Te ʼu Fua ʼo Te Faifakamafola—Ko “Te u Gaueaga Fulumeto Kua Natou Hihina Ki Te Tanaki o Te Fulumeto”

1, 2. (1) He ko ʼe neʼe feʼekeʼaki ia te kau tisipulo? (2) Ko te faʼahiga taʼukai feafeaʼi ʼae neʼe talanoa ki ai ia Sesu?

NEʼE ui fenei e Sesu ki ʼana tisipulo: “Kotou hiki ake okotou mata pea kotou sisio ki te u gaueaga fulumeto kua natou hihina ki te tanaki o te fulumeto.” Neʼe natou hahaga ki te faʼahi ʼae neʼe fakaha age e Sesu. Kaʼe ko te ʼu gaueʼaga ʼae neʼe natou sisio ki ai neʼe heʼeki hihina ia. Koia, neʼe lagi natou feʼekeʼaki fenei: “Kotea koa te tanaki ʼo te fulumeto ʼae ʼe talanoa ki ai Sesu? ʼE kei toe ni mahina ʼi muʼa ʼo te hoko mai ʼo te taʼukai.”—Soa. 4:35.

² Kaʼe neʼe mole talanoa ia Sesu ki he taʼukai moʼoni. Neʼe ina fakaʼaogaʼi ia te faigamalie ʼaia moʼo akoʼi age ki ʼana tisipulo ia faʼahi maʼuhiga ʼe lua ʼo ʼuhiga mo he taʼukai fakalaumalie, ʼae ʼe ko he taʼukai tagata. Kotea te ʼu faʼahi maʼuhiga ʼaia? Moʼo tali ki ai, tou vakaʼi te fakamatala ʼaia ʼi te Tohi-Tapu.

Ko He Gaue ʼe Fakatupu Fiafia

3. (1) Kotea ʼae neʼe lagi tupu ai te ui fenei ʼa Sesu: “[Ko] te u gaueaga fulumeto kua natou hihina ki te tanaki o te fulumeto”? (Vakaʼi te nota.) (2) Kotea ʼae neʼe ui e Sesu moʼo fakamahino ʼana palalau?

³ Neʼe hoko te faipalalau ʼaia ʼa Sesu mo ʼana tisipulo ʼi te fakaʼosi ʼo te taʼu 30 H.T.S., pea neʼe natou nonofo ovi ki te kolo ko Sikale, ʼi Samalia. ʼI te olo ʼo ʼana tisipulo ki te kolo, neʼe nofo ia Sesu ʼi he vai keli pea neʼe faifakamafola ki te fafine. Neʼe mahino atu aipe te fafine ʼaia ki te maʼuhiga ʼo te ʼu moʼoni ʼae neʼe ina fakaha age. ʼI te toe liliu mai ʼa te kau tisipulo, neʼe lele te fafine ki te kolo, ʼo fakamatala ki te hahaʼi te ʼu moʼoni ʼae neʼe logo ki ai. Neʼe tupu ai tanatou fia iloʼi, pea tokolahi neʼe natou ʼomai kia Sesu, ʼi te vai keli. ʼI te sio ʼa Sesu ki te ʼu gaueʼaga pea mo te fakaovi mai ʼa te kau Samalia ʼaia, neʼe lagi ko te lakaga ʼaia ʼae neʼe ina ui fenei ai: “Kotou sisio ki te u gaueaga fulumeto kua natou hihina ki te tanaki o te fulumeto.”a Pea moʼo fakamahino neʼe mole talanoa ki he tanaki moʼoni ʼo te fulumeto kaʼe fakalaumalie, neʼe ina ui fenei: “Ko ia ae e tanaki . . . e ina tanaki he u fua ki te mauli heegata.”—Soa. 4:5-30, 36.

4. (1) Kotea te ʼu faʼahi maʼuhiga ʼe lua neʼe akoʼi e Sesu ʼo ʼuhiga mo te tanaki fakalaumalie? (2) Kotea te ʼu fehuʼi ʼae ka tou vakaʼi?

⁴ Kotea te ʼu faʼahi maʼuhiga ʼe lua neʼe akoʼi e Sesu ʼo ʼuhiga mo te tanaki fakalaumalie? ʼUluaki, ʼe tonu ke tulikaki te gaue. ʼI tana ui ʼae ko “te u gaueaga fulumeto kua natou hihina ki te tanaki o te fulumeto,” neʼe ko hana pauʼi ʼaia ki ʼana tisipulo ke natou gaue. Moʼo fakaha kia natou ia te maʼuhiga ʼae ke tulikaki te gaue, neʼe ui fenei e Sesu: “Ko ia ae e tanaki e ina tali he totogi.” ʼEi, neʼe kua ʼosi kamata ia te tanaki ʼo te taʼukai, pea neʼe mole tonu ke natou fakatuatuai. Lua, ʼe fiafia te kau gaue. Ko natou ʼae ʼe natou nunusi te pulapula pea mo natou ʼae ʼe natou tanaki ia te fulumeto ʼe “fakafiafia fakatahi.” (Soa. 4:35, 36) Neʼe fiafia ia Sesu ʼi tana sio “nee kaugamalie te hahai Samalia . . . nee natou tui” kia te ia. ʼO toe feia aipe, ʼe fiafia anai ʼana tisipulo ʼi tanatou gaue ʼaki tonatou loto katoa ki te tanaki ʼo te taʼukai. (Soa. 4:39-42) Ko te aluʼaga ʼaia ʼae neʼe hoko ʼi te temi ʼo Sesu, ʼe maʼuhiga kia tatou, koteʼuhi ʼe fakaha lelei ai te meʼa ʼae ʼe lolotoga hoko nei ʼi te tanaki lahi fakalaumalie. Ko te temi fea ʼae neʼe kamata ai te tanaki ʼaia? Ko ai ʼae ʼe kau ki ai? Pea kotea ʼona fua?

ʼE Takitaki e Totatou Hau Ia Te Tanaki ʼo Te Fulumeto

5. Ko ai ʼae ʼe ina takitaki ia te tanaki fakamalamanei ʼo te hahaʼi? ʼI te meʼa ʼae neʼe ha kia Soane, ʼe fakaha feafeaʼi ʼe tonu ke tulikaki ia te gaue?

⁵ ʼI te meʼa ʼae neʼe ha ki te apositolo ko Soane, neʼe fakaha e Sehova tana hinoʼi ʼae ia Sesu ke ina takitaki te tanaki ʼaia ʼo te hahaʼi mai te kele katoa. (Lau ia Apokalipisi 14:14-16.) Neʼe ha ai ia Sesu mo he pale ʼaulo pea mo he hele piko. Ko te “pale aulo” ʼi te ʼulu ʼo Sesu, ʼe ina fakamoʼoni ai tona ʼuhiga Hau. Ko te “hele piko lahi masila” ʼae neʼe ina toʼo ʼi tona nima, ʼe ina fakamoʼoni ai ʼe ko ia ʼae ʼe ina takitaki te tanaki ʼo te fulumeto. ʼI tana fakaʼaogaʼi ia he ʼaselo moʼo tala “kua matutua te taukai o te kele,” neʼe fakaha lelei ai e Sehova ʼe tonu ke tulikaki ia te gaue. Neʼe mole tonu ke fakatuatuai, koteʼuhi neʼe kua hoko mai te “hola ke tuusi ai te taukai.” Neʼe fakatotonu e te ʼAtua kia Sesu ke ina ta tana hele piko. Neʼe fakalogo ki ai ia Sesu pea neʼe ina tanaki ai te hahaʼi ʼi te kele. ʼE ko he tahi fakamanatu ʼaia ʼe ko “te u gaueaga fulumeto kua natou hihina ki te tanaki o te fulumeto.” ʼAki te meʼa ʼaia neʼe ha, ʼe feala koa ke tou iloʼi te temi ʼae neʼe kamata ai te tanaki fakamalamanei ʼaia? ʼEi.

6. (1) Ko te temi fea ʼae neʼe kamata ai te temi ʼo te taʼukai? (2) Ko te temi fea ʼae neʼe kamata tanaki ai te fulumeto ʼi te kele? Fakamahino.

⁶ ʼI te meʼa ʼae neʼe ha kia Soane, ia Apokalipisi 14  ʼe ha ai ia Sesu, ʼae ʼe ina takitaki te tanaki ʼo te fulumeto, mo he pale ʼaulo (ʼi te vaega 14). ʼE ha mai ai neʼe kua ʼosi fakanofo Hau ʼi te taʼu 1914. (Tan. 7:13  14) Hili he temi ki tona fakanofo Hau ʼaia, neʼe fakatotonu kia Sesu ke ina kamata te tanaki (vaega 15). ʼE toe tatau te fakamatala ʼaia mo te lea fakata ʼa Sesu ʼo ʼuhiga mo te tanaki ʼo te fulumeto. Neʼe ui fenei e Sesu: “Ko te temi tuusi o te fulumeto ko te fakaosi o te malamanei.” Koia, ʼi te taʼu 1914  neʼe kamata fakatahi te temi ʼo te taʼukai pea mo te fakaʼosi ʼo te tuʼu ʼaeni. Kaʼe neʼe kamata tanaki ia te fulumeto ki muli age. (Mat. 13:30, 39) ʼE feala ke tou mahino ai ko te tanaki ʼo te fulumeto neʼe kamata ia hili ni taʼu ʼi te kua ʼosi fakanofo Hau ʼo Sesu. Mai te taʼu 1914 ki te taʼu 1919, neʼe kamata fakamaʼa e Sesu tana kau tisipulo fakanofo. (Mala. 3:1-3; 1 Pet. 4:17) Pea ʼi te taʼu 1919, neʼe kamata ai “te taukai o te kele” peʼe ko te tanaki ʼo te hahaʼi. Mole tuai pea neʼe fakaʼaogaʼi e Sesu ia te tagata faifekau agatonu ʼae neʼe hoki fakanofo age, ke tokoni ki ʼotatou tehina ke natou mahino ki te maʼua ʼae ke tulikaki te gaue faifakamafola. Tou vakaʼi pe kotea ʼae neʼe hoko.

7. (1) Kotea ʼae neʼe tokoni ki ʼotatou tehina ke natou mahino ki te maʼua ʼae ke tulikaki te gaue faifakamafola? (2) Kotea ʼae neʼe fakalotomalohiʼi ke fai e te ʼu tehina?

⁷ ʼI te mahina ʼo Sulio 1920, neʼe ui fenei ʼi Te Tule Leʼo: “ ʼE ha lelei mai, ʼaki te vakaʼi ʼo te ʼu vaega Tohi-Tapu, ʼe ko te pilivilesio lahi ʼae ʼe maʼu e te kokelekasio ʼe ko te tala ʼo te puleʼaga.” Ohage la, ʼaki te lea fakapolofeta ʼa Esaia, neʼe mahino ai te ʼu tehina ʼe tonu ke tala te logo ʼo te Puleʼaga ʼi te kele katoa. (Esa. 49:6; 52:7; 61:1-3) Neʼe mole natou iloʼi pe feafeaʼi anai tona fakahoko, kaʼe neʼe natou falala ʼe tokoni age anai ia Sehova kia natou. (Lau ia Esaia 59:1.) ʼI tanatou mahino lelei ki te maʼua ʼae ke tulikaki te gaue faifakamafola, neʼe fakalotomalohiʼi ia te ʼu tehina ke natou lagolago malohi ki ai. Neʼe tali feafeaʼi e te ʼu tehina ia te fakalotomalohi ʼaia?

8. ʼI te taʼu 1921, kotea te ʼu faʼahi ʼe lua ʼo ʼuhiga mo te gaue faifakamafola neʼe mahino ki ai ʼotatou tehina?

⁸ ʼI te mahina ʼo Tesepeli 1921, neʼe tala fenei ʼi Te Tule Leʼo: “Neʼe lelei ʼosi te taʼu ʼaeni; neʼe tokolahi age natou ʼae neʼe natou logo ki te moʼoni.” Neʼe hoko atu fenei ʼi te nusipepa ʼaia: “ ʼE kei lahi te gaue ʼae ʼe tonu ke fai. . . . Tou gaue ʼaki te fiafia.” ʼE feala ke ke tokagaʼi, neʼe mahino te ʼu tehina ki te ʼu faʼahi maʼuhiga ʼe lua ʼo ʼuhiga mo te gaue faifakamafola, ʼae neʼe fakaha lelei e Sesu ki ʼana tisipulo: ʼE tonu ke tulikaki ia te gaue, pea ʼe fiafia te kau gaue.

9. (1) ʼI te taʼu 1954  kotea ʼae neʼe ui ʼi Te Tule Leʼo ʼo ʼuhiga mo te tanaki, pea kotea tona tupuʼaga? (2) ʼI te ʼu taʼu ʼaeni ʼe 50 kua hili, neʼe feafeaʼi te tuputupu ʼo te kau faifakamafola? (Vakaʼi te pakī “Te Tuputupu ʼi Te Malamanei.”)

⁹ Lolotoga te ʼu taʼu 1930, neʼe lahi te faifakamafola he neʼe kua mahino te ʼu tehina ʼe ko he toe hahaʼi tokolahi ʼo te tahi ʼu ovi ʼae ka natou tali te logo ʼaia ʼo te Puleʼaga. (Esa. 55:5; Soa. 10:16; Apk. 7:9) Kotea tona fua? Neʼe tuputupu te lahi ʼo te kau faifakamafola, mai te toko 41 000 ʼi te taʼu 1934 ki te toko 500 000 ʼi te taʼu 1953. Koia neʼe fakaʼosi fenei ʼi Te Tule Leʼo ʼo te ʼaho 1 ʼo Tesepeli 1954: “ ʼE ko te laumalie ʼo Sehova pea mo te malohi ʼo tana Folafola ʼae neʼe feala ke fakahoko ai te toe tanaki fakamalamanei ʼaia.”b—Sakl. 4:6.

Te ʼu Lea Fakata ʼo ʼUhiga Mo Te Fua ʼo Te Taʼukai

10, 11. ʼI te lea fakata ʼo te fua ʼi sinapi, kotea te ʼu faʼahi ʼo te tuputupu ake ʼo te fua ʼi sinapi ʼe fakamaʼuhigaʼi ʼi te lea fakata ʼaia?

¹⁰ ʼI ʼana lea fakata ʼo ʼuhiga mo te Puleʼaga, neʼe fakakikite e Sesu te fua ʼo te tanaki ʼo te fulumeto. Tou vakaʼi te lea fakata ʼo ʼuhiga mo te fua ʼi sinapi pea mo ʼae ʼo ʼuhiga mo te meʼa fakatupu. ʼE tou tokagaʼi tafitō anai pe neʼe hoko feafeaʼi ʼi te temi ʼo te fakaʼosi.

¹¹ Te lea fakata ʼo te fua ʼi sinapi. Neʼe to e te tagata ia te fua ʼi sinapi. Neʼe tupu ake ʼo liliu ko he fuʼu ʼakau pea neʼe ʼomai ki ai te ʼu manulele. (Lau ia Mateo 13:31, 32.) Kotea te ʼu faʼahi ʼo te tuputupu ake ʼo te fua ʼi sinapi ʼe fakamaʼuhigaʼi ʼi te lea fakata ʼaia? (1) Tana tuputupu ʼo lahi. Ko te fua i sinapi ʼae ʼe “veliveli osi ia i te u fuai pulapula fuli,” ʼe liliu ko he fuʼu ʼakau mo ʼona vaʼa lalahi. (Mko. 4:31, 32) (2) ʼE hoko moʼoni ia te tuputupu ʼaia ʼo te fua i sinapi. “I te osi . . . to [ʼo te fua i sinapi], e homo ia.” Neʼe mole ui e Sesu ʼe lagi homo ake. ʼE ha mai ʼe mole feala ke taʼofi ia tona tuputupu ake. (3) ʼE fakamalumalu ai te ʼu manulele. “E omai te u manulele o te lagi” pea mo natou “faifatai i tona malumalu.” Neʼe hoko feafeaʼi te ʼu aluʼaga ʼaia ʼe tolu ʼi te tanaki fakalaumalie ʼae ʼe hoko ʼi totatou temi?

12. ʼI te lea fakata ʼo te fua ʼi sinapi, kotea te ʼu faʼahi ʼe tatau ai mo te tanaki ʼae ʼe hoko ia ʼaho nei? (Vakaʼi mo te pakī “Te Tuputupu ʼo Te ʼu Ako Tohi-Tapu.”)

¹² (1) Tana tuputupu ʼo lahi: ʼE fakaha lelei ʼi te lea fakata ʼaia te tuputupu ʼo te logo ʼo te Puleʼaga pea mo te kokelekasio Fakakilisitiano. Talu mai te taʼu 1919, ko te kau gaue faʼafai ʼo te taʼukai neʼe tanaki ki te kokelekasio Fakakilisitiano ʼae neʼe kua fakamaʼa. ʼI te temi ʼaia, neʼe tokosiʼi te kau gaue, kaʼe neʼe tuputupu vave. Neʼe fakaofoofo ia te tuputupu ʼaia, mai te ʼu taʼu 1900 ki te temi nei. (Esa. 60:22) (2) Tona hoko moʼoni: ʼE mole feala ke taʼofi ia te tuputupu ʼo te kokelekasio Fakakilisitiano. Logo la ia te fakafeagai ʼae neʼe fai moʼo taʼofi ia te homo ake ʼo te pulapula ʼaia, kaʼe neʼe haga tuputupu aipe. (Esa. 54:17) (3) ʼE fakamalumalu ai te ʼu manulele: ʼE fakata e te faʼahi ʼaia ia te toko lau ʼi miliona mai te ʼu fenua ʼe 240 tupu, ʼae neʼe natou tali ia te logo ʼo te Puleʼaga pea kua natou kau ki te kokelekasio. (Esk. 17:23) ʼE natou maʼu ai te meʼa kai fakalaumalie, mo te fakalotomalohi pea mo te puipui.—Esa. 32:1, 2; 54:13.

13. Kotea he ʼu faʼahi ʼo te tuputupu ʼe fakamaʼuhigaʼi ʼi te lea fakata ʼo te meʼa fakatupu?

¹³ Te lea fakata ʼo te meʼa fakatupu. Neʼe natu fakatahi e he fafine ia te meʼa fakatupu mo te falena. Hili ʼaia, pea neʼe tupu. (Lau ia Mateo 13:33.) Kotea he ʼu faʼahi ʼo te tuputupu ʼe fakamaʼuhigaʼi ʼi te lea fakata ʼaia? Tou vakaʼi ia faʼahi ʼe lua. (1) ʼE hoko ia he fetogi ʼaki te tuputupu ʼaia. ʼE natu te meʼa fakatupu mo te falena pea ʼe “tupu.” (2) ʼE fakatupu e te meʼa fakatupu ia te lapate katoa, ʼi te ʼu “ipu falaoa e tolu.” ʼE tatau feafeaʼi ia te ʼu faʼahi ʼaia ʼe lua mo te tanaki fakalaumalie ʼae ʼe hoko ia ʼaho nei?

14. ʼI te lea fakata ʼo te meʼa fakatupu, kotea te ʼu faʼahi ʼe tatau mo te tanaki ia ʼaho nei?

¹⁴ (1) Te fetogi: Ko te meʼa fakatupu ʼe ina fakata ia te logo ʼo te Puleʼaga, pea ko te falena ʼe ina fakata ia te hahaʼi. Ka natu fakatahi te meʼa fakatupu mo te falena, pea ʼe hoko ai he fetogi. ʼO toe feia pe, ko te logo ʼo te Puleʼaga ʼe ina fetogi ia te loto ʼo te hahaʼi ʼae ʼe natou tali ia te logo ʼaia. (Loma 12:2) (2) Tona katoa: ʼE ina fakata ia te mafola ʼo te logo lelei ʼi te kele katoa, “o kaku ki te u potu fuli o te malamanei.” (Gaue 1:8) ʼE fakaha e te lua faʼahi, ʼe mafola anai ia te logo ʼo te Puleʼaga, maʼia ʼi te ʼu fenua ʼae ʼe tapuʼi ai tatatou gaue, logo la te fakahoko fakafufu ʼi ai ʼo tatatou gaue.

15. ʼE hoko feafeaʼi ia ʼaho nei ia te ʼu palalau ʼae ʼe tuʼu ia Esaia 60:5, 22? (Vakaʼi mo te ʼu fakamatala ʼae ʼi te ʼa takai “Neʼe Fakahoko e Sehova,” ʼi te pasina 93 pea mo “Kua Liliu Ia Ia ‘ ʼAe ʼe Veliveliʼ Ko He ‘Puleʼaga Malohi,ʼ ” ʼi te ʼu pasina 96-97.)

¹⁵ Ia taʼu ʼe 800 ʼi muʼa ʼo te fai e Sesu ia te ʼu lea fakata ʼaia, ko Sehova, ʼaki tana polofeta ko Esaia, neʼe ina fakakikite ia te tanaki fakalaumalie ʼae ʼe hoko ia ʼaho nei pea mo te fiafia ʼo te kau gaue.c ʼE fakamatala e Sehova te ʼomai ʼae ʼa te hahaʼi “mai mamao” ki tana kautahi. ʼE palalau ia Sehova ki he fafine, ʼe ina fakata ia ʼaho nei te kau fakanofo ʼae ʼe kei maʼuʼuli ʼi te kele. ʼE ina ui fenei age: “E ke hopohopo anai i te fiafia, pea e ke fiafia anai, e ta vave anai tou mafu pea e mapula anai ia i te fiafia, moka tau mai anai te u koloa o te tai kia koe, moka kaku mai anai te u koloa o te atu puleaga kia koe.” (Esa. 60:1, 4  5, 9) Kua hoko te ʼu palalau ʼaia! Ia ʼaho nei, ʼe fiafia ia te ʼu kaugana ʼa Sehova ʼae ʼe natou tauhi agatonu talu mai fualoa. Neʼe natou sisio ki te tuputupu ʼo te kau faifakamafola ʼi tonatou fenua, mai te tokosiʼi ʼi te kamata ki te toko lau ʼi afe ʼi te temi nei.

Te ʼu Tupuʼaga ʼo Tatatou Fiafia

16, 17. Kotea ʼae ʼe tupu ai te “fakafiafia fakatahi” ʼo ia ʼae ʼe ina nunusi pea mo ia ʼae ʼe ina tanaki? (Vakaʼi mo te fakamatala ʼae ʼi te ʼa takai “Neʼe Malave Te ʼu Kiʼi Pepa Lotu ʼe Lua Ki Te Foʼi Toko Lua ʼi Amazonie.”)

¹⁶ ʼE lagi ke manatuʼi neʼe ui fenei e Sesu ki ʼana tisipulo: “Ko ia ae e tanaki . . . e ina tanaki he u fua ki te mauli heegata, o tupu ko ae e nunusi mo ae e tanaki ke na fakafiafia fakatahi.” (Soa. 4:36) He ko ʼe ʼe tou “fakafiafia fakatahi” ʼi te tanaki ʼae ʼe fakahoko ʼi te kele katoa? ʼE lahi ʼona tupuʼaga, kaʼe ʼe tou vakaʼi pe anai ia tupuʼaga ʼe tolu.

¹⁷ ʼUluaki, ʼe tou fiafia he ʼe tokoni mai ia Sehova ʼi te gaue ʼaia. Ka tou fakamafola ia te logo ʼo te Puleʼaga, ʼe tou nunusi ia te pulapula. (Mat. 13:18  19) Ka tou tokoni ki he tahi ke liliu ko he tisipulo ʼa Kilisito, ʼe tou utu ai te fua ʼo te nunusi ʼaia ʼo te pulapula. Pea ʼe tou fiafia fuli ʼi tatatou tokagaʼi ʼae te haga ʼa Sehova ʼo fakatuputupu lelei ia te pulapula ʼaia ʼo te Puleʼaga. (Mko. 4:27  28) Neʼe lagi tou nunusi he pulapula, pea neʼe homo ake pea mo utu e he tahi age. Neʼe lagi hoko kia tatou te aluʼaga ʼae neʼe hoko kia Joan, ko te tuagaʼane ʼi Pilitania, neʼe papitema kua hili ki ai taʼu ʼe 60. Neʼe ina ui fenei: “Neʼe au felaveʼi mo ʼihi neʼe natou ui mai, ʼi ni taʼu ki muʼa atu neʼe au nunusi ia te pulapula ʼi tonatou loto ʼi taku faifakamafola age kia natou. Pea neʼe fai tanatou ako e ʼihi age kau Fakamoʼoni pea mo tokoni kia natou ke natou liliu ʼo kaugana kia Sehova, kaʼe neʼe mole au mahino ki te faʼahi ʼaia. ʼE au fiafia ʼi taku sio ko te pulapula ʼae neʼe au nunusi, neʼe homo ake pea neʼe utu ki muli age.”—Lau ia 1 Kolinito 3:6, 7.

18. Ia 1 Kolinito 3:8  kotea te tahi tupuʼaga ke tou fiafia ai?

¹⁸ Lua, ʼe tou haga gaue fakafiafia moka ʼe tou manatuʼi te ʼu palalau ʼaeni neʼe fai e Paulo: “E na tahi mau anai tona fakapale o mulimuli ki tana gaue.” (1 Ko. 3:8) ʼE foaki ia te fakapale ʼo mulimuli ki te fai ʼo te gaue, kaʼe mole ki te ʼu fua ʼo te gaue. ʼE fakalotofimalie ia te manatu ʼaia kia natou ʼae ʼe faifakamafola ʼi te ʼu telituale ʼae ʼe tokosiʼi ai te hahaʼi ʼe fia logo. Kia mata ʼo te ʼAtua, ko te kau Fakamoʼoni ʼae ʼe natou haga nunusi ʼaki he loto katoa, ʼe natou tahi “fua o lahi” pea ʼe natou fiafia ai.—Soa. 15:8; Mat. 13:23.

19. (1) Kotea te pikipikiga ʼo te lea fakapolofeta ʼa Sesu ia Mateo 24:14 pea mo totatou fiafia? (2) Kotea ʼae ʼe tonu ke tou haga manatuʼi mo kapau ʼe mole lahi tatatou fai ʼo ni tisipulo?

¹⁹ Tolu, ʼe tou fiafia he ʼe ʼaki tatatou gaue ʼe tou fakahoko ia he lea fakapolofeta. Tou vakaʼi ia te tali ʼae neʼe fai e Sesu ki ʼana apositolo, ʼi tanatou fehuʼi fenei age: “Kotea anai te fakailoga o tau toe liliu mai pea mo te fakaosi o te malamanei?” Neʼe fakaha age e Sesu ʼe kau anai ki te fakaʼiloga ʼaia ia te gaue faifakamafola ʼi te kele katoa. Neʼe palalau koa ia Sesu ki te gaue ʼae ko te fai ʼo ni tisipulo? Kailoa ia. Neʼe ina ui fenei: “E fakamafola anai te logo lelei aeni o te puleaga i te malamanei katoa, ke fakamooni.” (Mat. 24:3  14) Koia, ko te fakamafola ʼo te Puleʼaga peʼe ko te nunusi ʼo te pulapula, ʼe kau ʼi te fakaʼiloga. Pea ka tou fakamafola ia te logo lelei ʼo te Puleʼaga, tou haga manatuʼi neʼe tou lava foaki ia he “fakamooni,” logo la ʼe mole lahi tatatou fai ʼo ni tisipulo.d ʼEi, pe tali e te hahaʼi peʼe kailoa, kaʼe ʼe tou kau ki te fakahoko ʼo te lea fakapolofeta ʼa Sesu. ʼE tou maʼu ai mo te pilivilesio ʼae ke tou kaugā gaue mo te ʼAtua. (1 Ko. 3:9) Ko he tupuʼaga lelei ʼaia ke tou fiafia ai!

“Mai Te Hopo o Te Laa o Kaku Ki Tona To”

20, 21. (1) ʼE hoko feafeaʼi ia ʼaho nei te meʼa ʼae neʼe fakakikite ia Malakia 1:11? (2) Kotea ʼae ʼe ke fakatotonu ke ke fai ʼo ʼuhiga mo te gaue ʼae ko te tanaki ʼo te taʼukai, pea kotea tona tupuʼaga?

²⁰ ʼI tana ʼi te kele, neʼe tokoni ia Sesu ki ʼana apositolo ke natou mahino ki te maʼua ʼae ke tulikaki ia te gaue ʼae ko te tanaki ʼo te taʼukai. Talu mai te taʼu 1919, neʼe tokoni ia Sesu ki ʼana tisipulo ke natou toe mahino mo natou ki ai. Neʼe tupu ai te gaue malohi ʼa te hahaʼi ʼa te ʼAtua. Neʼe mole feala ke taʼofi natou. Ohage ko tona fakakikite e te polofeta ko Malakia, ia ʼaho nei kua fakahoko ia te gaue faifakamafola “mai te hopo o te laa o kaku ki tona to.” (Mala. 1:11) ʼEi, mai te hopo ake ʼo te laʼa ki tona to, mai te potu esite ki te uesite, ʼi te potu fuli pe ʼo te kele, ko natou ʼae ʼe natou nunusi ia te pulapula pea mo natou ʼae ʼe natou utu ia te fulumeto, ʼe natou gaue pea mo fakafiafia fakatahi. Pea mai te hopo ake ʼo te laʼa ki tona to, mai te uhu ki te poʼuli, ʼe tou tulikaki ia te gaue.

²¹ Ia ʼaho nei, ʼi te ʼu taʼu ʼaeni ʼe 100 kua hili, neʼe tou sisio ai ki te liliu ʼo te kiʼi kutuga ʼo te ʼu kaugana ʼa te ʼAtua ko “he puleaga malohi,” pea ʼe tou fiafia ʼaupito ai. (Esa. 60:5, 22) ʼOfa pe ke uga tatou e totatou fiafia pea mo totatou ʼofa ʼae kia Sehova, “te pule o te taukai,” ke tou kau fuli ki te toe tanaki lahi, ʼo kaku ki tona fakaʼosi!—Luka 10:2.