ʼU Tūpulaga: Koteā Koa ʼAē ʼe Koutou Kumi?

“Hola ʼi te ʼu holi ʼo te temi tūpulaga, kae ke haga kumi te faitotonu, te tui, te ʼofa, te tokalelei, mo nātou ʼaē ʼe nātou fetapā ki te ʼAliki ʼaki he loto ʼe maʼa.”— 2 Timoteo 2:22.

1. Koteā tatatou fakaʼamu ʼo ʼuhiga mo te kau tūpulaga?

“KAU FAKAMOʼONI ʼA SEHOVA”, ko te tala ʼaia ʼa te sulunale ‘pentecotiste’ ʼi te lea faka suete ʼa Dagen (Te ʼAho), “ ʼe nātou faʼu te kūtuga ʼaē ʼe lahi tanatou maʼu ʼi te taʼu fuli te ʼu hahaʼi foʼou feiā aipe mo te kau tūpulaga tokolahi”. ʼE lagi ʼe koutou kau ʼi te toe hahaʼi lahi maʼa ʼaia, ia koutou ko te kau tūpulaga ʼe manavasiʼi ki te ʼAtua. Lagi neʼe akoʼi koutou talu takotou veliveli ʼi te ala faka kilisitiano, peʼe lagi neʼe koutou fagono pea mo koutou tali te logo ʼo te Puleʼaga e koutou totonu pe. ʼI tona ʼu ʼaluʼaga fuli, ʼe mātou fiafia ʼi takotou fakatahi mo mātou. Pea ʼe mātou fakaʼamu ke hoko atu takotou kumi te ala ʼo te faitotonu, ohage ko tona fai e te kau kilisitiano tūpulaga ʼo te ʼuluaki sēkulō. Ko te ʼu palalau ʼa te ʼapositolo ʼe feala pe ke tau mo koutou ʼi te faʼahi ʼaia: “ ʼE koutou mālohi pea ko te folafola ʼo te ʼAtua ʼe nofo ia koutou pea neʼe koutou mālo ʼi te agakovi.” — 1 Soane 2:14.

2. Koteā te ʼu meʼa ʼe feala ke fai moʼo haga kumi te faitotonu ʼi te ʼu temi faigataʼa lolotoga ʼo te “temi mātala ʼo te taʼu”?

² ʼE tokolahi te kau kilisitiano tūpulaga ʼi te temi nei ʼe nātou tekeʼi te ʼu fakahala ʼo te mālama ʼaenī. Kae, ʼe feala pe ke koutou manatuʼi ko te taupau ʼo te taʼi ala ʼaia ʼe mole faigafua. ʼI tokotou temi “mātala ʼo te taʼu”, ʼe feala ke koutou felāveʼi mo he ʼu meʼa foʼou ʼi tokotou loto pea mo tokotou mālohi (1 Kolonito 7:36). ʼI te lakaga ʼaia, ʼe feala ke lave vave kia koutou he ʼu toe maʼua ʼi te fale ako, ʼi tokotou famili, pea mo te kokelekasio. ʼO toe feiā aipe mo te ʼu fakahala ʼaē mai ia Satana te Tevolo. Ko tana fakatuʼutuʼu ke ina kakaʼi he tokolahi, ʼe ina ʼohofi ia nātou ʼaē ʼe vaivai gafua, ohage ko tana fai ʼaē ʼi te ʼōloto ʼo Eteni. ʼI muʼa, neʼe ina fakakaukauʼi tana ʼu kākā fakalotoʼi, pea ʼe mole ina fai kia nātou ʼaē ʼe fotufotua, ohage ko Atama ʼaē kua mahino lelei, kae ki te kau tūpulaga pea tāfito ia nātou ʼe mole heʼeki nātou māhani ʼo ʼuhiga mo te maʼuli ohage la ko Eva (Senesi 3:1-5). Ko te sēkulō ki muli age, ko Satana neʼe ina fakaʼaoga te ʼu taʼi kākā ʼaia ki te kokelekasio foʼou ʼo te kau kilisitiano ʼo Kolonito. Neʼe ʼui e te ʼapositolo ko Paulo, ʼo fēnei: “ ʼE ʼau mataku, naʼa ʼi he faʼahiga ʼaluʼaga, — ohage ko te haga ʼa te gata ʼo fakalalata ia Eva ʼaki tana kākā, — naʼa fakahehema tokotou ʼatamai pea mo fakamamaʼo ʼi te agatonu pea mo te nofo maʼa ʼe foaki kia Kilisito.” — 2 Kolonito 11:3.

3, 4. Koteā ʼihi ʼu meʼa gāue ʼe fakaʼaogaʼi e Satana moʼo fakahalaʼi te kau tūpulaga, pea koteā te fua ʼe feala ke hoko?

³ Ia ʼaho nei, ko ʼakotou mātuʼa kilisitiano ʼe feala ke nātou maʼu te taʼi mataku ʼaia ʼo ʼuhiga mo koutou. ʼAua naʼa koutou ʼui ʼe nātou manatu ʼe koutou fia fai te ʼu aga ʼaē ʼe kovi, kae ʼe nātou ʼiloʼi ʼaki tanatou kua māhani ʼi tonatou maʼuli, ko te kau tūpulaga ʼe nātou higa gafua ki te ʼu “kākā” ʼa Satana (Efesi 6:11, ta fakapilitānia ʼi te ʼu kumiʼaga, nota). ʼE mole hage ia ʼe fakatupu tuʼutāmaki, ko te ʼu fakahala ʼaē ʼa Satana ʼe hā mai ohage ko he ʼu meʼa ʼe fakalalata pea mo fia holi ki ai. ʼE fakahā fakapotopoto e te televisio te mānumānu koloā, te ʼu felāveʼi fakasino heʼeʼaoga, te agamālohi, pea mo te ʼu meʼa fakalauʼakau ohage ko he gaoʼi. Ko te ʼu fakakaukau ʼaē kei tuputupu ʼe feala ke nātou fakafonu ʼo nātou ʼatamai ʼaki he ʼu faʼahiga meʼa noa pe kae ʼe ko he ʼu meʼa ia ʼe ‘moʼoni, ko he ʼu meʼa ʼe tonu ke tokagaʼi, ko he meʼa totonu fuli, ko he meʼa maʼa fuli, pea mo fakaʼapaʼapa’. (Filipe 4:8.) Ko te fakalotoʼi ʼo te ʼu kaugā ako ʼe ko he tahi meʼa gāue mālohi ʼa Satana. ʼE feala pe ke haga ʼo koutou kaugā ako ʼo uga fakamālohiʼi koutou ke koutou mulimuli ki tonatou faʼahiga maʼuli, ki tanatou faʼahiga faiteuteu feiā mo te gaohi ʼo te lauʼulu (1 Petelo 4:3, 4). Neʼe fakahā e William Brown ʼi te sulunale: “Kapau ʼe ʼi ai he ʼAtua e tahi maʼa te kau tūpulaga, ko te ʼAtua ʼo te meʼa e tahi. (...) Ki te kau tūpulaga, ko te nofo kehe ʼi te ʼu kaugā ako ʼe ko te meʼa kovi ʼaupito ʼaia.” Neʼe fakahā e te taʼahine fakamoʼoni ʼi Italia, ʼo fēnei: “Neʼe ʼau ufiufi ʼi te fakahā ki ʼoku kaugā ako ko ʼau ko te Fakamoʼoni. Pea ʼi taku ʼiloʼi ʼaē ʼe mole leleiʼia e Sehova taku aga, neʼe mamahi toku loto pea neʼe ʼau lotovaivai.”

⁴ ʼAua naʼa koutou faihala: ko Satana ʼe loto ke ina taki koutou ke koutou puli noa. Tokolahi te kau tūpulaga kua ʼolo ki te mālama ʼe nātou mamahi anai ʼi tanatou mole maʼuʼuli ʼi te toe mamahi lahi koteʼuhi neʼe nātou kakaʼi pe ia nātou totonu (Esekiele 9:6). Ko te ala pe e tahi ki te maʼuli, ko te haga kumi ʼo te meʼa ʼaē ʼe totonu.

Ke koutou fakamamaʼo ʼi te ʼu faka kaugā kovi

5, 6. a) Koteā te ʼu faigataʼaʼia neʼe felāveʼi mo te tūpulaga ko Timoteo ʼi te temi neʼe maʼuli ai ʼi Efese? b) Koteā te tokoni neʼe fai e Paulo ʼo ʼuhiga mo Timoteo?

⁵ Neʼe ko te tupuʼaga tāfito ʼaia ʼo te tokoniʼi e te ʼapositolo ko Paulo te tūpulaga ko Timoteo. Ia taʼu e hogofulu tupu, neʼe kaugā fagona ia Timoteo mo te ʼapositolo ko Paulo ʼi tana ʼu folau misionea. ʼI te temi ʼaē neʼe fagonogono ai Timoteo ʼi te kolo pagani ko Efese, ko Paulo neʼe nofo ʼi te fale pilisoni ʼo fakatalitali ki tona matehi. ʼI te kua ōvi mai ʼo tona temi mate, lagi neʼe tuʼaniaʼi e Paulo ʼo ʼuhiga mo te meʼa ʼaē ka fai e Timoteo. Neʼe ʼiloa ia te kolo ko Efese ʼuhi ko tana ʼu koloā, tana aga heʼeʼaoga, tana ʼu fakafiafia heʼeʼaoga, pea neʼe mole kei maʼu e Timoteo he tokoni mai tana tagata fai tokoni ʼofaina.

⁶ Koia ʼaē, neʼe faitohi ai Paulo ki tana “tamasiʼi ʼofaina”, ʼo fēnei: “ ʼI he fale lahi, ʼe mole gata ʼaki pe he ʼu ipu aulo pea mo siliva, ʼe toe ʼi ai foki mo te ʼu ipu ʼakau pea mo te ʼu ipu kele neʼe taʼo; pea ko ʼihi ʼe fakaʼaoga ki he meʼa ʼe lelei, ka ko ʼihi ʼe fakaʼaoga ki he meʼa ʼe kovi. Koia kapau ʼe tuʼu mamaʼo he tahi mai te ʼu ipu ʼaenī, pea ʼe liliu ia ko he ipu ʼe fakaʼaoga ki he meʼa ʼe lelei, he ipu kua fakatapuʼi, ʼe ʼaoga kia ia ʼaē ʼaʼana te ipu, pea kua teuteuʼi ia ki te gāue lelei fuli pe. Hola ʼi te ʼu holi ʼo te temi tūpulaga, kae ke haga kumi te faitotonu, te tui, te ʼofa, te tokalelei, mo nātou ʼaē ʼe nātou fetapā ki te ʼAliki ʼaki he loto e maʼa.” — 2 Timoteo 1:2; 2:20-22.

7. a) Ko ai te ʼu ‘ipu ʼe fakaʼaoga ki te ʼu meʼa noa’ ʼaē neʼe valoki e Paulo? b) ʼE feafeaʼi te fakaʼaogaʼi e te kau tūpulaga ʼo te temi nei te ʼu palalau ʼaia ʼa Paulo?

⁷ Koia neʼe fakatokagaʼi e Paulo kia Timoteo māʼia pe la ʼi te lotolotoiga ʼo tona ʼu kaumeʼa kilisitiano ʼe feala pe ke maʼu ai ‘te ʼu ipu ʼe fakaʼaoga ki te ʼu meʼa noa’, ko te ʼu hahaʼi ʼe mole lelei te aga ʼaē ʼe nātou fai. Koia, kapau neʼe feala ke higa Timoteo ʼi hana faka kaugā mo ʼihi ʼu kilisitiano fakanofo, ʼe toe feiā aipe mo te temi nei ʼo ʼuhiga mo te faka kaugā mo te ʼu meʼa ʼo te mālama ʼaenī ʼaē ʼe ko he ʼu meʼa fakatupu kovi ki he kilisitiano tūpulaga! (1 Kolonito 15:33.) ʼAua naʼa koutou manatu ʼe tonu ke mole lelei takotou aga mo ʼokotou kaugā ako. Kae, ʼe tonu ke koutou fakatokaga ke ʼaua naʼa koutou faʼifaʼitakiʼi tanatou ʼu aga, māʼia pe la mo kapau ʼi ʼihi temi ʼe hage kia koutou ʼe mole hokotou ʼu kaumeʼa. ʼE feala ko he meʼa ʼe mata faigataʼa. Ko te taʼahine ʼi Pelesile, ʼe ina ʼui fēnei: “ ʼE faigataʼa. ʼE fakaafe tuʼumaʼu pe ʼau ʼe ʼoku kaugā ako ki te ʼu fakafiafia pea mo te ʼu koga meʼa ʼe mole ʼaoga ki te kau kilisitiano tūpulaga. ʼE nātou ʼui mai: ‘Koteā ʼaē ʼe mole ke haʼu ai mo mātou? ʼE ke vale!’ ”

8, 9. a) Logope la ko he ʼu meʼa ʼi te mālama ʼe hage ʼe agalelei, ʼe feafeaʼi ki he faka kaugā hana liliu ko he tuʼutāmaki ki he kilisitiano? b) ʼE koutou maʼu koa ʼifea hokotou ʼu kaumeʼa ʼe lelei?

⁸ Ko ʼihi kau tūpulaga ʼo te mālama ʼe feala ke tou ʼui ʼe nātou agalelei koteʼuhi ʼe mole nātou suluka, ʼe mole nātou lea heʼeʼaoga, peʼe nātou fai he ʼu aga heʼeʼaoga. Kae, kapau ʼe mole nātou kumi te faitotonu, ko tanatou ʼu manatu pea mo tanatou ʼu agaaga ʼe feala pe ke nātou fakahalaʼi tatou. Pea tahi ʼaē, ko meʼa ʼe fia ʼe feala ke koutou felogoi ai mo nātou ʼe mole tui kia Sehova? (2 Kolonito 6:14-16.) Koia ʼaē, ko te ʼu meʼa fakalaumālie ʼaē ʼe maʼuhiga tāfito kia koutou ʼe ko he ʼu meʼa “vale” ia kia nātou! (1 Kolonito 2:14.) ʼE feala koa hakotou kaumeʼa mo nātou pea ʼe mole fakagaohaʼa ki ʼakotou ʼu pelesepeto?

⁹ Koia ʼaē ke koutou tekeʼi te ʼu faka kaugā ʼe mole lelei. Koutou faka tuʼakoi ʼakotou faka kaugā ki te kau kilisitiano ʼaē ʼe ʼoʼofa moʼoni kia Sehova. Pea ke koutou fakatokaga foki ki te kau tūpulaga ʼo te kokelekasio ʼaē ʼe nātou maʼu te ʼu manatu ʼe mole lelei pea mo fai fatufatu. ʼI takotou tuputupu ʼi te faʼahi fakalaumālie, ʼe mahino ia ko takotou filifili ʼo ʼokotou ʼu kaumeʼa ʼe fetogi anai. ʼE ʼui e te finemui Fakamoʼoni: “Neʼe ʼau maʼu toku ʼu kaumeʼa foʼou ʼi te ʼu kokelekasio kehekehe. Ko te meʼa ʼaia neʼe ʼau mahino ai ʼe mole ʼi ai he ʼuhiga ʼo te ʼu kaumeʼa ʼi te malamanei.”

Koutou hola ʼi te ʼu aga ʼe mole lelei

10, 11. a) Koteā te faka ʼuhiga ʼo te talanoa ʼaē “ke hola ʼi te ʼu holi ʼo te temi tūpulaga”? b) ʼE feafeaʼi ki he tahi hana “hola ʼi te folonikasio”?

¹⁰ Neʼe toe fakaloto mālohiʼi e Paulo ia Timoteo ke “hola ʼi te ʼu holi ʼo te temi tūpulaga”. ʼI tokotou temi tūpulaga, ko te holi ʼaē ke koutou ʼiloa, ke koutou fakafiafia, peʼe ke koutou fakafimālie te ʼu holi fakasino ʼe feala ke mālohi ia koutou. Ko te fai fakavale ʼo te ʼu meʼa ʼaia, ko te ʼu taʼi holi ʼaia ʼe feala pe ke nātou taki koutou ke koutou agahala. Koia ʼaē, neʼe ʼui e Paulo ke hola ʼi te ʼu holi fakatupu kovi: ke tou lele ohage ko ha kita lele moʼo hāofaki ʼo to kita maʼulia.

¹¹ Ohage la, ko te holi ki te ʼu felāveʼi fakasino neʼe ina taki te kau kilisitiano tūpulaga tokolahi ki te puli noa fakalaumālie. Koia, ʼe tala fakahagatonu ai e te Tohi-Tapu ke tou “hola ʼi te folonikasio”. (1 Kolonito 6:18.) Kapau ko he tama pea mo he taʼahine ʼe nā fakatahi, ʼe nā faiʼakau, ʼe feala pe ke nā fakaʼaoga te fakatuʼutuʼu ʼaia ʼo nā tekeʼi he ʼu ʼaluʼaga ʼe feala ke nā tuʼutāmaki ai, ohage la ko hanā nonofo tokolua pe ʼi he koga fale peʼe ʼi he motokā ʼe tau. Logope la te ʼui ʼaē ko he aga kua ʼāfea he kaugā fagona ʼo he tokolua e fakatahi, kae ʼe ko he meʼa ia moʼo taupau ʼo nāua mai te fakahala. Pea logope la ko ʼihi kupu pea mo he ʼu aga moʼo fakahā tonā ʼofa ʼe feala ke tautonu mo te faʼahi ʼaia, ʼe tonu ke fai he ʼu tuʼakoi koteʼuhi ke tekeʼi he ʼu aga heʼemaʼa (1 Tesalonika 4:7). Ke tou hola ʼi te folonikasio ʼe tonu anai ke tou tekeʼi mo te ʼu ʼata ʼaē ʼe nātou lagaʼi te ʼu holi kovi (Sake 1:14, 15). Kapau ʼe hu he ʼu manatu ki tokotou ʼatamai neʼe mole koutou ʼamanaki ki ai, koutou fetogi te ʼu manatu ʼi ʼokotou ʼatamai. Koutou ʼolo ʼo haʼele; koutou lautohi; koutou fakatokatoka te ʼu meʼa ʼo te loto fale. Ko te faikole ʼe ko he tokoni mālohi, tāfito ʼi te faʼahi ʼaia. — Pesalemo 62:8b.

12. ʼE feafeaʼi hakotou akoʼi te fehiʼa ki te meʼa ʼaē ʼe kovi? Koutou fakamatalatala.

¹² Ko te meʼa ʼaē ʼe maʼuhiga tāfito, ʼe tonu ke koutou ako te fehiʼa, pea mo fakalialia ki te meʼa ʼaē ʼe kovi (Pesalemo 97:10). ʼE feafeaʼi hakotou fehiʼa ki he meʼa ʼe hage ʼi tona kamata ʼe ko he meʼa fakagaoʼi peʼe matalelei? ʼI hakotou manatuʼi tona ʼu ikuʼaga! “ ʼAua naʼa koutou faihala: ʼe mole feala ke kakaʼi te ʼAtua. ʼIo, ko te meʼa ʼaē ʼe to e te tagata, koia pe anai ka ina utu ake. Koteʼuhi ko te meʼa ʼaē ʼe to e te tagata ʼi te ʼaluʼaga ʼo te kakano ʼe ina utu anai ʼi te kakano te malaʼia.” (Kalate 6:7, 8). ʼI te temi ʼaē ʼe koutou holi ai ki te fakahala, koutou fakakaukauʼi te kavega mamafa ʼaē: ko he tahi ʼe higa ki te felāveʼi fakasino ʼe ina fakaloto mamahi anai ia Sehova ʼAtua (Vakaʼi ia Pesalemo 78:41). Koutou toe manatuʼi ia hakotou maʼu he tamasiʼi neʼe mole koutou loto ki ai peʼe ko he mahaki, ohage la ko te SITA. Koutou fakatokagaʼi te lotomamahi ʼaē ka koutou maʼu pea mo te matagafua ʼaē ʼe tau anai mo koutou. ʼE feala pe ke hoko mo he ʼu ikuʼaga fualoa. Neʼe fakahā e te fafine kilisitiano, ʼo fēnei: “Ko toku ʼohoana pea mo ʼau neʼe kua ma ʼiloʼi te felāveʼi fakasino ʼi muʼa ʼo tamā ʼohoana. Logope la ko māua ko te ʼu kilisitiano ʼi te temi nei, ko tomā maʼuli ʼāfea takitokotahi ʼe ko he matapuna fakafihi feiā aipe mo te fuaʼā ʼi tamā nofo ʼohoana.” ʼI tona ʼu ʼaluʼaga fuli ko te mole tokagaʼi te ʼu tokoni ʼa te ʼAtua, ʼe toʼo tokotou ʼu pilivilesio faka teokalatike peʼe feala pe ke fakamavae koutou ʼi te kokelekasio! (1 Kolonito 5:9-13.) ʼE ko te fakafimālie faka temi ʼaia ʼe tau koa mo te totogi mamafa ʼaia?

Koutou haga taupau he felogoi lelei mo Sehova

13, 14. a) He koʼe ʼe mole gata ʼaki tatatou hola mai te meʼa ʼaē ʼe kovi? b) ʼE feafeaʼi ki he tahi hana “faiga ke ina ʼiloʼi ia Sehova”?

¹³ Kae, ʼe mole feʼauga pe ʼi tatatou hola mai te meʼa ʼaē ʼe kovi. Neʼe tokoniʼi foki Timoteo ke ina “haga kumi te faitotonu, te tui, te ʼofa, te tokalelei”. ʼE ko he faʼahi ia ʼe fakamaʼua ki he faiga mālohi. ʼO toe feiā aipe mo te polofeta ko Osea neʼe ina kole ki te hahaʼi heʼe agatonu ʼo Iselaele, ʼo fēnei: “Koutou ʼomai pea ke tou liliu kia Sehova (...). ʼE tou haga faiga anai ke tou ʼiloʼi ia Sehova.” (Osea 6:1-3). ʼE koutou fai koa te taʼi faiga ʼaia? ʼE mole gata ʼaki pe te kau ki te ʼu fono pea mo te kaugā fagona mo ʼakotou ʼu mātuʼa ki te fai faka mafola. Neʼe tala e te fafine kilisitiano, ʼo fēnei: “Neʼe ʼau maʼuli mo taku ʼu mātuʼa ʼi te moʼoni, pea neʼe ʼau papitema kei veliveli toku ʼu taʼu. (...) Neʼe tahitahiga taku mole kau ki he fono feiā aipe mo taku fai faka mafola, kae neʼe mole ʼau fakatuputupu haku felogoi lelei mo Sehova.”

¹⁴ Ko te tahi finemui ʼe ina fakamoʼoni ki te faʼahi ʼaia, mo ia pe la neʼe mole ina ʼiloʼi ia Sehova ohage ko hona Kaumeʼa peʼe ko hana Tāmai, neʼe hage kia ia ia Sehova ko he laumālie puli noa. Neʼe ina fai te aga heʼeʼaoga pea neʼe maʼu tana tamasiʼi ʼi tona taʼu 18 kae mole heʼeki ʼohoana. ʼAua naʼa koutou fai te taʼi faihala ʼaia! “Koutou haga faiga ke koutou ʼiloʼi ia Sehova”, ohage ko tona ʼui e Osea. ʼAki te faikole pea mo te haʼele ʼaē ʼi te ʼaho fuli mo Sehova, ʼe feala pe ke koutou liliu ko hona kaumeʼa (Vakaʼi ia Mikea 6:8; Selemia 3:4). “ ʼE mole mamaʼo ia tatou takitahi” mo kapau ʼe tou kumi ia ia (Gāue 17:27). Koia ʼaē ʼe maʼuhiga ai he polokalama ako Tohi-Tapu tuʼumaʼu. ʼAua naʼa lahi fau pea mo faigataʼa te taʼi fakatuʼutuʼu ʼaia. ʼE ʼui fēnei e te finemui ko Melody: “ ʼI te ʼaho fuli ʼe ʼau lau te Tohi-Tapu ia minuta e 15.” Koutou tuku he temi moʼo lau te ʼu alatike fuli ʼo Te Tule Leʼo pea mo te nusipepa ʼaē Koutou ʼaʼala! Koutou teuteuʼi takotou ʼu fono ke feala hakotou “uga [niʼihi] ki te ʼofa pea mo te ʼu gāue ʼaē ʼe lelei”. — Hepeleo 10:24, 25.

Foaki tokotou loto ki ʼakotou ʼu mātuʼa

15. a) He koʼe koa ʼe faigataʼa ʼi ʼihi lakaga ia te fakalogo ki te ʼu mātuʼa? b) He koʼe ko te fakalogo ʼe ko meʼa ʼe lelei tāfito ki te kau tūpulaga?

¹⁵ Ko te ʼu mātuʼa ʼaē ʼe manavasiʼi ki te ʼAtua ʼe feala ko he ʼu matapuna moʼoni ʼo te tokoni pea mo te lagolago. Kae koutou fakatokagaʼi muʼa te meʼa ʼe tonu ke koutou fai: “Fānau, koutou fakalogo ki ʼakotou ʼu mātuʼa ʼi te fakatahi mo te ʼAliki, koteʼuhi heʼe tonu te meʼa ʼaia: ‘Fakaʼapaʼapa ki tau tāmai pea mo tau faʼe’, ko te ʼuluaki folafola ʼaia ʼe ʼi ai te fakapapau: ‘koteʼuhi ke fua lelei kia te koe pea ke ke maʼuli fualoa ʼi te kele.’ ” (Efesi 6:1-3). ʼIo, ʼe faka haʼu pe tokotou lahi pea ʼe koutou fakaʼamu ki he ʼāteaina lahi age. ʼE toe feala pe foki ke tuputupu takotou mahino ki te ʼu tuʼakoi ʼe fakatuʼu e te ʼu mātuʼa. Neʼe fakahā e te ʼapositolo ko Paulo, “ko ʼatatou ʼu tāmai, ʼe feala pe ke nātou fai te meʼa ʼaē ʼe lelei”. (Hepeleo 12:10, Tohi-Tapu ʼo Selusalemi.) Kae, ʼi te ʼu lelei fualoa, ʼe fua manuʼia ia kia koutou takotou fakalogo kia nātou. Ko takotou ʼu mātuʼa ʼe ʼoʼofa kia koutou pea ko nātou pe ʼaē ʼe nātou ʼiloʼi lelei koutou. Logope la takotou mole manatu tahi tuʼumaʼu mo ʼakotou mātuʼa, ʼe nātou tokagaʼi aipe te ʼu meʼa ʼaē ʼe ʼaoga kia koutou. Koteā te tupuʼaga ʼo takotou fakafeagai ki tanatou ʼu faiga ke nātou akoʼi koutou “ ʼi te akonaki pea mo te ako faka ʼatamai ʼa Sehova”? (Efesi 6:4.) ʼIo, ko ia ʼaē ʼe vale ʼe mole “fakaʼapaʼapa ki te akonaki ʼo tana tāmai”. (Tāʼaga Lea 15:5.) Ko te tūpulaga ʼaē ʼe poto ʼe ina ʼiloʼi anai te fai pule ʼo tana ʼu mātuʼa pea ʼe ina fakahā tana fakaʼapaʼapa kia nāua. — Tāʼaga Lea 1:8.

16. a) He koʼe ʼe mole lelei ke fufū e te kau tūpulaga tonatou ʼu fihifihia ʼi ʼanatou ʼu mātuʼa? b) Koteā te meʼa ʼe feala ke fai e te kau tūpulaga moʼo hikihiki ʼo tanatou felogoi mo ʼanatou ʼu mātuʼa?

¹⁶ ʼE ʼiloga anai te aga ʼaia ʼi hakotou tala te moʼoni ki ʼakotou ʼu mātuʼa, koutou fakahā ki ʼakotou mātuʼa ʼokotou ʼu fihifihia, ohage la ko he ʼu mahalohalo ʼo ʼuhiga mo te moʼoni peʼe ko he lotomamahi ʼo ʼuhiga mo he aga ʼe kovi (Efesi 4:25). Ko te fufū ʼo te ʼu faʼahiga ʼaluʼaga faka tuʼutāmaki ʼaia ki ʼakotou ʼu mātuʼa ʼe ʼāsili fakatupu ai te ʼu fihifihia lahi (Pesalemo 26:4). Ke palalau faʼitaliha te fānau ki ʼanatou mātuʼa, ko ʼihi mātuʼa ʼe mole lahi tanatou faiga ʼaē ke nātou felogoi mo tanatou fānau. ʼE fēnei te tagi ʼa te finemui: “ ʼE mole he temi ʼe nofo ai ki lalo taku faʼe pea ʼe mole he temi ʼe palalau ai mo ʼau. Neʼe mole ʼau toʼa ʼi te fakahā age te meʼa ʼi toku loto koteʼuhi neʼe ʼau mataku naʼa ina munaʼi ʼau.” Kapau ʼe feiā hokotou ʼaluʼaga, koutou maʼu he temi faigamalie moʼo fakahā ki ʼakotou mātuʼa te meʼa ʼaē ʼi tokotou ʼu loto. ʼE tokoni fēnei ia Tāʼaga Lea 23:26: “Toku foha, foaki mai tou loto.” Ia muʼa ʼo te tuputupu ʼo he ʼu fihifihia mamafa, koutou faiga ke koutou felogoi tuʼumaʼu mo takotou ʼu mātuʼa ki te ʼu meʼa ʼaē ʼe koutou tuʼaniaʼi.

Koutou haga kumi te faitotonu!

17, 18. Koteā te meʼa ʼe tokoni anai ki he tūpulaga ke ina haga muliʼi tana haga kumi ʼo te faitotonu?

¹⁷ ʼI te fakaʼosiʼosi ʼo te lua tohi ʼa Paulo, neʼe ina fakaloto mālohiʼi Timoteo, ʼo fēnei: “Ke ke haga nofo ʼi te ʼu meʼa ʼaē neʼe ke ako pea mo ke fakamoʼoni ki ai.” (2 Timoteo 3:14). ʼE tonu ke toe feiā mo koutou. ʼAua naʼa koutou tuku he tahi peʼe ko he meʼa ke ina kakaʼi koutou ʼi te takotou haga kumi te faitotonu. Ko te mālama ʼo Satana — mo tana ʼu kākā fuli — ʼe pipiki ki te ʼu meʼa kovi. Kua vave pe te faka ʼauha ʼo te malamanei pea mo nātou fuli ʼaē ʼe nātou kau ki ai (Pesalemo 92:7). Koutou tokaga ke ʼaua naʼa matehi koutou mo te hahaʼi ʼa Satana.

¹⁸ ʼAki te fakatuʼutuʼu ʼaia ʼi te ʼatamai, ʼe tonu ke koutou vakaʼi tuʼumaʼu ʼakotou fakatuʼutuʼu, feiā aipe mo ʼakotou ʼu holi, pea mo te ʼu meʼa ʼe ʼaoga kia koutou. Koutou fakakaukauʼi takitokotahi te ʼu fehuʼi ʼaenī: ‘ ʼE lelei koa taku lea pea mo taku aga tatau aipe pe ʼe mole sio mai ʼaku ʼu mātuʼa pea mo te ʼu hahaʼi ʼo te kokelekasio? Ko ai koa te ʼu kaumeʼa ʼaē ʼe ʼau fili? Ko taku ʼu kaugā ako ʼaē ʼe nātou puleʼi taku fai teuteu? Koteā koa te ʼu fakatuʼutuʼu neʼe ʼau fai? ʼE holi mālohi koa toku loto ki te minisitelio katoa, peʼe ki he gāue ʼi te ʼu faʼahiga meʼa ʼo te tuʼu ʼa Satana?’

19, 20. a) He koʼe koa ʼe mole tonu ke nofo tuʼania he tūpulaga ʼi te ʼu fakatuʼutuʼu ʼa Sehova? b) Koteā te ʼu meʼa ʼofa ʼe feala ke maʼu e te kau tūpulaga?

¹⁹ ʼE mahalo pe, ʼe koutou fakatokagaʼi te maʼuhiga ʼo hakotou fai he ʼu faʼahiga fetogi ʼi takotou fakakaukau (2 Kolonito 13:11). ʼAua naʼa koutou nofo tuʼania. Koutou manatuʼi, ʼe mole ʼamanaki ia Sehova ki he meʼa ʼe mole koutou lavaʼi. Neʼe fehuʼi e te polofeta ko Mikea, ʼo fēnei: “Koteā ʼe kole atu e Sehova kia te koe, mo kapau pe ko hau haga fai te faitotonu, pea mo manako ki te agalelei, pea mo haʼele fia mālalo mo tou ʼAtua?” (Mikea 6:8). ʼE mole mata faigataʼa anai kia koutou te faʼahi ʼaia mo kapau ʼe koutou leleiʼia te ʼu meʼa ʼofa ʼa Sehova moʼo tokoniʼi ʼo koutou. Koutou maʼu he felogoi lelei mo ʼakotou mātuʼa. Koutou fakatahi tuʼumaʼu mo te kokelekasio faka kilisitiano. Kae tāfito, ke koutou faigaʼi ke koutou ʼiloʼi te ʼu tagata ʼāfea ʼo te kokelekasio. ʼE nātou tokaga ʼo ʼuhiga mo tokotou fīmālie pea ʼe feala ko ni ʼu matapuna ʼo te tokoni pea mo te fakafimālie (Isaia 32:2). Ia meʼa fuli, koutou taupau he felogoi lelei mo Sehova ʼAtua. ʼE ina foaki atu anai te mālohi pea mo te loto faʼa kātaki ʼaē ke koutou haga kumi te meʼa ʼe totonu!

²⁰ Kae, ko ʼihi tūpulaga, neʼe nātou maumauʼi tanatou ʼu faiga ʼo ʼuhiga mo te tuputupu fakalaumālie ʼi hanatou fakalogo te ʼu faʼahiga musika kehekehe. Ko te alatike ka hoa mai ʼe talanoa tāfito anai ki te faʼahi ʼaia.

[Nota ʼi te lalo pasina]

Kei koutou manatuʼi koa?

◻ He koʼe koa ko te kau tūpulaga tāfito ʼaē ʼe higa gafua ki te ʼu “kākā” ʼa Satana?

◻ He koʼe koa ko te faka kaugā lahi mo te kau tūpulaga ʼo te mālama ʼe fakatupu tuʼutāmaki?

◻ ʼE feafeaʼi koa hakotou hola ʼi te felāveʼi fakasino?

◻ ʼE feafeaʼi koa hakotou haga felogoi lelei mo Sehova?

◻ He koʼe koa ʼe maʼuhiga ia te felogoi mo ʼakotou ʼu mātuʼa?

[Paki ʼo te pasina 16]

Ko he ʼu tama pea mo he ʼu finemui ʼe faiʼakau fakapotopoto ʼe nātou feʼiloʼiʼaki lelei ʼi te ʼu fakatuʼutuʼu, ohage la ko te fai heheke ʼi te ʼaisi, ʼe mole nā ʼāteaina.