Nina Zintloko-ntsapho—Yibani Nocwangciso Oluhle Lwezinto Zokomoya
1 Nangona wayephila nabantu ababenqula izithixo nababeziphethe kakubi kangangeenkulungwane eBhabhiloni, uDaniyeli wayesaziwa ngokukhonza uYehova “rhoqo.” (Dan. 6:16, 20) Wenza njani ukuze ahlale ephilile ngokomoya? Ingxelo yeBhayibhile ibonisa ukuba wayenocwangciso lokwenza izinto zonqulo oluyinyaniso. Ngokomzekelo, yayilisiko lakhe ukuthandaza kathathu ngemini kwindlu yakhe ephezulu. (Dan. 6:10) Alithandabuzeki elokuba wamisela umzekelo kwezinye izinto zokomoya, ezifana nokufunda uMthetho. Ngaloo ndlela, xa uDaniyeli wayejamelene nezilingo ezisongela ubomi bakhe, azizange zimgungqise kuzinikelo lwakhe kuYehova, yaye wahlangulwa ngendlela engummangaliso.—Dan. 6:4-22.
2 Ngokufanayo nanamhlanje, simele sizibhokoxe ekubeni ‘sihlale siphaphile.’ (Efe. 6:18) Ihlabathi esiphila kulo “lisemandleni ongendawo.” (1 Yoh. 5:19) Ngequbuliso kusenokuvela inkcaso okanye izilingo zize zivavanye ukholo lwethu. Ebudeni bembandezelo enkulu, abakhonzi bakaThixo baya kuhlaselwa ngamandla nguGogi kaMagogi, ibe ayiyi kubonakala indlela yokuphuma. Ngelo xesha kuya kufuneka bathembele kuYehova ngokupheleleyo.—Hez. 38:14-16.
3 “Omnye undoqo kukwenza uleso, ufundisiso nengxubusho yeBhayibhile ephumelelayo njengentsapho kube yindlela yokuphila.” Yatsho njalo intshayelelo yomdlalo wendibano yesithili yowe-1998 owawunomxholo othi “Zintsapho—Yenzani Ufundisiso LweBhayibhile Lwemihla Ngemihla Lube Yindlela Yenu Yokuphila!” Yahlabela mgama isithi: “Xa iintsapho zisenza ucwangciso olunjalo ngokuthe rhoqo nangendlela eyenza iBhayibhile inik’ umdla, olu cwangciso lweBhayibhile lunokuba nemiphumo engathethekiyo entsatsheni. Luphangalalisa ulwazi lwethu. Lomeleza ukholo lwethu. Yaye lusibonisa imizekelo enokulandelwa—amadoda nabafazi ababethembeke ngokupheleleyo bamandulo—nto leyo enokusikhuthaza, isishukumisele ekubeni siyimele inyaniso.” Njengoko siqwalasela iinkalo ezahlukeneyo zocwangciso oluhle lokomoya, iintloko-ntsapho zifanele zifune indlela enye okanye ezimbini zokuphucula ucwangciso lokomoya lweentsapho zazo.
4 Xubusha ILizwi LikaThixo: “Xa uBukumkani bukaThixo bulawula bungenazintshaba nokuthanda kwakhe kusenziwa emhlabeni njengasezulwini, akukho bantu baneengcwangu—kungekho nezilwanyana—ziya ‘kwenzakalisa okanye zonakalise.’ (Isa. 11:9; Mat. 6:9, 10)” Loo mazwi akumagqabaza omhla kaSeptemba 11 kwincwadi ethi Ukuhlolisisa IZibhalo Imihla Ngemihla—2001. Hayi indlela akhuthaza ngayo la mazwi! Njengentloko-ntsapho, ngaba ukwenza umkhwa ukuhlolisisa ingxubusho yeBhayibhile namagqabaza nentsapho yakho? Oku kuyingenelo kakhulu. Ukuba anikwazi ukuyihlolisisa kusasa, mhlawumbi ninokukwenza oku ebusuku. Omnye ubawo wathi: “Ixesha elifanelekileyo kuthi ukuze senze ingxubusho yeBhayibhile lelesidlo sangokuhlwa.”
5 Ukuba ninocwangciso oluhle lokwenza ingxubusho yosuku njengentsapho, nenza kakuhle kakhulu. Mhlawumbi ninokungenelwa ngakumbi xa niquka ukufunda inxalenye yeBhayibhile kwangaxeshanye. Bambi bakwenza umkhwa ukufunda sonke eso sahluko ithatyathwe kuso ingxubusho yosuku. Abanye bakhetha incwadi enye yeBhayibhile, bayifunde de bayigqibe. Ukufundisisa iBhayibhile yonke imihla kuya kuyinceda intsapho ihlakulele ukoyika uYehova ize inqwenele ukwenza ukuthanda kwakhe ngokungakumbi.—Dut. 17:18-20.
6 Ucwangciso lwentsapho yakho lokufunda iBhayibhile nokuqwalasela itekisi yosuku luya kuba yingenelo kakhulu ukuba ngemizuzwana nje embalwa nixubusha indlela esebenza ngayo loo nkcazelo. Incwadi ethi ISikolo Sobulungiseleli, kwiphepha 60, icebisa isithi: “Ninokukhetha iindinyana ezimbalwa zofundo lweBhayibhile olucwangciselwe loo veki, nixubushe intsingiselo yazo, nize nibuze imibuzo efana nothi: ‘Luluphi ukhokelo ezisinika lona ezi ndinyana? Sinokuzisebenzisa njani ezi ndinyana kubulungiseleli? Zisixelela ntoni ngoYehova nangendlela azenza ngayo izinto, kwaye loo nto ilwakha njani uxabiso esinalo ngaye?’” Ingxubusho yokomoya enjalo iya kuninceda nonke njengentsapho ukuba ‘niqhubeke nikuqonda into okuyiyo ukuthanda kukaYehova.’—Efe. 5:17.
7 Isifundo Sentsapho: Indlela elungileyo iintloko-ntsapho ezinokubabonisa ngayo abantwana bazo ukuba izinto zokomoya ziza kuqala kukuqhuba isifundo sentsapho ngokuthe rhoqo. Omnye umfana ukhumbula oku: “Maxa wambi uTata wayebuya emsebenzini edinwe eyimfe, kodwa wayesiqhuba isifundo nakubeni kunjalo, yaye oku kwasinceda sakuqonda ukubaluleka kwaso.” Nabantwana banokufak’ isandla ekuphumeleleni kwelo lungiselelo. Enye intsapho enabantwana abalithoba yayivuka ngentsimbi yesihlanu yonke imihla ukuze kuqhutywe isifundo sentsapho kuba lalingekho elinye ixesha eyayinokukwenza ngalo oku.
8 Ukuze isifundo sentsapho siphumelele, intloko-ntsapho imele ‘ilumkele imfundiso yayo.’ (1 Tim. 4:16) Incwadi ethi iSikolo Sobulungiseleli, kwiphepha 32, ithi: “Sinokutsho sithi isifundo sentsapho esiphumelelayo siqalisa ngofundisiso lwentsapho yakho. Injani inkqubela yamalungu entsapho yakho? . . . Xa ukubulungiseleli basentsimini nabantwana bakho, ngaba kuba lula ukuba bazazise koontanga babo njengamaNgqina kaYehova? Ngaba bayalunandipha ucwangciso lwenu lofundo lweBhayibhile nolofundisiso lwentsapho? Ngaba ngokwenene benza indlela kaYehova ibe yindlela yabo yokuphila? Ukuba neliso elibukhali kuya kukubonisa oko wena, njengentloko-ntsapho, kufuneka ukwenze ukuze umisele yaye wakhe iimpawu zokomoya kwilungu ngalinye lentsapho.”
9 Iintlanganiso Zebandla: Ukulungiselela nokubakho kwiintlanganiso kufanele kube yinxalenye ebalulekileyo yocwangciso lwakho lweveki nganye. (Heb. 10:24, 25) Maxa wambi, ninokulungiselela iinxalenye ezithile zeentlanganiso njengentsapho. Kunokulinda de kube ngumzuzu wokugqibela ukuze nilungiselele, ngaba ninokucwangcisa ukulungiselela kusengaphambili? Ucwangciso olulungeleleneyo kulo mbandela lunokuwuphucula umgangatho wendlela enilungiselela ngayo kwaneengenelo enizifumana ezintlanganisweni.—IMize. 21:5.
10 Ucwangciso lokomoya oluphumelelayo lubonakala ngokuba semgangathweni nangokungaguquguquki. Kuthekani ukuba iimeko zikubangela ukuba ungakwazi ukuzilungiselela iintlanganiso? Incwadi ethi iSikolo Sobulungiseleli, kwiphepha 31, inikela eli cebiso: “Yiphephe imigibe yokuwufundela nje ukuwugqiba umbandela okanye, okona kubi, wokungaqali kwaukuwufundisisa kuba ungenakukwazi nje kwaphela. Kunoko, zimisele umlinganiselo onokufundisisa ngawo, wandule ke ukufundisisa ngaloo mlinganiselo. Fundisisa veki nganye. Ethubeni, zabalazela ukuphangalala uze uquke nezinye iintlanganiso.”
11 Xa iintsapho zifika kwangethuba ezintlanganisweni, oku kuzinceda ukuba zilungele iintlanganiso ukuze zidumise uYehova zize zizuze kwimiyalelo ayinikelayo. Ngaba intsapho yakho ikwenza umkhwa oku? Oku kufuna ukuba intsapho icebe kakuhle ize isebenzisane. Ukuba ufumanisa ukuba rhoqo intsapho yakho iphath’ iyeka ngosuku lweentlanganiso, ngaba ninokwenza uhlengahlengiso kucwangciso lwenu? Ngaba kukho izinto ebekufuneka zenziwe kwangethuba? Ukuba elinye ilungu lentsapho linomthwalo wezinto ezininzi ekufuneka lizenzile, ngaba abanye banokunceda? Ngaba bekungayi kuba bhetele ukuba wonke ubani ebekulungele ukuphuma kwangethuba ukuya ezintlanganisweni? Ulungelelwano lufak’ isandla ekubeni kubekho uxolo ebandleni nasentsatsheni.—1 Kor. 14:33, 40.
12 Intsimi: Enye inxalenye yocwangciso oluhle lokomoya kukumisela amaxesha okuya entsimini. Umfana ogama linguJayson ukhumbula oku: “Kwintsapho yasekhaya, rhoqo kusasa ngoMgqibelo sasisiya entsimini. Oku kwakundinceda kuba ngokuya entsimini, ndandiyibona ngakumbi indlela endinceda ngayo yaye ndandiyinandipha kakhulu.” Ngokufanayo, abaninzi abakhuliswe ziintsapho ezingamaNgqina baye bafumanisa ukuba ukuba nexesha elimisiweyo lokuya entsimini veki nganye kuye kwabanceda benza inkqubela njengabalungiseleli abangamaKristu.
13 Ucwangciso olulungelelanisiweyo lunokunceda ekubeni intsapho yakho ilinandiphe ixesha lentsimi ize ilenze libe neziqhamo. Kunokufezwa njani oku? IMboniselo kaJulayi 1, 1999, iphepha 21, yacebisa isithi: “Ngaba kwisifundo senu sentsapho ngamaxesha athile niye nibe nexesha lokunceda amalungu entsapho alungiselele inkonzo yasentsimini yaloo veki? Ukwenjenjalo kunokuba yingenelo kakhulu. (2 Timoti 2:15) Kunokunceda ekwenzeni anikele inkonzo ebonakalayo nenemveliso. Maxa wambi, ninokusebenzisa lonke ixesha lesifundo ukuze nilungiselele. Ngokufuthi ninokusingatha iinkalo zobulungiseleli basentsimini ngeengxubusho ezimfutshane ekupheleni kwesifundo sentsapho okanye ngelinye ixesha evekini.” Ngaba intsapho yakho ikhe yakuzama oku?
14 Qhubekani Nisenza Inkqubela: Xa uqwalasela oku, ngaba uziphawule iindawo eyenza kakuhle kuzo intsapho yakho? Yincome, yaye zabalazela ukuphucula kwezi zinto. Ukuba kukho izinto ezininzi ekufuneka uphucule kuzo, khetha ibe nye okanye zibe mbini oza kuqala kuzo. Xa ziye zayinxalenye yocwangciso lwakho lokomoya, sebenzela kwenye okanye kwezimbini ezilandelayo. Yiba nesimo sengqondo esivumayo nengqiqo. (Fil. 4:4, 5) Ukuyimisela ucwangciso oluphumelelayo lokomoya intsapho yakho kufuna umgudu, kodwa kunomvuzo, kuba uYehova uyasiqinisekisa: “Lowo ogcina indlela emiselweyo, ndiya kumbangela alubone usindiso lukaThixo.”—INdu. 50:23.