Koutou Haga Haʼele Tahi Mo Te ʼAtua
“Koutou haga haʼele ʼaki te laumālie pea ʼe mole koutou fakahoko anai he holi ʼo te kakano.”—Kalate 5:16.
1. (a) Neʼe feafeaʼi te mālama ʼaē neʼe maʼuli ai ia Enoke, pea neʼe loaloaga feafeaʼi tana haʼele tahi mo te ʼAtua ʼi te mālama ʼaia? (b) Neʼe loaloaga feafeaʼi te haʼele tahi ʼa Noe mo te ʼAtua, pea neʼe koteā te ʼu meʼa ʼaē neʼe tonu ke ina fai?
ʼE FAKAHĀ mai e te Tohi-Tapu, ko Enoke neʼe “haga haʼele mo te ʼAtua moʼoni.” Logope la te ʼu palalau heʼe fakaʼapaʼapa pea mo te ʼu aga heʼeʼaoga ʼa te hahaʼi ʼo tona temi, neʼe kātaki aipe ʼo haʼele mo te ʼAtua ʼo aʼu ki te fakaʼosi ʼo tona maʼuli ʼi tona taʼu 365. (Senesi 5:23, 24; Suta 14, 15) Neʼe toe feiā pe ʼo ʼuhiga mo Noe, “neʼe haʼele mo te ʼAtua moʼoni.” Neʼe ina fai te faʼahi ʼaia logope la neʼe ʼi ai tona famili ke ina taupau, mo ina tauʼi he mālama neʼe puleʼi e te kau ʼaselo agatuʼu pea mo tanatou fānau agamālohi, pea mo ina fakahoko te ʼu meʼa ʼaē neʼe ʼui age kia ia ʼo ʼuhiga mo te faʼu ʼo te aleka ʼaē neʼe lahi age ʼi te ʼu vaka ʼaē neʼe faʼu ʼi te ʼu temi ʼāfea. Neʼe haga haʼele mo te ʼAtua ʼi te hili ʼo te Tulivio, māʼiape la mo te temi ʼaē neʼe toe agatuʼu ai te hahaʼi kia Sehova ʼi te kolo ko Papele. ʼE mahino ia, neʼe haga haʼele ia Noe mo te ʼAtua ʼo aʼu ki tona mate ʼi tona taʼu 950.—Senesi 6:9; 9:29.
2. Koteā te faka ʼuhiga ʼo te ʼui ʼaē ke tou ‘haʼele mo te ʼAtua’?
2 Ka ʼui e te Tohi-Tapu, ko te ʼu tagata ʼaia neʼe nā “haʼele” mo te ʼAtua, ʼe ina fakaʼaogaʼi te kupu ʼaia ʼi hona ʼaluʼaga fakatātā. Ko tona faka ʼuhiga, ko Enoke pea mo Noe, neʼe ʼiloga lelei ʼi te ʼu aga ʼaē neʼe nā fai, neʼe nā tui mālohi ki te ʼAtua. Neʼe nā fakahoko te ʼu meʼa ʼaē neʼe fakatotonu age e Sehova kia nāua, pea nā fetogi tonā maʼuli ke ʼalutahi mo te ʼu meʼa ʼaē neʼe nā ʼiloʼi ʼo ʼuhiga mo ia, ʼi tana ʼu felogoi ʼaē mo te tagata. (Vakaʼi ia 2 Fakamatala 7:17.) Neʼe mole gata ʼaki pe tanā ʼio ki te ʼu meʼa ʼaē neʼe ʼui age e te ʼAtua, pe ko te ʼu meʼa ʼaē neʼe ina fai, kae neʼe nā fakahoko fuli te ʼu meʼa ʼaē neʼe ina fakamaʼua age kia nāua—ʼo mole nā fakahoko fakakoga pe, kae neʼe nā fai ia meʼa fuli ʼaē neʼe feala ke nā fai ʼi tonā ʼuhiga tagata agahala. Ohage la ko Noe, neʼe mulimuli lelei ki te ʼu meʼa ʼaē neʼe fakatotonu age e te ʼAtua. (Senesi 6:22) Neʼe mole faiga e Noe ke lahi age tana ʼu gāue ʼi te ʼu gāue ʼaē neʼe fakatotonu age ki ai, kae neʼe mole ina meʼa noaʼi te ʼu faʼahi ʼaia ʼo gāue fakapepeʼe. Neʼe felogoi lelei mo Sehova, pea neʼe faikole faʼifaʼitaliha ki te ʼAtua pea mo ina leleiʼia tona takitaki, pea neʼe haʼele mo te ʼAtua. ʼE koutou fai koa te faʼahi ʼaia?
Tou Fai ʼi Te ʼAho Fuli ʼo Totatou Maʼuli
3. Koteā te meʼa ʼaē ʼe maʼuhiga ʼaupito kia nātou fuli ʼaē kua nātou foaki tonatou maʼuli ki te ʼAtua pea mo papitema?
3 ʼE tou fiafia mokā tou sio ki he ʼu hahaʼi ʼe nātou kamata haʼele mo te ʼAtua. Ka nātou fai he ʼu fakatuʼutuʼu ʼo mulimuli ki te finegalo ʼo Sehova, ʼe nātou fakahā tanatou tui, heʼe maʼuhiga ʼaupito te tui mo kapau ʼe nātou loto ke leleiʼia nātou e te ʼAtua. (Hepeleo 11:6) ʼE tou fiafia, heʼe ʼi te taʼu fuli talu mai te ʼu taʼu e nima kua ʼosi, ko te toko 320 000 tupu neʼe nātou foaki tonatou maʼuli kia Sehova pea mo papitema! Kae ʼe toe maʼuhiga foki kia nātou pea mo tatou fuli ke tou haga haʼele mo te ʼAtua.—Mateo 24:13; Fakahā 2:10.
4. Logope la neʼe nātou fakahā he faʼahiga tui, he koʼe ko te tokolahi ʼo te kau Iselaelite ʼaē neʼe nātou mavae ʼi Esipito neʼe mole nātou hū ki te Kele ʼo te Fakapapau?
4 ʼI te ʼu ʼaho ʼo Moisese, neʼe ʼaoga ki te ʼu famili Iselaelite ke nātou maʼu te tui moʼo fai te Pāsikate ʼi Esipito, pea mo vali te toto ʼo te akeno ʼi te ʼu kaumatapā pea mo te ʼakau fakalava ʼi ʼoluga ʼo tonatou ʼapi. (Ekesote 12:1-28) Kae ko te tokolahi ʼo nātou neʼe vaivai tanatou tui ʼi tanatou sio ki te kautau ʼa Falaone ʼaē neʼe fakaōvi age kia nātou ʼi te Tai Kula. (Ekesote 14:9-12) ʼE fakahā mai ia Pesalemo 106:12, neʼe nātou toe “tui ki te folafola [ʼa Sehova],” ʼi tanatou ʼosi fakalaka ʼi te ala kua moamoa ʼi te lotomalie ʼo te tai, pea mo tanatou sio ʼaē ki te fakaʼauha ʼo te kautau Esipito ʼaki te ʼu tai. Kae hili kiai te kiʼi temi, ʼi tanatou nonofo ʼaē ʼi te toafa, neʼe kamata meo te kau Iselaelite ʼo ʼuhiga mo te vai, mo te meʼa kai, pea mo te faʼahiga takitaki ʼo nātou. Neʼe nātou matataku ʼi tanatou logo ʼaē ki te ʼu fakamatala fakamataku ʼaē neʼe fai e te kau malomu e toko 10 ʼi te ʼu malomu e toko 12 ʼaē neʼe toe liliu mai te Kele ʼo te Fakapapau. ʼE ʼui fēnei e te koga tohi ʼo Pesalemo 106:24; “neʼe mole nātou tui ki te folafola [ʼa te ʼAtua]” ʼi te ʼu lakaga ʼaia. Neʼe nātou toe fia liliu ki Esipito. (Faka au 14:1-4) Neʼe hoki nātou tui pe ʼi te ʼu lakaga ʼaē neʼe nātou mamata ai ki te ʼu gāue fakaofoofo ʼo te mālohi fakaʼatua. Neʼe mole nātou haga haʼele mo te ʼAtua. Ko te meʼa ʼaē neʼe hoko ai, neʼe mole hū te kau Iselaelite ʼaia ki te Kele ʼo te Fakapapau.—Pesalemo 95:10, 11.
5. Koteā te pikipikiga ʼo te koga tohi ʼo 2 Kolonito 13:5 pea mo Tāʼaga Lea 3:5, 6 pea mo tatatou haʼele mo te ʼAtua?
5 Ko te Tohi-Tapu ʼe ina fakaloto mālohiʼi fēnei tatou: “Koutou haga ʼahiʼahiʼi ia koutou [ke koutou ʼiloʼi] peʼe koutou nonofo ʼi te tui, koutou sivi tuʼumaʼu pe koteā tokotou ʼuhiga ʼo koutou totonu.” (2 Kolonito 13:5) Ko tatatou nonofo “ ʼi te tui,” ʼe faka ʼuhiga ki tatatou pipiki ki te ʼu akonaki faka Kilisitiano. ʼE maʼuhiga ʼaupito te faʼahi ʼaia mo kapau ʼe tou fia haʼele moʼoni mo te ʼAtua ʼi te ʼaho fuli pe ʼo totatou maʼuli. Ke feala hatatou haʼele mo te ʼAtua, ʼe toe maʼua foki ke tou maʼuliʼi te tui, ʼo tou falala katoa kia Sehova. (Tāʼaga Lea 3:5, 6) ʼE lahi te ʼu hele ʼaē ʼe feala ke tō kiai ia nātou ʼaē ʼe mole nātou maʼuliʼi te ʼu faʼahi ʼaia. Koteā te ʼu hele ʼaia?
ʼAua Naʼa Koutou Falala Pe Kia Koutou Totonu
6. Koteā te meʼa ʼaē ʼe ʼiloʼi e te kau Kilisitiano fuli ʼo ʼuhiga mo te folonikasio pea mo te tono, pea koteā tanatou manatu ʼo ʼuhiga mo te ʼu agahala ʼaia?
6 Ko nātou fuli ʼaē kua nātou ako te Tohi-Tapu, mo nātou foaki tonatou maʼuli kia Sehova pea mo papitema, kua nātou ʼiloʼi ʼe fehiʼa ia Sehova ki te folonikasio pea mo te tono. (1 Tesalonika 4:1-3; Hepeleo 13:4) Ko te kau Kilisitiano ʼaia, ʼe nātou ʼiloʼi ʼe tonu te faʼahi ʼaia. Pea ʼe nātou fia mulimuli ki te pelesepeto ʼaia. Kae ʼe kei fakaʼaogaʼi e Satana te hele mālohi ʼaē ko te ʼu aga heʼeʼaoga ʼi te ʼu felāveʼi fakasino. Koteā tona tupuʼaga?
7. ʼI te ʼu Mafa ʼo Moape, he koʼe neʼe fai e te hahaʼi tagata Iselaelite te ʼu aga, neʼe kua nātou ʼiloʼi ʼe kovi?
7 ʼI te kamata, ko nātou ʼaē neʼe nātou fai he ʼu aga heʼeʼaoga feiā, neʼe mole lagi nātou fakatuʼutuʼu ke nātou fai te faʼahi ʼaia. Neʼe lagi toe feiā pe ʼo ʼuhiga mo te kau Iselaelite ʼaē neʼe nonofo ʼi te ʼu Mafa ʼo Moape. Ko te hahaʼi tagata Iselaelite ʼaē neʼe kua fiu ʼi te nonofo ʼi te toafa, ʼi te kamata neʼe lagi hage kia nātou ʼe agalelei pea mo tali kāiga te hahaʼi fafine Moapite pea mo Matianite ʼaē neʼe nātou fakahalaʼi ia nātou. Kae koteā te meʼa ʼaē neʼe hoko ʼi te temi ʼaē neʼe tali ai e te kau Iselaelite te fakaafe ʼaē ke nātou faifaitahi mo te hahaʼi ʼe tauhi kia Paale ka mole nātou tauhi kia Sehova, te ʼu hahaʼi ʼaia kua nātou tali ke fai e tonatou ʼu ʼofafine (māʼiape la mo te ʼu ʼofafine ʼo te hahaʼi ʼaliki) te ʼu felāveʼi fakasino mo he ʼu tagata neʼe mole ko honatou ʼu ʼohoana? ʼI te kamata leleiʼia e te hahaʼi tagata ʼo Iselaele tanatou faifaitahi mo te hahaʼi fafine ʼaia, neʼe fakahalaʼi ai nātou ke nātou fai he ʼu meʼa neʼe nātou ʼiloʼi ʼe kovi, pea neʼe fakaʼauha ai ia nātou.—Faka au 22:1; 25:1-15; 31:16; Fakahā 2:14.
8. Ia ʼaho nei, koteā te meʼa ʼaē ʼe feala ke ina uga he Kilisitiano ke ina fai te ʼu felāveʼi fakasino heʼeʼaoga?
8 Koteā te meʼa ʼaē ʼe feala ke ina fakaneke he Kilisitiano ia ʼaho nei, ke higa ki te hele ʼaia? Logope la tana ʼiloʼi ʼaē ʼe kovi te ʼu felāveʼi fakasino heʼeʼaoga, kapau ʼe mole mahino kia ia te kovi ʼo tana falala fau kia ia totonu, pea ʼe feala ke tupu ai hana higa ʼi he ʼaluʼaga ʼe mālohi age ai tana holi ki te agahala ʼi tana holi ki te meʼa ʼaē ʼe lelei.—Tāʼaga Lea 7:6-9, 21, 22; 14:16.
9. Koteā te ʼu fakatokaga ʼo te Tohi-Tapu, ʼaē ʼe feala ke nātou puipui tatou mai te ʼu aga heʼeʼaoga?
9 Ko tona fakanounou, ʼe fakatokagaʼi tatou e te Folafola ʼa te ʼAtua ke ʼaua naʼa tou manatu ʼe tou mālolohi fau, ʼo tou ʼui ʼe mole feala ke tou tuʼutāmaki mo kapau ʼe mole lelei tatatou ʼu fakakaugā. ʼE kau ki te faʼahi ʼaia tatatou sioʼi te ʼu ʼata ʼaē ʼe fakahā ai te maʼuli ʼo te ʼu hahaʼi aga heʼeʼaoga pea mo tatatou lau ia te ʼu nusipepa ʼaē ʼe nātou fakaneke ai tatou ki te ʼu holi kovi. (1 Kolonito 10:11, 12; 15:33) Māʼiape pe la mo tatatou faifaitahi mo he ʼu tēhina peʼe ko he ʼu tuagaʼane ʼi he ʼu ʼaluʼaga ʼe mole tau mo feʼauga, ʼe feala ke tupu ai he ʼu fihifihia lahi. ʼE mālohi te holi ʼaē ki te kakano. ʼI tana ʼofa ʼaē kia tatou, ʼe fakatokagaʼi mai e te kautahi ʼa Sehova ke ʼaua naʼa tou nonofo takitokotahi ʼi he potu mo he tuagaʼane pe ko he tēhina ʼe mole ko hotatou ʼohoana pe ko hotatou kāiga. Ke feala hatatou haga haʼele mo te ʼAtua, ʼe mole tonu ke tou falala fau kia tatou totonu, pea ʼe tonu ke tou mulimuli ki te tokoni ʼaē ʼe ina fai mai kia tatou.—Pesalemo 85:8.
ʼAua Naʼa Koutou Mataku Ki Te Tagata
10. He koʼe ko te “mataku ki te tagata” ʼe ko he hele kia tatou?
10 ʼE talanoa ia Tāʼaga Lea 29:25 ki te tahi hele, ʼo ina ʼui fēnei ai: “Ko te mataku ki te tagata, koʼena te meʼa ʼaē ʼe liliu ko he hele.” Ko te ʼu hele ʼaē ʼe fakaʼaogaʼi e te tagata kapu manu, ʼi te agamāhani ʼe ko he kauʼi noʼo moʼo nonoʼo mālohi te kia ʼo te manu pe ko he kauʼi maea ʼe ina nonoʼo te vaʼe ʼo te manu. (Sopo 18:8-11) ʼO toe feiā aipe mo te mataku ʼaē ki te tagata, ʼe feala ke ina tāʼofi he tahi ke mole palalau faʼitaliha pea ke mole ina fai te aga ʼaē ʼe leleiʼia e te ʼAtua. ʼE tou loto fuli ke leleiʼia tatou e te hahaʼi, pea ʼe mole ko he aga faka Kilisitiano ke tou meʼa noaʼi te manatu ʼa he tahi ʼu hahaʼi. Kae ʼe tonu ke tou fakafuafua te faʼahi ʼaia. Ka fai e he tahi te ʼu meʼa ʼaē ʼe tapuʼi e te ʼAtua pea mole ina fai te ʼu meʼa ʼaē ʼe fakatotonu e te Folafola ʼa te ʼAtua, heʼe mataku ki te ʼu meʼa ʼaē ʼe feala ke lau e te hahaʼi, pea ʼe feala leva ke tou ʼui, kua tō te Kilisitiano ʼaia ki te hele.
11. (a) Koteā te meʼa ʼaē ʼe feala ke ina puipui tatou ke ʼaua naʼa tou mataku ki te tagata? (b) Neʼe tokoni feafeaʼi ia Sehova ki tana ʼu kaugana ʼaē neʼe nā faiga ke nā tauʼi tonā mataku ki te tagata?
11 ʼE feala ke tou puipui ia tatou mai te hele ʼaia, ʼo mole tou fai ʼaki pe totatou fealagia takitokotahi, kae ʼe feala mo kapau ʼe tou “falala kia Sehova.” (Tāʼaga Lea 29:25b) Kapau ʼe falala he tahi kia Sehova, tatau aipe peʼe mataku ʼi te palalau, kae ʼe feala ke liliu ʼo lototoʼa pea mo lotomālohi. ʼO aʼu ki te fakaʼosi ʼo te tuʼu ʼo te ʼu faʼahiga meʼa ʼaenī ʼa Satana ʼaē ʼe ina fakamamahiʼi tatou, ʼe tonu anai ke tou nonofo tokaga ke ʼaua naʼa tou tō ki te hele ʼaē ko te mataku ki te tagata. Logope la neʼe logona te lototoʼa ʼo Elia ʼi tana tauhi kia Sehova, kae neʼe mataku pea mo feholaʼaki ʼi te temi ʼaē neʼe ʼui ai e Sesapele ʼe ina matehi anai ia ia. (1 Hau 19:2-18) ʼI tona fakamatakuʼi, neʼe fakafisi ia Petelo kia Sesu, pea hili kiai ni ʼu taʼu, neʼe ina toe fai te aga ʼe mole ʼalutahi mo te tui, ʼuhi pe ko tona mataku. (Maleko 14:66-71; Kalate 2:11, 12) Kae neʼe tali e Elia pea mo Petelo ke tokoniʼi nāua ʼi te faʼahi fakalaumālie, pea ʼaki tanā falala kia Sehova, neʼe nā hoko atu tanā tauhi ʼaē kia te ia.
12. Koteā te ʼu faʼifaʼitaki ʼo te temi ʼaenī ʼaē ʼe nātou fakahā mai te tokoni ʼaē neʼe maʼu e ʼihi, ke mole tāʼofi nātou e te mataku ki te tagata ke nātou fai te ʼu meʼa ʼaē ʼe leleiʼia e te ʼAtua?
12 ʼE lahi te ʼu kaugana ʼa Sehova ia ʼaho nei, kua nātou ako mo nātou peʼe feafeaʼi tanatou tauʼi te hele ʼaē ko te mataku. Neʼe ʼui fēnei e te taʼahine ko te Fakamoʼoni ʼa Sehova ʼi Guyane: “ ʼI te faleako, ʼe mālohi te ʼu fakaneke ʼa te tamaliki ako.” Kae neʼe ina toe ʼui fēnei: “Kae ʼe toe mālohi foki mo taku tui ʼaē kia Sehova.” ʼI te temi ʼaē neʼe vāʼi ai e tana tagata faiako ia muʼa ʼo te kalasi ʼuhi ko tana tui, neʼe faikole fakalogologo kia Sehova. Ki muli age, neʼe fai faka mafola ki tana tagata faiako ʼaki he aga fakaʼapaʼapa. ʼI tana tahi ʼalu ki te kolo ʼaē neʼe tupu ai ʼi Bénin, ko te tūpulaga neʼe ina kamata ako te ʼu fakatotonu ʼa Sehova, neʼe kua ina fakatotonu ʼe ina līaki anai te fakatātā ʼaē neʼe faʼu e tana tāmai maʼa ia. Neʼe ʼiloʼi e te tūpulaga ʼaia, ʼe mole maʼuli te fakatātā, pea neʼe mole mataku ia ki te meʼa ʼaia, kae neʼe mahino foki kia ia, ko te hahaʼi ʼo te kiʼi kolo ʼe nātou ʼiʼita anai pea mo lagi nātou matehi anai ia ia. Neʼe faikole kia Sehova, pea ʼi te po ʼaia, neʼe ina ʼave te fakatātā ʼaia ki te ʼulu vao ʼo ina līaki ai. (Vakaʼi ia Kau Fakamāu 6:27-31.) Ko te fafine ʼi te République Dominicaine, ʼi tana kamata tauhi ʼaē kia Sehova, neʼe kole age e tona ʼohoana, ke ina filifili peʼe ʼofa kia ia peʼe ʼofa kia Sehova. Neʼe ʼui age e te tagata, ʼe mavete anai mo ia. ʼE līaki anai koa e te fafine ʼaia tana tui ʼi tana mataku? Neʼe ina tali fēnei: “Kapau ʼe tā mavete ʼuhi he neʼe tono he tahi ia tāua, pea ʼe ʼau ufiufi anai, kae ʼe mole ʼau ufiufi anai mo kapau ʼe tā fai te faʼahi ʼaia ʼuhi ko taku tauhi ʼaē kia Sehova ʼAtua!” Neʼe haga haʼele aipe mo te ʼAtua, pea ʼaki te temi, neʼe kau fakatahi tona ʼohoana mo ia ʼo fai te finegalo ʼo Sehova. Kapau ʼe tou falala katoa ki tatatou Tāmai ʼaē ʼe ʼi selo, pea ʼe feala mo tatou ke tou tekeʼi te mataku ki te tagata ke mole ina tāʼofi tatou ke tou fai te ʼu meʼa ʼaē ʼe leleiʼia e Sehova.
ʼAua Naʼa Koutou Meʼa Noaʼi Te ʼu Tokoni
13. Ia 1 Timoteo 6:9, koteā te hele ʼaē ʼe tonu ke tou tokakaga kiai?
13 Ko te ʼu hele ʼaē ʼe fakaʼaogaʼi māhani e te hahaʼi kapu manu, ʼe fai moʼo puke ʼo te ʼu manu fuli ʼaē ʼe fakalaka ʼi te koga meʼa ʼaē ʼe tuku ai te hele ʼaia, kae ʼe ʼi ai mo te tahi ʼu hele ʼe fakaōvi kiai te ʼu manu ʼuhi ko te meʼa fagaʼi ʼaē ʼe fakapipiki kiai. Ki te tokolahi ʼo te hahaʼi, ko te ʼu koloā ʼe hage ko te ʼu hele ʼaia. (Mateo 13:22) Ia 1 Timoteo 6:8, 9, ʼe fakaloto mālohiʼi tatou e te Tohi-Tapu ke tou fakafeauga ki te meʼa kai pea mo te ʼu mutuʼi meʼa. ʼOsi ʼaia, pea ina fai te fakatokaga ʼaenī: “Ko nātou ʼaē kua nātou fakapapau ke nātou maʼu koloā ʼe nātou higa ki te fakahala, ki he hele pea mo te ʼu holi fakavale lahi pea mo fakatupu kovi ʼe nātou fakauku te tagata ki te fakaʼauha pea mo te pulinoa.”
14. (a) Koteā te meʼa ʼaē ʼe feala ke ina tāʼofi he tahi ke mole mulimuli ki te tokoni ʼaē ke tou fakafeauga ki te meʼa kai pea mo te mutuʼi meʼa? (b) Koteā te manatu hala ʼo ʼuhiga mo te hahaʼi maʼu koloā, ʼaē ʼe feala ke ina uga tatou ke tou meʼa noaʼi te tokoni ʼaē ʼe tou maʼu ia 1 Timoteo 6:9? (c) He koʼe ʼe mole sio ʼihi ki te tuʼutāmaki ʼaē ʼe feala ke hoko kia nātou ʼuhi ko te “holi ʼo [tonatou] ʼu mata”?
14 Logope la te fakatokaga ʼaia, kae ko te tokolahi ʼe nātou tō ki te hele ʼaia heʼe mole nātou fakaʼaogaʼi te tokoni faka Tohi-Tapu ʼi tonatou maʼuli. Koteā tona tupuʼaga? ʼE nātou fai koa la te faʼahi ʼaia ʼuhi ko tanatou fia hā, ʼaē ʼe ina uga ai nātou ke lahi age te ʼu koloā ʼaē ʼe nātou fia maʼu, ka mole nātou fakafeauga pe ki te “meʼa kai pea mo te mutuʼi meʼa,” ohage ko tona fakaloto mālohiʼi mai e te Tohi-Tapu? ʼE nātou meʼa noaʼi koa te fakatokaga ʼa te Tohi-Tapu ʼo nātou manatu, ko te hahaʼi maʼu koloā ʼe faka ʼuhiga pe ki te hahaʼi ʼaē ʼe lahi tanatou maʼu paʼaga? ʼE fakahā lelei mai e te Tohi-Tapu, ko takita fakapapau ʼaē ke kita maʼu koloā ʼe kehe ʼaupito ia mo takita fakafeauga ki te meʼa kai pea mo te mutuʼi meʼa. (Vakaʼi ia Hepeleo 13:5.) Ko “te holi ʼo te ʼu mata”—tanatou holi ʼaē ke nātou maʼu te ʼu meʼa ʼaē ʼe nātou sio kiai, tatau aipe peʼe nātou līaki anai tanatou ʼu fakatuʼutuʼu fakalaumālie—ʼe ina uga koa ia nātou ke mole kei nātou fakamuʼamuʼa te tauhi moʼoni? (1 Soane 2:15-17; Asea 1:2-8) ʼE lahi age te fiafia ʼo nātou ʼaē ʼe nātou maʼuliʼi moʼoni te tokoni ʼa te Tohi-Tapu pea mo nātou haʼele mo te ʼAtua, ʼo nātou faka maʼuhigaʼi tāfito te tauhi ʼaē kia Sehova ʼi tonatou maʼuli!
Tou Tauʼi Te ʼu Faigataʼaʼia ʼo Te Maʼuli
15. Koteā te ʼu ʼaluʼaga ʼaē ʼe feala ke tuʼaniaʼi e te tokolahi ʼo te hahaʼi ʼa Sehova, kae koteā te hele ʼaē ʼe tonu ke tou tokakaga kiai mokā hoko kia tatou te ʼu faigataʼaʼia ʼaia?
15 ʼI te agamāhani, ʼe mole tou faʼa tuʼania ke tou maʼu koloā, kae ʼe tou tuʼaniaʼi tāfito ke tou maʼu te ʼu meʼa ʼaē ʼe ʼaoga moʼoni ki totatou maʼuli. ʼE lahi te ʼu kaugana ʼa Sehova, ʼe mole lahi te ʼu meʼa ʼaē ʼe nātou maʼu. ʼE nātou gāue kinakina lolotoga ni ʼu hola ke maʼu hanatou falā moʼo totogi te ʼu mutuʼi meʼa ʼaē ʼe ʼaoga kia nātou, mo honatou nofoʼaga ke momoe ai tonatou famili, pea mo hanatou kiʼi meʼa kai ʼi te ʼaho fuli. Ko ʼihi, ʼe nātou tau mo te ʼu fihifihia ohage la ko te mahaki peʼe ko tanatou kua matutuʼa pe ko te kua matuʼa ʼa he tahi ʼi te famili. Kapau ʼe mole tou nofo tokaga, pea ʼe feala ki te ʼu meʼa ʼaia ke liliu ʼo maʼuhiga age ʼi te ʼu meʼa fakalaumālie!—Mateo 13:22.
16. ʼE tokoni feafeaʼi mai ia Sehova kia tatou ke tou lavaʼi te ʼu tuʼania ʼo te maʼuli?
16 Ko Sehova, ʼi tona ʼofa, ʼe ina fakahā mai kia tatou te fakafimālie ʼaē ka tou maʼu anai ʼi te takitaki ʼo te Puleʼaga Faka Mesianike. (Pesalemo 72:1-4, 16; Isaia 25:7, 8) Tahi ʼaē meʼa, ʼe tokoni mai kia tatou ke tou tauʼi te ʼu fihifihia ʼo te maʼuli, ʼo ina foaki mai kia tatou he ʼu tokoni ke tou ʼiloʼi papau pe koteā te ʼu meʼa ʼaē ʼe tonu ke tou fakamuʼamuʼa. (Mateo 4:4; 6:25-34) ʼE fakafimālieʼi tatou e Sehova ʼaki te ʼu fakamatala ʼaē ʼe ina fakahā mai ʼo ʼuhiga mo tana tokoni ki tana kau kaugana ʼi te ʼu temi ʼāfea. (Selemia 37:21; Sake 5:11) ʼE ina fakaloto mālohiʼi tatou ʼo ina fakahā mai, tatau aipe pe koteā te ʼu fihifihia ʼaē ʼe hoko kia tatou, kae ʼe ʼofa tuʼumaʼu pe ki tana kau kaugana agatonu. (Loma 8:35-39) ʼE ina ʼui fēnei kia nātou ʼaē ʼe nātou falala kia te ia: “Kailoa ʼe mole ʼau tuku anai koe, kailoa ʼe mole ʼau līaki anai koe.”—Hepeleo 13:5.
17. Koutou fakamatala te ʼu faʼifaʼitaki ʼo he ʼu Kilisitiano neʼe nātou haʼele mo te ʼAtua māʼiape la te ʼu fihifihia lahi ʼaē neʼe hoko kia nātou.
17 Ko te faʼahi ʼaia ʼe ina fakaloto mālohiʼi te kau Kilisitiano moʼoni, pea ʼe nātou haga haʼele mo te ʼAtua ka mole nātou higa ki te ʼu faʼahiga aga ʼo te malamanei. ʼE lahi te hahaʼi masiva ʼo te ʼu fenua kehekehe ʼe nātou manatu, kapau ʼe kita toʼo te ʼu meʼa ʼa he tahi ʼe maʼu koloā ke feala hakita fafaga ʼaki tokita famili, pea ʼe mole ko he kaihaʼa ia. Kae ko nātou ʼaē ʼe nātou haʼele ʼaki te tui, ʼe nātou fakafisi ki te faʼahiga manatu ʼaia. ʼE maʼuhiga age kia nātou te ʼofa ʼa te ʼAtua ʼi te ʼu koloā ʼaia, pea ʼe nātou falala ʼe fakapale anai nātou e te ʼAtua ʼuhi ko tanatou faitotonu. (Tāʼaga Lea 30:8, 9; 1 Kolonito 10:13; Hepeleo 13:18) Neʼe mahino ki te fafine vitua ʼi Initia, ko tona lotomālohi ʼaē ke gāue pea mo tana poto ʼi te maʼu ʼo he ʼu puleʼaki, neʼe ko he ʼu tokoni moʼoni ʼaia kia ia. Neʼe mole meo ʼo ʼuhiga mo tona ʼaluʼaga, kae neʼe mahino kia ia, kapau ʼe ina fakamuʼamuʼa te Puleʼaga ʼo te ʼAtua pea mo tana faitotonu ʼi tona maʼuli, pea ʼe tapuakiʼi anai e Sehova tana ʼu faiga ʼaē ke ina maʼu te ʼu meʼa ʼaē ʼe ʼaoga kia ia pea mo tana tama. (Mateo 6:33, 34) Ko te toko lauʼi afe kau Kilisitiano ʼi te kele katoa ʼe nātou fakahā ʼi tonatou maʼuli, ko Sehova ʼe ko tonatou holaʼaga pea ko tonatou puipui, tatau aipe pe koteā te ʼu fihifihia ʼaē ʼe hoko kia nātou. (Pesalemo 91:2) Kaeā ia koutou?
18. Koteā te kalavi ʼaē ʼe ʼaoga kia tatou, moʼo tekeʼi te ʼu hele ʼo te mālama ʼa Satana?
18 ʼO aʼu ki te fakaʼosi ʼo te tuʼu ʼo te ʼu faʼahiga meʼa ʼaenī, ʼe tonu anai ke tou tokaga ke ʼaua naʼa tou tō ki te ʼu hele ʼa Satana. (1 Soane 5:19) ʼE fakahā mai e te Tohi-Tapu pe koteā te ʼu hele ʼaia pea ʼe lava feafeaʼi hatatou fakamamaʼo mai ai. Ko nātou ʼaē ʼe ʼoʼofa moʼoni kia Sehova pea mo nātou manavasiʼi kia te ia, ʼe feala ke nātou hāo mai te ʼu hele ʼaia. Kapau ʼe nātou “haga haʼele ʼaki te laumālie,” pea ʼe mole nātou higa anai ki te ʼu faʼahiga aga ʼo te malamanei. (Kalate 5:16-25) Ko nātou fuli ʼaē ʼe nātou faka maʼuhigaʼi moʼoni tanatou ʼu felogoi mo Sehova ʼi tonatou maʼuli, ʼe feala ke nātou falala ʼe nātou haʼele anai mo ia pea mo kaumeʼa mo ia ʼo talu ai.—Pesalemo 25:14.
Koteā Takotou Manatu?
◻ He koʼe ko tatatou falala kia tatou totonu, ʼe feala ke liliu ko he hele?
◻ Koteā ʼaē ʼe feala ke ina puipui tatou ke ʼaua naʼa tou matataku ki te tagata?
◻ Koteā te ʼu meʼa ʼaē ʼe feala ke nātou tāʼofi tatou ke mole tou mulimuli ki te tokoni ʼaē ke ʼaua naʼa tou faiga ke tou maʼu koloā?
◻ Koteā ʼaē ʼe tokoni kia tatou ke ʼaua naʼa tou tō ki te hele ʼo te ʼu tuʼania ʼo te maʼuli?
[Paki ʼo te pasina 16, 17]
ʼE lahi ia nātou ʼaē ʼe nātou haga haʼele mo te ʼAtua lolotoga tonatou maʼuli katoa