Kapite 33
Neʼe Fakahoko e Sesu Te Lea Faka Polofeta ʼa Isaia
ʼI TANA ʼiloʼi ʼaē ko te kau Faliseo pea mo te ʼu hahaʼi ʼa Helote ʼe nātou faiga ke matehi ia ia, neʼe mavae Sesu ʼo ʼalu ki te tai ʼo Kalilea mo tana ʼu tisipulo. ʼI te faʼahi ʼaia, neʼe lahi ʼaupito te ʼu hahaʼi neʼe ʼōmai kia te ia mai te ʼu potu kehekehe ʼo Palesitina, pea mo te tahi ʼu potu ʼi tuʼa atu ʼo te ʼu tuʼakoi. Tokolahi te ʼu hahaʼi neʼe fakamālōlō e Sesu, koia ko nātou ʼaē neʼe kovi ʼaupito ʼonatou mahaki neʼe nātou fakahaohao tuʼu ke nātou fāfā kia te ia.
ʼI te tokolahi ʼo te hahaʼi ʼaia, neʼe kole age e Sesu ki tana kau tisipulo ke nātou teuteuʼi tuʼumaʼu he vaka kia te ia. ʼI tana mavae mai te matatai neʼe feala ai ke ʼaua naʼa efihia ʼi te hahaʼi. ʼO feala ai tana akonaki kia nātou mai te vaka pea mo tana feʼaluʼaki ʼi he potu ʼo te matatai ki he tahi potu ke tokoni ki te ʼu hahaʼi ʼe nonofo ai.
Neʼe fakatokagaʼi e te tisipulo ko Mateo ʼe fakahoko e te gāue ʼa Sesu ia “te meʼa ʼaē neʼe fakahā ʼaki te polofeta ko Isaia”. Pea ina lau ai te lea faka polofeta ʼaē ʼe fakahoko e Sesu, ʼo fēnei:
“Koʼeni taku tagata kaugana ʼaē neʼe ʼau fili, toku ʼofaʼaga, ʼaia kua fiafia ai toku nefesi! ʼE ʼau tuku anai toku laumālie kia te ia, pea ʼe ina fakamahino lelei anai ki te ʼu puleʼaga te faitotonu. ʼE mole ina fai anai he kē pe ko he kalaga, pea ʼe mole logo anai he tahi ki tona leʼo ʼi te ʼu ala lalahi. ʼE mole ina malaki anai te kaho ʼaē kua volu, pea ʼe mole ina matehi anai te vavaeʼi lino ʼaē ʼe kohu, ʼo kaku ki tana tuku mai te faitotonu ʼo lava lelei. ʼIo, ʼe falala anai te ʼatu puleʼaga ki tona huafa.”
Ko te tagata kaugana ʼaē ʼe ʼofaina e te ʼAtua, ko Sesu totonu. Neʼe ina fakamahino leleiʼi te ʼuhiga totonu ʼo te faitotonu moʼoni, ʼaē neʼe mole kei mahino lelei ʼuhi ko te ʼu talatisio ʼo te ʼu lotu hala. ʼIo, ʼaki te hala ʼo tanatou fakaʼaogaʼi te Lao ʼa te ʼAtua, ko te kau Faliseo ʼe mole nātou tokoni anai ki he tahi ʼe mahaki ʼi te ʼaho ʼo te sapato! Koia, ʼi tana fakamahino fakalelei age te ʼuhiga totonu ʼo te faitotonu ʼa te ʼAtua, neʼe fakafimālie e Sesu ia nātou ʼaē neʼe taʼomia ʼi te mamafa ʼo te ʼu talatisio heʼe agatonu; koia neʼe faigaʼi ai e te kau takitaki lotu ke matehi ia Sesu.
‘ ʼE mole ina fai anai he kē pe ko he kalaga, pea ʼe mole logo anai he tahi ki tona leʼo ʼi te ʼu ala lalahi.’ Koteā koa tatatou mahino ki te ʼu palalau ʼaia? Koʼeni tona faka ʼuhiga, ka fakamālōlō e Sesu te hahaʼi, neʼe ‘ina fakatotonu fakamālohi kia nātou ke ʼaua naʼa nātou fakahāhā’. Neʼe mole loto ia ke fai he logologo ʼi te ʼu ala ʼo ʼuhiga mo ia peʼe ko he foimo folahi ʼo he ʼu logo kua ʼave keheʼi ʼo ʼuhiga mo ia.
Pea tahi foki neʼe ʼave e Sesu tana logo fakafiafia ki te ʼu hahaʼi, ʼaē neʼe fakatā ki he kaho kua volu kua mapelu pea kua malamalaki ʼi te ʼu vaʼe. ʼE nātou hage ko he vavaeʼi lino ʼe kohu, ʼaia ko tona makaloʼi afi fakaʼosi ʼo te maʼuli kua vave mate. Neʼe mole malaki e Sesu te kaho ʼaē kua volu peʼe ina puhiʼi te mataʼi ulo ʼaē kua mū vaivai. Kailoa, ʼaki te agalelei, te ʼofa, neʼe ina maʼu te poto ʼaē ʼo te toe foaki te lotomālohi ki te kau agavaivai. Ko Sesu ʼe ko ia moʼoni ia ia ʼaē ʼe feala ke falala ki ai te ʼatu puleʼaga! Mateo 12:15-21; Maleko 3:7-12; Isaia 42:1-4.
▪ Neʼe fakamahino feafeaʼi e Sesu te faka ʼuhiga totonu ʼo te faitotonu, ke mole ina fai he kē pe ko he palalau leʼo lahi ʼi te ʼu ala lalahi?
▪ Ko ai ʼaē ʼe hage ko he kaho kua volu pe ko he vavaeʼi lino, pea neʼe feafeaʼi te aga ʼa Sesu kia nātou?