Ukuyikhangela Ngoxabiso “Indlu KaThixo”
“NDICELE nto-nye kuYehova, ndifuna yona: Ukuba ndihlale endlwini kaYehova yonke imihla yobomi bam, ndibone ubuhle bukaYehova, ndiphicothe [ndikhangele ngoxabiso, NW] etempileni yakhe.”—INdumiso 27:4.
UKumkani uDavide owayenoxabiso wayikhangela ngovuyo, okanye wayoliswa, yitempile kaYehova. Ngaba uvakalelwa ngendlela efanayo ngesazulu sonqulo lokwenyaniso namhlanje? Amakhaya aseBheteli angaphezu kwama-95 akumasebe eWatch Tower Society ayinxalenye yezakhiwo ezinxulumene nokunqulwa kukaYehova kwixesha lethu.
UHelga owaqalisa ukusebenza kwikhaya eliseJamani ngowe-1948, uyacacisa: “Xa ndikhangela emva kwiminyaka yam emininzi yenkonzo yaseBheteli ndizaliswa ngumbulelo onzulu noxabiso olukhulu, oluye lwakhula minyaka le.” UHelga ngomnye wabasebenzi abanovuyo baseBheteli abali-13 828 abasehlabathini lonke abaye ‘babona ubuhle bukaYehova’ ngonyaka wenkonzo we-1993. Ngaba lithetha ntoni kanye kanye igama elithi Bheteli? Ngamnye oliNgqina likaYehova, angenza njani ukuze alikhangele ngoxabiso eli lungiselelo, enoba umkhonza uThixo ephakathi eBheteli okanye engaphandle?
Igama Elifuna Uzinikelo
Igama elithi “Bheteli” lelona lifanelekileyo, njengoko igama lesiHebhere elithi Behth-ʼElʹ lithetha “Indlu kaThixo.” (Genesis 28:19, umbhalo osemazantsi kwiNW) Ewe, iBheteli ifanekisela indlu elungelelaniswe kakuhle, okanye ‘indlu eyakhiwe ngobulumko,’ apho uThixo nokwenziwa kokuthanda kwakhe kukwindawo yokuqala. (IMizekeliso 24:3) Enoxabiso uHerta uthi: “Kufana nokuphila njengentsapho. Sinomsebenzi wemihla ngemihla olungelelaniswe kakuhle.” Ebekhonza ngaphezu kweminyaka engama-45 kwiBheteli enye noHelga. Lungu ngalinye lale ntsapho inkulu linomsebenzi nendawo yalo, elivumela ukuba lizive lonwabile yaye linqabisekile. Ngokuvisisana negama elithi Bheteli, sebe ngalinye licwangciswe laza lalungelelaniswa kakuhle. Oku kukhuthaza uxolo, kwenza ukuba zishunyayelwe ngokunempumelelo iindaba ezilungileyo, yaye kunika amabandla isizathu esivakalayo sokuyigcina ikwelona nqanaba liphakamileyo “Indlu kaThixo.”—1 Korinte 14:33, 40.
Kutheni izakhiwo ezinjalo ziyimfuneko nje? Ngokomzekelo, eli phephancwadi, lenziwa kumzi-mveliso wokushicilela waseBheteli. Ukushunyayelwa kwesigidimi soBukumkani nokwabiwa kokudla kokomoya, yomibini le misebenzi yonganyelwe nguYesu Kristu, yenza ukuba ukulungelelaniswa kwamalungiselelo afana neBheteli abe yimfuneko—ixhaswa ngabasebenzi bokuzithandela yaye igcinwa kumgangatho ophezulu ngabo bonke abakhonzi bakaYehova.—Mateyu 24:14, 45.
Ngaba ubungathanda ukuva okungakumbi ngomsebenzi wemihla ngemihla walapha? Apho uHelga noHerta bahlala khona, kusasa nge-6:30 kukhala intsimbi etsho ngoncuthu lwengoma kuzo zonke izakhiwo zokuhlala, nangona abaninzi kwaba basebenzi bexesha elizeleyo abangaphezu kwama-800 bevuka kwangaphambili ukuze balungiselele imini. Ukususela ngoMvulo ukuya ngoMgqibelo, kusasa ngeye-7:00, intsapho ihlanganisana kwiiholo zokutyela ukuze ifumane ingxubusho yetekisi yosuku, okanye unqulo lwakusasa. Emva koko kulandela isidlo sakusasa esinesondlo. Suku ngalunye lokusebenza luqalisa ngeye-8:00 kusasa luze luthabathe iiyure ezisibhozo, lunqunyanyiswa sisidlo sasemini kuphela. (Ngokuqhelekileyo intsapho isebenza isiqingatha semini ngoMgqibelo.) Enoba kukwigumbi lokuphekela, kumzi-mveliso wokushicilela, kwindawo yokuhlamba iimpahla, kwiiofisi, kwizindlu zokusebenzela, kwindawo yokudibanisa iincwadi, okanye nakweliphi na isebe, kukho okuninzi ekufanele kwenziwe.
Ebudeni beengokuhlwa nangeempela-veki, amalungu entsapho anxulumana namabandla asekuhlaleni kwiintlanganiso nasekushumayeleni kwasesidlangalaleni. Abazalwana abaninzi baseBheteli bangabadala okanye izicaka zolungiselelo kula mabandla. AmaNgqina asekuhlaleni ayixabisa ngokwenene le ntsebenziswano, la maqela omabini esebenza kunye ngemvisiswano njengequmrhu elinye, ehlonelana yaye eqondana. (Kolose 2:19) Ngamnye kubasebenzi baseBheteli uyazi ukuba isabelo sakhe ‘kwiNdlu kaThixo’ sikwindawo yokuqala kweminye imisebenzi. Noko ke, inzondelelo yokushumayela nokukhuthala ebandleni, ndawonye nokuba nesimo sengqondo esilungeleleneyo, kuyabomeleza ubumoya balowo usebenza eBheteli, kwandisa uvuyo lwakhe, kuze kumenze ilungu lentsapho elinemveliso ngakumbi. Hayi indlela ezibaluleke ngayo ezi mpawu xa usebenza ‘kwindlu’ enegama elinxibelelene nokuzinikela ngomphefumlo uphela!
Ukuphumelela Kwinkonzo YaseBheteli
Yintoni eye yanceda amaNgqina kaYehova amaninzi ukuze aphumelele kwinkonzo yaseBheteli? Amalungu entsapho yaseBheteli eFransi aneminyaka emininzi yamava athi: “Ukuthanda uYehova. Ukuzimisela ukunyamezela naphi na apho asibeka khona; ukuthobeka, ukululama kunye nokuthobela ulwalathiso esilunikwa nguMbutho.” (Denise) “Ndiye ndaphawula indlela okubaluleke ngayo ukuhlonela umgaqo okhankanywe nguPawulos kwabaseRoma 12:10: ‘Mayela nembeko leyo, phangelanani.’ Esi sibhalo sisibonisa imbaluleka yokungagxininisi ekwamkelweni kweengcamango zethu, kodwa kunoko, sinikel’ ingqalelo nakwiingcamango zabanye. Ngamanye amazwi, singafuni ukubalasela.” (Jean-Jacques) UBarbara uthi: “Intlonelo yethu ngenkonzo yaseBheteli inokonakala ukuba izinto sizijonga ngeliso lokwenyama elingafezekanga, kuba oku kunokusenza siyilibale inyaniso yokuba nguYehova onikela ulwalathiso kwintlangano yakhe. Sinokuphulukana nentlonelo enjalo ukuba siyakhutyekiswa kukungafezeki kwabanye.”
Bonke abantu abaseBheteli abafezekanga, ngoko kufanele kucingwe nzulu ngonxulumano. Abaselula okanye abasandula ukufika benza kakuhle xa izinxulumani zabo bengazipheleliseli koontanga babo kuphela. Abo basenokubonakalisa utyekelo lokukhalaza okanye lokucinga ngokulandulayo abasayi kuba ngamaqabane alukhuthazo eBheteli okanye ebandleni. Kwelinye icala ukuxelisa “ubulumko baphezulu,” obuchazwe kuYakobi 3:17, (TE) kuzisa iintsikelelo. Obu “bumsulwa; bunolungelelwano, nobubele, buyazelelela. Bona bunovelwano, yaye buvelisa imisebenzi emihle; abunamkhethe naluhanahaniso.” Iimpawu ezinjalo, kuquka ukuzeka kade umsindo nobubele, ziyaphawuleka ‘kwiNdlu kaThixo,’ zikwenza ukuhlala apho kube luyolo nokhuthazo. Kwaneendwendwe ezingengawo amaNgqina ngokufuthi ziye zincome isimilo esihle, ubuhlobo, kunye nomoya wovuyo okubasebenzi.
UAnny, oneminyaka engaphezu kwama-70 ubudala nobelilungu lentsapho yaseBheteli eJamani ukususela ngowe-1956, ucacisa ngoko kumenza ahlale ekulungele ukusebenza: “Ngenxa yempilo-ntle yam yokomoya, ndenza umgudu omkhulu wokuzifunda kangangoko iimpapasho zoMbutho, wokubakho rhoqo kwiintlanganiso, nokuba nesabelo ngokuthe rhoqo ekushumayeleni. Kwakhona ndizama ukuhlala ndisempilweni ngokwenza umthambo ntsasa nganye, ngokungasebenzisi izinyusi ngalo lonke ixesha, nangokuhamba ngokufuthi kangangoko ndinako, ngokukodwa kwinkonzo yasentsimini.”
Abaninzi abanamava ngobomi baseBheteli banokuvumelana noAnny. Abaze bayeke ukufunda, nokusebenza. Ukuze baphile ngokwasemzimbeni kufuneka balale ngokwaneleyo yaye benze umthambo othile baze babonakalise ubungcathu xa besitya naxa besela. Okona kubaluleke ngaphezu kwako konke, abawutyesheli umthandazo wobuqu kunye nofundisiso lweBhayibhile.
Ukuyihlonela Ngokunzulu Inkonzo Engcwele YaseBheteli
Ngokuqhelekileyo amalungu aseBheteli abuzwa umbuzo othi: “Ngaba usebenza phi?” Izabelo zomsebenzi azifani, kodwa ngasinye sifanele sixatyiswe ngabantu bonke. Kutheni kunjalo? Kungenxa yokuba sabelo ngasinye—enoba kukusebenza ngomatshini oshicilela ukudla kokomoya, ukuhlamba iimpahla, ukupheka nokucoca izinto zentsapho, okanye ukwenza umsebenzi weofisi—kukunikela inkonzo engcwele. Njengoko kukhankanyiwe ngasentla, amaKristu akacalucaluli. Khumbula ukuba yonke imisebenzi eyimfuneko eyayisenziwa ngababingeleli kunye nabaLevi etempileni, kwiintendelezo nakwiindawo zabo zokutyela, yayithatyathwa njengenkonzo engcwele kuYehova. Oko kwakuquka ukuxhela izilwanyana nokuzilungiselela amadini, ukuzalisa izibane zeoli, kwanokucoca kuquka nokwenza umsebenzi wabalindi. Ngokufanayo, sabelo ngasinye saseBheteli singumsebenzi owanelisayo nofanelekileyo ‘emsebenzini weNkosi,’ kungenxa yoko le nto ulilungelo elikhethekileyo.—1 Korinte 15:58.
Ngokufutshane cinga ngesimo esinokusithintela ekuyikhangeleni ngoxabiso “Indlu kaThixo.” AmaKristu aphakathi eBheteli nangaphandle kufuneka azilumkele nxamnye nomona kunye nekhwele, lona ‘liyimpehla emathanjeni.’ (IMizekeliso 14:30) Akukho bani unesizathu sokuba nomona ngamalungelo enkonzo abasebenzi baseBheteli. Ngaphezu koko, kwintsapho yaseBheteli akukho ndawo yekhwele, oluyeminye yemisebenzi yenyama. Linda ngokuthobekileyo—eso sisiluleko esiphilileyo kubani osengavakalelwa kukuba akasiwa so ngoxa abanye befumana amalungelo angakumbi. Okungakumbi kukuba, abantu abaneemeko ezahluke gqitha ngokwemali bahlala kunye ngokusondeleleneyo eBheteli. Hayi indlela ekutyhafisa ngayo ukuba ubani ujonga iimeko zakhe ‘aze azilinganise nezomnye umntu’! Ukwanela yinto “edliwayo neyambathwayo” kuye kwanceda abaninzi ukuba baqhubeke ngentembeko kangangamashumi eminyaka ‘kwiNdlu kaThixo.’—Galati 5:20, 26; 6:4, TE; 1 Timoti 6:8.
AmaNgqina kaYehova nezigidi zabanye abantu bafumana iingenelo ezininzi kwinkonzo engahlawulelwayo eyenziwa eBheteli—umsebenzi owenziwa ngokuzithandela ngenxa yokuthanda uThixo nommelwane. Amakhaya aseBheteli nemizi-mveliso yokushicilela yeWatch Tower Society, njengamanye amalungiselelo olawulo lobuthixo, axhaswa yiminikelo yokuzithandela ngokwemali. (2 Korinte 9:7) Ngokufanayo noKumkani uDavide neenkosi neentloko zakwaSirayeli, sinokubonakalisa umdla noxabiso lwethu ‘ngeNdlu kaThixo’ ngokunikela inkxaso yokoqobo nengokwemali kuMbutho. (1 Kronike 29:3-7) Ngoku masibone indlela ekunokwenzeka ngayo ukuba ‘sibubone ubuhle bukaYehova’ eBheteli.
Iintsikelelo ‘KwiNdlu KaThixo’
Xa usendibanweni, ngaba uyaluva ulwaneliseko olunzulu njengoko ujikelezwe ngabanquli bakaYehova abonwabileyo? Khawufan’ ucinge, umntu osebenza eBheteli unelungelo lokukhonza uYehova phakathi kweqela labazalwana mihla le! (INdumiso 26:12) Elinjani lona ukuba lihle ithuba lokukhula ngokomoya oku okulivulayo! Omnye umzalwana wathi waye wafunda okungakumbi okwathi kwamnceda ukuba alungelelanise ubuntu bakhe kwisithuba sonyaka omnye eseBheteli kunokuba wayenokwenjenjalo ngeminyaka emithathu ekwenye indawo. Kwakutheni? Kwakungenxa yokuba akazange alifumane naphi na ithuba lokubukela aze axelise ukholo lwamaKristu amaninzi nangabantu abaqolileyo.—IMizekeliso 13:20.
Ngokungathi kunjalo, eBheteli umntu ujikelezwe ngabacebisi abanamava. Ukongezelela, kukho ilungelo lokuphulaphula amagqabaza alungiselelwe kakuhle anikelwa ebudeni bonqulo lwakusasa nakwiSifundo seMboniselo sentsapho yaseBheteli naxa uphulaphule iintetho ezinikelwa ngokuhlwa ngeMivulo. Abasandula ukufika bafumana imfundiso kwiSikolo Sabafikayo saseBheteli baze babelwe ukuba bayifunde yonke iBhayibhile ebudeni beenyanga zabo zokuqala ezili-12.
Iingxelo namava eendwendwe ezisuka kwamanye amazwe zinikela ukhuthazo olungakumbi. Ukongezelela, amalungu eQumrhu Elilawulayo okanye abameli bawo batyelela iiofisi zesebe. UHelga uthi: “Nangona benomsebenzi omninzi, abazalwana basoloko belenza ixesha lencokwana emfutshane okanye loncumo lobuhlobo.” Hayi indlela ekukhuthaza ngayo ukuzibonela ngokobuqu ihambo ehlaziyayo nethozamileyo yamadoda athembeke ngolo hlobo!
Ngokukodwa eBheteli ubani unokuyiqwalasela kakuhle indlela intlangano kaThixo esebenza ngayo kwanendlela umoya wakhe oyingcwele ozishukumisela emsebenzini ngayo iintliziyo nezandla ezivumayo. Umzalwana obesebenza kwiBheteli eseFransi ukususela ngowe-1949, uyacacisa: “EBheteli ubani uziva esondele ngakumbi ‘esazulwini somsebenzi.’” Uhlabela mgama esithi: “Ndingatsho ngokunyaniseka ukuba iBheteli luhlobo lwenkonzo yexesha elizeleyo endivumelayo ukuba ndinikele ngelona xesha namandla amaninzi kwinkonzo kaYehova nokuze ndikhonze abazalwana abaninzi kakhulu.” Yaye ngaba leyo asiyonjongo yethu yokwenene ebomini—ukwenza ukuthanda kukaThixo? EBheteli ubani unokunikela ‘indumiso imihla yonke.’ Enjani yona intsikelelo!—INdumiso 44:8.
Njengoko siye sabona, ubani osebenza kwikhaya laseBheteli unokububona ubuhle bukaYehova yaye afumane intabalala yeentsikelelo. (Hebhere 6:10) Ngaba ukukhonza ‘kwiNdlu kaThixo’ kunokuba yinto efanelekileyo ngawe? Abo baphakathi kwamaNgqina kaYehova bakubudala beminyaka eli-19 ubuncinane, abaphile kakuhle ngokomoya nangokwenyama, kwanabo, ngokufana noTimoti, ‘bangqinelwa kakuhle ngabazalwana’ banokufaka izicelo zokukhonza eBheteli. (IZenzo 16:2) Abaninzi baye bayenza umsebenzi wobomi babo inkonzo yaseBheteli, njengaba bakhankanywe ngasentla. Kubo umnqweno onzulu womdumisi—‘wokuhlala endlwini kaYehova yonke imihla yobomi bakhe’—uye wafezeka.
AmaNgqina kaYehova awuhlonela ngokunzulu umoya wokuzincama oboniswa ngabazalwana noodade babo eBheteli, abaphumeza izabelo zabo ngokuvumayo nangovuyo. Enoba uYehova simkhonza eBheteli okanye kwenye indawo, ngamnye wethu unesizathu esifanelekileyo sokuvakalelwa ngendlela uKumkani uDavide awavakalelwa ngayo—ukuyikhangela ngoxabiso, okanye ukuyoliswa, ‘yiNdlu kaThixo.’
[Umfanekiso okwiphepha 31]
La maKristu aye ayoliswa yinkonzo engcwele eBheteli eJamani kangangamashumi eminyaka