Koteā Te Faka ʼUhiga ʼo Te ʼu Meʼa Fuli ʼAia?

NEʼE ʼui fēnei e Sesu Kilisito: ʼE fakaʼiloga anai “te fakaʼosi ʼo te tuʼu ʼo te ʼu faʼahiga meʼa ʼaenī” ʼaki te ʼu tau ʼaē ʼe hoko, mo te ʼu hoge, mo te ʼu mahaki pea mo te ʼu mafuike.—Mateo 24:1-8; Luka 21:10, 11.

Talu mai te taʼu 1914, neʼe tuʼutāmakiʼia te maʼuli ʼo te hahaʼi ʼaki te ʼu tau ʼo te ʼu puleʼaga pea mo te ʼu lanu ʼe fetauʼaki, ʼaē ʼe tautau hoko ʼuhi ko te kau ʼa te kau takitaki lotu ki te politike pea mo te ʼu ʼohofi fakamataku ʼaē ʼe fai ʼi te ʼu potu fuli pē.

Logolā te kau lahi ʼaupitō ʼo te poto ʼo te tagata, ʼe kei pakupaku pē te ʼu toko lauʼi teau miliona ʼi te mālamanei, pea mo tupu ai te mamate ʼi te taʼu fuli ʼa te ʼu toko lauʼi miliona hahaʼi.

Ko te ʼu mahaki, peʼe ko te ʼu taʼi mahaki ʼaē ʼe liliu ʼo kovi, ʼe toe kau ki te fakaʼiloga ʼaē neʼe tuku mai e Sesu. ʼI te ʼosi ʼo te ʼUluaki Tau Faka Mālamanei, neʼe ʼi ai te taʼi mahaki neʼe mamate ai ia te toko 21 miliona tupu hahaʼi. ʼO mole tatau ia mo te ʼu taʼi mahaki ʼaē neʼe tautau hoko ki muʼa atu, ʼaē neʼe gata pē ʼi te koga meʼa ʼaē neʼe kamata ai, heʼe ʼi te temi nei kua aʼu te ʼu taʼi mahaki ki te ʼu potu fuli ʼo te kele, māʼiapē lā mo te ʼu motu mamaʼo. Iā ʼaho nei, kua mafola ia te SITA ʼi te kele kātoa, pea mo ʼihi mahaki ohagē ko te mahaki fatafata (tuberculose), mo te mahaki ʼaē ʼe maʼu mai te namu (paludisme), mo te mata kivi ʼuhi ko te ʼuli ʼo te ʼu liuʼa peʼe ko te mahaki ʼaē ʼe higoa ko te Chagas, ʼe kei maʼu pē ʼi te ʼu fenua ʼaē ʼe kei laga.

ʼI te taʼu fuli, ʼe lauʼi hogofulu afe te ʼu mafuike ʼe hoko, ʼe tahi ʼalu pē ʼi tona mālohi. Logolā te ʼu masini foʼou ʼaē kua tou maʼu ʼi te temi nei, pea mo te kua lelei ʼo te ʼu masini moʼo ʼiloʼi ia te mālohi ʼo he mafuike, kae kua ʼāsili age ia te ʼu maumau tupu mai te ʼu mafuike ʼaē neʼe hoko ʼi te ʼu koga meʼa ʼaē ʼe kaugamālie ai te hahaʼi ʼaē ʼe nonofo ai.

Neʼe toe fakakikite ʼi te Tohi-Tapu: “Ke ke ʼiloʼi te meʼa ʼaenī: ʼi te ʼu ʼaho fakamuli ʼe ʼi ai anai te ʼu temi maʼuhiga ʼaupitō mo faigataʼa. Heʼe ko te hahaʼi ʼe kaumeʼa pē anai mo nātou totonu, kaumeʼa mo te paʼaga, fiatuʼu, fialahi, lea pātapāta ki te ʼAtua, talagataʼa ki te ʼu mātuʼa, maʼuli galo, heʼe agatonu, heʼeʼofa, logogataʼa, fasituʼu, heʼe fakatātāʼofi, fekai, mole manako ki te meʼa ʼaē ʼe lelei, kākā, fiatuʼu, fonu ʼi te fialahi, kaumeʼa mo te ʼu fakafiafia kae mole kaumeʼa mo te ʼAtua, ʼe hagē ʼe natou pipiki ki te ʼAtua, kae ʼe natou lītuʼa ki tona mālohi; pea mai iā nātou ʼaia ke ke maliu kehe mai ai.”—2 Timoteo 3:1-5.

ʼE kotou fakamoʼoni koa, ʼe tou māʼuʼuli nei ʼi “te ʼu temi maʼuhiga ʼaupitō mo faigataʼa”?

ʼE kotou fakatokagaʼi koa ko te hahaʼi kua fakavalevale tanatou kaumeʼa pē mo nātou totonu, kaumeʼa mo te paʼaga pea mo fiatuʼu?

Ko ai anai kā mole fakamoʼoni kua fonu ʼi te kele ia te hahaʼi ʼe natou loto pē ke fakahoko te meʼa ʼaē ʼe natou loto kiai kae natou maʼuli galo, mo logogataʼa, pea mo heʼe agatonu?

ʼE kotou fakatokagaʼi koa ki te kua tuputupu ʼo te talagataʼa ʼa te fānau ki tanatou ʼu mātuʼa pea mo te kua puli ʼo te ʼofa mamahi ʼi te ʼu potu fuli pē ʼo te kele?

ʼE mahino ia ʼe kotou fakatokagaʼi kua tou māʼuʼuli nei ʼi he mālama kua manako pē ki te ʼu fakafiafia, kae mole kei manako ia ki te ʼu meʼa ʼaē ʼe lelei. Neʼe fakahā ʼi te Tohi-Tapu, ʼi “te ʼu ʼaho fakamuli” ʼe maʼu ai anai ia te ʼu taʼi aga ʼaia.

ʼE kei ʼaoga koa kiā tātou ia he tahi age ʼu fakamoʼoni ke tou mahino ai ki te temi ʼaenī ʼe tou māʼuʼuli ai? Neʼe toe fakakikite e Sesu ʼi te lolotoga pē ʼo te temi ʼaia, ʼe faka mafola ai anai ʼi te kele kātoa ia te logo lelei ʼo te Puleʼaga ʼo te ʼAtua. (Mateo 24:14) ʼE hoko koa ia te faʼahi ʼaia?

Ko Te Tule Leʼo, ʼaē ko he nusipepa neʼe fakatuʼutuʼu moʼo tala ia te logo lelei ʼo te Puleʼaga ʼo Sehova, ʼe lahi age tona tā kiā lea kehekehe ʼi he tahi age nusipepa.

ʼI te taʼu fuli, ko te kau Fakamoʼoni ʼa Sehova ʼe natou faka mafola ia te Puleʼaga ʼo te ʼAtua iā hola e tahi miliale tupu.

ʼE natou tā iā ʼaho nei te ʼu tohi faka Tohi-Tapu iā lea e 400, pea ko ʼihi lea ʼe palalauʼi e te tokosiʼi ʼe nonofo ʼi te ʼu potu mamaʼo. Kua aʼu ia te kau Fakamoʼoni ʼa Sehova ki te ʼu puleʼaga fuli ʼo faka mafola ia te logo lelei; neʼe natou toe faka mafola ʼi te ʼu motu pea mo te ʼu telituale ʼe mole faʼa maʼuhiga ki te kau tagata fai politike. ʼE lahi te ʼu fenua, neʼe natou fakatuʼu ai te polokalama ako faka Tohi-Tapu.

ʼE faka mafola te logo lelei ʼo te Puleʼaga ʼo te ʼAtua ʼi te kele kātoa moʼo fakahā ia he fakamoʼoni kae mole ko he faka mafola moʼo fakatafoki ʼo te hahaʼi fuli ki he lotu. ʼI he potu pē ʼo te kele ʼe nonofo ai te hahaʼi, ʼe feala hanatou fakahā peʼe natou fia tokagaʼi pe ko ai ʼaē neʼe ina fakatupu ia te lagi mo te kele, peʼe natou fia fakaʼapaʼapa ki te ʼu lao ʼa te Tupuʼaga ʼaia pea mo ʼoʼofa ki tonatou tatau.—Luka 10:25-27; Fakahā 4:11.

Kua vave pē anai te pulihi e te Puleʼaga ʼo te ʼAtua ia te kau agakovi fuli ʼi te kele pea mo fakaliliu ko he palatiso.—Luka 23:43.

[Talanoa ʼo te pasina 6]

Ko Te ʼu ʼAho Fakamuli ʼo ʼUhiga Mo Teā?

ʼE mole ko te ʼu ʼaho fakamuli ʼo ʼuhiga mo te hahaʼi. ʼE fakapapauʼi mai ʼi te Tohi-Tapu ia te maʼuli heʼegata maʼa nātou ʼaē ʼe natou fai ia te finegalo ʼo te ʼAtua.—Soane 3:16, 36; 1 Soane 2:17.

ʼE mole ko te ʼu ʼaho fakamuli ʼo ʼuhiga mo te kele. ʼE fakapapauʼi mai ʼi te Folafola ʼa te ʼAtua ʼe tuʼu anai ʼo talu ai ia te kele ʼaē ʼe nofoʼi anai e te hahaʼi.—Pesalemo 37:29; 104:5; Isaia 45:18.

ʼE ko te ʼu ʼaho fakamuli ia ʼaia ʼo ʼuhiga mo te ʼu faʼahiga meʼa ʼo te tuʼu agamālohi ʼaenī, ʼaē ʼe heʼe ʼofa, pea mo te hahaʼi ʼaē ʼe natou maʼu tona ʼu agaaga.—Tāʼaga Lea 2:21, 22.

[Talanoa/Paki ʼo te pasina 7]

Ko Te Tohi-Tapu ʼe Ko Te Folafola Moʼoni Koa ʼa Te ʼAtua?

Neʼe tuʼa lahi te tohi fēnei ʼi te Tohi-Tapu e te kau polofetā: “Koʼenī te meʼa ʼaē neʼe ʼui e Sehova.” (Isaia 43:14; Selemia 2:2) Māʼia pē lā mo Sesu Kilisito, ia te ʼAlo ʼo te ʼAtua, neʼe ina fakahā fakalelei ‘ ʼe mole ʼi ai he meʼa ʼe ina tala ʼe haʼu mai iā te ia totonu pē.’ (Soane 14:10) ʼE ʼui tonu ʼi te Tohi-Tapu: “Ko te Tohi-Tapu kātoa ʼe haʼu mai te ʼAtua.”—2 Timoteo 3:16.

ʼE mole ʼi ai he tahi age tohi neʼe lahi fēia tona tā ʼi he ʼu lea kehekehe—ko lea e 2 200 tupu, ko te fakafuafua ʼaia ʼa te Alliance biblique universelle. ʼE mole ʼi ai he tahi age tohi neʼe lahi fēia tona tufa—iā ʼaho nei ko Tohi-Tapu e fā miliale tupu neʼe tufa. ʼE tonu ke fēia mo kapau ʼe ko he logo ʼa te ʼAtua ki te hahaʼi fuli.

Ke kotou maʼu kātoa he ʼu fakamoʼoni ko te Tohi-Tapu ʼe haʼu mai te ʼAtua, kotou vakaʼi ia te tohi La Bible : Parole de Dieu ou des hommes ?, neʼe tā e te kau Fakamoʼoni ʼa Sehova.

Kapau ʼe kotou lau ia te Tohi-Tapu kae kotou tui ʼe ko te Folafola moʼoni ʼa te ʼAtua, ʼe kotou maʼu lahi anai te ʼu lelei.

[Talanoa/Paki ʼo te pasina 8]

Koteā Koa Te Puleʼaga ʼo Te ʼAtua?

ʼE ko te puleʼaga ʼi selō ʼaē ʼe fakaʼaogaʼi e te ʼAtua moʼoni ko Sehova ia te Tupuʼaga ʼo te lagi pea mo te kele, moʼo takitaki ia te mālamanei.—Selemia 10:10, 12.

ʼE fakahā mai ʼi te Tohi-Tapu ʼe ko Sesu Kilisito ʼaē ʼe foaki ki ai e Sehova ia te takitaki. (Fakahā 11:15) ʼI tana ʼi te kele, neʼe fakamoʼoni e Sesu ia te kua foaki age e te ʼAtua ia te pule makehe, ke ina puleʼi te ʼu mālohi ʼo te nātulā, ke ina fakamālōlō te ʼu mahaki kehekehe pea ke ina fakatuʼuake mo te kau mate. (Mateo 9:2-8; Maleko 4:37-41; Soane 11:11-44) ʼI te lea faka polofetā, neʼe fakahā e te ʼAtua ʼe ina toe foaki mo “te pule, pea mo te fakaʼaliʼaliki, pea mo te puleʼaga, koteʼuhi ke tauhi kiā te ia te hahaʼi, pea mo te ʼu fenua, pea mo te ʼu faʼahiga lea kehekehe.” (Taniela 7:13, 14) ʼE fakahigoaʼi te puleʼaga ʼaia ko te Puleʼaga ʼi selō; heʼe pule mai ai ia Sesu Kilisito iā ʼaho nei.

[Paki ʼo te pasina 7]

Ko te logo lelei ʼe faka mafola ʼi te kele kātoa