʼe mole kotou faʼa leleiʼia ia takotou gāue. Koia, kiā mata ʼo te ʼAtua ʼe maʼuhiga ʼaupitō takotou tokaga ʼaē kiā nātou ʼaē ʼe kotou ʼoʼofa ai. ʼE ʼui ʼi tana Folafola, ko he tahi ʼe mole ina foaki ki tona fāmili ia te ʼu meʼa ʼaē ʼe ʼaoga kiā nātou “ ʼe kovi age ia ʼi he tahi ʼe fakafisi kiā Sehova.” (1 Timoteo 5:8; kiʼi nota ʼi te lalo pāsina) Kapau ʼe kotou mahino ʼe ʼi ai te ʼaoga ʼo takotou gāue ʼaē ko te fakahoko ʼo tokotou maʼua ʼaē neʼe foaki atu e te ʼAtua, pea ʼe tokoni atu anai ke kotou maʼu ai he fiafia pea mo hona ʼaoga kiā koutou, ʼaē ko he faʼahi ʼe mole mahino kiai tokotou ʼu kaugā gāue.

12. Ko te ʼu ʼaluʼaga fea ʼaē ʼe tou maʼu ai te ʼu lelei ʼi tatatou faʼafai pea mo aga fakahagatonu ʼi tatatou gāue?

¹² Tou faʼafai pea mo fai fakahagatonu tatatou gāue. Ko tatatou gāue kinakina pea mo tatatou akoako ʼaē ke tou fai fakalelei tatatou gāue, ʼe feala ai ke tou maʼu he ʼu tapuakina. ʼI te agamāhani, ʼe leleiʼia ʼaupitō e te ʼu pātolō tanatou hahaʼi gāue ʼaē ʼe faʼafai pea mo popoto. (Tāʼaga Lea 12:24; 22:29) ʼI totatou ʼuhiga Kilisitiano moʼoni, ʼe tonu foki ke tou fai fakahagatonu tatatou gāue, ʼo mole tou kaihaʼa he falā, he ʼu meʼa gāue, peʼe pulinoa totatou temi gāue ʼaē ʼe tonu ke tou fakaʼaogaʼi maʼa totatou pātolō. (Efesi 4:28) Ohagē ko te ʼu faʼahi neʼe kua tou vakaʼi ʼi te kāpite ʼaenī kua ʼosi, ʼe lahi te ʼu lelei ʼe tou maʼu mokā ʼe tou aga fakahagatonu ʼi totatou maʼuli. Ko he tahi ʼe ʼiloa ʼe aga fakahagatonu ʼi tana gāue, ʼe mahino ia ʼe tuha anai mo ia ke falala ki ai te hahaʼi. Pea tatau aipē peʼe fakatokagaʼi peʼe kailoa e totatou pātolō ia tatatou gāue kinakina, kae ʼe tou fiafia pē tātou heʼe tou maʼu ia ‘he leʼo ʼo loto ʼe aga fakahagatonu’ pea ʼe tou ʼiloʼi ʼe tou fakafiafia ia te ʼAtua ʼaē ʼe tou ʼofa ai.—Hepeleo 13:18; Kolose 3:22-24.

13. Koteā anai tona fua mokā tou tuku he faʼifaʼitaki lelei ʼi totatou fale gāue?

¹³ Tou mahino ko tatatou aga ʼe ina fakakolōliaʼi ia te ʼAtua. Kā tou maʼuliʼi ia te ʼu lēkula māʼoluga Fakakilisitiano ʼi totatou fale gāue, pea ʼe mahino ia ʼe tokagaʼi anai tatatou aga ʼaia e ʼihi. Koteā anai tona fua? ʼE tou “fakamatalelei [ai] te akonaki ʼo totatou Fakamaʼuli, ia te ʼAtua.” (Tito 2:9, 10) ʼEī, ʼe feala ki ʼihi ke natou tokagaʼi ia te matalelei ʼo tatatou tauhi ʼaki tatatou aga ʼaē ʼe lelei, ʼo tupu ai hanatou fia mahino lahi age ki tatatou tauhi. Kotou fakakaukauʼi age muʼa peʼe feafeaʼi anai tokotou loto mo kapau ʼe tali e hokotou kaugā gāue ia te moʼoni ʼuhi ko te faʼifaʼitaki lelei ʼaē ʼe kotou tuku ʼi te fale gāue! Tahi ʼaē meʼa ʼe maʼuhiga tāfito age: Koteā he tahi age meʼa ʼe fakafiafia lahi age ʼi hatatou ʼiloʼi ʼaē ko tatatou aga ʼaē ʼe lelei ʼe ina fakakolōliaʼi ia Sehova pea mo fakafiafia ia tona loto?—Tāʼaga Lea 27:11; 1 Petelo 2:12.

TOU FAKASIOSIO POTO MOKĀ TOU FILI KE TOU FAI HE GĀUE

14-16. Kā tou fai he ʼu tonu ʼo ʼuhiga mo he gāue, ko te ʼu fehuʼi maʼuhiga fea ʼaē ʼe tonu ke tou fakakaukau kiai?

¹⁴ ʼE mole fakahā mai leva ʼi te Tohi-Tapu ia te ʼu faʼahi fuli ʼo he gāue ʼe tonu ke tou tali pea mo ʼaē ʼe tonu ke tou fakafisi kiai. ʼE mole fakaʼuhiga leva ʼe tou tali anai ia te ʼu gāue fuli. ʼAki te ʼu tokoni Fakatohi-tapu, ʼe feala anai ke tou filifili he gāue ʼe ʼaoga pea mo faitotonu ʼe leleiʼia e te ʼAtua, kae ʼe mole tou tali anai ia he gāue ʼe mole ina leleiʼia. (Tāʼaga Lea 2:6) Kā tou fai ia he ʼu tonu ʼo ʼuhiga mo he gāue, ʼe ko fehuʼi maʼuhiga e lua ʼe tonu anai ke tou fakakaukau kiai.

¹⁵ Kapau ʼe au tali ia te gāue ʼaenī, ʼe feala ai koa ke au fai he aga ʼe tauteaʼi ʼi te Tohi-Tapu? ʼE tauteaʼi ʼi te Folafola ʼa te ʼAtua ia te kaihaʼa, te loi, pea mo te faʼu ʼo he ʼu tamapua. (Ekesote 20:4; Gāue 15:29; Efesi 4:28; Fakahā 21:8) ʼE mole tou tali anai ia he gāue ʼe ina fakamaʼua mai ke tou fai ia te ʼu taʼi aga ʼaia. Kapau ʼe tou ʼofa kiā Sehova, pea ʼe mole tou tali anai ia he gāue ʼe feala ai ke tou fai he ʼu aga ʼe fakafeagai ki te ʼu fakatotonu ʼa te ʼAtua.—1 Soane 5:3.

¹⁶ Kapau ʼe au fai ia te gāue ʼaenī, ʼe feala ai koa ke au kau mo au ki he aga ʼe kovi peʼe au uga ai niʼihi ke natou fai mo nātou ia he aga ʼe kovi? Tou toʼo he faʼifaʼitaki moʼo fakamahino ia te faʼahi ʼaia: ʼE mole kovi te gāue ʼaē ko te tali ʼo te hahaʼi ʼi he fale gāue peʼe ʼi te telefoni. Kae ʼe feafeaʼi anai mo kapau ʼe foaki age ia he gāue fēia ki he Kilisitiano ʼi he lōpitali fakatō fatu? ʼE moʼoni, ko te gāue ʼaia ʼe mole fakamaʼua anai ki te Kilisitiano ke tokoni ki te ʼu fakatō fatu. Kae ko tana gāue ʼe mole lagolago anai koa ia ki he gāue ʼe fai e he lōpitali ʼe fai ai ia te fakatō fatu, ʼaē ko he aga ʼe fakafeagai ia ki te Folafola ʼa te ʼAtua? (Ekesote 21:22-24) Kapau ʼe tou ʼofa kiā Sehova, pea ʼe mole tou fia kau anai ki he ʼu aga ʼe fakafeagai ki te Tohi-Tapu.

17. (a) Ko te ʼu faʼahi fea ʼaē ʼe feala ke tou fakakaukauʼi mokā tou fai he ʼu tonu ʼo ʼuhiga mo he gāue? (Vakaʼi ʼi te pāsina 177, ia te fakamatala ʼaē ʼe ʼātakai.) (b) ʼE lava tokoni feafeaʼi mai ia totatou leʼo ʼo loto ke tou fai he ʼu tonu ʼe leleiʼia e te ʼAtua?

¹⁷ ʼE feala anai ke tou maʼu ia te ʼu tali ki te ʼu tuʼuga fehuʼi ʼo ʼuhiga mo te gāue, ʼaki hatatou fakakaukauʼi fakalelei ia te ʼu fehuʼi maʼuhiga e lua ʼaē ʼe tuʼu ʼi te ʼu palakalafe 15 pea mo te 16. Tahi ʼaē meʼa, ʼe ʼi ai te tahi ʼu faʼahi ʼe lelei ke tou fakakaukauʼi mokā tou fai he ʼu tonu ʼo ʼuhiga mo he gāue.b ʼAua naʼa tou fakatalitali ke fai e te kalasi ʼo te tagata kaugana agatonu ia he ʼu lēkula ʼo ʼuhiga mo te ʼu ʼaluʼaga fuli ʼaē ʼe feala ke hoko ʼi totatou maʼuli. ʼI te ʼu taʼi ʼaluʼaga ʼaia, ʼe tonu anai ke tou fakasiosio poto. Ohagē ko te ʼu manatu neʼe kua tou ako ʼi te Kāpite 2, ʼe tonu ke tou akoʼi totatou leʼo ʼo loto ʼo tou ako peʼe feafeaʼi hatatou maʼuliʼi ia te Folafola ʼa te ʼAtua ʼi totatou maʼuli. ‘ ʼAki te fakaʼaogaʼi’ ʼaia ʼo totatou “ ʼu fealagia fakakaukau,” ʼe feala ai anai ki totatou leʼo ʼo loto ke tokoni mai ke tou fai he ʼu tonu ʼe leleiʼia e te ʼAtua pea mo feala ai ke tou nonofo ʼi tona ʼofa.—Hepeleo 5:14.

TOU TAUPAU HE AGA FAKAPOTOPOTO ʼO ʼUHIGA MO TE GĀUE

18. He koʼē ʼe mole ko he meʼa faigafua ia hatatou aga fakapotopoto ʼi te faʼahi fakalaumālie?

¹⁸ ʼE mole ko he meʼa faigafua ia hatatou aga fakapotopoto ʼi te faʼahi fakalaumālie ʼi “te ʼu ʼaho fakamuli” ʼaenī ʼaē ʼe “maʼuhiga ʼaupitō mo faigataʼa.” (2 Timoteo 3:1) Ko te maʼu ʼo he gāue pea mo tona taupau ʼe ko he meʼa ʼe faigataʼa moʼoni. ʼI totatou ʼuhiga kau Fakamoʼoni ʼa Sehova, ʼe tou ʼiloʼi ia te maʼuhiga ʼaē ke tou gāue kinakina moʼo taupau ia totatou fāmili. Kae kapau ʼe mole tou nonofo tōkakaga, pea ko te ʼu fakaneke ʼaē ʼi te fale gāue peʼe ko te ʼu manatu ʼaē ʼe mafola ʼi te mālamanei ʼo ʼuhiga mo te fia maʼu koloa, ʼe feala ai ke natou tāʼofi ia tatatou fai ʼo tatatou ʼu gāue fakalaumālie. (1 Timoteo 6:9, 10) Tou vakaʼi age muʼa peʼe tou lava taupau feafeaʼi he aga fakapotopoto, pea mo tou ʼiloʼi papau ia “te ʼu meʼa ʼaē ʼe maʼuhiga tāfito.”—Filipe 1:10.

19. He koʼē ʼe tuha ke tou falala kātoa kiā Sehova, pea ko te taʼi falala ʼaia ʼe tokoni mai kiā tātou ke tou tekeʼi teā?

¹⁹ Kotou falala kātoa kiā Sehova. (Tāʼaga Lea 3:5, 6) ʼE mole tuha koa mo te ʼAtua ke tou falala kiā te ia? ʼI tona fakahagatonu, ʼe tokaga ia kiā tātou. (1 Petelo 5:7) ʼE ina ʼiloʼi lelei age iā tātou ia te ʼu meʼa ʼaē ʼe ʼaoga kiā tātou, pea ʼe faigafua pē kiā te ia hana tokoni mai kiā tātou. (Pesalemo 37:25) Koia, ʼe lelei ai ke tou fakalogo mokā ʼe ina fakamanatuʼi mai ʼi tana Folafola: “Ke pulihi ʼi tokotou faʼahiga maʼuli ia te manako ʼaē ki te paʼaga, kotou fakafeʼauga pē ki te meʼa ʼaē ʼe maʼu, he neʼe . . . ʼui fēnei [e te ʼAtua]: ‘Kailoa ʼe mole au tuku anai koe, kailoa ʼe mole au liʼaki anai koe!’ ” (Hepeleo 13:5) ʼE tokolahi ia te ʼu kaugana ʼa Sehova ʼaē ʼe kau ʼi te selevisi kātoa, ʼe natou lava fakamoʼoni atu ki te maʼu ʼaē e te ʼAtua ia te mālohi moʼo foaki atu ia te ʼu meʼa ʼaē ʼe ʼaoga ki te maʼuli. Kapau ʼe tou falala kātoa, ko Sehova ʼe tokaga anai ia kiā tātou, pea ʼe mole tou hoha fau anai ʼo ʼuhiga mo te ʼu meʼa taupau maʼuli ki totatou fāmili. (Mateo 6:25-32) ʼE mole tou tuku anai ia tatatou gāue fakamālama ke liliu ko he faʼahi ʼe ina tāʼofi ai tatatou ʼu gāue fakalaumālie, ohagē lā ko te fakamafola ʼo te logo lelei pea mo tatatou kau ki te ʼu fono.—Mateo 24:14; Hepeleo 10:24, 25.

20. Koteā te fakaʼuhiga ʼo te ʼui ʼaē ke tokaga totatou mata ki he meʼa pē e tahi, pea ʼe kotou lava taupau feafeaʼi ia te faʼahi ʼaia?

²⁰ Ke tokaga tokotou mata ki he meʼa e tahi. (Mateo 6:22, 23) Ko tona fakaʼuhiga, ke tou fakafaigafua ia totatou maʼuli. Ko te fakatuʼutuʼu pē e tahi ʼaē ʼe tonu ke tou tōkakaga kiai, ko te fakahoko ʼo te finegalo ʼo te ʼAtua. Kapau ʼe tou haga sio fakalelei ki he meʼa ʼe tahi, pea ʼe mole tou faiga anai ke tou maʼu ia he gāue ʼe totogi lelei ʼaupitō pea mo tou fia maʼu koloa. ʼE mole tou kumi tāfito anai ke tou maʼu te ʼu koloa ʼaē neʼe hoki hā pea mo lelei, ʼaē ʼe faigaʼi e te mālama ke tou fakatui ʼe ʼaoga te ʼu meʼa ʼaia ke feala ai hatatou maʼuli fiafia. ʼE feafeaʼi hakotou lava puipui ʼo tokotou mata ke tokaga pē ki he meʼa e tahi? ʼAua naʼa kotou fakamamafa ia tokotou maʼuli ʼaki ni ʼu maʼua ʼe feala pē hona tekeʼi. ʼAua naʼa lahi fau hokotou ʼu koloa heʼe kotou fakaʼaogaʼi anai kiai ia he toe temi lahi pea mo kotou tōkakaga tāfito kiai. Kotou mulimuli ki te tokoni ʼaē ʼi te Tohi-Tapu ke tou fakafeʼauga pē totatou maʼuli ʼaki “te meʼa kai pea mo te meʼa kofu.” (1 Timoteo 6:8) Kotou faiga mālohi ke kotou fakamaʼamaʼa ia tokotou maʼuli.

21. He koʼē ʼe ʼi ai te ʼu gāue ʼe tonu ke tou fakamuʼamuʼa, pea koteā ʼaē ʼe tonu ke tou fakamuʼamuʼa ʼi totatou maʼuli?

²¹ Kotou fakamuʼamuʼa te ʼu gāue fakalaumālie, pea mo pipiki maʼu kiai. Mai tona ʼaluʼaga ʼaē, ʼe fakatuʼakoi pē ia totatou temi maʼuli, koia ʼe ʼi ai te ʼu gāue ʼe tonu ke tou fakamuʼamuʼa. Heʼe feala ai anai ke tou fakaʼaogaʼi tāfito totatou temi ki he ʼu meʼa ʼe mole faʼa maʼuhiga, kae mole kei tou tōkakaga tātou ki te ʼu meʼa ʼaē ʼe maʼuhiga age. Koteā ʼaē ʼe tonu ke tou fakamuʼamuʼa ʼi totatou maʼuli? Tokolahi ʼi te mālamanei ʼe maʼuhiga ʼaupitō kiā nātou ke natou ʼolo ki he ʼu faleako lalahi ke feala ai hanatou maʼu ʼo hanatou ʼu gāue lelei ʼi te tuʼu ʼaenī. Kae ko Sesu neʼe ina fakalotomālohiʼi tana kau tisipulo ke natou “haga kumi muʼa te puleʼaga.” (Mateo 6:33) ʼEī, ʼi totatou ʼuhiga kau Fakamoʼoni ʼa Sehova, ʼe tou fakamuʼamuʼa ʼi totatou maʼuli ia te Puleʼaga ʼo te ʼAtua. Ko totatou faʼahiga maʼuli, te ʼu tonu ʼaē ʼe tou fai, tatatou ʼu fakatuʼutuʼu, pea mo te ʼu gāue ʼaē ʼe tou fai, ʼe tonu ke hā ai ʼe maʼuhiga age kiā tātou ia te ʼu gāue ʼo te Puleʼaga pea mo te finegalo ʼo te ʼAtua ʼi te ʼu koloa pea mo te gāue fakamālama.

TOU GĀUE KINAKINA ʼI TE MINISITELIO

22, 23. (a) Koteā te gāue maʼuhiga tāfito ʼa te kau Fakamoʼoni ʼa Sehova, pea ʼe tou lava fakahā feafeaʼi ʼe maʼuhiga ia te gāue ʼaia kiā tātou? (Vakaʼi ʼi te pāsina 180, ia te fakamatala ʼaē ʼe ʼātakai.) (b) Koteā takotou fakatotonu ʼo ʼuhiga mo te gāue fakamālama?

²² ʼI tatatou ʼiloʼi ʼaē ʼe tou māʼuʼuli nei ʼi te temi fakaʼosi ʼo te tuʼu ʼaenī, ʼe tou tōkakaga tāfito anai ki te gāue maʼuhiga ʼaē ʼe fai e te kau Fakamoʼoni ʼa Sehova, ʼaē ko te fai fakamafola pea mo te fai ʼo ni ʼu tisipulo. (Mateo 24:14; 28:19, 20) Ohagē ko totatou Faʼifaʼitakiʼaga ko Sesu, ʼe tou fia maʼumaʼua ʼi te gāue ʼaē ʼe feala ke haofaki ai te maʼuli ʼo te hahaʼi. ʼE tou lava fakahā feafeaʼi ʼe maʼuhiga ia te gāue ʼaia kiā tātou? Tokolahi ʼi te hahaʼi ʼa te ʼAtua ʼe ko he kau fai fakamafola, ʼe natou foaki tonatou maʼuli moʼo fakahoko ʼaki he loto kātoa ia te gāue fai fakamafola. Ko ʼihi neʼe natou fakatuʼutuʼu lelei tanatou ʼu gāue ke feala hanatou kau ki te selevisi pioniē peʼe misionea. ʼI tanatou mahino ki te maʼuhiga ʼo te fai ʼo he ʼu fakatuʼutuʼu fakalaumālie, tokolahi te ʼu mātuʼa neʼe natou fakalotomālohiʼi tanatou fānau ke natou kau ki te selevisi temi kātoa. ʼE mamata koa te kau fai fakamafola ʼo te Puleʼaga ki te lelei ʼo tanatou gāue kinakina ʼi te minisitelio? ʼE mahino ia! Ko te tauhi ʼaē kiā Sehova ʼaki tonatou maʼuli kātoa, ʼe natou maʼu moʼoni ai te fiafia pea mo te ʼu tuʼuga tapuakina.—Tāʼaga Lea 10:22.

²³ Tokolahi iā tātou, ʼe tonu ke tou gāue ʼaho kātoa moʼo taupau totatou fāmili. Kotou manatuʼi ʼe loto ia Sehova ke tou mamata ki te lelei ʼo tatatou gāue kinakina. Kapau ʼe tou fakaʼalutahi tatatou manatu pea mo tatatou ʼu gāue mo tana ʼu manatu pea mo tana ʼu pelesepeto, pea ʼe tou fiafia ai anai ʼi te fai ʼo tatatou gāue. Tou fakatotonu ke mole fakaleluʼi tātou e tatatou gāue fakamālama mai te gāue ʼaē ʼe maʼuhiga tāfito, ʼaē ko te tala ʼo te logo lelei ʼo te Puleʼaga ʼo te ʼAtua. Kapau ʼe tou fakamuʼamuʼa ia te gāue ʼaia ʼi totatou maʼuli, pea ʼe tou fakahā ai anai ia totatou ʼofa ʼaē kiā Sehova pea ʼe tou nonofo ai anai ʼi tona ʼofa.