He ʼu Faʼifaʼitaki ʼe ʼAoga

Mateo 13:34, 35

TE MANATU ʼAE KE TAʼOFI: Ke ke hikihiki tau faʼahiga faiako ʼo ke fakaʼaogaʼi he ʼu faʼifaʼitaki ʼe faigafua ke tupu ai he fia logo ʼa te hahaʼi, pea ʼe maʼu ai he ʼu manatu maʼuhiga.

TONA FAʼAHIGA FAI:

• Filifili he ʼu faʼifaʼitaki ʼe faigafua. Ohage ko Sesu, fakaʼaogaʼi he ʼu meʼa ʼe faigafua, pea ʼe mahani ki ai te hahaʼi moʼo fakamahino he ʼu manatu ʼe faigataʼa. Tokaga ke alu tahi te ʼu faʼahi ʼae ʼe ke talanoa ki ai ʼi tau faʼifaʼitaki mo te ako ʼae ʼe ke fia fakaha ki te hahaʼi. ʼAua naʼa ke palalau ki he ʼu faʼahi ʼe mole ʼaoga, naʼa faigataʼa ai te mahino ki te faʼifaʼitaki.

• Manatuʼi ia natou ʼae ʼe fagono atu. Filifili he ʼu faʼifaʼitaki ʼe alu tahi mo te ʼu meʼa ʼae ʼe natou fai pea mo te ʼu meʼa ʼae ʼe natou leleiʼia. Pea tahi ʼae, tokaga ki te ʼu faʼifaʼitaki ʼae ʼe ke fakaʼaogaʼi naʼa natou ufiufi ai peʼe lave kovi kia natou.

• Taupau maʼu te manatu tafito. Fakaʼaogaʼi he ʼu faʼifaʼitaki moʼo fakaha te ʼu manatu tafito kae mole ko he ʼu manatu ʼe mole faʼa maʼuhiga. Tokaga ke mole manatuʼi pe e te hahaʼi te faʼifaʼitaki, kae ke natou toe taʼofi te ako.