FAI NI TISIPULO
AKO 10
Tou Toʼo Fakamalotoloto
Pelesepeto: “Neʼe matou fakatotonu ai ke mole gata pe tamatou fakaha atu kia koutou te logo lelei ʼo ʼuhiga mo te ʼAtua, kae ke matou toe foaki foki mo ʼomatou maʼuli moʼo tokoni atu, koteʼuhi neʼe matou ʼoʼofa mamahi ia koutou.”—1 Tes. 2:8.
Te Meʼa ʼAe Neʼe Fai e Sesu
1. Sioʼi te ʼATA VITEO, peʼe lau ia Soane 3:1, 2. Pea tali ki te ʼu fehuʼi ʼaeni:
He koʼe neʼe alu ia Nikotemo kia Sesu ʼi te poʼuli?—Vakaʼi ia Soane 12:42, 43.
ʼE ha feafeaʼi ʼi te hisitolia ʼaia neʼe toʼo fakamalotoloto e Sesu tana fai he ʼu tisipulo?
Kotea ʼAe ʼe Tou Ako Mai Ai?
2. ʼE tou fakaha ʼe tou ʼoʼofa ʼi te hahaʼi ʼo tou faiga ke tou tokoni ke natou liliu ko he ʼu tisipulo.
Faʼifaʼitakiʼi Ia Sesu
3. Tokagaʼi te ʼu meʼa ʼae ʼe leleiʼia e ia ʼae ʼe ako. ʼE lagi lelei ke ke mulimuli ki te ʼaho mo te hola ʼae ʼe ina leleiʼia. ʼE tonu ke ke toe fakasiosio pe ʼe ina leleiʼia ke fai io ia peʼe ʼi tona fale gaue peʼe ʼi he koga meʼa ʼe hahaʼi.
4. Ke fai tuʼumaʼu te ako. Kapau ʼe mole ke lava fai te ako ʼi he ʼaho, fai he tahi age fakatuʼutuʼu ʼi muʼa ʼo tau mole fai te ako. Ohage la:
ʼE feala koa ke fai te ako ʼi he tahi age ʼaho ʼo te vahaʼa?
ʼE feala koa ke ke fai ʼi te telefoni peʼe ʼi te neti?
ʼE feala koa ke ke kole age ki he tahi ke ina fai?
5. Faikole ke ke maʼu he faʼahiga manatu ʼe lelei. Kole kia Sehova ke tokoni atu ke ke haga toʼo fakamalotoloto te ako, logo la ʼe faigataʼa tana fai tuʼumaʼu tana ako peʼe maʼuliʼi te ʼu faʼahi ʼe ina ako. (Flp. 2:13) ʼE mahino ia, ʼe lahi te ʼu kalitate ʼe maʼu e tau ako koia kole kia Sehova ke tokoni atu ke ke tokagaʼi tafito ʼona kalitate.