Hlala Uhamba Ekukhanyeni Kobuthixo
Ebudeni bokufundisiswa kweli nqaku namabini alandelayo ebandleni, umqhubi ufanele athi mazifundwe iinxalanye ezicatshuliweyo zeyokuQala kaYohane ngokuvuma kwexesha
“UThixo ukukukhanya.”—1 YOHANE 1:5.
1, 2. EyokuQala kaYohane yabhalwa nini yaye ibhalelwa phi, yaye isebenza koobani?
AMANGQINA KAYEHOVA anombulelo ngenxa yokukhanya kobuthixo yaye azimisele ukusoloko ehamba kuko. Noko ke, ukwenza oko akulula, kuba kwanabafundi bokuqala bakaYesu Kristu babejongene nowexuko. Kodwa abapostile bakaYesu abanyanisekileyo bakubambezela ukusasazeka kwalo, yaye ‘owabambezelayo’ yayingumpostile uYohane. (2 Tesalonika 2:1-12) Njengendoda enkulu eyayihlala e-Efese okanye kufuphi nakhona malunga nowama-98 C.E., wabhala incwadi yakhe yokuqala ephefumlelwe ngokobuthixo. Isiluleko sayo sawanceda amaKristu enkulungwane yokuqala ukuba ahambe ekukhanyeni kobuthixo. Kodwa kuthekani ngathi?
2 Amazwi kaYohane aluncedo nakumaKristu enkulungwane yama-20. Ngoko ebudeni bokuzifundela kwakho eli nqaku namabini alandelayo, qiniseka ukuba uyazifunda zonke iinxalenye ezicatshuliweyo zencwadi yakhe yokuqala ephefumlelweyo njengoko zixutyushwa. Kule ncwadi yompostile nakumazwi ethu, izimela-bizo ezinjengesithi “thina” nesithi “kuthi” zibhekisela ngokuyintloko kubalandeli bakaYesu abathanjisiweyo. Kodwa imigaqo esisiseko engobulungisa, engothando, engokholo neminye efanayo, ikwasebenza nakumaKristu anethemba lasemhlabeni.
Ubudlelane Obuzisa Uvuyo
3. Bubuphi ubungqina obukhoyo bokuba uNyana kaThixo waphila, weva ubunzima waza wafa njengomntu, yaye kutheni le nto ebizwa ngokuthi ‘lilizwi lobomi’?
3 Okokuqala uYohane uthetha ‘ngobudlelane’ obuvuyisayo. (Funda eyoku-1 kaYohane 1:1-4.) UYesu, ‘olilizwi lobomi,’ wayekunye noYehova “kwasekuqalekeni” njengendalo kaThixo yokuqala, lowo ‘zadalelwa kuye zonke izinto.’ (Kolose 1:15, 16) Abawexuki abathile benkulungwane yokuqala babesithi abanasono yaye beyikhanyela indawo kaKristu emfaneleyo kwilungiselelo lobuthixo. Kodwa abapostile bakaYesu bamva ethetha, bamqwalasela ngenyameko, yaye bamchukumisa. Babesazi ukuba amandla kaThixo ayesebenza ngaye. Ngoko kwakukho ubungqina bokuzibonela bokuba wayenguNyana kaThixo owakhe waphila, weva ubunzima waza wafa njengomntu. ‘Ulilizwi lobomi’ kuba ‘ubomi [obungunaphakade] babonakaliswa’ ngoYesu, lowo uThixo walungiselela ngaye intlawulelo.—Roma 6:23; 2 Timoti 1:9, 10.
4. Bubonisa ntoni ‘ubudlelane’ abanabo abo bathanjisiweyo?
4 Ngoko abapostile bakuthethayo nabakubhalayo, ‘babengqinela’ umntu ongenasono onguYesu Kristu. UYohane ‘wayixela’ imicimbi enjalo ukuze abathanjiswa babe “nobudlelane,” nezinye iindlalifa zoBukumkani, noYise noNyana Wakhe. Obu ‘budlelane’ bubonisa umanyano yaye bubangela uvuyo olukhulu. (INdumiso 133:1-3; Yohane 17:20, 21) Abawexuki abazithiyileyo izinxulumani zangaphambili enkonzweni kaYehova abasenabudlelane bunjalo noThixo noKristu.
“UThixo Ukukukhanya”
5. Luluphi “udaba” abapostile abalwamkela kuYesu, yaye luyichaphazela njani ihambo yamaNgqina kaYehova?
5 Ngokulandelayo kukhankanywe “udaba” abapostile abalwamkela kuYesu. (Funda eyoku-1 kaYohane 1:5-7.) Olu daba nalu: “UThixo ukukukhanya, akukho bumnyama [akukho nt’ ingengcwele, ekukuziphatha okubi, engeyonyaniso okanye engendawo] kuye.” Ngoko amaNgqina kaYehova aphepha lonke uqheliselo lwesono olunxulumene nobumnyama. (Yobhi 24:14-16; Yohane 3:19-21; Roma 13:11-14; 2 Korinte 6:14; 1 Tesalonika 5:6-9) Ekubeni abawexuki abathile babengakholelwa ukuba kukho imisebenzi esisono, babekubumnyama bokomoya. Babesithi banolwazi olufihlakeleyo, kodwa uThixo ukukukhanya, akafihlakalanga ebumnyameni. Ukukhanya kokomoya ukunikela kuphela kumangqina akhe athembekileyo.—Mateyu 5:14-16; 1 Petros 2:9.
6. Ukuba ‘senza inyaniso,’ yiyiphi intsikelelo eyiyeyethu?
6 Ukuba sithi ‘sinobudlelane’ noThixo kodwa “sibe ke sihamba ebumnyameni,” siphila ubomi besono, “siyaxoka, asiyenzi inyaniso,” okanye asiphili ngokuvisisana nayo. Kodwa ukuba sihamba ngekhondo elivisisana nenyaniso, sisekukhanyeni, kwananjengokuba uThixo enjalo. ‘Sinobudlelane’ namaKristu angoowethu, onke amanyaniswe emfundisweni, kwisimo sengqondo sokomoya, kumsebenzi wokwenza abafundi nakwezinye iinkalo zonqulo olunyulu.
7. Kutheni lento igazi likaYesu ‘linokusihlambulula kuso sonke isono’?
7 Ngokungafaniyo nabawexuki abathile bokuqala, thina ‘sihamba ekukhanyeni’ siyavuma ukuba isono asicocekanga. Igazi likaYesu ‘lisihlambulula kuso sonke isono’ kuba asingoboni bangabom. (Mateyu 12:31, 32) Eneneni, sinombulelo kuba uThixo ebonakalisa inceba kwanakumaKristu enza iimpazamo kodwa aguquke.—INdumiso 103:8-14; Mika 7:18, 19.
Isizinzi Sokucanyagushelwa
8, 9. (a) UYehova uya kusixolela ngokwasiphi isizinzi? (b) Ngokuphathelele isono, babesithini abanye abawexuki, yaye kutheni le nto babephosisile?
8 Ngokulandelayo uYohane ukhankanya isizinzi sokuhlanjululwa esonweni. (Funda eyoku-1 kaYohane 1:8–2:2.) Ukuba sithi, “Asinasono,” siyasikhanyela isibakala sokuba bonke abantu abangafezekanga banesono, yaye “inyaniso ayikho kuthi.” (Roma 5:12) Kodwa uThixo “uthembekile” yaye uyasixolela “ukuba sithi sizivume izono zethu” kuye sinesimo sengqondo sokuguquka esisishukumisela ukuba sisishiye isenzo esiphosakeleyo. (IMizekeliso 28:13) UThixo wathi ngabo bakumnqophiso omtsha: “Ndingabi sasikhumbula isono sabo.” (Yeremiya 31:31-34; Hebhere 8:7-12) Ekubaxoleleni kwakhe, uthembekile kwelo dinga.
9 Ngokungakumbi, uThixo “ulilungisa,” usoloko ebambelele kwimilinganiselo yakhe yobulungisa. Uhlangabezene neemfuneko zokusesikweni ngentlawulelo yaye ‘unokusixolela izono zethu aze asihlambulule kuko konke ukungalungisi’ ukuba ngokholo kwidini likaYesu siyavuma ukuba sinesono. (Hebhere 9:11-15) Ngokufa kwakhe uMesiya wazisusa izono, nanjengokuba ibhokhwe ethwele izono yayithunyelwa entlango ngoMhla Wocamagushelo. (Levitikus 16:20-22; Isaya 53:5, 8, 11, 12; 1 Petros 2:24) Abawexuki abathile bathi, “Asinasono,” ngaloo ndlela ‘bemenza ixoki uYehova.’ Kodwa ‘uThixo akanakuxoka,’ yaye iLizwi lakhe libonisa ukuba bonke abantu abangafezekanga banesono. (Tito 1:2; INtshumayeli 7:20; Roma 3:23) Ewe, ukuthi “asinasono” bekuya kuthetha ukuba ilizwi likaThixo alikho “kuthi,” alikho ezintliziyweni zethu!—Thelekisa amaHebhere 8:10.
10. UYesu “usisicamagushelo” ngayiphi indlela?
10 UYohane ubhala “ezi zinto” ngokuphathelele isono, ukuxolelwa izono nokuhlanjululwa ukuze singasiqheliseli isono. Amazwi akhe afanele asishukumisele ukuba silwe ngozimiselo ukuze singoni. (1 Korinte 15:34) Kodwa ukuba sithi ‘sone’ size siguquke, “sinomthetheleli kuye uYise”—“uYesu Kristu, ilungisa,” olingxengxezelayo ikhondo lethu kuThixo. (Hebhere 7:26; thelekisa uYohane 17:9, 15, 20.) UYesu “usisicamagushelo” Ukufa kwakhe kwahlangabezana neemfuneko zokusesikweni ibe kwenza kwaba nokwenzeka ukuba uThixo abonakalise inceba aze ashenxise isono kumaSirayeli okomoya ‘nakwihlabathi liphela,’ kuquka “isihlwele esikhulu.” (Roma 6:23; Galati 6:16; ISityhilelo 7:4-14) Hayi indlela esilixabisa ngayo elo dini!
Thobela UThixo Uze Ubonakalise Uthando
11. Kungabuphi ubungqina esazi ngabo ukuba ‘sihleli’ kuThixo?
11 Ukuze sihlale sihamba ekukhanyeni kobuthixo, simele sithobele uYehova. (Funda eyoku-1 kaYohane 2:3-6.) Siyaqonda ukuba “siyamazi” uThixo, simqonda yena neempawu zakhe, ukuba ‘siyayigcina imithetho yakhe.’ Nabani na othi uyamazi uYehova kodwa engamthobeli “ulixoki.” Ngokwahlukileyo koko, “uthando lukaThixo lugqibelele,” okanye luphelele, ukuba siyaligcina ilizwi lakhe. ‘Ngobu’ bungqina bokuthobela nokuthanda uThixo, siyazi ukuba ‘sihleli kuye.’ Yaye sinyanzelekile ukuba sihambe njengokuba uNyana wakhe wahambayo, kumsebenzi wokwenza abafundi, kulwalamano lwethu nabanye, njalo njalo.
12. Nguwuphi “umthetho omdala” amaKristu anawo, yaye “mtsha” ngayiphi ingqiqo?
12 Uthando lobuzalwana nalo lubalulekile. (Funda eyoku-1 kaYohane 2:7, 8.) UYohane ubhala ‘umthetho omdala’ lowo abathembekileyo babenawo “kwasekuqalekeni” kubomi babo njengamaKristu. ‘Mdala’ kuba uYesu wawunikela kwiminyaka ngaphambilana xa waxelela abalandeli bakhe ukuba ‘bathandane njengokuba naye wabathandayo.’ (Yohane 13:34) Kanti kwakhona “mtsha” kuba udlulela ngaphaya kothando lommelwane olwalufunwa nguMthetho yaye ufuna ukuvuma ukuzincama kukabani ngenxa yamakholwa angoowabo. (Levitikus 19:18; Yohane 15:12, 13) Ekubeni uthando lwethu lokuzincama lungqina ukuba ukuthobela lo ‘mthetho mtsha kuyinyaniso kokubini kwimeko kaKristu nakweyethu, ubumnyama buyedlula yaye ukukhanya kokwenyaniso sele kubonakala’ phakathi kwethu.
13. Ngokweyoku-1 kaYohane 2:9-11, ngubani ‘osekukhanyeni’ yaye ngubani ongekho kuko?
13 Kanti, ngubani ngenene ‘osekukhanyeni’? (Funda eyoku-1 kaYohane 2:9-11.) Kaloku, “lowo uthi usekukhanyeni, abe emthiyile umzalwana wakhe” usebumnyameni bokomoya “unangoku.” Kodwa “lowo umthandayo umzalwana wakhe uhleli ekukhanyeni,” yaye kwimeko yakhe akukho ‘sikhubekiso.’ Apha igama lesiGrike lithetha isigu sezilwanyana esicutshiweyo yaye libonisa into enokubangela ukuba kwenziwe isono. Eneneni, umntu othi ungumKristu nomthiyileyo umzalwana wakhe “akazi apho aya khona, ngokuba ubumnyama buwamfamekisile amehlo akhe.” (Mateyu 13:13-15) Ngaba esi silumkiso siya kukushukumisela ukuba ubuphephe ubumnyama bokomoya ngokwala ukuvumela ukungavisisani kobuqu, ukuxoka kwabawexuki, okanye nayiphi na enye into ukuba itshabalalise uthando lwakho lobuzalwana?
Isizinzi Sokuba Nentembelo
14. Ngoobani “abantwanana” ‘noobawo’ ababhalelwa nguYohane?
14 Ngokulandelayo uYohane uvakalisa intembelo ‘kubantwanana,’ ngokucacileyo ebhekisela kwibandla liphela. (Funda eyoku-1 kaYohane 2:12-14.) Izono zethu ziye zaxolelwa ‘ngenxa yegama likaKristu,’ kuba kuphela kungaye athe uThixo wenza kwaba nokwenzeka ukuba kuzuzwe usindiso. (IZenzo 4:12) Abathanjisiweyo ‘bayamazi uYise’ kuba ubazele ngomoya wakhe. Bambi ‘bangoobawo’—ekunokwenzeka ukuba bangamakholwa akhulileyo, anamava angakumbi naqhubele phambili ngokomoya. Bayamazi uYesu, owayekho “kwasekuqalekeni” ekubeni uThixo wamdala ngaphambi kwazo zonke ezinye izinto.
15. (a) Ngoobani ‘amadodana’ uYohane awabhalelayo, yaye ‘amoyise njani ongendawo’? (b) Nika umzekelo wendlela ‘esinokumoyisa’ ngayo uSathana namhlanje.
15 La “madodana” uYohane awabhalelayo asenokuba ngamaKristu aselula nangekabi namava. ‘Amoyisile ongendawo,’ uSathana, ngokunganikezeli ‘kumaqhinga’ akhe. (2 Korinte 2:11) Ngokomzekelo, namhlanje oku bekuya kuquka ukuphepha ukuzonwabisa okungacocekanga, umculo ovuselela isini, noncwadi lobuhenyu, zinto ezo ezinokukhukulisa imigaqo yobuKristu zize ziphumele ekuweleni kukuziphatha okubi ngokwesini. La “madodana” amoyisile uSathana kuba ‘omelele’ ngokomoya yaye “ilizwi likaThixo” lihleli kuwo. Ngamana singafana nawo ekwamkeleni amalungiselelo kaThixo okomoya, siluchase uwexuko size siqhubeke sihamba ekukhanyeni kobuthixo.
Uthando Esimele Singabi Nalo
16. Luluphi uthando esimele singabi nalo, kodwa yintoni ebiya kuba yinyaniso kuthi ukuba besineembono namabhongo eli hlabathi?
16 Enoba singamaKristu aselula okanye akhulileyo, kukho uthando esimele singabi nalo. (Funda eyoku-1 kaYohane 2:15-17.) Asimele ‘silithande ihlabathi okanye nantoni na ekulo.’ Kunoko, sifuna ukuzigcina singenabala ngokonakaliswa ngabantu abangemalungisa yaye simele singawusezeli “umoya” walo, okanye sishukunyiswe sisimo salo sengqondo esesameleyo nesisesesono. (Efese 2:1, 2; Yakobi 1:27) Ukuba besiya kuba neembono namabhongo eli hlabathi, “uthando lukaYise” belungayi kubakho kuthi. (Yakobi 4:4) Eneneni oko kufuna ukucingisiswa ngomthandazo, akunjalo na?
17. Yiyiphi iminqweno yehlabathi amaKristu angamele ayanelise?
17 “Konke okusehlabathini” akuphumi kuThixo. Oku kuquka “inkanuko yenyama,” ukuzanelisa okuthetha ukwanelisa loo minqweno yesono njengeenkanuko zokuziphatha okubi ngokwesini. (1 Korinte 6:15-20; Galati 5:19-21) Kwakhona kufuneka sikuphephe ukunikezela ‘kwinkanuko yamehlo.’ Isiqhamo esalelweyo esasinqweneleka ngokwenkangeleko samhenda uEva, yaye ukujonga kukaDavide uBhatshebha ngoxa wayehlamba kwakhokelela kwisono esinzulu. (Genesis 3:6; 2 Samuweli 11:2-17) Ngoko, ukuze sihlale sihamba ekukhanyeni kobuthixo, simele siphephe ukuzonwabisa okuthob’ isidima nezinye izinto ezinomtsalane kwiminqweno yesono nezonakalisa intliziyo.—IMizekeliso 2:10-22; 4:20-27.
18. Kutheni le nto ‘ukubonakalisa kukabani ngokuqhayisa izinto zobu bomi’ kungekho ngqiqweni, yaye yintoni okusilelayo ukuyizisa?
18 Kwakhona okuphuma ehlabathini ‘kukubonakalisa kukabani ngokuqhayisa izinto zobomi’ (NW), Umntu onekratshi unokuqhayisa ngobutyebi bakhe, ngempahla yakhe nangezinye izinto, zinto ezo ezinokulahleka. ‘Ukuqhayisa’ kwakhe kunokuchukumisa abanye abantu kuze kuzise udumo oluphela ngokukhawuleza kodwa kungazisi intsikelelo yobuthixo.—Mateyu 6:2, 5, 16, 19-21; Yakobi 4:16.
19. Kuza kwenzeka ntoni kweli hlabathi, yaye esi sibakala sifanele sisichaphazele njani?
19 Khumbula ukuba “ihlabathi ke liyadlula” yaye liza kutshatyalaliswa. (2 Petros 3:6) Iminqweno nethemba lalo liya kutshabalala kunye nalo, njengoko koba njalo nangabantu abalithandayo. UYohane uthi, “Ke yena owenza ukuthanda kukaThixo uhleli ngonaphakade.” Ngoko masihlale sicinga ngobomi obungunaphakade ‘ngokukuncama ukukhanuka kwehlabathi’ nangokuqhubeka sihamba ekukhanyeni kobuthixo.—Tito 2:11-14.
Ukuzilinda Nxamnye Nowexuko
20. Babebizwa njani abo ‘babemchasile uKristu,’ yaye ukuvela kwabo kwakungqina ukuba yintoni le ifikileyo?
20 Ngoku uYohane ulumkisa nxamnye nabachasi-kristu. (Funda eyoku-1 kaYohane 2:18, 19.) Ukhumbuza amakholwa angoowabo ukuba eva kubapostile ukuba “umchasi-Kristu uyeza.” Ukuvela ‘kwabachasi-kristu abaninzi’ kwangqina ukuba ‘yayililixa lokugqibela,’ inxalenye yokugqibela yexesha labapostile. Nangona abo ‘babechasene noKristu’ babebumba “umchasi-kristu” oyintlanganisela, abachasi-kristu abaninzi babezimilisa ngathi banqula uThixo kodwa “babengengabo abethu” yaye babushiya ubuKristu bokwenyaniso. Siyavuya kuba ukushiya okanye ukugxothwa kwabo banjalo namhlanje kuthintela ukonakala kwebandla.
21. Kutheni le nto amaKristu azelwe ngomoya ‘enolwazi,’ ibe yiyiphi “inyaniso” ayaziyo?
21 Iimbono zabawexuki zichasiwe ngamaKristu azelwe ngomoya nanyanisekileyo. Ekubeni ‘intambiso evela koyingcwele,’ uYehova, iwanceda ukuba aliqonde iLizwi lakhe, ‘onke anolwazi.’ (Funda eyoku-1 kaYohane 2:20, 21.) Ngokuqinisekileyo ayayazi “inyaniso” njengoko ingoYesu Kristu, ngoxa abawexuki beneengcamango eziphosakeleyo ngaye. Ekubeni “kungekho buxoki buphuma enyanisweni,” bonke abathandi bakaYehova bazichasile iimbono ezinjalo zobuxoki yaye babachasile nabo bazithethelelayo.
22. UC. T. Russell wenza ntoni xa omnye wezinxulumani zakhe zokuqala wayikhanyelayo intlawulelo?
22 Ngapha koko, “ngubani na ixoki, ingenguye okhanyelayo ukuba uYesu unguye uKristu,” uMthanjiswa kaThixo? (Funda eyoku-1 kaYohane 2:22-25.) Ewe, ‘lowo umkhanyelayo uYise noNyana ungumchasi-kristu’! Okubangel’ umdla kukuba, xa isinxulumani sokuqala somfundi weBhayibhile onguCharles T. Russell sayikhanyelayo intlawulelo, uRussell warhoxa ekunxulumaneni naso waza waqalisa ukupapasha lo lindixesha, obesoloko evakalisa inyaniso engemvelaphi kaKristu, indima yakhe njengoMesiya, nenkonzo yothando ‘njengesicamagushelo.’
23. ‘Ukuvuma uNyana’ kuluchaphazela njani ulwalamano lwethu noThixo, nethemba lethu?
23 UYehova akangomhlobo wabawexuki abamkhanyelayo uKristu. (Yohane 5:23) Kodwa thina ‘esivuma ekuhleni ukuba uNyana unoYise singabo,’ ekubeni sikulwalamano olukholisekileyo noThixo. (Mateyu 10:32, 33) Abalandeli bakaYesu bokuqala abanyanisekileyo babambelela koko bakuvayo ngoNyana kaThixo “kwasekuqalekeni” kwabo ukuphila njengamaKristu. Yaye ukuba inyaniso efanayo isezintliziyweni zethu, siya “kuhlala” noThixo noKristu yaye siya kwamkela “idinga,” ubomi obungunaphakade.—Yohane 17:3.
Ukufundiswa NguYehova Uthixo
24. Ngoobani ‘abanentambiso’ yomoya oyingcwele, yaye kutheni le nto ‘bengafuni nabani na wokubafundisa’?
24 Ukuze sihambe ekukhanyeni kobuthixo size singalahlekiswa ngabawexuki, sifuna ukufundiswa ngokufanelekileyo ngokomoya. (Funda eyoku-1 kaYohane 2:26-29.) Abo bazelwe ngomoya ‘banentambiso’ abayinikwe ngomoya oyingcwele, bayamazi uThixo noNyana wakhe, yaye ‘abaswele nabani na [umwexuki] ukuba abafundise.’ Ngomoya wakhe othambisayo, uThixo ‘ufundisa’ amaSirayeli okomoya “ngeento zonke” ezifunekayo ukuze amnqule ngokwamkelekileyo. (Yohane 4:23, 24; 6:45) Siyavuya kuba njengamaNgqina kaYehova sizuza loo mfundiso yokomoya ephuma kuThixo ‘ngomkhonzi othembekileyo noqondayo.’—Mateyu 24:45-47.
25, 26. (a) Kutheni le nto abathanjisiweyo ‘benokungafihlisi’? (b) Kuthetha ntoni ‘ukwenza ubulungisa’?
25 UYohane ubongoza abo bathanjisiweyo nabafundiswe kakuhle ukuba ‘bahlale’ kuThixo. Aba ‘bahleli’ kuYehova ngendlela efanayo bamanyene noNyana wakhe. (Yohane 14:19-21) Kubongozwa umanyano olunjalo ukuze “xa [uKristu] athe wabonakaliswa, sibe nokungafihlisi, singadani, simbaleke ekufikeni kwakhe,” oko kukuthi, ebudeni beParousia yakhe.
26 Ekubeni ngoku siphila ebudeni ‘bokufika’ kukaYesu, sinokuqiniseka njani ukuba asinanto inokusenza sibe neentloni nokuba ngokwenene sihamba ekukhanyeni kobuthixo? ‘Ngokuqhelisela ubulungisa.’ UYohane uqiqa ngokuthi, ‘Ukuba siyazi ukuba uThixo ulilungisa, siyazi ukuba bonke abenza ubulungisa bazelwe nguye.’ ‘Ukuqhelisela ubulungisa’ kuthetha ukuthobela imithetho kaThixo, ukuphepha okubi, nokubandakanyeka emisebenzini emihle njengaleyo yokwenza abafundi nokunceda amakholwa angoowethu. (Marko 13:10; Filipi 4:14-19; 1 Timoti 6:17, 18) ‘Ukuzalwa’ nguThixo kuthetha ‘ukuzalwa kwakhona’ njengabantwana bakhe bokomoya.—Yohane 3:3-8.
27. Yintoni umpostile uYohane aza kusixelela yona ngokulandelayo?
27 Ngoko uYohane uyibonisile indlela yokuhlala sihamba ekukhanyeni kobuthixo. Ngokulandelayo usibonisa indlela yokuphila njengabantwana bakaThixo. Oku kufuna ntoni?
Zithini Iimpendulo Zakho?
◻ Bubuphi ubungqina uYohane abunikelayo bokuba uNyana kaThixo waphila, weva ubunzima waza wafa njengomntu?
◻ UYesu “usisicamagushelo” ngayiphi indlela?
◻ Nguwuphi umyalelo amaKristu anawo ‘omdala’ ‘nokwangomtsha’?
◻ Kuza kwenzeka ntoni kweli hlabathi, yaye esi sibakala sifanele sisichaphazele njani thina njengamaKristu?
◻ Abathanjisiweyo banokuqiniseka njani ukuba bahamba ekukhanyeni kobuthixo?
[Amagama acatshuliweyo akwiphepha 12]
Ngaba ubonakalisa uxabiso ngedini likaYesu?