Ububele Buyawuthomalalisa Umsindo
ELINYE ixhegokazi lalingatyhilekanga kwaphela ukufika kukaGeorge noManon, amaNgqina amabini aseNetherlands, eze kuthetha nalo ngeendaba ezilungileyo zoBukumkani. Ayevile ukuba laliswelekelwe ngabayeni ababini kunye nonyana yaye lalikhathazwa nasisifo samathambo. Nangona wakha wathi nqum umsindo kulo ngoxa kuncokolwa, eli xhegwazana alizange likhululeke ncam.
Noko ke, uGeorge, wacebisa uManon ukuba xa bephinda bebuyela, kufuneka baliphathele isipha seentyatyambo eli xhegokazi kuba lalibonakala lililolo yaye lisezintlungwini. Xa babuyayo, umninimzi, uRie, wothuka gqitha. Noko ke, bafika exakekile, baza bacela ukubuya ngenye imini. UGeorge noManon babuyela ngosuku olwalubekiwe, kodwa bafika kungekho mntu. Bakhondoza bebuyela, kodwa abazange balifumane elo xhegwazana. Baqalisa ukucinga ukuba liyabazimela.
UGeorge wada wamfumana uRie ekhayeni lakhe. Lacel’ uxolo ngokungafumaneki lisitsho ukuba belilele esibhedlele. Lathi: “Ngaba niyazi ukuba ndenza ntoni emva kokuba nimkile? Ndaqalisa ukufunda iBhayibhile!” Baxubusha kamnandi nalo, baza baqalisa isifundo seBhayibhile.
Ngoxa uRie wayefunda iBhayibhile, wayeka ukuba nomsindo waza waba ngumntu nje ozonwabeleyo nonobubele. Nangona wayengasakwazi ukuphuma endlwini, ngoko nangoko waqalisa ukuxelela wonke umntu oze kumbona ngeenkolelo zakhe ezintsha. Impilo yakhe yayingamvumeli ukuba abekho rhoqo kwiintlanganiso zebandla, sekunjalo wayekuvuyela kakhulu ukuza kubonwa ngabazalwana noodade. Mhla wayegqiba iminyaka engama-82 ubudala, waya kwindibano yesiphaluka waza wabhaptizwa, ebonisa uzinikelo lwakhe kuThixo.
Emva kweenyanga ezimbalwa eswelekile, kwafunyanwa umbongo awayewubhale ngokwakhe. Kuwo, wayebhale ngentlungu yokuba lilolo ebudaleni ebethelela nokubaluleka kokuba nobubele. UManon uthi: “Kwandichukumisa ngenene ukufunda loo mbongo, yaye ndiyavuya kuba uYehova eye wasinceda ukuba sibonise ububele kuye.”
Ngenene, ngumzekelo kaYehova owasenza sabonisa olo thando nobubele. (Efe. 5:1, 2) Ubulungiseleli bethu buya kuba neziqhamo njengoko ‘sizincomela njengabalungiseleli bakaThixo ngobubele.’—2 Kor. 6:4, 6.