He Koʼē ʼe Mole Feala Ke Tāʼofi Te Aga Faka Kakā?
“E pule ai te tagata ki te tagata ke fakamamahii ia ia.”—EKELESIASI 8:9.
ʼE HĀ lelei mai ʼi te ʼu palalau ʼaenī ia te ʼuhiga ʼo te faʼahiga takitaki ʼa te tagata. Neʼe tupu mai ai te ʼu toe mamahi fakamataku. Talu mai fualoa, neʼe faigaʼi e te hahaʼi fakamalotoloto ke natou fakatuʼu he mālama faitotonu kae neʼe mole feala ke hoko ʼuhi ko te mānumānu pea mo te aga faka kakā. Koteā tona tupuʼaga? He koʼē ʼe mole feala ke tāʼofi te aga faka kakā? ʼE hoko ia te faʼahi ʼaia ʼuhi ko te ʼu fakaneke kovi ʼaenī e tolu.
1. Te fakaneke ʼo te agahala.
ʼE tala fakahagatonu ʼi te Tohi-Tapu ʼe puleʼi tātou e te agahala. (Loma 3:9) Ohagē pē ko he mahaki tausino ʼe tuku holo, ʼe “nofo” te agahala iā tātou. Kua hili kiai te ʼu taʼu e lauʼi afe, neʼe “pule” te agahala ki te tagata ohagē ko he hau. ʼE pule tuʼumaʼu pē te “lao” ʼo te agahala kiā tātou. ʼE uga ia te tokolahi e tonatou ʼuhiga agahala ke natou fakamuʼamuʼa ia te ʼu meʼa ʼe natou loto kiai peʼe ko te fia maʼu koloa pea mo te fia maʼu tuʼulaga, tatau aipē peʼe natou fakamamahiʼi niʼihi.—Loma 5:21; 7:17, 20, 23, 25.
2. Te fakaneke ʼo te mālama agakovi ʼaenī.
ʼE hā lelei ʼi te mālama ʼaenī ʼe tou māʼuʼuli ai ia te mānumānu pea mo te tahi manatu pē ʼaē kiā kita. ʼI te taʼi mālama ʼaenī, ʼe faigataʼa takita hao mai te taʼi ʼu aga ʼaia. ʼI tanatou manatu pē ʼaē kiā nātou totonu, ʼe natou faigaʼi ke natou maʼu tuʼulaga. Pea ʼe natou toe mānumānu koloa, kae ʼe mole ʼaoga moʼoni kiā nātou. Kae ʼi meʼa fakaʼofaʼofa, heʼe natou taliʼia ke natou aga faka kakā ke iku lelei ʼanatou fakatuʼutuʼu. Mole ʼui ke natou tauʼi te ʼu fakaneke kovi ʼaia, ʼe natou “muli anai i he kaugamalie, o fai he mea ae e kovi.”—Ekesote 23:2.
3. Te fakaneke ʼa Satana, te Tēvolo.
ʼE “kakaai te kele katoa” e Satana, te ʼāselo talagataʼa. (Apokalipisi 12:9) ʼE fiafia ʼi te fakaneke ʼo te hahaʼi. Pea ʼe ina fakaneke nātou ke natou aga faka kakā ke feala hanatou maʼuli fīmālie pea ke lahi mo ʼonatou koloa.
ʼE fakaʼuhiga koa ʼe mole feala ke tou hao mai te ʼu fakaneke ʼa Satana? ʼE tou vakaʼi anai tona tali ʼi te ʼalatike ʼaē kā hoa mai.