Indoda Nomfazi—Benziwa Ukuze Bafanelane

KWAKUDALA indoda nomfazi bebesoloko benqwenela ukuba kunye. Lo mnqweno wafakwa nguThixo. UYehova wabona kungafanelekanga ukuba indoda yokuqala uAdam, ibe yodwa. Ngoko wayenzela “umncedi, oza kuba ngumphelelisi [wayo].”

UYehova wamlalisa yoyi uAdam, waza wathabatha ubambo ezimbanjeni zakhe ‘walwakha olo bambo lwaba ngumfazi waza wamzisa endodeni yakhe.’ Wathi akubona esi sidalwa sihle sikaYehova uAdam akakwazi ukuzibamba yimincili waza wathi: “Ekugqibeleni eli ke lithambo lasemathanjeni am nenyama yasenyameni yam.” Ngenxa yeempawu zobufazi awayenazo, umfazi ofezekileyo, uEva wayethandeka ngokwenene. Ngenxa yesidima sobudoda awayenaso, noAdam wayekufanelekela ukuhlonelwa. Ngamnye wayenziwe ukuze afanele omnye. IBhayibhile ithi: “Kungenxa yoko le nto indoda iya kumshiya uyise nonina, inamathele emfazini wayo baze babe nyama-nye.”—Genesis 2:18-24.

Noko ke, namhlanje iintsapho ziyaqhekeka, phakathi kwendoda nomfazi kuhlala kukho ukruthakruthwano nokuzingca. Ukhuphiswano olukhoyo phakathi lwamadoda nabafazi luye lwabangela ungquzulwano nokuhlala bexhwithana. Konke oku kuyangqubana nenjongo awayenayo uThixo ngendoda nomfazi. Indoda yadalelwa ukufeza indima ebalulekileyo emhlabeni. Umfazi wanikwa indima ekhethekileyo nexabisekileyo, ukuba ngumphelelisi wendoda. Babemele batsale ngaxhatha-linye. Kwasekuqaleni kwabantu, amadoda nabafazi aboyika uThixo baye ngokuthembeka bazabalazela ukufeza iinjongo awayenazo ngabo uYehova, ibe oko kuye kwabazisela ulonwabo nokwaneliseka. Ziziphi ezo njongo, ibe singazifeza njani thina?

[Umfanekiso okwiphepha 3]

Indoda nomfazi ngamnye wadalelwa ukufeza indima ebalulekileyo kwilungiselelo likaThixo lomtshato