ʼE Koutou Manako Lahi Koa Ki Te ʼu Fakamanatu ʼa Sehova?
“Neʼe taupau e toku nefesi tau ʼu fakamanatu, pea neʼe ʼau manako lahi kiai.”—Pesalemo 119:167.
1. ʼE tou maʼu tāfito ʼifea te fakahā liuliuga ʼo te ʼu fakamanatu ʼa Sehova?
ʼE LOTO ia Sehova ke fiafia tana hahaʼi. ʼE mahino ia, ke tou maʼu te fiafia moʼoni, ʼe tonu ke tou haʼele ʼi te lao ʼa te ʼAtua pea mo tou mulimuli ki tana ʼu fakatotonu. Moʼo fai te faʼahi ʼaia, ʼe ina fai mai kia tatou he ʼu fakamanatu. ʼE fakahā liuliuga te ʼu fakamanatu ʼaia ʼi te Tohi-Tapu, tāfito ia Pesalemo 119, ʼaē neʼe lagi tohi e te Tama ʼAliki tūpulaga ʼo Suta, ko Esekiasi. ʼE kamata fēnei te hiva matalelei ʼaia: “Manuʼia ia nātou ʼaē ʼe nātou haohaoa ʼi tonatou ʼu ala, ia nātou ʼaē ʼe nātou haʼele ʼi te lao ʼa Sehova. Manuʼia ia nātou ʼaē ʼe nātou mulimuli ki tana ʼu fakamanatu; ʼi tonatou loto katoa ʼe nātou haga kumi ia ia.”—Pesalemo 119:1, 2.
2. Koteā te pikipikiga ʼo te ʼu fakamanatu ʼa te ʼAtua pea mo te fiafia?
2 ʼE tou “haʼele ʼi te lao ʼa Sehova” mokā tou maʼu te ʼatamai mālama totonu ʼo tana Folafola pea mokā tou maʼuliʼi. Kae ʼuhi ko totatou ʼuhiga agahala, ʼe ʼaoga ke fai mai kia tatou he ʼu fakamanatu. Ko te kupu faka Hepeleo ʼaē neʼe fakaliliu ʼaki te kupu “te ʼu fakamanatu,” ʼe fakahā ai ʼe fakamanatuʼi mai kia tatou e te ʼAtua tana ʼu lao, mo tana ʼu fakatotonu, pea mo tana ʼu lekula. (Mateo 10:18-20) ʼE tou maʼuli fiafia anai mo kapau ʼe tou haga mulimuli ki te ʼu fakamanatu ʼaia, heʼe nātou tokoni mai ke tou tekeʼi te ʼu kākā fakalaumālie ʼaē ʼe nātou taki tatou ki he tuʼutāmaki pea mo he ʼaluʼaga fakaʼofaʼofa.
Tou Pipiki Mālohi Ki Te ʼu Fakamanatu ʼa Sehova
3. ʼO fakatafito ki te Pesalemo 119:60, 61, koteā ʼaē ʼe tonu ke tou falala kiai?
3 Ko te ʼu fakamanatu ʼa te ʼAtua neʼe maʼuhiga ʼaupito ki te tagata fai pesalemo, ʼaē neʼe hiva fēnei: “Neʼe ʼau fakavilivili, pea neʼe mole ʼau tuai moʼo taupau tau ʼu fakatotonu. Ko te ʼu maea ʼo te kau agakovi neʼe nātou haʼihaʼi ʼau. Neʼe mole ʼau galoʼi tau lao.” (Pesalemo 119:60, 61) Ko te ʼu fakamanatu ʼa Sehova ʼe tokoni mai kia tatou ke tou kātakiʼi te ʼu fakataga, heʼe tou falala ʼe feala ki tatatou Tāmai ʼaē ʼi selo ke ina tuʼusi te ʼu maea ʼaē ʼe haʼi ʼaki tatou e totatou ʼu fili. ʼI tona temi tonu, ʼe ina faka ʼāteainaʼi tatou mai te ʼu fakafeagai ʼaia, ke feala ai hatatou fakahoko te gāue ʼaē ko te faka mafola te Puleʼaga.—Maleko 13:10.
4. ʼE tonu ke tou tali feafeaʼi te ʼu fakamanatu ʼa te ʼAtua?
4 ʼI ʼihi temi, ʼe fakatonutonuʼi tatou e te ʼu fakamanatu ʼa Sehova. Tou fakaʼamu ke tou leleiʼia tuʼumaʼu te fakatonutonuʼi ʼaia ʼo tatou, ohage ko te tagata fai pesalemo. Neʼe ina ʼui fēnei ʼi tana faikole ki te ʼAtua: “ ʼE ʼau pipiki ki tau ʼu fakamanatu . . . Neʼe ʼau manako ki tau ʼu fakamanatu.” (Pesalemo 119:24, 119) ʼI te temi nei, ʼe lahi age te ʼu fakamanatu ʼaē ʼe tou maʼu mai te ʼAtua ʼi te ʼu fakamanatu ʼaē neʼe maʼu e te tagata fai pesalemo. Ko te ʼu lauʼi teau vaega ʼo te ʼu Tohi Faka Hepeleo ʼaē ʼe fakaʼaogaʼi ʼi te ʼu Tohi Faka Keleka, ʼe nātou fakamanatuʼi mai te ʼu fakatotonu ʼaē neʼe fai e Sehova ki tana hahaʼi ʼaē neʼe fakalogo ki te Lao, pea mo tana ʼu fakatuʼutuʼu ʼo ʼuhiga mo te kokelekasio faka Kilisitiano. Ka sio te ʼAtua ʼe lelei ke fakamanatuʼi mai kia tatou te ʼu meʼa ʼaē ʼe pipiki ki tana ʼu lao, pea ʼe tou loto fakafetaʼi ki tana takitaki ʼaia. Pea kapau ʼe tou ‘pipiki ki te ʼu fakamanatu ʼa Sehova,’ pea ʼe tou tekeʼi te ʼu fakaneke ki te agahala, ʼaē ʼe mole leleiʼia e totatou Tupuʼaga pea ʼe puli ai tatatou fiafia.—Pesalemo 119:31.
5. ʼE lava feafeaʼi hatatou manako lahi ki te ʼu fakamanatu ʼa Sehova?
5 ʼE tonu ke feafeaʼi tatatou manako ki te ʼu fakamanatu ʼa Sehova? Neʼe hiva fēnei te tagata fai pesalemo: “Neʼe taupau e toku nefesi tau ʼu fakamanatu, pea neʼe ʼau manako lahi kiai.” (Pesalemo 119:167) ʼE tou manako lahi anai ki te ʼu fakamanatu ʼa Sehova mo kapau ʼe tou faka ʼuhiga pea mo tali te ʼu fakamanatu ʼaē ʼe fai mai, ohage ko he tokoni ʼa he Tāmai ʼe tokaga moʼoni kia tatou. (1 Petelo 5:6, 7) ʼE ʼaoga kia tatou tana ʼu fakamanatu, pea ʼe tuputupu anai tatatou manako ki te ʼu fakamanatu ʼaia mokā tou sio ki tonatou ʼu fua lelei kia tatou.
Te ʼAoga ʼo Te ʼu Fakamanatu ʼa Te ʼAtua
6. He koʼe ʼe ʼaoga kia tatou te ʼu fakamanatu ʼa Sehova, pea koteā ʼaē ka tokoni mai kia tatou ke tou manatuʼi?
6 ʼE ʼaoga kia tatou te ʼu fakamanatu ʼa Sehova koteʼuhi ʼe tou loto galogalo. ʼE ʼui e te tohi The World Book Encyclopedia: “ ʼI te agamāhani, ʼaki te temi ʼe lahi te ʼu meʼa ʼe galoʼi e te hahaʼi. . . . Neʼe lagi koutou galoʼi te higoa ʼa he tahi peʼe ko he meʼa neʼe koutou fia palalau kiai. . . . Ko te hoko putuputu ʼo te puli faka temi ʼaia ʼo tokotou ʼatamai, ʼe ʼui ʼe ko te mole feala ʼaē ke kita manatuʼi. ʼE fakatatau e te hahaʼi popoto te faʼahi ʼaia ki te faiga ʼaē ke kita maʼu ʼi he kogafale ʼe tokakovi, he meʼa neʼe mole hili ʼi tona tukuʼaga. . . . Ko te meʼa ʼaē ʼe lelei moʼo manatuʼi ʼo he logo, ʼe ko tona fakakaukauʼi fualoa ki muli age ʼi takotou kua tāʼofi lelei.” Ko he ako fakalelei pea mo he lau liuliuga, ʼe tokoni mai anai ke tou manatuʼi te ʼu fakamanatu ʼa te ʼAtua, pea mo tou mulimuli kiai ke fua lelei kia tatou.
7. He koʼe ʼe ʼaoga tāfito te ʼu fakamanatu ʼa te ʼAtua ia ʼaho nei?
7 Ia ʼaho nei, ʼe ʼaoga lahi age kia tatou te ʼu fakamanatu ʼa Sehova, koteʼuhi kua lahi ʼaupito te agakovi ʼa te tagata. Kapau ʼe tou tokagaʼi te ʼu fakamanatu ʼa te ʼAtua, pea ʼe tou maʼu anai te fakasiosio tonu ʼaē ʼe ʼaoga ke ʼaua naʼa kākāʼi tatou e te ʼu ala agakovi ʼo te mālama. Neʼe ʼui fēnei e te tagata fai pesalemo: “Kua ʼau liliu ʼo sio loloto age ʼi toku kau faiako, heʼe ʼau tokagaʼi tau ʼu fakamanatu. ʼE ʼau poto age ia nātou ʼaē kua matutuʼa, heʼe ʼau mulimuli ki tau ʼu fakatotonu. Neʼe ʼau tāʼofi toku ʼu vaʼe mai te ʼu ala kovi fuli, ke ʼau taupau ai tau folafola.” (Pesalemo 119:99-101) Kapau ʼe tou mulimuli ki te ʼu fakamanatu ʼa te ʼAtua, pea ʼe mole tou haʼele anai ʼi “te ʼu ala kovi fuli,” pea ʼe mole tou liliu anai ohage ko te hahaʼi tokolahi, ʼaē “ ʼe nātou fakapōʼuli ʼi te fakakaukau, pea mo mamaʼo mai te maʼuli ʼaē ʼe haʼu mai te ʼAtua.”—Efeso 4:17-19, MN.
8. Koteā ʼaē ʼe feala ke tou fai ke tou lava tauʼi ai te ʼu ʼahiʼahiʼi ʼo tatatou tui?
8 ʼE toe ʼaoga te ʼu fakamanatu ʼa te ʼAtua heʼe tou maʼu ai te mālohi moʼo kātakiʼi totatou ʼu tuʼuga ʼahiʼahi ʼi “te temi fakaʼosi” ʼaenī. (Taniela 12:4) Kapau ʼe mole fai mai te ʼu fakamanatu ʼaia pea ʼe feala anai ke tou hage “ko he tahi e ina fakalogo pea e ina galoi.” (Sakopo 1:25) Kae kapau ʼe tou ako fakalelei te Tohi-Tapu, ʼo tou fai takitokotahi pea mo fai mo te kokelekasio, ʼaki te ʼu tohi mai “te kaugana agatonu mo fakapotopoto,” ʼe tokoni mai anai te faʼahi ʼaia ke tou lavaʼi te ʼu ʼahiʼahiʼi ʼo tatatou tui. (Mateo 24:45-47) ʼAki te ʼu fakatuʼutuʼu fakalaumālie ʼaia, ʼe tou lava sio ai pe koteā te meʼa ʼaē ʼe tonu ke tou fai moʼo fakafiafia ia Sehova mokā hoko kia tatou he ʼu ʼahiʼahi.
ʼE Maʼuhiga ʼAupito Tatatou ʼu Fono
9. Ko ai ‘te ʼu meʼa ʼofa ko he ʼu tagata,’ pea ʼe feafeaʼi tanatou tokoni ki te ʼu tēhina mo tuagaʼane?
9 ʼE tou maʼu ʼi te ʼu fono faka Kilisitiano te ʼu fakamanatu ʼa te ʼAtua ʼaē ʼe ʼaoga kia tatou, heʼe akoʼi ai tatou e te ʼu tēhina neʼe hinoʼi ki te faʼahi ʼaia. Neʼe tohi fēnei e te ʼapositolo ko Paulo: “ ʼI te temi ʼaē neʼe hake ai [Sesu] ki ʼoluga, neʼe ina ʼave mo ia te kau popūla; neʼe ina foaki he ʼu meʼa ʼofa ko he ʼu tagata.” Neʼe ina toe ʼui fēnei: “Neʼe ina foaki ʼihi ko te kau ʼapositolo, ʼihi ko te kau polofeta, ʼihi ko te kau fagonogono ʼo te evaselio, ʼihi ko te kau tauhi ōvi pea mo te kau faiako, moʼo fakatonutonuʼi te kau maʼoniʼoni, ʼo ʼuhiga mo te gāue faka minisitelio, ʼo ʼuhiga mo te fakatuʼu ʼo te sino ʼo Kilisito.” (Efeso 4:8, 11, 12, MN ) ʼE feala ke tou loto fakafetaʼi heʼe ko ‘te ʼu meʼa ʼofa [ʼaia] ko he ʼu tagata’—te kau tagata ʼāfea—ʼe nātou fakatokaga mai kia tatou te ʼu fakamanatu ʼa Sehova ʼi te temi ʼaē ʼe tou fakatahi ai moʼo fai tatatou tauhi.
10. Koteā te manatu tāfito ia Hepeleo 10:24, 25?
10 Ko tatatou loto fakafetaʼi ki te ʼu fakatuʼutuʼu fakaʼatua ʼaia, ʼe ina uga anai tatou ke tou kau ʼi te vāhaʼa fuli ki te ʼu fono e nima ʼo totatou kokelekasio. Neʼe fakahā lelei e Paulo te ʼaoga ʼaē ke tou fakatahitahi tuʼumaʼu. Neʼe ina tohi fēnei: “Tou fe’tokagaʼaki o fakaʼalaʼala ki te fai o te ofa pea mo te u gaue lelei. Aua naa tou liaki atatou fakatahi o hage ko te aga mahani a ihi, kae tou fe’tokoniʼaki, pea tafito leva, e koutou mamata ki te fakaovi mai o te Aho.”—Hepeleo 10:24, 25.
11. ʼE fua lelei feafeaʼi kia tatou tatatou ʼu fono takitahi ʼo te vāhaʼa?
11 ʼE koutou leleiʼia koa la te ʼu lelei ʼaē ʼe tou maʼu ʼi te ʼu fono? Ko te ako ʼo Te Tule Leʼo ʼi te vāhaʼa fuli ʼe ina fakaloto mālohiʼi tatatou tui, mo tokoni mai ke tou mulimuli ki te ʼu fakamanatu ʼa Sehova, pea ʼe tou mālohi ai moʼo fakafeagai ki “te laumalie o te malama-nei.” (1 Kolonito 2:12; Gaue 15:31) ʼI te Akonaki ki te Kaugamālie, ʼe akoʼi tatou e te ʼu tēhina ʼaki te Folafola ʼa te ʼAtua, ʼo ina fakahā mai te ʼu fakamanatu ʼa Sehova pea mo “te u folafola o te mauli heegata” ʼaē neʼe fai e Sesu. (Soane 6:68; 7:46; Mateo 5:1-7:29) Ko te Ako ʼo te Minisitelio Faka Teokalatike, ʼe ina fakatuputupu tatatou poto ʼi te faiako. Ko te Fono Gāue, ʼe maʼuhiga moʼo tokoni kia tatou ke tou hikihiki tatatou faʼahiga fakahā ia te logo lelei ʼi te ʼu ʼapi, mo fai te ʼu ʼaʼahi, mo te ʼu ako Tohi-Tapu, pea mo te tahi ʼu faʼahi ʼo totatou minisitelio. Mai tona ʼuhiga ʼaē ʼe mole hahaʼi te Ako Tohi ʼo te kokelekasio, koia ʼe feala ai ke tou fai he ʼu tali ʼe tau talanoa ai ki te ʼu fakamanatu ʼa te ʼAtua.
12, 13. Neʼe fakahā feafeaʼi e te hahaʼi ʼa te ʼAtua ʼi te motu ʼo Asia tanatou leleiʼia te ʼu fono?
12 ʼE tonu ke tou kau tuʼumaʼu ki te ʼu fono heʼe fakamanatuʼi mai ai te ʼu fakatotonu ʼa te ʼAtua, pea mo tokoni mai ke tou nofo mālolohi ʼi te faʼahi fakalaumālie mokā hoko he tau, he faigataʼaʼia faka ekonomika, pea mo te tahi ʼu ʼahiʼahiʼi ʼo tatatou tui. Neʼe logoʼi e te toko 70 kau Kilisitiano ʼo te motu ʼi Asia te maʼuhiga ʼo te ʼu fono, he neʼe kapu nātou ʼi tonatou ʼu ʼapi pea neʼe maʼua ke nātou maʼuʼuli ʼi te loto vao matuʼa. ʼI tanatou loto ʼaē ke nātou haga fakatahitahi tuʼumaʼu, neʼe nātou toe liliu ai ki tonatou kolo ʼaē neʼe hoko ai te tau, ʼo tānaki te ʼu meʼa ʼaē neʼe toe ʼi tonatou Fale ʼo te Puleʼaga, pea nātou toe laga tonatou fale fono ʼi te vao matuʼa.
13 ʼI te tahi potu ʼo te fenua ʼaia, neʼe kei mālohi pe te tauhi ʼa te hahaʼi ʼa Sehova ʼi tanatou ʼosi kātakiʼi lolotoga ni ʼu taʼu te tau ʼaē neʼe hoko ai. Neʼe fehuʼi fēnei age ki te tahi ʼo te ʼu tagata ʼāfea ʼo te koga meʼa ʼaia: “Koteā te faʼahi ʼaē neʼe tokoni tāfito kia koutou moʼo taupau fakatahi te ʼu tēhina?” Koteā tana tali? “Ia taʼu e 19, neʼe mātou fono tuʼumaʼu. ʼI ʼihi temi, ʼuhi ko he foʼi pulu neʼe paʼulu peʼe ko te tahi ʼu faigataʼaʼia, neʼe mole feala ke ʼōmai te ʼu tēhina ʼo fono, kae neʼe mātou haga fai te ʼu fono.” Ei, ko te ʼu tēhina pea mo te ʼu tuagaʼane ʼofaina ʼaia ʼe mahino kia nātou te maʼuhiga ʼaē ‘ke mole nātou līaki tanatou fakatahi.’
14. Koteā ʼaē ʼe feala ke tou ako mai te agamāhani ʼa te finematuʼa ko Ana?
14 Ko Ana, te fafine vitua neʼe taʼu 84, “neʼe mole puli ia ʼi he ʼaho ʼi te fale lotu.” Pea neʼe sio ai kia Sesu ʼi tana kei meamea, ʼi te temi ʼaē neʼe ʼaumai ai ki te fale lotu ʼi tona ʼosi fānauʼi. (Luka 2:36-38, MN ) ʼE koutou fakatotonu koa ke mole koutou tō fono? ʼE koutou faiga moʼoni koa ke koutou kau ʼi te ʼu ʼaho fuli ʼo te ʼu fakatahi? Ko te ako fakalaumālie ʼaē ʼe ʼaoga kia tatou ʼaē ʼe tou maʼu ʼi te ʼu fakatahi ʼaia, ʼe ko he fakamoʼoni lelei ʼaia ʼe tokaga tatatou Tāmai ʼaē ʼi selo ki tana hahaʼi. (Isaia 40:11) ʼE tou toe maʼu ʼi te ʼu fakatahi ʼaia te fiafia, pea ka tou kau kiai pea ʼe hā ai tatatou leleiʼia te ʼu fakamanatu ʼa Sehova.—Nehemia 8:5-8, 12.
ʼE Tou Makehe ʼAki Te ʼu Fakamanatu ʼa Sehova
15, 16. Kapau ʼe tou mulimuli ki te ʼu fakamanatu ʼa Sehova pea ʼe malave feafeaʼi ki tatatou aga?
15 Ko te mulimuli ki te ʼu fakamanatu ʼa te ʼAtua ʼe tokoni mai ke tou makehe mai te mālama agakovi ʼaenī. Ohage la, ko te taupau ʼo te ʼu fakamanatu ʼa te ʼAtua ʼe ina tāʼofi tatou ke mole tou fai he ʼu felāveʼi fakasino heʼeʼaoga. (Teutalonome 5:18; Tāʼaga Lea 6:29-35; Hepeleo 13:4) Kapau ʼe tou mulimuli ki te ʼu fakamanatu fakaʼatua, pea ʼe tou lava tekeʼi anai te fia loi, te fia aga kākā, pea mo te fia kaihaʼa. (Ekesote 20:15, 16; Levitike 19:11; Tāʼaga Lea 30:7-9; Efeso 4:25, 28; Hepeleo 13:18) Kapau ʼe tou mulimuli ki te ʼu fakamanatu ʼa Sehova, pea ʼe ina tāʼofi anai tatou ke ʼaua naʼa tou fia lagavaka, peʼe tou taupau he loto fehiʼa, peʼe tou fakapogi he tahi.—Levitike 19:16, 18; Pesalemo 15:1, 3.
16 Kapau ʼe tou taupau te ʼu fakamanatu ʼa te ʼAtua, pea ʼe tou nonofo maʼa, peʼe tou makehe, moʼo fakahoko tana tauhi. Pea ʼe maʼuhiga ʼaupito ke tou makehe mai te mālama ʼaenī. ʼI tana faikole kia Sehova ʼi te po fakamuli ʼo tona maʼuli ʼi te kele, neʼe fai e Sesu te kole maʼa tana kau tisipulo, ʼo ʼui maʼana: “Neʼe ʼau foaki age tau folafola kia nātou, ka neʼe fehiʼa te malamanei kia nātou, koteʼuhi ʼe mole nātou kau ʼi te malamanei, ohage pe ko ʼau, ʼe mole ʼau kau ʼi te malamanei. ʼE mole ʼau kole atu kia te koe ke ke toʼo kehe ia nātou ʼi te malamanei, kae ke ke leʼoleʼo kia nātou ʼuhi ko ia ʼaē ʼe agakovi. ʼE mole nātou kau ʼi te malamanei, ohage pe ko ʼau ʼe mole ʼau kau ʼi te malamanei. Fakamaʼoniʼoniʼi ia nātou ʼaki te moʼoni; ko tau folafola ʼe moʼoni.” (Soane 17:14-17, MN ) Tou haga taupau fakalelei te Folafola ʼa te ʼAtua, ʼaē ʼe tou makehe ai moʼo fakahoko tona tauhi taputapu.
17. Koteā ʼaē neʼe feala ke hoko mo kanapaula neʼe mole tou ʼiloʼi te ʼu fakamanatu ʼa te ʼAtua, pea koteā ʼaē ʼe tonu ke tou fai?
17 ʼI totatou ʼuhiga kaugana ʼa Sehova, ʼe tou loto ke ina tali tatou moʼo fakahoko tana tauhi. Kae kapau ʼe mole tou tokagaʼi te ʼu fakamanatu ʼa te ʼAtua, pea ʼe feala pe ke tou tokakaga fau ki te manatu ʼo te mālama ʼaenī, ʼaē ʼe lahi tana hā ʼi te ʼu fai palalau, mo te ʼu tohi, mo te ʼu fakafiafia, pea mo te ʼu aga ʼa te hahaʼi. ʼE mahino ia ʼe mole tou fia liliu anai ʼo manako ki te paʼaga, fiatuʼu, fialahi, maʼuli galo, heʼe agatonu, fekai, ʼuigataʼa, fonu ʼi te fialahi, manako ki te ʼu fakafiafia kae mole manako ki te ʼAtua—he ko te ʼu agaaga ʼaia ʼo te hahaʼi ʼaē ʼe nātou mamaʼo mai te ʼAtua. (2 Timoteo 3:1-5) ʼE tou maʼuʼuli ʼi te ʼu ʼaho fakamuli ʼo te tuʼu ʼo te ʼu faʼahiga meʼa agakovi ʼaenī, koia tou haga faikole kia Sehova ʼAtua ke tokoni mai, ke feala hatatou haga mulimuli ki tana ʼu fakamanatu pea mo tou ‘nofo tokaga ʼo mulimuli ki tana folafola.’—Pesalemo 119:9.
18. ʼI tatatou mulimuli ki te ʼu fakamanatu ʼa te ʼAtua koteā te ʼu meʼa lelei ʼaē ka tou fai?
18 ʼE mole haga fakatokagaʼi mai pe e te ʼu fakamanatu ʼa Sehova te ʼu meʼa ʼaē ʼe mole tonu ke tou fai. Kapau ʼe tou mulimuli ki tana ʼu fakamanatu pea ʼe tou fai anai he ʼu meʼa lelei, ʼe ina uga anai tatou ke tou falala katoa kia Sehova pea mo tou ʼofa kia te ia ʼaki totatou loto katoa, mo totatou nefesi katoa, mo totatou ʼatamai katoa, pea mo totatou mālohi katoa. (Teutalonome 6:5; Pesalemo 4:5; Tāʼaga Lea 3:5, 6; Mateo 22:37; Maleko 12:30) Ko te ʼu fakamanatu ʼa te ʼAtua ʼe nātou toe fakaloto mālohiʼi tatou ke tou ʼofa ki totatou kāiga. (Levitike 19:18; Mateo 22:39) ʼE tou fakahā tāfito totatou ʼofa ki te ʼAtua pea mo totatou kāiga, mokā tou fai te finegalo fakaʼatua pea mo fakahā ki te hahaʼi te “ ʼatamai mālama ʼo ʼuhiga mo te ʼAtua” ʼaē ʼe ina foaki te maʼuli.—Tāʼaga Lea 2:1-5.
Tou Muliʼi Te ʼu Fakamanatu ʼa Sehova Ke Tou Maʼuli Ai!
19. ʼE tou lava fakahā feafeaʼi ki te hahaʼi ʼe ʼaoga pea mo fua lelei te manatuʼi ʼo te ʼu fakamanatu ʼa Sehova?
19 Kapau ʼe tou mulimuli ki te ʼu fakamanatu ʼa Sehova pea mo tou tokoni ki te hahaʼi ke nātou fai feiā mo nātou, pea ʼe tou hāofaki anai ia tatou pea mo nātou ʼaē ʼe nātou fakalogo kia tatou. (1 Timoteo 4:16) ʼE tou lava fakahā feafeaʼi ki te hahaʼi, ko te mulimuli ki te ʼu fakamanatu ʼa Sehova ʼe ʼaoga pea mo fua lelei moʼoni? Mokā tou maʼuliʼi ia te ʼu pelesepeto ʼa te Tohi-Tapu ʼi totatou maʼuli. Ko “nātou fuli ʼaē neʼe lotolelei ki te maʼuli heʼegata” ʼe nātou maʼu anai te fakamoʼoni ʼaē ko te faʼahiga maʼuli ʼaē ʼe fakahā mai ʼi te Folafola ʼa te ʼAtua, ʼe ko te maʼuli lelei tokotahi pe ʼaia. (Gaue 13:48, MN ) ʼE nātou toe sio anai ʼe ‘nofo moʼoni te ʼAtua mo tatou,’ pea ʼe uga anai nātou ke nātou fakatahi ki te tauhi ʼaē ki te Tuʼi ʼAliki ko Sehova.—1 Kolonito 14:24, 25.
20, 21. ʼAki te ʼu fakamanatu ʼa te ʼAtua pea mo tona laumālie, koteā ʼaē ʼe feala anai ke tou fai?
20 Kapau ʼe tou haga ako te Tohi-Tapu, mo maʼuliʼi te ʼu meʼa ʼaē ʼe tou ako, pea mo fakaʼaogaʼi katoa te ʼu fakatuʼutuʼu fakalaumālie ʼaē neʼe foaki mai e Sehova, pea ʼe tou manako lahi anai ki tana ʼu fakamanatu. Kapau ʼe tou manatuʼi te ʼu fakamanatu ʼaia, pea ʼe tokoni mai anai ke tou “kofu ki te tagata foou nee fakatupu o fai ki te Atua i te susitisia mo te maonioni o te mooni.” (Efeso 4:20-24) ʼAki te ʼu fakamanatu ʼa Sehova pea mo tona laumālie maʼoniʼoni, ʼe feala anai hatatou fakahā te ʼofa, te fiafia, te tokalelei, te kātaki fualoa, te agalelei, te agaʼofa, te tui, te agamālū, te loto lolomi—ko te ʼu kalitate ʼe mole tatau mo te agaaga ʼo te mālama ʼaē ʼe takoto ʼi te mālohi ʼo Satana! (Kalate 5:22, 23; 1 Soane 5:19) Koia, ʼe tonu ke tou loto fakafetaʼi mokā fakamanatuʼi mai te ʼu fakatotonu ʼa Sehova ʼi tatatou ako takitokotahi te Tohi-Tapu, ka fakamanatuʼi mai e te ʼu tagata ʼāfea ʼaē neʼe hinoʼi, pea ʼi tatatou ʼu fono pea mo tatatou ʼu fakatahi.
21 ʼI tatatou mulimuli ki te ʼu fakamanatu ʼa Sehova, ʼe feala ke tou fiafia, tatau aipe peʼe tou mamahi ʼuhi ko te faitotonu. (Luka 6:22, 23) ʼE tou falala ki te ʼAtua ʼe ina hāofaki anai tatou mai te ʼu ʼaluʼaga fakamataku. ʼE maʼuhiga tāfito te faʼahi ʼaia heʼe lolotoga fakatahitahi nei te ʼu puleʼaga fuli “ki te tau ʼo te ʼaho lahi ʼo te ʼAtua te Māfimāfi” ʼi Halamaketone.—Apokalipesi 16:14-16, MN.
22. Koteā ʼaē ʼe tonu ke tou lotomālohi ʼo fai ʼo ʼuhiga mo te ʼu fakamanatu ʼa Sehova?
22 Kapau ʼe tou fia maʼu te meʼa ʼofa makehe ʼo te maʼuli heʼegata, pea ʼe tonu ke tou manako lahi ki te ʼu fakamanatu ʼa Sehova pea mo tou mulimuli kiai ʼaki totatou loto katoa. Koia, ʼofa pe ke tou maʼu te manatu ʼa te tagata fai pesalemo ʼaē neʼe hiva fēnei: “Ko te faitotonu ʼo tau ʼu fakamanatu ʼe heʼegata. Fakamahino mai, ke feala haku maʼuli ai.” (Pesalemo 119:144) Pea ʼofa pe ke tou fakahā te lotomālohi ʼaē neʼe hā ʼi te ʼu palalau ʼaenī ʼa te tagata fai pesalemo: “Neʼe ʼau pāui atu [Sehova]. Ê hāofaki ʼau! Pea ʼe ʼau haga taupau anai tau ʼu fakamanatu.” (Pesalemo 119:146) Ei, ʼi tatatou ʼu palalau pea mo tatatou aga, tou fakamoʼoni ʼe tou manako lahi ki te ʼu fakamanatu ʼa Sehova.
ʼE Koutou Tali Feafeaʼi Anai?
• Koteā te manatu ʼa te tagata fai pesalemo ʼo ʼuhiga mo te ʼu fakamanatu ʼa Sehova?
• He koʼe ʼe ʼaoga kia tatou te ʼu fakamanatu ʼa te ʼAtua?
• Koteā te ʼaoga ʼo tatatou ʼu fono ʼo ʼuhiga mo te ʼu fakamanatu fakaʼatua?
• ʼE feafeaʼi tatatou makehe mai te mālama ʼaenī ʼaki te ʼu fakamanatu ʼa Sehova?
[Paki ʼo te pasina 15]
Neʼe manako lahi te tagata fai pesalemo ki te ʼu fakamanatu ʼa Sehova
[Paki ʼo te pasina 16, 17]
Ohage ko te faʼifaʼitaki ʼa Ana, ʼe koutou fakatuʼutuʼu koa ke mole koutou tō ʼi he fono?
[Paki ʼo te pasina 18]
Ko te taupau ʼo te ʼu fakamanatu ʼa Sehova ʼe tou makehe ai, ʼo tou maʼa pea mo ina tali ke tou tauhi kia te ia