Te ʼu Fehuʼi ʼa Te Kau Lautohi

Neʼe ko ai koa “te u foha o te Atua” ʼae ʼe talanoa ki ai ia Senesi 6:2, 4 neʼe maʼuʼuli ʼi muʼa ʼo te Tulivio?

Kotea te ʼu tupuʼaga ʼaia?

ʼE tou lau fenei ia Senesi 6:2: “Nee sisio leva te u foha o te Atua nee matalelei osi te u ofafine o te u tagata, pea nee natou filifili leva ni ihi o natou ko onatou ohoana.”

ʼI te Koga Tohi-Tapu Fakahepeleo, ko te kupusiga palalau ʼae “te u foha o te Atua,” ʼe maʼu ia Senesi 6:2, 4 mo Sopo 1:6; 2:1; 38:7 pea mo Pesalemo 89:7. Kotea ʼae ʼe ha mai ʼi te ʼu vaega ʼaia ʼo ʼuhiga mo “te u foha o te Atua”?

ʼE ha lelei mai ia Sopo 1:6, ko “te u foha o te Atua” ʼe ko te ʼu ʼaselo ʼae neʼe fakatahitahi ia muʼa ʼo te ʼAtua. Neʼe kau ai ia Satana, ʼae neʼe ina “folii te kele.” (Sopo 1:7; 2:1, 2) ʼO toe feia, ʼe tou lau ia Sopo 38:4-7, ko “te u foha . . . o te Atua” neʼe natou kalaga fakafiafia ʼi te temi ʼae neʼe hili ai e te ʼAtua te maka agele ʼo te kele. ʼO mahino mai ai, ko te ʼu foha ʼaia ʼo te ʼAtua neʼe ko te kau ʼaselo, koteʼuhi neʼe heʼeki fakatupu ʼi te temi ʼaia te tagata. Ko “te u foha o te Atua” ʼae ʼe talanoa ki ai ia Pesalemo 89:7 ʼe ko te ʼu ʼaselo ʼae ʼe nofo mo te ʼAtua ʼi te lagi, kaʼe ʼe mole ko te tagata.

Pea ko ai koa “te u foha o te Atua” ʼae ʼe talanoa ki ai ia Senesi 6:2, 4? ʼO mulimuli ki te ʼu vaega neʼe hoki tou vakaʼi age, ʼe feala ke tou ui ʼe fakaʼuhiga ki te ʼu foha fakalaumalie ʼo te ʼAtua ʼae neʼe hifo mai ki te kele.

ʼE faigataʼa ki niʼihi hanatou tali te manatu ʼae ko te ʼu ʼaselo neʼe natou fia fai ni felaveʼi fakasino. ʼE ha mai ʼi te ʼu palalau ʼa Sesu ia Mateo 22:30, ʼe mole maʼu ʼi te lagi te fai ʼohoana mo te ʼu felaveʼi fakasino. Kaʼe ʼi te tahi ʼu lakaga, neʼe kofuʼi e te ʼu ʼaselo te ʼu sino ʼi tagata, ʼo natou kakai mo iinu ai mo te tagata. (Sen. 18:1-8; 19:1-3) Koia, ʼe feala ai ke tou ui kapau neʼe natou kofuʼi ni sino ʼi tagata, pea neʼe feala pe hanatou fai ni felaveʼi fakasino mo ni fafine.

ʼE ʼi ai te ʼu tupuʼaga Fakatohi-tapu ke tou tui ai neʼe fai e ʼihi ʼaselo te aga ʼaia. Ia Suta 6, 7 ʼe fakatatau te agahala ʼo te hahaʼi tagata ʼo Sotoma, ʼae neʼe natou holi ki te kakano ʼo fakafeagai ki te natula, mo ʼae ʼa “te kau aselo ae nee mole natou taupau onatou tuulaga, kae nee natou siaki tonatou nofoaga totonu.” Ko te faʼahi ʼae neʼe tatau ai te kau ʼaselo ʼaia mo te kau Sotoma, neʼe ko tanatou “faifeauaki mo fai ni mea ae e fakafehagai ki te natula.” Ia 1 Petelo 3:19, 20, ʼae ʼe talanoa ki te faʼahi ʼaia, ʼe fakaha ai ko te talagataʼa ʼaia ʼa te kau ʼaselo neʼe hoko ʼi “te u aho o Noe.” (2 Pet. 2:4, 5) Koia, ʼe feala ke fakatatau te talagataʼa ʼa te kau ʼaselo ʼi te temi ʼo Noe mo te agahala ʼo Sotoma mo Komola.

ʼE fakapotopoto te ʼu manatu ʼaia moka tou fakamoʼoni ko “te u foha o te Atua” ʼae ʼe talanoa ki ai ia Senesi 6:2, 4 neʼe ko te ʼu ʼaselo ʼae neʼe natou kofuʼi ni sino ʼi tagata pea mo fai ni felaveʼi fakasino heʼe ʼaoga mo ni fafine.

ʼE ui ʼi te Tohi-Tapu neʼe alu ia Sesu “o akonaki ki te u laumalie i te fale pilisoni.” (1 Pet. 3:19) Kotea tona fakaʼuhiga?

ʼO ha lelei mai ai neʼe talanoa Petelo ki te ʼu ʼaselo ʼae neʼe natou filifili ke natou kau ki te agatuʼu ʼa Satana. ʼE palalau ia Suta ʼo ʼuhiga mo te ʼu ʼaselo ʼae “nee mole natou taupau onatou tuulaga, kae nee natou siaki tonatou nofoaga totonu,” ʼo ina ui ko te ʼAtua “nee ina taupau [ia natou] ki te aho lahi o te fakamaau, o hai o heegata e te u fakapouli.”—Suta 6.

Neʼe feafeaʼi te talagataʼa ʼa te ʼu ʼaselo ʼi te temi ʼo Noe? ʼI muʼa ʼo te Tulivio, neʼe kofuʼi e te ʼu ʼaselo agakovi ʼaia ni sino ʼi tagata, kaʼe neʼe mole ko he faʼahi ia neʼe fakatotonu e te ʼAtua ke natou fai. (Sen. 6:2, 4) Tahi ʼae, ko te ʼu ʼaselo ʼaia neʼe natou fai ni felaveʼi fakasino mo ni fafine, neʼe ko he aga ia ʼe fakafeagai ki te natula. Koteʼuhi neʼe mole fakatupu e te ʼAtua te ʼu ʼaselo ke natou fai ni felaveʼi fakasino mo ni fafine. (Sen. 5:2) Ko te ʼu ʼaselo agakovi mo talagataʼa ʼaia, ʼe fakaʼauha anai natou e te ʼAtua ʼi tona temi totonu. Kaʼe ʼi te temi nei, ohage ko tona ui e Suta, ʼe natou nonofo ʼi “te u fakapouli,” ʼae ʼe feala ke fakata ki he fale pilisoni fakalaumalie.

Neʼe ko ʼanafea pea neʼe feafeaʼi te akonaki ʼa Sesu ki “te u laumalie [ʼaia] i te fale pilisoni”? ʼE tohi e Petelo neʼe hoko te faʼahi ʼaia hili te fakatuʼuake ʼo Sesu. (1 Pet. 3:18, 19) Kotou toe tokagaʼi ʼe ui e Petelo “nee alu ai ia [Sesu] o akonaki,” ʼo ha ai neʼe hoko ʼi muʼa ʼo te tohi e Petelo tana ʼuluaki tohi. Koia hili he ʼu kiʼi temi ki tona fakatuʼuake, neʼe tala e Sesu ki te kau ʼaselo agakovi te fakatuʼā ʼae ʼe tonu ke fai kia natou. Neʼe mole foaki e Sesu kia natou ia he ʼamanaki kaʼe neʼe ko he akonaki faifakamau ia. (Son. 1:1, 2) Neʼe feala kia Sesu ke ina fai te fakamau ʼaia, he neʼe kua ina fakaha tana tui mo tana nofo agatonu ʼo kaku ki te mate pea mo kua ʼosi fakatuʼuake, ʼo fakamoʼoni ai neʼe mole malo te Tevolo ia ia.—Soa. 14:30; 16:8-11.

ʼI te ka haʼu, ʼe haʼi anai e Sesu mo ina li anai ia Satana pea mo te ʼu ʼaselo ʼaia ki te vanu. (Luka 8:30, 31; Apk. 20:1-3) Kaʼe ʼo fakatalitali ki te temi ʼaia, ko te ʼu ʼaselo talagataʼa ʼaia, ʼe nonofo ʼi te fakapoʼuli gaogao ʼi te faʼahi fakalaumalie pea ko tonatou fakaʼauha fakaʼosi ʼe hoko moʼoni anai.—Apk. 20:7-10.