Te Aluʼaga Fakatupu Lotomamahi ʼAe Ko Te Mate

Tokolahi ʼe mole natou fia palalau ʼo ʼuhiga mo te mate. Kaʼe ʼe hoko te faʼahi ʼaia kia tatou fuli. Pea ʼe ko he aluʼaga fakatupu lotomamahi ʼaupito.

Ko te mate ʼo he tamai, peʼe ko he faʼe, peʼe ko hotatou ʼohoana peʼe ko he fanau, ʼe ko he aluʼaga faigataʼa ʼaupito ʼe mole faigafua tona tali. ʼI ʼihi temi ʼe hoko fakapunamaʼuli pea ʼi ʼihi temi ʼe hoko hili he temi loaloaga ʼuhi ko te mahaki peʼe ko te vaivai matuʼa. Tatau aipe pe kotea tona faʼahiga hoko, ʼe tou lotomamahi ai koteʼuhi ʼe hage ʼe mole kei ʼi ai he ʼamanaki.

ʼE fakamahino fenei e Antonio ʼae neʼe mate tana tamai ʼi te fakaʼi: “ ʼE hage pe neʼe lokaʼi tokita ʼapi e he tahi pea ina toʼo te ʼu kalavi. ʼE mole kei feala hakita toe liliu ki ai. ʼE kita nofo pe ʼo manatuʼi ia ia ʼae kua mate. Kua fetogi katoa tokita maʼuli. ʼE faigataʼa ʼosi hakita tali te aluʼaga ʼaia he neʼe mole tonu ia ke hoko. Kaʼe ʼe mole feala hakita fetogi te faʼahi ʼaia.”

Neʼe taʼu 47 ia Dorothy ʼi te temi ʼae neʼe mate ai tona ʼohoana pea neʼe faiga ke ina maʼu he ʼu tali ʼo ʼuhiga mo te mate. Neʼe faikapite, koia ʼi tana manatu ko te mate ʼe mole ko te fakaʼosiʼaga ʼaia ʼo meʼa fuli. Kaʼe neʼe mole ina faʼa leleiʼia te ʼu tali ʼae neʼe foaki age. Neʼe ina fai te fehuʼi ʼaeni ki te patele Anglican: “Kotea ʼae ka hoko anai kia tatou moka tou mamate?” Neʼe tali fenei age e te patele: “ ʼE mole he tahi ʼe ina iloʼi te tali ki te fehuʼi ʼaia. ʼE hoki tou mahino pe anai ki ai ki muli age.”

ʼE moʼoni koa ʼe mole feala hatatou maʼu te tali ki te fehuʼi ʼaia? ʼE tou lava iloʼi feafeaʼi pe ʼe fakaʼosi ia meʼa fuli ʼi te mate?