ISikolo Esisixhobisela Ezona Zinto Zibalulekileyo
1 Abantu baya esikolweni ngenjongo yokufumana imfundo eza kubanceda bafikelele usukelo lwabo ebomini. Noko ke, luluphi olona sukelo lubalulekileyo kunokudumisa uMniki-bomi nokunceda abanye bafunde iinjongo neendlela zakhe? Alukho. Injongo yeSikolo Sobulungiseleli Sobuthixo kukusiqeqeshela ukuba sifundise abanye ngokholo lwethu. Ngaloo ndlela, njengoko sisiya kwesi sikolo veki nganye, sifunda ubuchule bokwenza ezona zinto zibalulekileyo ebomini.
2 “Ucwangciso LweSikolo Sobulungiseleli Sobuthixo Sowama-2003” luthunyelwe noBulungiseleli Bethu BoBukumkani benyanga ephelileyo. Olu cwangciso luneenkcukacha zendlela esiza kuqhutywa ngayo isikolo. Kunokuba kuhle ukulugcina kwincwadi yakho ethi Zuza Kwimfundo YeSikolo Sobulungiseleli Sobuthixo, ofanele uyiphathe kwiSikolo Sobulungiseleli Sobuthixo veki nganye. Makhe sixubushe ezinye zeenkalo zeSikolo Sobulungiseleli Sobuthixo Sowama-2003.
3 Uphawu Lwentetho: Ukususela ngoJanuwari, intlanganiso nganye iza kuqalisa ngentetho yemizuzu emihlanu exubusha uphawu lwentetho okanye umbandela ophathelele ukufunda, ufundisiso okanye ukufundisa. Ngumveleli wesikolo oza kunikela ezi ntetho zokuvula okanye usenokwabela omnye umdala ofanelekayo. Isithethi sinokuxubusha ingcaciso nokubaluleka kolo phawu lwentetho. Sifanele siwuphuhlise loo mbandela ngokuxubusha imizekelo yeZibhalo nokubonisa indlela yokusebenzisa olo phawu, sinikel’ ingqalelo ekhethekileyo kwindlela olo phawu olunokunceda ngayo entsimini.
4 Isabelo 1: Abazalwana ababelwe ukunikela intetho yokuyala bakhuthazwa ukuba ‘banikele ingqalelo kwindlela obaluleke ngayo loo mbandela uxutyushwayo.’ Oku kuthetha ukuba bafanele babonise ibandla indlela elinokuyisebenzisa ngayo loo nkcazelo. Ukuba wabelwe esi sabelo, funda incwadi yeSikolo Sobulungiseleli kwiphepha 48-9 ukuze ufumane amacebiso ngendlela yokulungiselela, uze ufunde iimbekiselo eziboniswe kwisalathiso samagama phantsi komxholo othi “Indlela osebenza ngayo umbandela.”
5 Ucwangciso Lofundo LweBhayibhile: Ukuba kwixesha elidluleyo ubungakwazi ukuhambisana nofundo lweBhayibhile, kutheni ungazimiseli ukunamathela kucwangciso lwalo nyaka? Abo benjenjalo baya kuzigqiba iZibhalo ZamaKristu ZesiGrike ekupheleni konyaka. Iingenelo zokuqalisa ucwangciso lofundo lweBhayibhile ngeZibhalo ZamaKristu ZesiGrike zichazwe kwiphepha 10, isiqendu 4, sencwadi ethi iSikolo Sobulungiseleli.
6 Imbalasane Zofundo LweBhayibhile: Liye landiswa ixesha lale ntetho laya kwimizuzu elishumi ukuze nabaphulaphuli bagqabaze ngoko bakufumeneyo kufundo lweveki. Abo babelwe le ntetho bafanele bagcine ixesha. Iya kunikelwa veki nganye, kuquka neveki yempinda. Njengoko ufunda izahluko zaloo veki, khangela iingongoma eziya kukunceda kwisifundo sentsapho, entsimini, nasebomini bakho. Ziziphi iimpawu zikaYehova ezabonakala kwiinkqubano zakhe nabantu neentlanga? Yintoni oyifundileyo eyomeleze ukholo lwakho yaza yakwenza wamxabisa kakhulu uYehova? Zive ukhululekile ukugqabaza kuyo nayiphi na ingongoma ekwezo zahluko zabelweyo, kwaneendinyana eziza kufundwa kwiSabelo 2, ekubeni umzalwana oza kusisingatha esi sabelo engazukugqabaza ngezo ndinyana.
7 ISabelo 2: Intetho yokuqala yomfundi veki nganye iya kuqhelisela ufundo lwasesidlangalaleni. Ngaphandle kofundo lokugqibela enyangeni, esi sabelo siza kuthatyathwa kufundo lweBhayibhile lwaloo veki. Kwiveki yokugqibela enyangeni esi sabelo siza kuthatyathwa kwiMboniselo. Umfundi akafanele enze intshayelelo okanye umqukumbelo kwesi sabelo. Ngale ndlela, unokunikela ingqalelo ekhethekileyo kubuchule bakhe bokufunda.—1 Tim. 4:13.
8 ISabelo 3 nesesi-4: Ezinye zezi zabelo zinombandela omninzi othatyathwe kwincwadi ethi Ukuqiqa; ukanti ezinye zinomxholo nje kuphela. Abo banikwe izabelo ezinombandela omncinane okanye ezinomxholo nje kuphela baya kufumana ithuba lokuphanda kwiimpapasho zethu zamaKristu ukuze bakhe iintetho zabo. Oku kunokubenzela lula oodade ukuze loo mbandela ufanele lowo uncedisayo.
9 Iindlela Zokuceba Iintetho: Njengoko kuboniswe kwiphepha 45 kwincwadi ethi iSikolo Sobulungiseleli, umveleli wesikolo unokwabela indlela yokuceba intetho. Ukuba akayabelanga, oodade banokukhetha kwezikwiphepha 82. Ukuba rhoqo kwiinyanga ezimbini udade unikela intetho, iindlela zokuceba ezingama-30 ziya kumnika ukhetho olwaneleyo kangangeminyaka emihlanu. Oodade abakhetha ukusebenzisa indlela yama-30 yokuceba intetho, ethi, “Enye indlela yokuceba intetho efanelekileyo kwindawo okuyo,” bafanele bayibhale ezantsi okanye ngasemva kwephepha lesabelo sentetho (S-89). Umveleli wesikolo uya kubhala usuku ayinikele ngalo intetho umfundi kwiphepha 82 lencwadi yakhe, ecaleni kwendlela yokuceba ayisebenzisileyo. Usenokukwenza oku xa ephawula iphepha lesiluleko.
10 Iphepha Lesiluleko: Iphepha lakho lesiluleko sentetho lingaphakathi encwadini yakho. Likwiphepha 79-81. Ngaloo ndlela, ufanele unike umveleli wesikolo incwadi yakho emva kwentetho nganye oyinikelayo. Umveleli wesikolo uya kugcina ingxelo yeengongoma zesiluleko abasebenzela kuzo abafundi.
11 Impinda: Impinda yeSikolo Sobulungiseleli Sobuthixo iya kuba yimibuzo neempendulo, ayisayi kubhalwa. Iya kuqhutywa rhoqo emva kweenyanga ezimbini yaye iya kuthabatha malunga nemizuzu engama-30. Imibuzo eza kuxutyushwa ebudeni bempinda iya kubhalwa kuBulungiseleli Bethu BoBukumkani. Ukuba iveki yempinda ingqamana neveki yendibano yesiphaluka okanye utyelelo lomveleli wesiphaluka, kunokunikelwa iintetho zeveki elandelayo ize impinda icwangciselwe iveki elandelayo.
12 Iiklasi Ezongezelelekileyo: Kumabandla anabafundi abangaphezu kwama-50, abadala basenokucinga ngeeklasi ezongezelelekileyo. “Eli lungiselelo linokusetyenziswa kuzo zonke iintetho zabafundi okanye lisetyenziswe kwiintetho ezimbini zabafundi zokugqibela.” (ISikolo Sobulungiseleli, iphe. 285) Eli cebiso lokugqibela lenzelwe amabandla anoodade abaninzi kodwa enabazalwana abambalwa bokwenza ufundo lweBhayibhile. Abadala bafanele bazabele abazalwana abafanelekayo ezi klasi.
13 Umluleki Wangasese: Njengoko kuboniswe kucwangciso lweSikolo Sobulungiseleli Sobuthixo, umluleki wangasese ufanele amiselwe liqumrhu labadala ukuze aluleke abadala nezicaka zolungiselelo ezinikela iimbalasane zofundo lweBhayibhile nentetho yokuyala. Esi sabelo simele sinikwe umzalwana onamava, oya kuhlonelwa ngabanye abadala. Umele anikele isiluleko esakhayo, aze ancome indlela efanelekileyo yokuthetha nobuchule bokufundisa aze amkhuthaze ukuba aphucule kwingongoma enye okanye ezimbini. Akuyomfuneko ukusoloko eluleka umzalwana onikela iintetho rhoqo. Noko ke, umzalwana onikwe esi sabelo umele asebenzise ukuqonda yaye akhumbule ukuba kwanabazalwana abanikela iintetho zesidlangalala banokuncedwa ukuze benze inkqubela engakumbi.—1 Tim. 4:15.
14 Izinto Ekufanele Kunikelwe Ingqalelo Kuzo: Yintoni enokunceda umluleki xa ephulaphule intetho? Ibhokisi yesithathu kwinkoliso yezahluko ezingama-53 zencwadi yeSikolo Sobulungiseleli ishwankathela oko afanele akuphulaphule. Umveleli wesikolo umele aphawule ezinye izinto ezimele zikhunjulwe okanye amacebiso akule ncwadi aya kumnceda ukuba ayiqonde ngokukhawuleza indlela eyondelelaniswe ngayo nenikelwe ngayo loo ntetho. Ngokomzekelo, phawula ungcelele lwemibuzo esekuqaleni kwephepha 55 neengcamango ezikwisiqendu sokugqibela sephepha 163.
15 Bhala Kwizikhewu: Ukongezelela eludinini lwayo olubanzi, incwadi yeSikolo Sobulungiseleli inezikhewu ezininzi ezenzelwe ukuba ubhale amanqaku ngoxa uyifunda naxa ukwiSikolo Sobulungiseleli Sobuthixo. (Bona iphepha 77, 92, 165, 243, 246, nelama-250.) Qiniseka ukuba uyayiphatha incwadi yakho veki nganye. Hambisana nesithethi ngoxa sinikela intetho yokuvula. Hlala uyivulile incwadi yakho side sigqitywe isikolo. Khangela amacebiso anikelwa ngumveleli wesikolo. Nikel’ ingqalelo kwindlela yokufundisa, imibuzo, imizekelo, izigaba zentetho, imizekeliso, izinto ezinceda ekufundiseni nokuthelekisa izinto kwesithethi. Ngokubhala amanqaku, uya kukwazi ukukhumbula nokusebenzisa iingongoma ozifunde esikolweni.
16 UYesu Kristu wayeqonda ukuba ukushumayela iindaba ezilungileyo zoBukumkani bukaThixo yayilelona lungelo libalaseleyo elinokunikwa nabani na. Yayilolona thumo lwakhe lubalulekileyo. (Marko 1:38) Wathi: “Ndimele ndizivakalise iindaba ezilungileyo zobukumkani bukaThixo, ngenxa yokuba ndithunywe oko.” (Luka 4:43) Njengoko siye samkela isimemo sokuba simlandele, nathi sixakeke ngumsebenzi wokushumayela iindaba ezilungileyo, yaye sisoloko sizama ukuphucula umgangatho ‘wombingelelo wendumiso’ yethu. (Heb. 13:15) Ngenxa yoko, ngamana singazimisela ukuba nenxaxheba rhoqo kwiSikolo Sobulungiseleli Sobuthixo, isikolo esiya kusixhobisela ezona zinto zibalulekileyo ebomini.