Ngaba Ubuphumeza Ngokucokisekileyo Ubulungiseleli Bakho?
1 Kwincwadi yeZenzo, sixelelwa ukuba abafundi bakaYesu baphumeza ubulungiseleli babo ngokunikela “ubungqina obucokisekileyo” ebantwini. (IZe. 2:40; 8:25; 28:23) Ngokuqinisekileyo leyo yayiyinjongo eyintloko kampostile uPawulos. (IZe. 20:24) Ngaba olo asilulo usukelo lwakho njengomlungiseleli weendaba ezilungileyo? Unokukwenza njani oku?
2 Lungiselela Intshumayelo Yakho: Ukuze uqinisekise ukuba unikela ubungqina obucokisekileyo kubulungiseleli, kubalulekile ukulungiselela. Oku kubaluleke ngokwenene xa uhambisa amaphephancwadi, ekubeni umbandela usoloko uguquka. Ukuze sixhobe, le nkupho yoBulungiseleli Bethu BoBukumkani inenkalo entsha—umhlathi osekhohlo, odwelisa iintshumayelo zephephancwadi IMboniselo noVukani! wamvanje. Umxholo osexesheni oya kuvuselel’ umdla kubantu abaninzi uya kubalaseliswa kwinkupho nganye. Unokuzisebenzisa njani ezi ntshumayelo zimfutshane?
3 Khetha intshumayelo ocinga ukuba iya kuphumelela kwintsimi yenu. Lifundisise elo nqaku, uze uphawule iingongoma ezisenokuvusa umdla. Khetha isibhalo esiboniswe kwelo phephancwadi esihambelana nengxubusho, nonokukwazi ukusifundela umninimzi. Ngokufutshane qukumbela ngokukhuthaza umphulaphuli wakho ukuba alifunde eli phephancwadi, ukuba kufanelekile, unokuchaza ilungiselelo lokunikela kumsebenzi owenziwa ehlabathini lonke wamaNgqina kaYehova kumninimzi. Ngoku, qhelisela intshumayelo yakho.
4 Ceba Ukusebenzisa IBhayibhile: Xa ulungiselele kakuhle, ngokufuthi unokukwazi ukufaka isibhalo kwintshumayelo yakho. Ngokomzekelo, abavakalisi abanamava kwiindawo ezininzi bayaphumelela ngokuya emakhayeni abantu neBhayibhile, babulise umninimzi, baze bathi:
◼ “Sibuza abantu enoba bayakukholelwa na oku . . . ” Funda iGenesis 1:1, uze ubuze oku: “Ngaba uyavumelana nale ngxelo?” Ukuba loo mntu uyavuma, yithi: “Nam ndiyavumelana nayo. Noko ke ngaba ucinga ukuba, ukuba nguThixo odale zonke izinto, ukwanguye nonobangela wobungendawo?” Emva kwempendulo yaloo mntu, funda INtshumayeli 7:29. Vula incwadi ethi Ulwazi kwiphepha 71 uze ufunde isiqendu 2. Mkhuthaze ukuba ayifunde le ncwadi.
5 Buyela Kubo Bonke Abo Babonise Umdla: Akunakuze ubuphumeze ngokuzeleyo ubulungiseleli bakho ukuba akubuyeli ukuze ukhulise umdla owufumeneyo. Xa uye wanengxubusho entle, enoba uhambise amaphephancwadi okanye olunye uncwadi, bhala igama nedilesi yaloo mntu. Zama ukukhulisa umdla waloo mntu ngokubuyela ngokukhawuleza. Cela ukumqhubela isifundo seBhayibhile.
6 Abafundi benkulungwane yokuqala babesazi ukuba uYesu ubayalele ‘ukuba banikele ubungqina obucokisekileyo.’ (IZe. 10:42) Loo myalelo usasebenza nakuthi, kuba kuphela kwendlela esiya kukwazi ngayo ukwenza abafundi. (Mat. 28:19, 20) Masenze konke okusemandleni ethu ukuze sibuphumeze ngokucokisekileyo ubulungiseleli bethu.—2 Tim. 4:5.