Te Faʼahiga Tauhi ʼAe ʼe Loto Ki Ai Te ʼAtua

1. Ko ai ʼae ʼe tonu ke ina fakaha mai te faʼahiga tauhi ʼae ʼe loto ki ai te ʼAtua?

ʼE LAHI te ʼu lotu ʼe natou ui ʼe natou akoʼi te moʼoni ʼo ʼuhiga mo te ʼAtua. Kaʼe, ʼe mole moʼoni. Koteʼuhi ʼe akoʼi e te ʼu lotu te ʼu manatu ʼe kehekehe ʼo ʼuhiga mo te ʼAtua pea mo te faʼahiga tauhi ʼae ʼe fai kia te ia. Kaʼe ʼe feafeaʼi hatatou iloʼi te faʼahiga tauhi ʼae ʼe loto ki ai te ʼAtua? ʼE ko Sehova tokotahi pe ʼe feala ke ina fakaha mai te faʼahi ʼaia.

2. Kofea ʼae ʼe tou lava iloʼi ai te faʼahiga tauhi ʼae ʼe loto ki ai te ʼAtua?

² Neʼe foaki mai e Sehova te Tohi-Tapu. Pea ʼe feala ke tou iloʼi ai te faʼahiga tauhi ʼae ʼe loto ki ai. Koia, ke ke ako te Tohi-Tapu. Pea ʼe tokoni atu anai ia Sehova ke ke maʼu ni fua lelei mai ʼana akonaki. Koteʼuhi ʼe ʼofa ia ia koe.​—Esaia 48:17.

3. Kotea ʼae ʼe loto e te ʼAtua ke tou fai?

³ Ko ʼihi ʼe natou ui ʼe tali e te ʼAtua te ʼu lotu fuli. Kaʼe, neʼe mole ko te faʼahi ʼaia neʼe akoʼi mai e Sesu. Neʼe ina ui fenei: “ ʼE mole ko natou fuli ʼae ʼe natou ui mai: ‘ ʼAliki, ʼAliki,’ ʼae ka natou hu anai ki te Puleʼaga ʼo selo, kaʼe ʼe gata pe kia ia ʼae ʼe ina fai te finegalo ʼo taku Tamai.” Koia ʼae ʼe tonu ai ke tou iloʼi te finegalo ʼo te ʼAtua pea ke tou mulimuli ki ai. ʼE maʼuhiga te faʼahi ʼaia, koteʼuhi neʼe fakatatau e Sesu te hahaʼi ʼae ʼe mole fakalogo ki te ʼAtua ki ni hahaʼi faifakapo. Ko tona fakaʼuhiga, ko ni hahaʼi ʼe natou “maumauʼi ia te lao.”​—Mateo 7:​21-23.

4. Kotea ʼae neʼe ui e Sesu ʼo ʼuhiga mo te fai ʼo te finegalo ʼo te ʼAtua?

⁴ Neʼe fakatokaga e Sesu ʼana tisipulo, koteʼuhi neʼe mahino kia ia ʼe mole faigafua anai te fai ʼo te finegalo ʼo te ʼAtua. Neʼe ina ui fenei: “Kotou hu ʼi te matapa faveliveli, koteʼuhi ʼe falahi ia te matapa pea mo laulahi ia te ala ʼae ʼe ina taki ki te fakaʼauha, pea ʼe kaugā malie ia natou ʼae ʼe hu ai. Kaʼe ʼe faveliveli ia te matapa pea mo lauveliveli ia te ala ʼae ʼe ina taki ki te maʼuli, pea ʼe tokosiʼi ia natou ʼae ʼe natou maʼu.” (Mateo 7:​13, 14) Ko te ala faveliveli, ia te faʼahiga tauhi ʼae ʼe loto ki ai te ʼAtua, ʼe ina taki ki te maʼuli heʼe gata. Ko te ala falahi, ia te faʼahiga tauhi ʼae ʼe mole tali e te ʼAtua, ʼe ina taki ki te mate. Kaʼe, ʼe mole loto e Sehova ke mate he tahi. Koia, ʼe ina foaki ai ki te hahaʼi te fealagia ʼae ke natou ako ke natou iloʼi ia ia.​—2 Petelo 3:9.

TE FAʼAHIGA TAUHI ʼAE ʼE LOTO KI AI TE ʼATUA

5. ʼE ke lava iloʼi feafeaʼi ia natou ʼae ʼe natou fai te faʼahiga tauhi ʼe loto ki ai te ʼAtua?

⁵ Neʼe ui e Sesu ʼe feala ke tou iloʼi ia natou ʼae ʼe natou fai te faʼahiga tauhi ʼae ʼe loto ki ai te ʼAtua. ʼO feafeaʼi? ʼAki tatatou vakavakaʼi lelei te ʼu akonaki ʼe natou tui ki ai pea mo te ʼu gaue ʼae ʼe natou fai. Neʼe ui fenei e Sesu: “ ʼE kotou iloʼi anai natou ʼi ʼanatou gaue.” Pea neʼe ina hoko atu fenei: “Ko te ʼu fuʼu ʼakau ʼae ʼe maʼuli lelei, ʼe fua lelei.” (Mateo 7:​16, 17) ʼE mole fakaʼuhiga leva ʼe kua haohaoa te kau atolasio moʼoni ʼa te ʼAtua. Kaʼe ʼe natou faiga tuʼumaʼu pe ke natou fai te meʼa ʼae ʼe lelei. Tou vakaʼi pe ʼe feafeaʼi hatatou iloʼi ia natou ʼaia.

6, 7. He koʼe ʼe fakatafito te tauhi moʼoni ki te Tohi-Tapu? Kotea ʼe tou ako mai te faʼifaʼitaki ʼa Sesu?

⁶ ʼE tonu ke fakatafito tatatou tauhi ki te Tohi-Tapu. ʼE ui fenei ʼi te Tohi-Tapu: “Ko meʼa fuli ʼae ʼe tohi ʼi te ʼu Tohi Taputapu ʼe haʼu ia mai te ʼAtua. ʼE ʼaoga moʼo akoʼi te hahaʼi, moʼo fakatonutonu te hala, moʼo fakatokatoka te ʼu aluʼaga kehekehe, moʼo akonakiʼi ʼo mulimuli ki te faitotonu, ke liliu ai te tagata kaugana ʼa te ʼAtua ʼo faiva, pea mo tokalelei ke ina fai te ʼu gaue lelei fuli.” (2 Timoteo 3:​16, 17) Neʼe tohi fenei e te apositolo ko Paulo ki te kau Kilisitiano: “Neʼe kotou tali te folafola ʼa te ʼAtua ʼae neʼe matou tala atu. Pea neʼe mole kotou tali ohage ko te folafola ʼa te tagata, kaʼe ohage ko te folafola ʼa te ʼAtua.” (1 Tesalonika 2:13) ʼEi, ʼe fakatafito pe te tauhi moʼoni ki te Folafola ʼa te ʼAtua, ia te Tohi-Tapu. Kaʼe ʼe mole fakatafito ki he ʼu manatu fakatagata, peʼe ki he ʼu talatisio peʼe ki he tahi age ʼu meʼa.

⁷ Ko te ʼu faʼahi fuli ʼae neʼe akoʼi e Sesu, neʼe ina fakatafito ki te Folafola ʼa te ʼAtua. (Lau ia Soane 17:17.) ʼI ʼihi temi, neʼe ina fakaʼaogaʼi he ʼu vaega Tohi-Tapu. (Mateo 4:​4, 7, 10) Koia, ʼe mulimuli pe te kau atolasio moʼoni ʼa te ʼAtua ki te faʼifaʼitaki ʼa Sesu. Pea ko te ʼu meʼa fuli ʼae ʼe natou akoʼi ki te hahaʼi ʼe fakatafito ki te Tohi-Tapu.

8. Ohage ko tona ui e Sesu, ko ai ʼae ʼe tonu ke tou tauhi ki ai?

⁸ ʼE tonu ke tou tauhi ʼateaina pe kia Sehova. ʼE ui ia Pesalemo 83:19: “Ko koe toko tahi ae e higoa ko [Sehova], ko koe ko te Maoluga i te kele katoa!” Neʼe loto e Sesu ke iloʼi e te hahaʼi pe ko ai moʼoni te ʼAtua. Pea neʼe ina akoʼi ki te hahaʼi te huafa ʼo te ʼAtua. (Lau ia Soane 17:6.) Neʼe ui fenei e Sesu: “ ʼE tonu ke ke atolasio kia Sehova tou ʼAtua pea mo foaki kia te ia tokotahi pe he tauhi taputapu.” (Mateo 4:10) Koia, ʼi totatou ʼuhiga kaugana ʼa te ʼAtua, ʼe tou mulimuli ki te faʼifaʼitaki ʼa Sesu. ʼE tou tauhi ʼateaina pe kia Sehova. ʼE tou fakaʼaogaʼi tona huafa pea mo fakaha ki te hahaʼi. Pea ʼe tou akoʼi ki te hahaʼi te fakatuʼutuʼu ʼae ka fai anai e te ʼAtua maʼa te tagata.

9, 10. ʼE feafeaʼi hatatou fakaha totatou ʼofa?

⁹ ʼE tonu ke tou ʼoʼofa moʼoni ki te hahaʼi. Neʼe akoʼi e Sesu ki ʼana tisipulo ke natou maʼuli feʼofaʼofani. (Lau ia Soane 13:35.) ʼE tonu ke tou maʼuli feʼofaʼofani tatau aipe pe ʼe mole tou fenua tahi, peʼe kehekehe totatou faʼahiga akoʼi peʼe tou maʼu koloa peʼe tou masisiva. Ko tatatou maʼuli feʼofaʼofani ʼae ʼe tonu ke ina fakatahiʼi ai tatou. Pea ko tatou ko te ʼu tehina mo tuagaʼane. (Kolose 3:14) Koia, ʼe mole tou kau ai ki te tau pea ʼe mole tou matehi he tahi. ʼE ui fenei ʼi te Tohi-Tapu: “ ʼE iloga kehe pe te ʼu fanau ʼa te ʼAtua mai te ʼu fanau ʼa te Tevolo ʼi te faʼahi ʼaeni: Ko ia ʼae ʼe mole ina maʼuliʼi te faitotonu ʼe mole haʼu ia mai te ʼAtua, ʼo feia pe mo ia ʼae ʼe mole ʼofa ki tona tehina.” Pea ʼe ina hoko atu fenei: “Ke tou feʼofaʼaki. Kaʼe ʼe mole tonu ke tou hage ko Kaino, ʼae neʼe haʼu mai te Agakovi pea neʼe ina matehi tona tehina.”​—1 Soane 3:​10-12; 4:20, 21.

¹⁰ ʼE tou fakaʼaogaʼi totatou temi, mo totatou malohi pea mo meʼa fuli ʼe tou maʼu ke tou fetokoniʼaki ai mo ʼihi pea mo fefakalotomalohiʼaki. (Hepeleo 10:24, 25) ʼEi, “tou fai te meʼa ʼae ʼe lelei ki te hahaʼi fuli.”​—Kalate 6:10.

11. He koʼe ʼe tonu ke tou tali ʼe ko Sesu pe ʼae ʼe feala ke ina haofaki tatou?

¹¹ ʼE tonu ke tou fakalogo kia Sesu koteʼuhi ko ia ʼae neʼe ina haofaki tatou. ʼE ui fenei ʼi te Tohi-Tapu: “ ʼE mole maʼu te haofaki ʼi he tahi age, koteʼuhi ʼe mole ʼi ai ʼi te lalo lagi he tahi age higoa neʼe kua foaki ki te tagata, ʼe tonu ke haofaki ai tatou.” (Gaue 4:12) ʼI te Kapite 5 ʼo te tohi ʼaeni, neʼe tou mahino ai ko Sehova ʼae neʼe ina fekauʼi ifo ia Sesu ki te kele ke ina foaki tona maʼuli ko he totogi maʼa te hahaʼi fakalogo. (Mateo 20:28) Neʼe filifili e Sehova ia Sesu ko te Hau ki te kele. Ko te tupuʼaga la ʼaia ʼo te ui ʼi te Tohi-Tapu ʼe tonu ke tou fakalogo kia Sesu mo kapau ʼe tou fia maʼu te maʼuli heʼe gata.​—Lau ia Soane 3:36.

12. He koʼe ʼe mole tou kau ki te faipolitike?

¹² ʼE mole tonu ke tou kau ki te faipolitike. Neʼe mole faipolitike ia Sesu. ʼI tona fakamauʼi e te pule Loma ko Pilato, neʼe ina ui fenei: “ ʼE mole kau toku Puleʼaga ʼi te malama ʼaeni.” (Lau ia Soane 18:36.) Ohage pe ko Sesu, ʼe tou agatonu ki te Puleʼaga ʼo te ʼAtua ʼae ʼe ʼi selo. Koia, ʼe mole tou kau anai ki te faipolitike tatau aipe pe ʼe ko te fenua fea ʼae ʼe tou maʼuʼuli ai. Kaʼe, ʼe fakatotonu mai ʼi te Tohi-Tapu ke tou fakalogo ki “te ʼu pule maʼoluga,” ko tona fakaʼuhiga ia te ʼu puleʼaga fakatagata. (Loma 13:1) Koia, ʼe tou fakalogo anai ki te ʼu lao ʼo te fenua ʼae ʼe tou maʼuʼuli ai. Kaʼe, ka ʼi ai he lao ʼe fakafeagai ki te ʼu lao ʼa te ʼAtua, ʼe tou faʼifaʼitakiʼi anai te kau apositolo ʼae neʼe natou ui fenei: “ ʼE tonu ke matou fakalogo ki te ʼAtua ʼi tona ʼuhiga pule, ʼi hamatou fakalogo ki te tagata.”​—Gaue 5:29; Maleko 12:17.

13. Kotea ʼae ʼe tou fakamafola ʼo ʼuhiga mo te Puleʼaga ʼo te ʼAtua?

¹³ ʼE tou tui ko te Puleʼaga pe ʼo te ʼAtua ʼae ka ina fakatokatoka te ʼu fihifihia fuli ʼo te malamanei. Neʼe ui e Sesu ʼe fakamafola anai “te logo lelei . . . ʼo te Puleʼaga” ʼi te malamanei katoa. (Lau ia Mateo 24:14.) ʼE mole he tahi age puleʼaga ʼe ina lava fai te meʼa ʼae ka fai anai e te Puleʼaga ʼo te ʼAtua maʼa te tagata. (Pesalemo 146:3) Neʼe akoʼi mai e Sesu ke tou faikole ki te Puleʼaga ʼo te ʼAtua, ʼi tana fai te ʼu palalau ʼaeni: “Ke hoko mai tou Puleʼaga. Ke fai tou finegalo ʼi te kele ohage ko selo.” (Mateo 6:10) ʼE ui ʼi te Tohi-Tapu ʼe pulihi anai e te Puleʼaga ʼo te ʼAtua ia te ʼu puleʼaga fakatagata fuli. Pea “e tuu anai ia ia totonu, o heegata.”​—Taniela 2:44.

14. ʼI tau manatu la, ko ai ʼae ʼe ina fai te tauhi ʼae ʼe loto ki ai te ʼAtua?

¹⁴ Hili tau vakaʼi te ʼu manatu ʼaia, ke ke fai kia koe te ʼu fehuʼi ʼaeni: ‘Ko ai ʼae ʼe ina fakatafito ʼana akonaki ki te Tohi-Tapu? Ko ai ʼae ʼe ina fakaha te huafa ʼo te ʼAtua? Ko ai ʼae ʼe ina fakaha te maʼuli feʼofaʼofani? Ko ai ʼae ʼe tui ko te ʼAtua ʼae neʼe ina fekauʼi ifo ia Sesu ki te kele moʼo haofaki ʼo te tagata? Ko ai ʼae ʼe mole kau ki te faipolitike? Ko ai ʼae ʼe ina fakamafola ko te Puleʼaga pe ʼo te ʼAtua ʼae ʼe ina lava fakatokatoka te ʼu fihifihia ʼo te tagata?’ ʼE ko te kau Fakamoʼoni pe ʼa Sehova.​—Esaia 43:​10-12.

KOTEA KA KE FAI ANAI?

15. Kotea ʼae ʼe tonu ke tou fai ke tali tatatou tauhi e te ʼAtua?

¹⁵ ʼE mole gata ʼaki pe tatatou tui ʼae ʼe maʼuli moʼoni te ʼAtua. He maʼia pe la mo te kau temonio, ʼe natou tui ʼe maʼuli moʼoni te ʼAtua. Kaʼe, ʼe mole natou fakalogo kia te ia. (Sakopo 2:19) Koia, kapau ʼe tou loto ke tali tatatou tauhi e te ʼAtua, ʼe tonu ke tou fai te meʼa ʼae ʼe ina ui mai.

16. He koʼe ʼe tonu ke tou liakī te tauhi hala?

¹⁶ ʼE tonu ke tou liakī te lotu hala ke feala ki te ʼAtua hana tali tatatou tauhi. Neʼe tohi fenei e te polofeta ko Esaia: “Koutou mavae i lotomalie o ia! Koutou fakamaa.” (Esaia 52:11; 2 Kolonito 6:17) Koia, ʼe tonu ke tou liakī ia meʼa fuli ʼe ʼi ai tona pikipikiga mo te tauhi hala.

17, 18. Kotea ia “Papiloni Lahi”? Pea he koʼe ʼe tonu ke tou mavae fakavilivili mai te lotu hala?

¹⁷ Kotea ia te tauhi hala? ʼE ko te ʼu lotu ʼae ʼe natou akoʼi ki te hahaʼi ke natou fai te tauhi ʼae ʼe fakafeagai ki te Folafola ʼa te ʼAtua. ʼI te Tohi-Tapu, ʼe fakahigoaʼi te lotu hala ko “Papiloni Lahi.” (Fakaha 17:5) Kotea tona tupuʼaga? Koteʼuhi hili te Tulivio ʼae ʼi te temi ʼo Noe, neʼe lahi ai te ʼu akonaki hala neʼe ha ʼi te kolo ko Papiloni. Pea neʼe mafola te ʼu akonaki ʼaia ʼi te kele katoa. Ohage la, ko te hahaʼi ʼae neʼe maʼuʼuli ʼi Papiloni, neʼe natou tauhi ki he ʼu kutuga ʼe ʼatua tolu. Ia ʼaho nei, ʼe lahi te ʼu lotu ʼe natou akoʼi ko te ʼAtua ʼe ko te Tahitolutapu. Kaʼe, ʼe fakaha lelei mai ʼi te Tohi-Tapu ʼe ko te ʼAtua moʼoni pe ʼe tahi, ia Sehova pea ko Sesu ʼe ko tona ʼAlo. (Soane 17:3) Neʼe toe tui te hahaʼi ʼae neʼe maʼuʼuli ʼi Papiloni ki te manatu ʼaeni: Ka mate he tahi ʼe ʼi ai he koga ʼo tona sino ʼe hoko atu pe tona maʼuli peʼe fakamamahiʼi ʼi ʼifeli. Kaʼe, ʼe hala te manatu ʼaia.​—Vakaʼi te Fakamahino 14, 17 pea mo 18.

¹⁸ Neʼe fakakikite e te ʼAtua kua vave pulihi pe ia te lotu hala. (Fakaha 18:8) ʼE ke mahino koa pe koʼe ʼe tonu ke ke mavae fakavilivili mai te lotu hala? ʼE loto e Sehova ʼAtua ke ke fai te faʼahi ʼaia naʼa tauhala.​—Fakaha 18:4.

19. Ka ke toʼo te tonu ʼae ke ke tauhi kia Sehova, ʼe tokaga feafeaʼi anai ia te ia kia koe?

¹⁹ Kapau ʼe ke mavae mai te lotu hala ʼo ke tauhi kia Sehova, ʼe lagi mole mahino anai ʼou kaumeʼa mo tou famili ki te tonu ʼae kua ke toʼo. ʼE lagi feala anai ke faigataʼaʼia tou maʼuli ʼuhi pe ko natou. Kaʼe, ʼe mole liakī anai koe e Sehova. ʼE ke kau anai ʼi te foʼi famili ʼo te malamanei katoa ʼo te toko lauʼi miliona hahaʼi ʼae ʼe maʼuli feʼofaʼofani moʼoni. Pea ʼe ke maʼu anai te ʼamanaki ʼae ke ke maʼuli ʼo heʼe gata ʼi te malama foʼou. (Maleko 10:​28-30) Pea ʼe lagi feala pe ʼi he ʼaho kia natou ʼae neʼe fakafeagai kia koe, ke natou ako ia te Tohi-Tapu.

20. He koʼe ʼe maʼuhiga ke tou fai te tauhi ʼae ʼe loto ki ai te ʼAtua?

²⁰ Kua vave pulihi pe e te ʼAtua ia te agakovi. Pea ʼe pule anai tona Puleʼaga ki te kele katoa. (2 Petelo 3:​9, 13) ʼE ko he temi taulekaleka anai. ʼE tou atolasio fuli anai kia Sehova ohage pe ko te meʼa ʼae neʼe loto ki ai. Koia, ʼe tonu ai ʼi te temi nei ke ke fai ni fetogi ʼi tou maʼuli ke feala hau fai te tauhi ʼae ʼe loto ki ai te ʼAtua.