IGazi

Ingcaciso: Lulwelo olungummangaliso ngokwenene olutyhutyha imijelwana yabantu neyoninzi lwezilwanyana ezineeseli ezininzi, lunesondlo neoksijini, lufudusa umphutha luze lube nendima enkulu ekulondolozeni umzimba nxamnye nokusulelwa zizifo. Igazi libandakanyeke ngokungenakwahlulwa kwiinkqubo zobomi kangangokuba iBhayibhile ithi “umphefumlo wenyama usegazini wona.” (Lev. 17:11) NjengoMthombo wobomi, uYehova ulungiselele imiyalelo engqalileyo ngendlela elinokusetyenziswa ngayo igazi.

AmaKristu ayalelwa ukuba ‘azile negazi’

Ize. 15:28, 29: “Kwabonakala kulungile kuye uMoya oyiNgcwele, nakuthi [qumrhu elilawulayo lebandla lamaKristu], ukuba kungabekwa phezu kwenu mthwalo ungaphezu kwezi ndawo zifunekayo: zokuba nizile izinto ezibingelelwe kwizithixo, negazi, nento ekrwitshiweyo [okanye, ebuleweyo ayophiswa], nombulo [“nohenyuzo,” NW]; enothi nakuzigcina kuzo, nibe niyalungisa. Hlalani kakuhle.” (Apha ukutya igazi kulinganiswa nokunqula izithixo nohenyuzo, zinto ezo esingamele sifune ukuzifica kuzo.)

Inyama yezilwanyana isenokutyiwa, kodwa hayi igazi

Gen. 9:3, 4: “Zonke izinambuzane eziphilileyo mazibe kukudla kuni; njengomfuno oluhlaza, ndininikile oko konke. Yinyama yodwa enomphefumlo wayo, enegazi layo, eningasayi kuyidla.”

Nasiphi na isilwanyana esisetyenziselwa ukutya sifanele sophiswe ngokufanelekileyo. Esikrwitshiweyo okanye esifele emgibeni nokuba sesifunyenwe sesifile akufanelekanga ukuba sityiwe. (Ize. 15:19, 20; thelekisa iLevitikus 17:13-16.) Ngokufanayo, nakuphi na ukutya okongezwe igazi elipheleleyo okanye intwana yalo akufanele kutyiwe.

Kuphela kukusetyenziswa kwegazi njengedini okwakukhe kwavunyelwa nguThixo

Lev. 17:11, 12: “Umphefumlo wenyama usegazini wona. Mna ndaninika lona esibingelelweni, ukuba kucanyagushelwe imiphefumlo yenu; kuba igazi eli licamagusha ngomphefumlo. Ngenxa yoko ndithe koonyana bakaSirayeli, Makungabikho namnye umphefumlo kuni odla igazi; nomphambukeli ophambukele phakathi kwenu makangalidli igazi.” (Onke loo madini ezilwanyana phantsi koMthetho kaMoses afanekisela kusengaphambili idini elinye likaYesu Kristu.)

Heb. 9:11-14, 22: “Ke yena uKristu, efike wangumbingeleli omkhulu . . . wangena kwaba kanye kweyona ngcwele, kungengalo negazi leebhokhwe nelamathole, kungegazi elilelakhe; wafumana inkululo engunaphakade ngokusihlawulela. Kuba, ukuba igazi leenkomo neleebhokhwe, nothuthu lwethokazi olufefa abaziinqambi, lungcwaliselwa ekuhlambululeni inyama: lobeka phi na ukugqithisela lona igazi likaKristu, owazisondeza ngomoya ongunaphakade, engenasiphako, kuye uThixo, ukusihlambulula isazela senu emisebenzini efileyo, ukuze nikhonze uThixo ophilileyo? . . . Kungaphalalanga gazi, akubikho kuxolelwa.”

Efe. 1:7: “Esinayo sikuye [uYesu Kristu] inkululeko ngokuhlawulelwa ngegazi lakhe, ukuxolelwa ke kweziphoso zethu, ngokobutyebi bobabalo lwakhe.”

Abo babezibanga bengamaKristu kwinkulungwane yokuqala C.E. bayiqonda njani imiyalelo yeBhayibhile engegazi?

UTertullian (malunga nowe-160-230 C.E.) wathi: “Iindlela zenu ezinxamnye nemvelo mazihlazeke phambi kwamaKristu. Alikho kwaukubakho igazi lezilwanyana ezidlweni zethu, kuba ezi zinto zikukutya okuqhelekileyo. . . . Ekuchotshelweni kwamatyala amaKristu nina [maRoma angabahedeni] niwanike iisoseji ezizele ligazi. Kakade ke, neyisekile lelokuba into kanye enizama ngayo ukuba makatyeke endleleni elungileyo ayikho mthethweni kuwo. Xa ninentembelo yokuba aya koyika ukutya igazi lesilwanyana, ninani na le nto nikholelwa ukuba aya kulinqwenela gqitha igazi labantu?”—Tertullian, Apologetical Works, and Minucius Felix, Octavius (New York, 1950), iguqulelwe nguEmily Daly, iphe. 33.

UMinucius Felix (wenkulungwane yesithathu C.E.) wathi: “Igazi lomntu siyakoyika ukulidla kangangokuba asilisebenzisi igazi kwanelezilwanyana ezityiwayo ekutyeni kwethu.”—The Ante-Nicene Fathers (Grand Rapids, Mich.; 1956), ihlelwe nguA. Roberts noJ. Donaldson, Umqu. IV, iphe. 192.

Utofelo Lwegazi

Ngaba isalelo seBhayibhile siquka igazi lomntu?

Ewe, yaye amaKristu okuqala asiqonda ngaloo ndlela. IZenzo 15:29 zithi “nizile . . . negazi.” Ayithi nje kuphela kuzilwe igazi lezilwanyana. (Thelekisa iLevitikus 17:10, eyayisalela ukutyiwa kwayo “yonke into eligazi.”) UTertullian (owabhala ekhusela iinkolelo zamaKristu okuqala) wachaza: “Isalelo ‘esingegazi’ siya kusiqonda (isisalelo) esitsole ngakumbi egazini labantu.”—The Ante-Nicene Fathers, Umqu. IV, iphe. 86.

Ngaba ukulitofela ngokwenene kuyafana nokulitya igazi?

Esibhedlele, xa umguli engakwazi ukutya ngomlomo wakhe, utyiswa ngemibhobho efakwe emithanjeni. Kaloku, ngaba umntu ongazange alifake igazi emlonyeni wakhe kodwa owamkele igazi ngokulitofela ngokwenene ebeya kuba uthobela umyalelo ‘wokuzila igazi’? (Ize. 15:29) Ngokwentelekiso, cinga ngendoda exelelwa ngugqirha ukuba imele izile utywala. Ngaba ibiya kuba iyathobela ukuba iyayeka ukusela utywala kodwa ivume ukuba bufakwe ngqo emithanjeni yayo?

Kwimeko yomguli owala igazi, lukho na unyango olulolunye?

Ngokufuthi umxube onezithako ezinetyuwa olula (saline solution), umxube kaRinger onezithako nedextran unokusetyenziswa njengezandisi zegazi, yaye ezi zinto ziyafumaneka phantse kuzo zonke izibhedlele zezi mini. Eneneni, ubungozi obubangelwa kukutofelwa kwegazi buyaphetshwa ngokusebenzisa le mixube. ICanadian Anaesthetists’ Society Journal (Januwari 1975, iphe. 12) ithi: “Kunokuzuza iingozi ezibangelwa kukutofela igazi uyazuza ngolutho olondla igazi: uphepha ukosulelwa ziibhakteriya okanye ziintsholongwane, izinto ezivelayo ngenxa yotofelo nokwenzakala kolutho olukhuselayo oluyirhodium.” AmaNgqina kaYehova akakuchasanga ngokonqulo ukusetyenziswa kwezi zandisi zegazi zingenagazi.

Eneneni amaNgqina kaYehova ayangenelwa lunyango lwamayeza olulunge ngakumbi kuba akalamkeli igazi. Ugqirha owabhala kwiAmerican Journal of Obstetrics and Gynecology (Juni 1, 1968, iphe. 395) wavuma esithi: “Alithandabuzeki elokuba imeko wena [gqirha otyandayo] apho utyanda ngaphandle kotofelo olunokwenzeka ityekela ekuphuculeni utyando lwakho. Uwuvala ngokukhawuleza nawuphi na umthambo owophayo.”

Zonke iintlobo zotyando zinokwenziwa ngempumelelo ngaphandle kotofelo lwegazi. Ezi ziquka utyando olukhulu lwentliziyo, utyando lobuchopho, ukushunqulwa kwamalungu omzimba nokususwa ngokupheleleyo kwamalungu adliwe ngumhlaza. Ebhala kwiNew York State Journal of Medicine (Oktobha 15, 1972, iphe. 2527), uGqr. Philip Roen wathi: “Asikuthandabuzanga ukuphumeza zonke iinkqubo ezibonisiweyo zotyando apho kuye akwavunywa ukuba kutofelwe igazi.” UGqr. Denton Cooley, kwisiBhedlele Sentliziyo saseTexas, wathi: “Siye samangaliswa gqitha yimiphumo [yokusebenzisa izandisi zegazi ezingenagazi] kumaNgqina kaYehova kangangokuba siqalisile ukusebenzisa le nkqubo kubo bonke abaguli esinabo bentliziyo.” (IUnion yaseSan Diego, Disemba 27, 1970, iphe. A-10) “Utyando olukhulu lwentliziyo ‘ngaphandle kwegazi,’ olwaqala layilelwa amalungu angabantu abakhulu ehlelo lamaNgqina kaYehova kuba unqulo lwawo lukwalela ukutofelwa igazi, ngoku luthe lwamkelwa ngokhuseleko ukuba lusetyenziswe kwiinkqubo ezicekethekileyo zentliziyo kwiintsana nasebantwaneni.”—Cardiovascular News, Februwari 1984, iphe. 5.

Ukuba Ubani Uthi—

‘Niyababulala abantwana benu kuba nisala utofelo lwegazi. Ndicinga ukuba oko kubi’

Usenokuphendula uthi: ‘Kodwa siyabavumela batofwe—utofelo olukhuselekileyo. Siyalwamkela uhlobo lotofelo olungabachanabi kwizinto ezinjengeAIDS, ukudumba kwesibindi, nesifo seengcongconi. Abantwana bethu sifuna bafumane olona nyango lulungileyo, njengoko ndiqinisekile ukuba nawuphi na umzali onothando ebeya kulufuna.’ Mhlawumbi usenokongeza uthi: (1) ‘Xa umntu ophe kakhulu, eyona ntswelo inkulu kukubuyisela umthamo wolwelo. Ngokungathandabuzekiyo uyaqonda ukuba igazi lethu eneneni linamanzi angaphezu kwama-50 ekhulwini; ke kukho iiseli ezibomvu nezimhlophe, njalo njalo. Xa wophe kakhulu, umzimba uthulula izixa ezikhulu ebezikuvimba weeseli zegazi uzifake kwinkqubo yokuhamba kwegazi uze ukhawulezise uvelise ezintsha. Kodwa umthamo wolwelo uyafuneka. Izandisi zomthamo wegazi ezingenagazi zinokusetyenziswa ukuzalisa loo ntswelo, yaye siyakwamkela oku.’ (2) ‘Izandisi zomthamo wegazi ziye zasetyenziswa kumawaka abantu, nto leyo ebangele imiphumo emihle gqitha.’ (3) ‘Okubaluleke ngokude kwangakumbi kuthi kokuthethwa yiBhayibhile kwiZenzo 15:28, 29.’

Okanye unokuthi: ‘Ndiyayiqonda indlela ocinga ngayo. Ndicinga ukuba uthelekelela owakho umntwana ekuloo meko. Njengabazali besiya kwenza nantoni na esemandleni ethu ukulondoloza impilontle yomntwana wethu, akunjalo na? Ke ukuba abazali abanjengam nawe bebeya kwala uhlobo oluthile lonyango lwezamayeza kumntwana wethu, ngokuqinisekileyo bekuya kubakho isizathu esinyanzelisayo sokwenjenjalo.’ Mhlawumbi usenokongeza uthi: (1) ‘Ngaba ucinga ukuba bambi abazali basenokuba baphenjelelwe kokuthethwa liLizwi likaThixo apha kwiZenzo 15:28, 29?’ (2) ‘Ke umbuzo ngulo, Ngaba sinokholo olwaneleyo lokwenza okuyalelwa nguThixo?’

‘Nina bantundini anikholelwa kutofelo lwegazi’

Usenokuphendula uthi: ‘Amaphephandaba aye apapasha amabali ngeemeko ezithile athe anemvo yokuba amaNgqina asenokufa ukuba akalamkeli igazi. Ngaba ucinga ngaloo nto? . . . Kutheni sinesi simo sengqondo nje?’ Mhlawumbi usenokongeza uthi: (1) ‘Uyamthanda na umfazi (indoda) wakho ngokwaneleyo kangangokuba ubungakuvuma ukumncamela ubomi bakho? . . . Kukwakho amadoda abubeka esichengeni ubomi bawo ngenxa yelizwe lawo, yaye ajongwa njengamakhalipha, akunjalo na? Kodwa kukho ubani ongaphezulu kunaye nawuphi na umntu okanye into apha emhlabeni, yaye lowo nguThixo. Ngaba ubuya kububeka esichengeni ubomi bakho kuba umthanda yaye unyanisekile kulawulo lwakhe?’ (2) ‘Imbambano elapha kukunyaniseka kuThixo. LiLizwi likaThixo elisixelela ukuba sizile igazi. (Ize. 15:28, 29)’

Okanye unokuthi: ‘Kukho izinto ezininzi ezithanda ukuqheleka namhlanje yaye ezi amaNgqina kaYehova ayazinxwema kuzo—ngokomzekelo, ukuxoka, ukukrexeza, ubusela, ukutshaya, yaye njengoko ukhankanyile, ukusetyenziswa kwegazi. Ngoba? Kuba silawula ubomi bethu ngeLizwi likaThixo.’ Mhlawumbi usenokongeza uthi: (1) ‘Ubusazi na ukuba iBhayibhile ithi sifanele “sizile igazi”? Bendingathanda ukukubonisa oko. (Ize. 15:28, 29)’ (2) ‘Mhlawumbi uyakhumbula ukuba uThixo wathi kubazali bethu bokuqala, uAdam noEva, babenokutya kuyo yonke imithi esemyezweni ngaphandle komnye. Kodwa abazange bathobele, batya kweso siqhamo salelweyo baza baphulukana nento yonke. Hayi indlela ekwakungebobulumko ngayo oko! Kakade ke, akukho mthi unesiqhamo esalelweyo. Kodwa emva koMkhukula womhla kaNowa uThixo waphinda wamisela isalelo esinye kuluntu. Ngesi sihlandlo sabandakanya igazi. (Gen. 9:3, 4)’ (3) ‘Ke umbuzo wokwenyani ngulo, Siyakholwa na kuThixo? Ukuba siyamthobela, phambi kwethu sinethemba lobomi obungunaphakade emfezekweni phantsi koBukumkani bakhe. Nokuba siyafa, usiqinisekisa ngovuko.’

‘Kuthekani ukuba ugqirha uthi, “Uya kufa ukuba akulitofelwa igazi”?’

Usenokuphendula uthi: ‘Ukuba imeko imbi ngenene, ngaba ugqirha unokuqinisekisa ukuba umntu ogulayo akayi kufa ukuba utofelwe igazi?’ Mhlawumbi usenokongeza uthi: ‘Kodwa kukho ubani onokuphinda amnike ubomi umntu, yaye lowo nguThixo. Akulivumi na elokuba, xa ujongene ngqo nokufa, ukumnikel’ umva uThixo ngokwaphula umthetho wakhe bekuya kuba sisigqibo esingafanelekanga? Mna okunene ndiyakholwa kuThixo. Unjalo na wena? ILizwi lakhe lithembisa uvuko kwabo bakholwayo kuNyana wakhe. Uyakukholelwa na oko? (Yoh. 11:25)’

Okanye unokuthi: ‘Kusenokuthetha ukuba yena ubuqu akayazi indlela yokusingatha imeko ngaphandle kokusetyenziswa kwegazi. Ukuba kunokwenzeka, sizama ukumnxibelelanisa nogqirha onamava ayimfuneko, okanye sifune uncedo lomnye ugqirha.’