Isahluko 14
Emva Komnqophiso Omtsha—BuBukumkani Bewaka Leminyaka
1, 2. (a) Izigidi zabantu abangenelwa ngenxa yokusebenza komnqophiso omtsha zinokufaniswa noobani namhlanje? (b) Zazisithini iinkcukacha zomnqophiso omtsha?
ABANTU abazizigidi jikelele emhlabeni sele bezifumene iingenelo ezizukileyo ezibangelwa kukusebenza komnqophiso omtsha, nakubeni bengekho kuwo. Bafana nabemi abangengomaSirayeli ababehlala kwaSirayeli ebudeni bemihla xa umnqophiso woMthetho kaMoses wawusasebenza. (Eksodus 20:10) Kwenzeke njani oku kwizigidi ezanda ngolu hlobo zabantu abafumana iingenelo abanxulumana nentsalela yamaSirayeli okomoya namhlanje?
2 Kwisiprofeto sikaYeremiya 31:31-34, Lowo wandlala iinkcukacha zomnqophiso omtsha wathi: “Ndiya kuwubeka umyalelo wam embilinini yabo, ndiwubhale ezintliziyweni zabo, ndibe nguThixo wabo, babe ngabantu bam.”
3. (a) Umthetho womnqophiso omdala kaMoses wanikelwa ngaluphi uhlobo kuSirayeli? (b) Ngaphambi kokuqaliswa kokubhalwa kweZibhalo zamaKristu zesiGrike, uThixo wayibhala phi imithetho yomnqophiso omtsha?
3 Kumnqophiso woMthetho, uYehova uThixo, ngomprofeti uMoses njengomlamli, wanika uSirayeli wokwemvelo ‘umbhalo wesandla ongowemimiselo.’ (Kolose 2:14) Noko ke, kuthekani ngomthetho womnqophiso omtsha? UMlamli wawo wayengayi kuwubhala elityeni, okanye awubhale kumbhalo-ngqangi. UMlamli wawo akazange ashiye mibhalo iyeyakhe. Sifumana oko umthetho womnqophiso omtsha ukuko kwiZibhalo zamaKristu zesiGrike eziphefumlelweyo. (2 Timoti 3:16) Kodwa kwanangaphambi kokubhalwa kwezo Zibhalo zesiGrike, ukususela malunga nowama-41 C.E., uYehova uThixo waqalisa ukubhala umthetho wakhe womnqophiso omtsha. Nini? Ngomhla wePentekoste, ngowama-33 C.E. Phi? Wawubhala kanye apho wayethembise kudala ukuba wowubhala khona: “Ndiya kuthi, ndiyibeke imithetho yam engqondweni yabo, ndiyibhale ezintliziyweni zabo.”—Hebhere 8:10.
4. Ukubhala kukaThixo imithetho yakhe entliziyweni aze ayibeke engqondweni yabakhonzi bakhe kwakuya kuba nayiphi imiphumo elungileyo?
4 Ekubeni ibhalwe entliziyweni, loo mithetho yayingenakufane ingathandwa ngabo bayithobelayo. Ukuba loo mithetho yayibekwe “engqondweni yabo,” babengenakufane bayilibale. Ngenxa yoko, abagcini baloo mithetho bathi, kumazwi eNdumiso 119:97: “Hayi, ukuwuthanda kwam umyalelo wakho! Imini le yonke ndiyacamngca ngawo.” Ngokusuka kanye ngaphakathi kubo, uthando lwabo balumilise kwimithetho kaYehova njengoko inikelwe ngoMlamli wakhe, uYesu Kristu. Ngaloo ndlela, beshukunyiswe ngokufanelekileyo, bazimisele ukugcina loo mithetho ixabisekileyo. Oku kusebenza ‘kumhlambi omncinane’ kumnqophiso omtsha ‘nakwisihlwele esikhulu’ ‘sezinye izimvu’ esingekho kumnqophiso omtsha, kodwa esiphantsi kwawo.—Thelekisa eyoku-1 kaYohane 5:3; Yohane 14:15.
Imbambano YoBukumkani Iyabalasela!
5. UMlamli womnqophiso omtsha waxela ntoni kwangaphambili kuMateyu 24:12-14?
5 Abagcini bemithetho yomnqophiso omtsha abamele nakancinane bayekelele koko uMlamli, uYesu Kristu, wakuxela kwangaphambili njengenxalenye ‘yomqondiso wokupheliswa kwephakade eli’: “Nangenxa yokwanda kokuchasa umthetho, luya kuphola uthando lwabaninzi. Ke onyamezeleyo kwada kwaba sekupheleni, lowo uya kusindiswa. Zaye ezi ndaba zilungileyo zoBukumkani ziya kuvakaliswa kulo elimiweyo liphela, zibe bubungqina kuzo zonke iintlanga.”—Mateyu 24:3, 12-14.
6. (a) Ngaba uMateyu 24:14 wayesisiprofeto nje esingenamsebenzi? (b) Ngoobani abaye basijonga njengento engesosiprofeto nje, ibe kunokuthiwani ngonyamezelo lwabo?
6 La mazwi okugqibela angokunikelwa kobungqina boBukumkani zwenibanzi ayengesosiprofeto nje esingenamsebenzi. Ayengumyalelo kubafundi bakhe abaphila ‘ekuphelisweni kwephakade eli.’ Ayelulwalathiso kwikhondo lawo elichanileyo lesenzo ukuhla ukuza kwesona siphelo senkqubo yezinto engenaluthando nezaliswe kukuchas’ umthetho ngokubanzi, kungekhona nje ukungahlonelwa komthetho kaThixo. Ngoobani namhlanje abangqineka bengamaKristu okwenyaniso, abathabatha loo mazwi kaYesu Kristu njengomyalelo kubo? Izibakala ezingokwembali eziye zaphindaphindeka ukususela ngowe-1919 ngokwenyaniso ziphendula ngelithi, “NgamaNgqina kaYehova”! Iphulo lawo lokufundisa iBhayibhile ngoBukumkani lelona likhulu kuwo onke, ibe abonakalise unyamezelo kweli phulo ebudeni beminyaka engama-67 edluleyo. Ngoku nyaka ngamnye, eli phulo liyakhula ngomlinganiselo nangamandla.
7, 8. (a) Ebudeni beMfazwe Yehlabathi I, uSathana wazama ukwenza ntoni kwabo babekumnqophiso omtsha? (b) Kwithuba lasemva kwemfazwe, imbambano yoBukumkani yabalasela njani?
7 USathana uMtyholi wazama ukuthintela eli phulo libalaseleyo lokufundisa iBhayibhile ngokutshayela intsalela encinane yamaSirayeli okomoya ebudeni beMfazwe Yehlabathi I. Watsho phantsi! Ngokukhawuleza, emva kokuhlaziyeka kwayo kwimeko efana nokufa kwihlobo lowe-1919, yaqhuba indibano yayo yokuqala yasemva kwemfazwe eCedar Point, eOhio, ngoSeptemba waloo nyaka. Kwindibano yesibini eyayiseCedar Point ngoSeptemba 1922, imbambano yoBukumkani yathi yabalaseliswa. Ngosuku lwesine lwaloo ndibano, olwalunomxholo othi “Usuku,” umongameli weWatch Tower Society wanikela intetho yakhe echwayitisayo eyafikelela kwincopho enkulu ngokudanduluka athi:
8 “Ngoko buyelani entsimini, nina boonyana boThixo Osenyangweni, Bhinqani isikrweqe senu! Misan’ iingqondo, phaphani, khuthalani nize nikhaliphe. Yibani ngamangqina eNkosi athembekileyo nawokwenyaniso. Qhubekani emlweni de yonke inxalenye eseleyo yeBhabhiloni iphanze. Vakalisani isigidimi ngokubanzi. Ihlabathi limele lazi ukuba uYehova unguThixo nokuba uYesu Kristu nguKumkani wookumkani neNkosi yeeNkosi. Le yimini yeemini. Khangelani, uKumkani uyalawula! Nina ningoothunywashe abamvakalisayo. Ngoko ke bhengezani, bhengezani, bhengezani uKumkani noBukumkani bakhe.”
Ukwazi UYehova Ngokuqonda Okungakumbi
9. (a) Ngenxa yokwanda kobungqina obungaloo rhulumente wobulungisa, abantu kufuneka bazibonakalise bemi njani? (b) Abo bazibonakalisa bemi ngokufanelekileyo banikwa ulwazi olunjani?
9 Ngoku kuyiminyaka engaphezu kwama-70 ukususela ukuba uKristu wabekwa etroneni emandleni oBukumkani ngowe-1914. Ukususela ngoko, ubungqina obungorhulumente kaThixo wobulungisa buye banda kanobom. Abantu behlabathi loluntu kufuneka babonakalise apho bami khona ngokubhekisele kwimbambano yoBukumkani, enoba bangakuBukumkani okanye banxamnye nabo. Ibe abo babonakalisa ukuma kwabo ngokuxhasa loo rhulumente wobuthixo babangela ukuba la mazwi abalulekileyo omnqophiso omtsha azaliseke kubo: “Bangabi safundisa elowo ummelwane wakhe, elowo umzalwana wakhe, besithi, Mazini uYehova; ngokuba bonke bephela baya kundazi, kuthabathela kwabancinane kuse kwabakhulu.”—Yeremiya 31:34.
10. (a) Intsalela yamaSirayeli okomoya yaqalisa ukwamkela “ezinye izimvu” phantsi kwaliphi igama? (b) Luluphi ulwazi “ezinye izimvu” ezaluzuzayo?
10 Ngowe-1935 intsalela yamaSirayeli okomoya yaqalisa ukwamkela “ezinye izimvu” zoMalusi Olungileyo ekunxulumaneni ngokukhutheleyo nazo ‘kumhlambi omnye’ phantsi kukaYesu Kristu, bonke bengamaNgqina kaYehova. Ngoko ezo ‘zimvu zizezinye,’ ezaqalisa ukwakheka zibe ‘sisihlwele esikhulu’ esingenamlinganiselo, zikunye nentsalela ezelwe ngomoya, zathi ‘zayigcina imithetho kaThixo’ zaza zenza ‘umsebenzi wokunikela ubungqina ngoYesu.’ (ISityhilelo 7:9-17; 12:17) Ngaloo ndlela ukususela ekuqaleni ngowe-1935, ezi ‘zimvu zizezinye’ nazo zathi zamazi uYehova “kuthabathela kwabancinane kuse kwabakhulu.”
11. Ukwazi kwamaKristu uYehova kwahluke njani ibe kulunge ngakumbi njani kunoko kwamaYuda phantsi komnqophiso woMthetho?
11 Noko ke, ukwazi komKristu uYehova kwahluke ngayiphi indlela ibe kulunge ngakumbi njani kunolwazi amaYuda awayenalo phantsi komnqophiso omdala woMthetho kaMoses? UMenzi wasezulwini womnqophiso omtsha uhambisa asixelele oku: “Ndiya kubuxolela ubugwenxa babo, ndingabi sasikhumbula isono sabo.” (Yeremiya 31:34; Hebhere 8:12) Oku kubangelwe sisibakala sokuba umnqophiso omtsha usekelwe kwidini elilunge ngakumbi ngoMlamli olunge ngakumbi. (Hebhere 8:6; 9:11, 12, 22, 23) Idini elilunge ngakumbi loMlamli olunge ngakumbi akuyomfuneko ukuba liphindwe, njengakuSuku lwaminyaka le loCamagusho phantsi komnqophiso omdala woMthetho kaMoses. (Hebhere 10:15-18) Ngenxa yako konke oku, ukwazi uYehova okukhoyo kwabo bakumnqophiso omtsha nabaphantsi kwawo ngokwenene kulunge ngakumbi, kunentsingiselo engakumbi, kunengqiqo ngakumbi, kuphelele ngakumbi kunolwazi lukaThixo amaYuda awayenalo phantsi komnqophiso woMthetho.
12. Ngaphezu kwako konke, uYehova ukwesiphi isikhundla kwabo bathatyathelwe kumnqophiso omtsha kwanabo baphantsi kwawo?
12 Ngaphezu kwako konke, uYehova uThixo, uMenzi woMnqophiso, unguKumkani phezu kwabo abangenisa kumnqophiso omtsha naphezu kwabo ababeka phantsi kwawo. (Mateyu 5:34, 35; Yeremiya 10:7) Umpostile uPawulos, kwiminyaka eli-1 850 ngaphambi kokubekwa etroneni kukaYesu njengoKumkani ezulwini ngowe-1914, walatha kulawulo lukaYehova phezu kwabo bathobela imithetho yomnqophiso omtsha, esithi: “Ke kaloku, kuye uKumkani wawo amaphakade, ongenakonakala, ongenakubonakala, kuThixo olumkileyo yedwa, makubekho imbeko nozuko, kuse emaphakadeni asemaphakadeni. Amen.”—1 Timoti 1:17.
UBukumkani BeWaka Leminyaka Emva ‘Kwembandezelo Enkulu’
13. (a) “Isihlwele esikhulu” siya kuzifumana ngokupheleleyo nini yaye phantsi kwaziphi iimeko iintsikelelo ezithululwa ziphuma kumnqophiso omtsha? (b) Yiyiphi injongo ezukileyo umnqophiso omtsha oya kube uyifezile?
13 “Isihlwele esikhulu” ‘sezinye izimvu,’ esingekho kumnqophiso omtsha kodwa esiphantsi kwawo, sikhangele phambili ekuphumeni siphila ‘kwimbandezelo enkulu.’ Emva kokutshatyalaliswa kwale nkqubo ikhoyo negwetyiweyo yezinto, kangangeminyaka eliwaka, siya kunandipha ulawulo lukaYesu Kristu neendlalifa ezingamadlelane naye kumhlaba ocociweyo. (ISityhilelo 7:9-14) Ngoko injongo yomnqophiso omtsha iya kuba iphunyeziwe, eyileyo yokuvelisa ‘abantu abayinqobo’ ukuba babe ziindlalifa zoBukumkani bukaThixo basezulwini. (1 Petros 2:9; IZenzo 15:14) NgoBukumkani bukaThixo, iintsikelelo ziya kuthululwa ngomlinganiselo opheleleyo ‘kwisihlwele esikhulu’ ‘sezinye izimvu’ ezisindileyo. USathana uMtyholi nentlangano yakhe engabonakaliyo yeedemon baya kuphoswa enzonzobileni baze bangakwazi ukuphazamisa.—ISityhilelo 21:1-4; 20:1-3.
14. “Isihlwele esikhulu” esisindileyo siya kube sizilungiselele kakuhle ntoni?
14 “Isihlwele esikhulu” esisindileyo ‘sezinye izimvu’ siya kube sizilungiselele kakuhle ukuphila kwinkqubo entsha yezinto. Njengentsalela yamaSirayeli okomoya, siya kube simazile uThixo “kuthabathela kwabancinane kuse kwabakhulu.” (Yeremiya 31:34) Kumthandazo oya kuThixo, uKumkani olawulayo wakha wathi: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.” (Yohane 17:3) Ngoko oku kwaziwa kukaYehova uThixo kwindalo iphela kuya kuphumela kusindiso olungunaphakade. Oku kuya kuba njalo kungekuphela nje ‘kwinyama’ eya kusindiswa iphila ‘kwimbandezelo enkulu’ kodwa kuya kuba njalo nakumawaka ezigidi abafi abangabantu abaya kuliva ilizwi loKumkani baze baphume emangcwabeni. Lonke ulwazi lukaYehova olufunekayo luya kudluliselwa kwabavusiweyo abanjalo.—Mateyu 24:21, 22; Yohane 5:28, 29; ISityhilelo 20:11-15.
15. Kutheni le nto ukuphunyezwa komnqophiso omtsha kungayi kuphumela nakuyiphi na ilahleko ‘kwisihlwele esikhulu’ ‘sezinye izimvu’?
15 Okonwabisayo kukuba, ukuphunyezwa komnqophiso omtsha kaThixo ukuze uphumelele ngeyona ndlela izukileyo akuyi kuphumela kwilahleko ‘kwisihlwele esikhulu’ sababumvu abasinda kwintshabalalo yale nkqubo yezinto igwetyiweyo. Kunoko, kuya kuvulela indlela yokufunyanwa kweentsikelelo ezizuke ngokude kwangakumbi apha kumhlaba ocociweyo oya kuba ngowabo ukuba bawudle ilifa ibe baya kuba nendima yokuqala ekuguquleni elimiweyo libe yiparadisi yomhlaba. (Mateyu 25:34; Luka 23:43, NW) Ngokukhawuleza, abo bonakalisa umhlaba baya kuba bengekho, “ke bona abamthembayo uYehova, baya kulidla ilifa ilizwe. . . . Abalulamileyo baya kulidla ilifa ilizwe, baziyolise ngobuninzi boxolo.” (INdumiso 37:9-11) Bonke baya kubuzukisa uBukumkani beWaka Leminyaka bukaYehova uThixo nobuphantsi ‘koMthetheli Woxolo’ obulandela ukuphunyezwa komnqophiso omtsha!
[Imifanekiso ekwiphepha 119]
Iindaba ezilungileyo zoBukumkani bukaThixo ziya kushunyayelwa kuwo wonke umhlaba ngaphambi kokuphela kwale nkqubo