Isizathu Sokuba Singenakuphila Ngaphandle Kwabanye
“Ababini balunge ngakumbi kunomnye . . . Ngokuba xa omnye wabo esiwa, omnye unokuliphakamisa iqabane lakhe.”—UKumkani uSolomon
UKUMKANI USOLOMON wakwaSirayeli wamandulo wathi: “Ababini balunge ngakumbi kunomnye, ngenxa yokuba banomvuzo ngomsebenzi wabo onzima. Ngokuba xa omnye wabo esiwa, omnye unokuliphakamisa iqabane lakhe. Kodwa wothini na oyedwa owayo xa kungekho omnye wokumphakamisa?” (INtshumayeli 4:9, 10) Esi silumko sineliso elibukhali ngobomi sigxininisa imfuneko yokuba kunye nabanye nokungazenzi amakheswa. Noko ke, le yayingeyiyo nje ingcamango yabantu. Oku kwakuthethwa nguSolomon kwakububulumko obuvela kuThixo yaye kuphefumlelwe kwanguye.
Akubobulumko ukuzenza amakheswa. Mntu ngamnye uxhomekeke kwabanye. Sonke sifuna ukomelezwa nokuncedwa ngabanye. Umzekeliso weBhayibhile uthi: “Ozahlulayo uya kufuna ulangazelelo lwakhe lokuzingca; uya kuphambuka kubo bonke ubulumko bobuqili.” (IMizekeliso 18:1) Ngoko ke siyasiqonda isizathu sokuba oonontlalo-ntle bakhuthaze abantu ukuba bazimanyanise neqela elithile baze babe nomdla kwabanye.
Phakathi kwezinye izinto azincomelayo ukuvuselela ubomi bokuphila nabanye abantu, uNjingalwazi uRobert Putnam ukhankanya “ukuqonda indlela unqulo olubaluleke ngayo.” AmaNgqina kaYehova abalasele kule nkalo kuba akhuseleka kumabandla anjengentsapho emhlabeni wonke. Ngokuvisisana namazwi kampostile uPetros, ‘anothando ngomanyano lwabazalwana abamoyikayo uThixo.’ (1 Petros 2:17) Kwakhona amaNgqina ayakuphepha ukuzenza amakheswa neengozi ezibangelwa kuko kuba imisebenzi emininzi eyakhayo enxulumene nonqulo lokwenyaniso iwenza ahlale exakekile enceda abamelwane bawo ukuba bafunde inyaniso ekwiLizwi likaThixo, iBhayibhile.—2 Timoti 2:15.
Uthando Nokuba Nolwalamano Nabanye Kwabuguqula Ubomi Bam
AmaNgqina kaYehova alibutho labantu elimanyeneyo nelinamalungu ancedanayo. Ngokomzekelo, khawucinge ngemeko kaMiguel, uFroylán noAlma Ruth, amalungu amathathu entsapho yaseLatin-America. Bazalwa benengxaki yamathambo eyabenza babafutshane ngendlela engaqhelekanga. Bobathathu bahamba ngesitulo esinamavili sabaguli. Ukunxulumana kwabo namaNgqina kuye kwabanceda njani ebomini?
UMiguel uthi: “Ubomi babunzima ngokwenene, kodwa xa ndaqalisa ukunxulumana nabantu bakaYehova, ubomi bam batshintsha. Ukuzenza ikheswa kuyingozi gqitha. Ukuba kunye namanye amakholwa kwiintlanganiso zamaKristu, ukuba kunye nawo veki nganye, kwandinceda ndafumana ulwaneliseko.”
UAlma Ruth wongezelela esithi: “Ndandikhe ndizive ndidandatheke gqitha; ndilusizi. Kodwa xa ndafunda ngoYehova, ndaqonda ukuba ndinokuba nolwalamano olusenyongweni naye. Oko kwaba yeyona nto ixabisekileyo ebomini bam. Intsapho yakowethu iye yasomeleza gqitha, yaye oko kusimanyanise ngakumbi.”
UMiguel wafundiswa nguyise ukulesa nokubhala. Waza yena wafundisa uFroylán noAlma Ruth. Oku kwakubalulekile ukuze bakhule ngokomoya. UAlma Ruth uthi: “Ukufunda ukulesa kwasinceda gqitha kuba ngokufunda iBhayibhile neempapasho ezisekelwe eBhayibhileni kuye kwasomeleza ngokomoya.”
Ngoku, uMiguel ungumdala ongumKristu. UFroylán uyifunde yonke iBhayibhile kangangezihlandlo ezisithoba. UAlma Ruth uye wayandisa inkonzo yakhe kuYehova ngokuba nguvulindlela, okanye umvakalisi woBukumkani wexesha elizeleyo, ukususela ngowe-1996. Uthi: “Ngenxa yokusikelwa nguYehova ndiye ndalufikelela olu sukelo, njengoko ndixhaswa ngoodade wethu abanothando abangandincedi nje kuphela ekushumayeleni kodwa abaye bandinceda ndakwazi ukuqhuba izifundo zeBhayibhile ezili-11 endiye ndaziqalisa.”
Omnye umzekelo omhle ngokaEmelia, owehlelwa yingozi eyamenza wahamba ngesitulo esinamavili sabaguli ngenxa yokwenzakala imilenze nomnqonqo. AmaNgqina kaYehova kwisiXeko saseMexico afundisisa naye iBhayibhile, waza wabhaptizwa ngowe-1996. UEmelia uthi: “Ngaphambi kokuba ndiyazi inyaniso, ndandifuna ukuzibulala; ndandingasafuni ukuphila. Ndandiziva ndingento yanto, ndisoloko ndilila. Kodwa xa ndanxulumana nabantu bakaYehova, ndayibona indlela abazalwana abanothando ngayo. Ukubonakalisa kwabo umdla kum kuyandikhuthaza. Omnye wabadala unjengomntakwethu okanye ubawo kum. Yena nezicaka zolungiselelo ezithile bandisa kwiintlanganiso nakumsebenzi wokushumayela ngesi situlo.”
UJosé, owabhaptizwa njengomnye wamaNgqina kaYehova ngowe-1992, uhlala yedwa. Uneminyaka engama-70 ubudala, wathabath’ umhlala-phantsi ngowe-1990. UJosé wayedla ngokudandatheka, kodwa emva kokuba elinye iNgqina lishumayele kuye, kungekudala waqalisa ukuya kwiintlanganiso zamaKristu. Wakuthanda oko wayekuva nawayekubona apho. Ngokomzekelo, waphawula ubuhlobo babazalwana nendlela ababemkhathalele ngayo. Ngoku abadala nezicaka zolungiselelo ebandleni lakhe bayamnyamekela. (Filipi 1:1; 1 Petros 5:2) Amakholwa anjalo ‘ayamomeleza.’ (Kolose 4:11) Amsa kwagqirha, amtyelela ekhayeni lakhe, yaye amomeleza ebudeni bokwenziwa kwakhe utyando izihlandlo ezine. Uthi: “Bandikhathalele. Bayintsapho yam ngokwenene. Ndiyakuvuyela ukuba kunye nabo.”
Ukupha Kuzisa Ulonwabo Lokwenene
Xa uKumkani uSolomon wathi “ababini balunge ngakumbi kunomnye,” wayesandul’ ukuthetha ngamampunge okuzibhokoxa ukuze ufumane ubutyebi. (INtshumayeli 4:7-9) Yiloo nto kanye abayisukelayo abaninzi namhlanje, nangona oku kuthetha ukuncama ukuba nolwalamano entsatsheni nabahlobo.
Umoya wokubawa nokuzingca ukhokelele abaninzi ekubeni bazenze amakheswa. Oku akukhange kubazisele ulonwabo okanye ulwaneliseko ebomini, kuba abantu abawuvumelayo loo moya banxunguphele yaye abanathemba. Ngokwahlukileyo koko, oku sisandul’ ukuva kubonisa umphumo omhle wokunxulumana nabo bakhonza uYehova abaqhutywa kukumthanda yena nabamelwane babo. Ukubakho rhoqo kwiintlanganiso zamaKristu, inkxaso nenkathalo yamanye amaKristu, nokuba nenzondelelo kumsebenzi wasentsimini zizinto ezabancedayo ukuba bayeke ukudimazeka okubangelwa kukuzenza ikheswa.—IMizekeliso 17:17; Hebhere 10:24, 25.
Ekubeni ngamnye exhomekeke komnye, ngokwemvelo kubangela ulwaneliseko ukwenzela abanye izinto. UAlbert Einstein, owanceda abanye ngezinto awazenzayo, uthi: “Umntu ngumntu . . . ngoko akwenzela abanye kungekhona ngoko akufumanayo.” Oku kuyavisisana nala mazwi eNkosi yethu uYesu Kristu athi: “Kunoyolo ngakumbi ukupha kunokwamkela.” (IZenzo 20:35) Ngoko ke, ngoxa kulungile ukuthandwa, kubaluleke gqitha ukubonakalisa uthando kwabanye.
Omnye umveleli ohambahambayo osele eneminyaka etyelela amabandla ukuze awakhe ngokomoya nowancede akha iindawo zokuhlanganisana zamaKristu kwimimandla ehlwempuzekileyo uchaza indlela avakalelwa ngayo esithi: “Uvuyo lokunceda abazalwana bam nokubabona bezele luxabiso kundenza ndiqhubeke ndikhangela ezinye iindlela endinokubanceda ngazo. Ndisoloko ndifumanisa ukuba ukubonakalisa umdla kwabanye kuyeyona nto ezisa ulonwabo. Yaye ndiyazi ukuba njengabadala, sifanele sibe ‘njengendawo yokuzimela umoya . . . , njengemisinga yamanzi kwilizwe elingumqwebedu, nanjengomthunzi wengxondorha enkulu kwilizwe elibharhileyo.’”—Isaya 32:2.
Hayi Indlela Ekulunge Ngayo Ukuhlala Ndawonye Ngomanyano!
Ngokuqinisekileyo ukunceda abanye nokuba nolwalamano nabo bakhonza uYehova kuyinzuzo enkulu yaye kuzisa ulonwabo lokwenene. Umdumisi wathi: “Khangela! Hayi indlela ekulunge nekuthandeka ngayo ukuba abazalwana bahlale ndawonye ngomanyano!” (INdumiso 133:1) Umanyano lwentsapho lubalulekile ekuxhaseni abanye, njengoko sibonile kwimeko kaMiguel, uFroylán, noAlma Ruth. Yaye kuyintsikelelo ngokwenene ukumanyana kunqulo lokwenyaniso! Emva kokululeka amadoda nabafazi abangamaKristu, umpostile uPetros wabhala: “Okokugqibela, cingani nto-nye nonke, nivelane, ninomsa wobuzalwana, nemfesane, nithobekile engqondweni.”—1 Petros 3:8.
Ubuhlobo bokwenene buluncedo gqitha, ngokweemvakalelo nangokomoya. Ethetha namanye amakholwa, umpostile uPawulos wabongoza: “Yithuthuzeleni imiphefumlo edandathekileyo, baxhaseni ababuthathaka, nizeke kade umsindo kubo bonke. . . . Hlalani niphuthuma okulungileyo omnye komnye nakubo bonke abanye.”—1 Tesalonika 5:14, 15.
Ngoko ke, khangela iindlela onokubanceda ngazo abanye. ‘Yenza okulungileyo kubo bonke, ngokukodwa kwabo bahlobene nawe elukholweni,’ kuba oku kuya kwenza ubomi bakho bube nenjongo nolwaneliseko. (Galati 6:9, 10) Umfundi kaYesu uYakobi wabhala: “Ukuba umzalwana okanye udade uyadlakazela, eswele ukutya okulingene imini, aze omnye kuni athi kubo: ‘Hambani ngoxolo, nifudumale, nihluthe,’ kodwa ningabaniki izinto abazisweleyo, kunceda ngantoni oko?” (Yakobi 2:15, 16) Impendulo yaloo mbuzo izicacele. Sifanele ‘sinyamekele, kungekuphela nje izilangazelelo zethu zobuqu, kodwa kwanezilangazelelo zabanye.’—Filipi 2:4.
Ukongezelela ekuncedeni abanye ngezinto eziphathekayo xa kukho imfuneko ekhethekileyo okanye xa kwehle intlekele, amaNgqina kaYehova axakekile anceda abanye ngeyona ndlela ibalulekileyo—ngokushumayela iindaba ezilungileyo zoBukumkani bukaThixo. (Mateyu 24:14) Ukuba nenxaxheba kwamaNgqina angaphezu kwezi-6 000 000 ekuvakaliseni esi sigidimi sethemba nesentuthuzelo kubonakalisa umdla anawo wokwenyaniso nowothando, wokunceda abanye. Kodwa ukunikela uncedo olukwiZibhalo Ezingcwele nako kunceda ukuze kuhlangatyezwane nenye into efunwa ngabantu. Yintoni leyo?
Ukuhlangabezana Neyona Nto Iyimfuneko
Ukuze sonwabe ngokwenene, sifanele sibe nolwalamano oluhle noThixo. Kuthiwa: “Isibakala sokuba umntu, kuyo yonke indawo nangalo lonke ixesha, ukususela ekuqaleni ukuza kuthi ga ngoku, eye waziva efuna ukuzityand’ igila kwinto ephakamileyo nenamandla angaphezu kwawakhe, sibonisa ukuba unqulo luyinto yokwemvelo yaye lufanele lwamkelwe zizazinzulu. . . . Kufanele kusichukumise kuze kusenze sibe nentlonelo ukubona bonke abantu befuna, yaye bekholelwa kumntu omkhulu kunabo bonke.”—Man Does Not Stand Alone, nguCressy Morrison.
UYesu Kristu wathi: “Banoyolo abo bayiphapheleyo intswelo yabo yokomoya.” (Mateyu 5:3) Izinto azibahambeli kakuhle abantu xa bezenza amakheswa. Noko ke, kubi nangakumbi ukuzahlula kuMdali wethu. (ISityhilelo 4:11) Ukuzuza nokusebenzisa ‘ulwazi ngoThixo’ kufanele kube yeyona nto ibalulekileyo ebomini bethu. (IMizekeliso 2:1-5) Eneneni, sifanele sizimisele ukwanelisa iintswelo zethu zokomoya, kuba asinakuphila ngaphandle kwabanye nangaphandle koThixo. Ubomi obonwabisayo nobunomvuzo ngokwenene buxhomekeke ekubeni nolwalamano oluhle noYehova, “Oyena Uphakamileyo phezu komhlaba wonke.”—INdumiso 83:18.
[Umfanekiso okwiphepha 5]
UMiguel: “Ubomi babunzima ngokwenene, kodwa xa ndaqalisa ukunxulumana nabantu bakaYehova, ubomi bam batshintsha”
[Umfanekiso okwiphepha 5]
UAlma Ruth: “Xa ndafunda ngoYehova, ndaqonda ukuba ndinokuba nolwalamano olusenyongweni naye”
[Umfanekiso okwiphepha 6]
UEmelia: “Ngaphambi kokuba ndiyazi inyaniso, . . . ndandiziva ndingento yanto”
[Umfanekiso okwiphepha 7]
Ukunxulumana nabanquli bokwenyaniso kuyasomeleza ngokomoya