Yabelana Nabanye Ngokweemfuno Zabo
1 UYehova ulungiselela ngokweemfuno zethu zokomoya ‘ngekhoboka’ elithembekileyo. (Mat. 24:45-47) Oku ukwenza ubukhulu becala ngeencwadi, iiBhayibhile, imiqulu, iividiyo, iikhasethi ezirekhodiweyo needisk zekhompyutha zokuphengulula iBhayibhile. Oko akulungiselelayo uYehova kusoloko kwanele yaye akanankcitho. Ulindele ukuba sabelane, eqiniseka ukuba sonke singenelwa ngokulinganayo.
2 Konke oku kuveliswa ngeendleko ezinkulu. Ezi ndleko zinyanyekelwa ngabazalwana bethu ehlabathini lonke. Oku kunjalo ngakumbi ekubeni intlangano imisele ilungiselelo lokusasaza uncwadi ngaphandle kwentlawulo, ixhomekeke ngokupheleleyo kwiminikelo yokuzithandela ukuze igubungele iindleko. Ukongezelela, amasebe amaninzi afumana uncwadi kuMbutho ngamaxabiso aphantsi nto leyo eyenza abazalwana bakwazi ukufumana oko bakufunela iintlanganiso nomsebenzi wasentsimini nangona benemali encinane.
3 Indlela Esinokunceda Ngayo: Singasabela kwisibongozo sikaPawulos sokuba sabelane nabanye “ngokweemfuno zabo.” (Roma 12:13) Xa sinikela ngemali kumsebenzi owenziwa ehlabathini lonke, sabelana ngokuthe ngqo nabazalwana bethu abasehlabathini liphela ngoko sinako. Becinga ngoku, abanye baye bagqiba ekubeni babekele bucala imali ethile ukuze banikele kumsebenzi owenziwa ehlabathini lonke nyanga nganye, kanye njengokuba besenza ukuze bahlangabezane neendleko zeHolo yoBukumkani. Bayaqonda ukuba le mali ayisetyenziselwa ukuveliswa koncwadi kuphela kodwa kwawo wonke umsebenzi. Cinga ngendlela ebebeya kungenelwa ngayo abazalwana ehlabathini lonke ukuba abangakumbi bebenesabelo ngale ndlela rhoqo.
4 Ukongezelela, sinokwabelana nabo ngokuba ngabongayo xa sifuna izinto esisenokuzifumana nanini na. Xa siodola kuphela oko sikufuna ngokwenene senza ukuba abazalwana bethu abakwezinye iindawo bakwazi ukufumana ukutya kokomoya abakufunayo ukuze bomelele yaye bahambisele phambili ukushunyayelwa kweendaba ezilungileyo kwinxalanye yabo yomhlaba.—Heb. 13:16.
5 Sifanele sisoloko sicinga ngoku xa sicela izinto eziveliswa ngeendleko ezinkulu nguMbutho. Ezi ziquka iividiyo, iiCD-ROM, iincwadi ezinkulu zeembekiselo, imiqulu yeMboniselo noVukani! nemirhumo yeekhasethi. Kunokuba kufakwe isicelo selungu ngalinye lentsapho, ngaba intsapho ayinakusebenzisa nje enye? Ukuba siyakulinganisela oko sikuthabathayo, oko kuya kwenza nabanye bazifumane izinto ezintle esizithandayo.—Fil. 2:4.
6 Iindleko zoncwadi esiluhambisa entsimini zisenokuthotywa yinxalenye yeminikelo esiyinikela kumsebenzi woMbutho owenziwa ehlabathini lonke esiyikhupha kwiHolo yoBukumkani neyabo banomdla bamkela uncwadi. Noko ke, xa sizifunela uncwadi esiza kulusebenzisa, oluquka amaculo, IiNcwadi Zonyaka, iBhayibhile enoqweqwe oluthambileyo nezinye izinto, asinakulindela ukuba abantu bangaphandle banikele ukuze bahlangabezane neemfuno zethu. Abakhonzi bakaYehova abazahluleleyo ngabona bafanele baxhase ngemali. Becinga ngoko, abavakalisi abaninzi baqikelela oko bezinokuxabisa kona ezi zinto ukuba beziveliswa ngabezorhwebo, baze banikele ngokuvisisana noko. Ngokomzekelo, iBhayibhile enoqweqwe oluthambileyo inokubiza ii-R150 nangaphezulu, incwadi yeembekiselo inokubiza malunga nee-R300 nangaphezulu, ikhalenda emibala bala inokubiza malunga nee-R40 ubuncinane, intyila-lwazi ekwiCD-ROM inokubiza ukususela kwii-R400 ukusa kwii-R800 okanye ngaphezulu, iicompact disc zomculo zidla ngokubiza phantse ii-R100, yaye ezinye iividiyo zidla ngokubiza ngaphezulu. Ukusilela ukunikela ngokwaneleyo ukuze kugutyungelwe iindleko ekugqibeleni kuya kubangela ukuba intlangano ingakwazi ukuvelisa konke okufunekayo ukuze ihambisele phambili umsebenzi wokushumayela.
7 UYesu wathi abafundi bakhe bokwenyaniso babeya kubonwa ngokuthandana. (Yoh. 13:34, 35) Isisa sethu sokunikela ngezinto eziphathekayo nokwabelana nabanye ngokungazingci ngokweemfuno zabo ngokuqinisekileyo ziindlela ezintle zokuba sizingqine singamaKristu okwenyaniso.