Te ʼu Tapuakina ʼAē ʼe Tou Maʼu ʼi Tatatou Haʼele ʼi Te Agatonu
“Ko te tapuakina ʼa Sehova—koʼenā te meʼa ʼaē ʼe ina fakakoloaʼia, pea ʼe mole maʼu ai he mamahi.”—Tāʼaga Lea 10:22.
1, 2. He koʼe ʼe mole tonu ke tou hoha fau ki te ka haʼu?
NEʼE ʼui fēnei e te tagata Amelika fai filosofia: “ ʼE mole tou fiafia anai ki te ʼu meʼa ʼaē ʼe tou maʼu ʼi te temi nei mo kapau ʼe tou hoha fau ki te ka haʼu.” Ohage ko te tamaliki liliki, ʼe mole nātou sisio anai ki te ʼu meʼa lelei ʼaē ʼe nātou maʼu ʼi tanatou kei liliki mo kapau ʼe nātou hoha fau ki te ʼu meʼa ʼaē ka nātou fai anai mokā nātou lalahi.
2 Koia ʼi ʼihi temi māʼiape la mo tatou kau Fakamoʼoni ʼa Sehova, ʼe tou maʼu ia te ʼu manatu ʼaia. Tou tokagaʼi te faʼahi ʼaē ʼe feala ke hoko kiā tatou fuli. Kua tou fakaʼamu la ke hoko te fakapapau ʼa te ʼAtua ʼo ʼuhiga mo te fakatuʼu ʼo he palatiso ʼi te kele. Kua tou loto la ke pulihi te mahaki, mo te mātutuʼa, mo te lotomamahi, pea mo te mamahi. ʼE mole kovi te ʼu fakaʼamu ʼaia, kae kapau ʼe tou hoha fau ki te ʼu tapuakina ʼo te ka haʼu, ʼe mole tou tokagaʼi anai ia te ʼu tapuakina fakalaumālie ʼaē ʼe tou maʼu ʼi te temi nei! Heʼe feala anai ke tou lotovaivai pea mo ‘mamahi totatou loto, mo kapau ʼe mole hoko’ vave mai te ʼu meʼa ʼaē ʼe tou fakaʼamu kiai. (Tāʼaga Lea 13:12) ʼE feala ʼaki te ʼu fihifihia pea mo te ʼu faigataʼaʼia ʼo te maʼuli, ke tou lotovaivai ai pea mo lotomamahi. Kapau ʼe mole tou kumi puleʼaki ʼo ʼuhiga mo te ʼu fihifihia ʼaē ʼe tau mo tatou, pea ʼe feala anai ke tou meomeo, kae ko te faʼahi ʼaia ʼe tou lava tekeʼi, mo kapau ʼe tou metitāsioʼi ʼaki he loto fakafetaʼi ia te ʼu tapuakina ʼaē ʼe tou maʼu ʼi te temi nei.
3. Koteā ʼaē ka tou talanoa tāfito anai kiai ʼi te alatike ʼaenī?
3 ʼE ʼui fēnei iā Tāʼaga Lea 10:22: “Ko te tapuakina ʼa Sehova—koʼenā te meʼa ʼaē ʼe ina fakakoloaʼia, pea ʼe mole maʼu ai he mamahi.” Ko te tuputupu fakalaumālie ʼa te ʼu kaugana ʼa Sehova iā ʼaho nei, ʼe mole ko he tapuakina koa la ke nātou fiafia ai? Tou vakaʼi age muʼa he ʼu faʼahi ʼo tatatou tuputupu fakalaumālie pea mo tonatou ʼu ʼaoga kiā tatou takitokotahi. Kapau ʼe toʼo hotatou temi moʼo fakakaukauʼi ia te ʼu tapuakina ʼaē ʼe foaki e Sehova ki ‘te tagata faitotonu ʼaē ʼe haʼele ʼi tana agatonu,’ pea ʼe tou lotomālohi anai ʼo hoko atu tatatou tauhi fakafiafia ki tatatou Tāmai ʼaē ʼe ʼi selo.—Tāʼaga Lea 20:7.
‘Te ʼu Tapuakina ʼAē ʼe Fakatupu Fiafia Kiā Tatou’ ʼi Te Temi Nei
4, 5. Ko te akonaki fea ʼo te Tohi-Tapu neʼe koutou leleiʼia tāfito, pea koteā tona tupuʼaga?
4 Te ʼatamai mālama totonu ʼo ʼuhiga mo te ʼu akonaki faka Tohi-Tapu. ʼI te agamāhani, ʼe tala e te ʼu lotu ʼa te Keletiate ʼe nātou tui ki te Tohi-Tapu, kae ʼe mole hā ʼi tonatou maʼuli ia te faʼahi ʼaia. Māʼiape la ʼi ʼihi lotu, ko tona ʼu hahaʼi ʼe kehekehe tanatou ʼu fakamahino ia te Tohi-Tapu. ʼE kehekehe mo te tauhi ʼa te ʼu kaugana ʼa Sehova! Heʼe logola te kehekehe ʼo totatou ʼu puleʼaga, mo tatatou agaʼi fenua, peʼe ko totatou ʼu haʼuʼaga, kae ʼe tou tauhi ki te ʼAtua e tahi ʼaē ʼe tou ʼiloʼi tona huafa. ʼE mole ko he ʼatua ʼo he tahitolu tapu faka misitelio. (Teutalonome 6:4; Pesalemo 83:18; Maleko 12:29) ʼE tou toe mahino ko te fakafifihi lahi ʼaē neʼe fai ʼo ʼuhiga mo te pule faʼitaliha ʼa te ʼAtua, kua vave fakatokatoka, pea ʼaki tatatou agatonu ki te ʼAtua, ʼe tou tahi lagolago moʼo tali ki te fakafifihi ʼaia. ʼE tou ʼiloʼi te moʼoni ʼo ʼuhiga mo te kau mate, pea ʼe mole kei tou mātataku ʼo ʼuhiga mo he ʼAtua ʼe ʼui ʼe ina fakamamahiʼi te hahaʼi ʼi he ʼifeli afi peʼe ʼi he pulekatolio.—Tagata Tānaki 9:5, 10.
5 Pea ʼe tou fiafia ʼi tatatou ʼiloʼi ʼaē neʼe mole tou tutupu mai te evolisio peʼe fakafokifā. Kae neʼe fakatupu tatou e te ʼAtua, ʼo ina faʼu tatou ʼo mulimuli ki tona pāki. (Senesi 1:26; Malakia 2:10) Neʼe hiva fēnei te tagata fai Pesalemo ki tona ʼAtua: “ ʼE au vikiviki anai kiā te koe, heʼe fakamanavahe pea mo fakaofoofo toku faʼu. ʼE fakatalakitupua tau ʼu gāue, pea ʼe mahino lelei ki toku nefesi te faʼahi ʼaia.”—Pesalemo 139:14.
6, 7. Koteā te ʼu fetogi ʼi tokotou maʼuli peʼe ko te maʼuli ʼo ʼihi neʼe liliu ʼo fua lelei?
6 Te lava tekeʼi ʼo te ʼu agamāhani pea mo te ʼu gāue ʼaē ʼe kovi. ʼI te ʼu tala logo, ʼe lahi te ʼu fakatokaga ʼo ʼuhiga mo te ʼu fua kovi ʼo te suluka, ʼo te ʼinu kava fakavale, pea mo te ʼu felāveʼi fakasino heʼeʼaoga. Tokolahi ʼe mole nātou tokagaʼi te ʼu fakatokaga ʼaia. Kae e feafeaʼi la mo kapau ʼe ʼiloʼi e he tahi ʼe tauhi fakamalotoloto, ko te ʼAtua moʼoni ʼe ina tapuʼi te ʼu aga ʼaia pea mo lotomamahi kiā nātou ʼaē ʼe nātou fai te ʼu aga ʼaia? ʼE ina līaki anai ia te ʼu aga kovi ʼaia! (Isaia 63:10; 1 Kolonito 6:9, 10; 2 Kolonito 7:1; Efeso 4:30) ʼE ina fai tāfito ia te faʼahi ʼaia moʼo fakafiafia te loto ʼo Sehova ʼAtua, pea ʼe ina maʼu mo te tahi ʼu tapuakina—ko he maʼuli fīmālie ʼi te faʼahi fakasino pea mo te tokalelei ʼo te ʼatamai.
7 ʼE faigataʼa ki te tokolahi hanatou tuku tanatou ʼu agamāhani ʼaē ʼe kovi. Kae ʼi te taʼu fuli ko te ʼu lauʼi afe hahaʼi ʼe nātou fetogi tonatou maʼuli. ʼE nātou foaki tonatou maʼuli kiā Sehova pea mo papitema, ʼo nātou fakahā ʼi muʼa ʼo te kaugamālie kua nātou toʼo ʼi tonatou maʼuli ia te ʼu aga ʼaē ʼe mole leleiʼia e te ʼAtua. ʼE ko he fakaloto mālohi kiā tatou fuli! ʼE toe mālohi ai tatatou fakatotonu ʼaē ke tou līaki te agahala pea mo te ʼu aga heʼeʼaoga.
8. Ko te tokoni faka Tohi-Tapu fea ʼaē ʼe ina fakatupu he maʼuli faka famili fiafia?
8 Ko he maʼuli faka famili fiafia. ʼE lahi te ʼu fenua, ʼe mole fiafia te ʼu maʼuli faka famili. ʼE lahi te ʼu taumātuʼa ʼe nātou māvete, ʼo tupu ai te maʼuli mamahi ʼa te ʼu fānau. ʼI ʼihi fenua ʼo te Eulopa, ko te toko 20 ʼi te teau ʼi te ʼu famili ʼe ko he tāmai peʼe ko he faʼē tokotahi pe ʼaē ʼe ina taupau te famili. Koteā te tokoni ʼaē ʼe foaki mai e Sehova ke tou haʼele agatonu ʼi te faʼahi ʼaia? Koutou lau ia Efeso 5:22–6:4, pea koutou fakatokagaʼi te tokoni lelei ʼi te Folafola ʼa te ʼAtua ʼaē ʼe foaki ki te ʼu tagata ʼohoana, mo te ʼu fafine ʼohoana pea mo te fānau. Kapau ʼe nātou maʼuliʼi te ʼu tokoni ʼaia pea mo te tahi ʼu tokoni faka Tohi-Tapu, ʼe mālohi moʼoni anai te ʼu noʼo ʼo te ʼohoana, pea mo tokoni anai ki te ʼu mātuʼa ʼo ʼuhiga mo te taupau fakalelei ʼo tanatou fānau, pea mo fakatupu he maʼuli faka famili fiafia. ʼE mole koa la ko he tapuakina ʼe fakatupu fiafia?
9, 10. Koteā ʼaē ʼe kehekehe ai tatatou sio ʼo ʼuhiga mo te ka haʼu pea mo te sio ʼa te malamanei?
9 ʼE tou tui papau ʼe fakatokatoka anai te ʼu fihifihia ʼo te malamanei. Logola te poto ʼa te tagata ʼi te ʼu meʼa fakapoto lalahi pea mo te tekenolosia, pea mo te ʼu gāue fakamalotoloto ʼa ʼihi tagata takitaki, kae ʼe kei lahi pe te ʼu fihifihia ʼi te temi nei ʼe mole maʼu ni ʼu puleʼaki kiai. Mole heʼeki faʼa fualoa, ko Klaus Schwab te tagata ʼaē neʼe ina fakatuʼu te World Economic Forum, neʼe ina ʼui fēnei: “ ʼE ʼāʼāsili age te ʼu fihifihia kae ʼe fakasiʼisiʼi te temi ʼaē moʼo kumi puleʼaki kiai.” Neʼe talanoa ʼo ʼuhiga mo “te ʼu tuʼutāmaki ʼaē ʼe hoko ki te ʼu puleʼaga fuli, ʼaē ko te fai fakapō, mo te maumauʼi ʼo te kele pea mo te haʼele kovi ʼo te paʼaga.” Neʼe ʼui e Schwab: “Kua maʼuhiga tāfito age ʼi te temi nei ke fai e te malamanei kātoa ia he puleʼaki moʼo fakatokatoka ia te ʼu fihifihia maʼuhiga.” ʼI te ʼalu ʼo te 21 sēkulō, ʼe fakaʼapē lua te ʼu fakatuʼutuʼu ʼo ʼuhiga mo te ka haʼu ʼo te malamanei.
10 ʼE tou fiafia ʼi tatatou ʼiloʼi ko Sehova neʼe ina fai ia te puleʼaki, ʼaē ko te Puleʼaga Faka Mesia ʼo te ʼAtua, moʼo fakatokatoka te ʼu fihifihia ʼo te malamanei! ʼAki te Puleʼaga ʼaia, ko te ʼAtua moʼoni ʼe ina ‘fakagata anai te ʼu tau’ pea ʼe ina fakatuʼu anai ‘te tokalelei lahi.’ (Pesalemo 46:9; 72:7) Ko Sesu Kilisito te Hau fakanofo, ʼe ina ‘hāofaki anai te masiva, mo ia ʼaē ʼe lotomamahi, mo ʼaē ʼe veliveli, mai te taʼomia pea mo te agamālohi.’ (Pesalemo 72:12-14) ʼAki te Puleʼaga ʼaia, ʼe mole toe pākupapaku anai te hahaʼi. (Pesalemo 72:16) Ko Sehova “ ʼe ina holoholoʼi anai te ʼu loʼimata fuli pe ʼi [ʼotatou] mata, pea ko te mate ʼe pulihi anai ia; ʼe mole toe ʼi ai anai he putu, he kekē, he mamahi. Ko te ʼu meʼa ʼāfea kua puli ia.” (Apokalipesi 21:4, MN ) Ko te Puleʼaga kua tuʼu ʼi te lagi, pea kua vave hoko mai te temi ʼaē ka ina fakatokatoka ai ia te ʼu fihifihia fuli ʼo te kele.—Taniela 2:44; Apokalipesi 11:15.
11, 12. (a) ʼE tou maʼu koa te fīmālie moʼoni ʼi tatatou kumi te ʼu fakafiafia? Koutou fakamahino. (b) ʼE tou maʼu ʼifea te fīmālie moʼoni?
11 ʼE tou ʼiloʼi te meʼa ʼaē ʼe tonu ke tou fai moʼo maʼu ia te fiafia moʼoni. ʼE tou maʼu ʼifea ia te fiafia moʼoni? Neʼe ʼui e te tagata ko koga e tolu ʼo te fiafia—tata leleiʼia he meʼa, tata kau ki he gāue (ohage ko he ʼu gāue faka famili), pea tolu leva, (ko te ikuʼaga ʼo te meʼa ʼaē neʼe kita fai). ʼI te ʼu koga ʼaia ʼe tolu ʼo te fiafia, neʼe ina faka maʼuhigaʼi tāfito ia tata leleiʼia he meʼa, pea neʼe ina ʼui: “ ʼE maʼuhiga te koga ʼaia heʼe tokolahi te hahaʼi ʼe nātou faʼufaʼu tonatou maʼuli ʼaki te faʼahi ʼaia.” Koteā te manatu ʼa te Tohi-Tapu ki te faʼahi ʼaia?
12 Neʼe ʼui fēnei e Salomone, te Hau ʼo te Iselaele ʼāfea: “Neʼe au ʼui ʼi toku loto: ‘Haʼu foki, ke au ʼahiʼahiʼi koe ʼaki te fiafia. Tahi ʼaē, sio ki te lelei.’ Pea koʼeni ʼe toe vaʼiganoa mo te faʼahi ʼaia. Neʼe au ʼui age ki te kata: ‘Vale!’ pea ki te fakafiafia: ‘Koteā tona ʼaoga?’ ” (Tagata Tānaki 2:1, 2) ʼE ʼui ʼi te Tohi-Tapu, ʼe faka temi pe te fīmālie ʼaē ʼe tou maʼu ʼi te ʼu fakafiafia. Kae e feafeaʼi mokā tou fai he gāue? Ko te gāue ʼaē ʼe maʼuhiga tāfito ke tou kau kiai—ko te faka mafola ʼo te Puleʼaga pea mo te fai ʼo ni ʼu tisipulo. (Mateo 24:14; 28:19, 20) Ka tou fakahā ki te hahaʼi ia te logo ʼo te hāofaki ʼaē ʼe tuʼu ʼi te Tohi-Tapu, pea ʼe tou kau ki te gāue ʼaē ka ina hāofaki ia tatou totonu pea mo nātou ʼaē ʼe fakalogo ki tatatou fai faka mafola. (1 Timoteo 4:16) ʼE “lahi age [takita] fiafia ʼi takita foaki, ʼi takita tali” mokā ʼe tou “kauga gaue [mo] te Atua.” (1 Kolonito 3:9; Gaue 20:35, MN ) Ko te gāue ʼaia ʼe ina hikihiki te lelei ʼo totatou maʼuli pea mo ina foaki te tali ki te Tupuʼaga ʼo ʼuhiga mo te fasituʼu ʼaē neʼe fai e Satana te Tevolo. (Tāʼaga Lea 27:11) Ei, neʼe fakahā e Sehova kapau ʼe tou tauhi age kiā te ia, pea hoki tou maʼu ai te fīmālie moʼoni pea mo tologa.—1 Timoteo 4:8.
13. (a) He koʼe ko te Ako Faka Teokalatike ʼe ko he tapuakina ke tou fiafia ai? (b) Neʼe fua lelei feafeaʼi kiā koutou te Ako Faka Teokalatike?
13 Te polokalama ako maʼuhiga pea mo ʼaoga. Ko Gerhard ʼe ko te tagata ʼāfea ʼe gāue ʼi te kokelekasio ʼa te kau Fakamoʼoni ʼa Sehova. ʼE ina ʼui fēnei ʼo ʼuhiga mo tona temi tūpulaga: “ ʼI taku kei tūpulaga, neʼe faigataʼa taku palalau. Ka au hoha, pea faigataʼa ʼosi taku palalau pea mo taku puʼaki ia te ʼu kupuʼi palalau. ʼI taku manatu, ʼe mole au lavaʼi he gāue pea neʼe tupu ai taku umiuminoa. Ko taku ʼu mātuʼa neʼe nā fakahū au ki te faleako ʼe akoako mai ai te palalau kae neʼe mole he fua ʼo tanā ʼu faiga ʼaia, heʼe ko te fihifihia ʼaē neʼe tau mo au ʼi te temi ʼaia, neʼe mole ko taku palalau kae neʼe tonu ke au fetogi taku faʼahiga fakakaukau. Pea neʼe ʼi ai te fakatuʼutuʼu taulekaleka ʼa Sehova—ko te Ako Faka Teokalatike. ʼI taku kau ki te ako ʼaia, neʼe tupu ai toku lotomālohi. Neʼe au faiga fakamalotoloto ke au fakaʼaogaʼi te ʼu meʼa ʼaē neʼe au ako, pea neʼe ʼi ai tona ʼu fua! Neʼe fakahaʼu ʼo lelei taku palalau, neʼe mole kei au umiuminoa, pea neʼe kua au lotomālohi ʼi te fai faka mafola ʼi te minisitelio. ʼI te temi nei kua au fai te ʼu akonaki ʼi muʼa ʼo te kaugamālie. ʼE au loto fakafetaʼi ʼaupito kiā Sehova, ʼi tana fetogi toku maʼuli ʼaki te ako ʼaia.” Ko te ako ʼaē ʼe foaki mai e Sehova moʼo fai ia tana gāue, ʼe mole koa la ko he tupuʼaga ʼaia ke tou fiafia ai?
14, 15. ʼI te ʼu temi faigataʼa, ko te tokoni fea ʼaē ʼe tou lava maʼu? Koutou fakamahino.
14 Te ʼu felogoi lelei mo Sehova pea mo te tokoni ʼa te fale tautēhina ʼi te malamanei kātoa. Ko Katrin, ʼe nofo ʼi Siamani, neʼe mataku ʼaupito ʼi tana logo ʼaē neʼe tō ia te mafuike lahi pea mo hake te foʼi peau ʼi te potu saute-esite ʼi Asia, he neʼe nofo tana taʼahine ʼi Tailani ʼi te temi ʼaē neʼe hoko ai te tuʼutāmaki. Lolotoga hola e 32 neʼe mole ʼiloʼi e te faʼē ʼaia peʼe kei maʼuli tana taʼahine, peʼe neʼe kau ʼi te kaugamālie ʼaē neʼe lāvevea peʼe mamate. ʼI meʼa fakafiafia kiā Katrin tana logo ki te telefoni age ʼa tana taʼahine moʼo fakahā age ʼe kei maʼuli pe!
15 Koteā ʼaē neʼe tokoni kiā Katrin ʼi te ʼu hola ʼaē neʼe nofo hoha ai? ʼE ina ʼui fēnei: “Neʼe au faikole lahi kiā Sehova ʼi te temi ʼaia. ʼAki taku faikole, neʼe au maʼu ai te lotomālohi pea mo te tokalelei ʼo toku ʼatamai. Tahi ʼaē, ko toku ʼu tēhina mo tuagaʼane fakalaumālie neʼe nātou fonu ʼi te ʼofa, he neʼe nātou ʼōmai ʼo fakaloto mālohiʼi au.” (Filipe 4:6, 7) Neʼe feala ke lahi age tona lotomamahi mo kanapaula ʼi te ʼu hola ʼaia neʼe mole faikole kiā Sehova, pea neʼe mole ina maʼu te tokoni ʼo tona ʼu tēhina mo tuagaʼane ʼi te faʼahi fakalaumālie! ʼAua naʼa tou meʼa noaʼi te tapuakina makehe pea mo maʼuhiga ʼaē ʼe tou maʼu: tatatou felogoi ʼaē mo Sehova pea mo tona ʼAlo, pea mo tatatou kau ki te foʼi famili fale tautēhina.
16. Koutou tuku mai he faʼifaʼitaki moʼo fakahā te maʼuhiga ʼo te ʼamanaki ʼo te fakatuʼuake.
16 Te ʼamanaki ʼaē ka tou toe sisio anai ki te ʼu hahaʼi ʼaē kua mamate kae neʼe tou ʼoʼofa ai. (Soane 5:28, 29) Ko te tūpulaga ko Matthias, neʼe lahilahi ake ʼi te kautahi ʼa te kau Fakamoʼoni ʼa Sehova. Kae ʼi tana mole tokagaʼi te ʼu tapuakina ʼaē neʼe ina maʼu, neʼe fakamamaʼo ia ʼi te kokelekasio ʼi tona temi tūpulaga. ʼE ina ʼui fēnei ʼi te temi nei: “Neʼe mole au felogoi lelei mo taku tāmai. Lolotoga te ʼu taʼu, neʼe mā fihi ai. Neʼe faigaʼi tuʼumaʼu e taku tāmai te ʼu meʼa ʼaē ʼe lelei ki toku maʼuli. Neʼe ʼofa moʼoni ia kiā au, kae neʼe mole au mahino pe la ʼi te temi ʼaia ki tona ʼofa. ʼI te taʼu 1996, ʼi taku heka iā tafa ʼo tona palepale pea mo puke tona nima, neʼe au tagi mamahi, ʼo au faifakalelei age ʼo ʼuhiga mo meʼa fuli neʼe au fai pea mo fakahā age toku ʼofa lahi ʼaē kiā ia. Kae neʼe mole logo ia ki he meʼa. Hili ʼaia te kiʼi temi ʼo tana mahaki, pea mate leva ia. Kapau ʼe au maʼuli ʼo aʼu ki tona fakatuʼuake, ʼe au fetogi anai taku ʼu felogoi mo ia. Pea ʼe fiafia anai ia mo kapau ʼe logo ko tona foha ʼe ko te tagata ʼāfea ʼi te temi nei, pea ko au mo toku ʼohoana ʼe mā pionie taumātuʼa.” ʼE ko he tapuakina kiā tatou ia te ʼamanaki ʼo te fakatuʼuake!
“ ʼE Mole Maʼu Ai He Mamahi”
17. ʼE tonu ke malave feafeaʼi kiā tatou tatatou metitāsioʼi ia te ʼu tapuakina ʼa Sehova?
17 ʼO ʼuhiga mo tana Tāmai ʼaē ʼe ʼi selo, neʼe ʼui fēnei e Sesu: “E ina fakahopoʼake tana laa ki te hahai agakovi mo te hahai agalelei, pea e ina fakaʼua ifo ki te hahai agatonu mo te hahai agahala.” (Mateo 5:45) Kapau ko Sehova ʼAtua ʼe ina foaki fakatatau te ʼu tapuakina ki te hahaʼi heʼe faitotonu pea mo agakovi, pea e feafeaʼi age la kiā nātou ʼaē ʼe nātou haʼele ʼi te agatonu! ʼE ʼui iā Pesalemo 84:11: “Ko Sehova ʼe mole ina fakafisi anai he meʼa lelei kiā nātou ʼaē ʼe haʼele fakahagatonu.” Ko totatou loto ʼe fonu ʼi te fakafetaʼi pea mo te fiafia mo kapau ʼe tou metitāsioʼi te ʼofa lahi pea mo te tokaga ʼa Sehova kiā nātou ʼaē ʼe ʼoʼofa kiā te ia!
18. (a) ʼE faka ʼuhiga feafeaʼi te ʼui ʼaē ko te tapuakina ʼa Sehova ʼe mole maʼu ai he ʼu mamahi? (b) He koʼe e tokolahi te ʼu kaugana ʼa te ʼAtua ʼe nātou maʼuli mamahi?
18 “Ko te tapuakina ʼa Sehova”—koʼenā te meʼa ʼaē ʼe ina fakakoloaʼia te maʼuli fakalaumālie ʼo tana ʼu kaugana. Pea ʼe fakapapau fēnei mai “ ʼe mole maʼu ai he mamahi.” (Tāʼaga Lea 10:22) Kae he koʼe koa ʼe hoko ki te ʼu kaugana agatonu ʼa te ʼAtua ia te ʼu ʼahiʼahi pea mo te ʼu faigataʼaʼia, ʼo nātou lotomamahi ai pea mo maʼuli mamahi ʼaupito? ʼE tou tau mo te ʼu fihifihia ʼuhi ko tupuʼaga tāfito e tolu. (1) Ko tatou ko te ʼu hahaʼi agahala. (Senesi 6:5; 8:21; Sakopo 1:14, 15) (2) Ko Satana pea mo tana kau temonio. (Efeso 6:11, 12) (3) Ko te mālama agakovi. (Soane 15:19) Logola ʼe fakagafua e Sehova ke hoko he ʼu meʼa kovi kiā tatou, kae ʼe mole ko ia ʼaē ʼe ina fakatupu te ʼu meʼa ʼaia. Heʼe ʼui fēnei ʼo ʼuhiga mo ia: “Ko te meʼa ʼofa lelei fuli pea mo te mōlaga haohaoa fuli, ʼe haʼu ia mai ʼoluga, heʼe hifo mai te Tāmai ʼo te ʼu mālama ʼaē ʼe ʼi selo.” (Sakopo 1:17, MN ) ʼE mole maʼu he ʼu mamahi ʼi te ʼu tapuakina ʼa Sehova.
19. Koteā ʼaē ka maʼu anai e te hahaʼi ʼaē ka haga haʼele ʼi te agatonu?
19 Kapau ʼe tou fia koloaʼia tuʼumaʼu ʼi te faʼahi fakalaumālie, pea ʼe tonu ke tou fakaōvi ki te ʼAtua. Ka tou felogoi lelei mo te ʼAtua, ʼe tou ‘tānaki maʼa tatou, ohage he koloā moʼoni, he fakatafitoʼaga taulekaleka ki te temi ka haʼu, koteʼuhi ke tou puke maʼu ia te maʼuli moʼoni’—ia te maʼuli heʼegata. (1 Timoteo 6:12, 17-19) ʼI te mālama foʼou ʼaē ka fakatuʼu e te ʼAtua, ʼe tou koloaʼia anai ʼi te faʼahi fakalaumālie pea mo te faʼahi fakasino. Ko te maʼuli moʼoni ʼe foaki anai kiā nātou fuli ʼaē ʼe “haga fakalogo ki te leʼo ʼo Sehova.” (Teutalonome 28:2) ʼAki he faiga mālohi, tou haga haʼele fakafiafia ʼi te agatonu.
Koteā ʼAē Neʼe Koutou Ako?
• He koʼe ʼe mole tonu ke tou hoha fau ʼo ʼuhiga mo te ka haʼu?
• Ko te ʼu tapuakina fea ʼaē ʼe tou maʼu ʼi te temi nei?
• He koʼe ʼe maʼuli mamahi te ʼu kaugana agatonu ʼa te ʼAtua?