Hlala Ubonakalisa Uthando Nokholo
“Lowo uhleli eluthandweni uhleli kuye uThixo.” “Lulo ke olu uloyiso oluleyisayo ihlabathi, ukholo lwethu.”—1 YOHANE 4:16; 5:4.
1, 2. Ziziphi iimpawu ezibethelelwa ngokukhethekileyo kweyoku-1 kaYohane 4:7-5:21?
UYEHOVA uluthando lumntwisiwe, yaye abo banqwenela ukumkholisa bamele babonakalise olu phawu lokuhlonel’ uThixo. Umpostile uYohane ukwenza kucace oku kwinxalenye yokugqibela yencwadi yakhe yokuqala ephefumlelweyo.
2 AmaKristu okwenyaniso akwamele abonakalise ukholo. Kuphela kungale ndlela anokuthi oyise ihlabathi aze ahlale enqabisekile kwinkoliseko kaYehova. Ngoko, njengokuba sifundisisa le nxalenye yokugqibela yencwadi kaYohane, masikuqwalasele ngomthandazo ukubaluleka kokubonakalisa uthando nokholo.
‘Masithandane’
3, 4. Luluphi ulwalamano ukubonakalisa uthando ekunalo ekwazini kwethu uThixo?
3 UYohane ubethelela ukubaluleka kothando. (Funda eyoku-1 kaYohane 4:7, 8.) ‘Iintanda’ ezingamaKristu zibongozwa ukuba ‘ziqhubeke zithandana, kuba uthando luphuma kuThixo,’ ekubeni uYehova enguMthombo walo. “Bonke abanothando bazelwe nguThixo [njengomntu ngamnye ozelwe ngomoya], bayamazi uThixo,” ekubeni beqhelene neempawu neenjongo zikaYehova, neendlela abonakalisa ngazo uthando. Namhlanje oku ‘kwaziwa kukaThixo’ kuye kwafikelela ‘nakwisihlwele esikhulu’ ‘sezinye izimvu’ zikaKristu.
4 Ukwazi uThixo kuthetha ukuzixabisa ngokwenyaniso iimpawu zakhe, ukumthanda ngokupheleleyo, nokubambelela kuye njengoMongami wethu. Kodwa “lowo ungenaluthando akazange amazi uThixo.” Abo bangabonakalisi uthando lobuKristu ‘abamazanga uThixo, kuba uThixo uluthando.’ Ewe, uthando lolona phawu lukaYehova lubalaseleyo, nto leyo ecaca kumalungiselelo akhe angokomoya nangokwenyama awenzele uluntu.
5. Bubuphi obona bungqina bukhulu bokuba “uThixo uluthando”?
5 Ngokulandelayo kuchazwe obona bungqina bucacileyo bokuba “uThixo uluthando.” (Funda eyoku-1 kaYohane 4:9, 10.) UYohane uthi: “Kwabonakaliswa ngale nto ukusithanda kukaThixo [njengaboni abebefanelwe kukufa], ngokuthi uThixo amthume ehlabathini uNyana wakhe, ekuphela kwamzeleyo, ukuze sidle ubomi naye.” UYesu ‘unguNyana kaYehova okuphela kwamzeleyo’ ngokwendlela yokuba ungokuphela kowadalwa ngokungqalileyo nguYehova. (Yohane 1:1-3, 14; Kolose 1:13-16) Ibe uYesu ‘wathunyelwa ehlabathini’ ngokuthi abe ngumntu, ephumeza ubulungiseleli bakhe esidlangalaleni, yaye kamva esifa ukufa okulidini. (Yohane 11:27; 12:46) ‘Ukuzuza ubomi obungunaphakade ngaye,’ enoba kusezulwini okanye emhlabeni, kufuna ukukholelwa kwixabiso ledini lakhe lentlawulelo.
6. Ngoxa sasingaboni ababengamthandi uThixo, wenza ntoni yena?
6 Sasingaboni ababengamthandi uThixo xa “wasithandayo yena, wamthuma uNyana wakhe ukuba abe sisicamagushelo sezono zethu.” Idini likaKristu labangela kwaba nokwenzeka ngathi ukuba sibuyiselwe kulwalamano olufanelekileyo noThixo. (Roma 3:24, 25; Hebhere 2:17) Ngaba uyakuxabisa oku kubonakaliswa kuzuke kangaka kothando obelungasifanele nguBawo wethu wasezulwini?
7. (a) Ekubeni singenakuthi siyamthanda uYehova kuba simbonile, sinokubonakalisa njani ukuba siyamthanda? (b) Ukubonakalisa kwethu uthando lobuzalwana kungqina ntoni?
7 Ukusithanda kukaThixo kufanele kuchaphazele isimo sethu sengqondo ngabanye. (Funda eyoku-1 kaYohane 4:11-13.) Ekubeni yena wasithandayo ngoxa thina sasingaboni, “nathi sifanele ukuthandana.” Phakathi kwabantu, “akukho namnye owakha wambona uThixo.” Ngoko asinakuthi siyamthanda uYehova kuba simbonile. (Eksodus 33:20; Yohane 1:18; 4:24) Noko ke, ngokubonakalisa uthando, sibonisa ukuba siyawuthanda uMthombo wolu phawu. Uthando lwethu lobuzalwana lubonisa ukuba “uThixo uhleli kuthi, nothando lwakhe lugqibelele,” okanye lukumlinganiselo opheleleyo, kuthi. Yaye siyazi ukuba “sihleli” kuYehova “ngokuba usinike okomoya wakhe.” Ukubonakalisa kwethu uthando lobuzalwana kubonisa ukuba umoya kaYehova uyasebenza ngaphakathi kuthi, kuba uthando lusesinye seziqhamo zawo. (Galati 5:22, 23) Oku kubonisa ukuba siyamazi uThixo yaye sikholisekile kuye.
8. Bubuphi ubungqina obongezelelekileyo bokuba ‘sihleli kuThixo’?
8 Kukho ubungqina obongezelelekileyo bokuba “sihleli kuThixo.” (Funda eyoku-1 kaYohane 4:14-16a.) Ekubeni ‘sikubonile’ oko uYesu wakwenzayo emhlabeni nendlela aweva ubunzima ngayo ngenxa yoluntu, uYohane ‘wayenokunikela ubungqina bokuba uYise umthumile uNyana Wakhe ukuba abe nguMsindisi wehlabathi’ loluntu olunesono. (Yohane 4:42; 12:47) Ngaphezu koko, ‘uThixo uhleli kuthi yaye nathi sihleli kuye’ ukuba sivuma ngokusuk’ entliziyweni ukuba uYesu Kristu unguNyana wakhe. Oku kufuna ukuqhelisela ukholo nokunikela ubungqina basekuhleni bokuba uYesu unguNyana kaThixo. (Yohane 3:36; Roma 10:10) Ukukholosa kwethu ‘ngothando lukaThixo olukuthi’ kunikela ubungqina obungakumbi bokuba enoba singabentsalela ethanjisiweyo okanye ‘abezinye izimvu,’ sihleli kuYehova.
9. (a) Ukuthanda uThixo ‘kunokugqityeleliswa’ ngayiphi ingqiqo, yaye oku kuya kuluchaphazela njani ulwalamano lwethu nabanye? (b) Uthando ‘olugqibeleleyo’ lukhulisa ntoni?
9 Ngokulandelayo uYohane ubonisa ukuba uthando ‘lunokwenziwa lugqibelele.’ (Funda eyoku-1 kaYohane 4:16b, 17.) Siyakhunjuzwa ukuba “uThixo uluthando.” Ngenxa yokuba ‘sihleli eluthandweni,’ sibonakalisa esi siqhamo somoya kaYehova, ‘sihleli kuThixo.’ Ukuba ukuthanda uYehova ‘kugqityelelisiwe kuthi,’ sifikelele kumlinganiselo opheleleyo wokumthanda, siya kuwathanda amakholwa angoowethu. (Thelekisa indinyana 12.) Uthando ‘olugqibeleleyo’ kwakhona lukhulisa ‘ukungafihlisi’ kuThixo ngomthandazo ngoku ‘nangomhla womgwebo’ onxulumene nobukho bukaKristu. Abo babonakalisa uthando olunjalo abayi kuba nesizathu sokoyika ukuba umgwebo kaThixo uya kuba nzima. Ukuba sibonakalisa uthando, ngengqiqo ‘anjalo ngayo yena [uYesu], sinjalo nathi kweli hlabathi.’ Ewe, sifana naye ekunandipheni ubabalo njengabantwana bakaThixo kweli hlabathi loluntu elityekileyo kuThixo.
10. Abo uthando lwenziwe ‘lwagqibelela’ kubo yintoni abangenayo?
10 Abo phakathi kwabo uthando luye lwenziwa ‘lwagqibelela’ abanalo uloyiko olwenza kube nzima ukuthandaza. (Funda eyoku-1 kaYohane 4:18, 19) “Uloyiko lunexhala” obeluya kusithintela ukuthetha noYehova ngokukhululekileyo. Ngoko ukuba sinoloyiko olunjalo, ‘asigqibelele eluthandweni.’ Kodwa ukuba siye ‘sagqibelela eluthandweni,’ olu phawu luzalisa iintliziyo zethu, lusishukumisela ukuba senze ukuthanda kukaThixo, yaye lusishukumisela ukuba sihlale sisondele kuBawo wethu wasezulwini ngomthandazo. Ngokuqinisekileyo sinesizathu sokumthanda uYehova yaye sithandaze kuye, kuba kunjengokuba uYohane esithi, ‘Siyamthanda, ngokuba yena wasithanda kuqala.’
11. Kutheni le nto kusengqiqweni ukuba sithobele umthetho othi: “Lowo umthandayo uThixo umele amthande nomzalwana wakhe”?
11 Kakade ke, ukuthi nje siyamthanda uThixo akwanele. (Funda eyoku-1 kaYohane 4:20, 21.) Nabani na othi, “Ndiyamthanda uThixo” abe emthiyile umzalwana wakhe wokomoya “ulixoki.” Ekubeni sinokumbona umzalwana wethu size siqwalasele iimpawu zakhe zokuhlonel’ uThixo, ukubonakalisa ukumthanda kufanele kube lula ngakumbi kunokuthanda uThixo ongabonakaliyo. Eneneni, “lowo ungamthandiyo umzalwana wakhe ambonileyo, angathini na ukumthanda uThixo angambonanga?” Ngoko kusengqiqweni ukuba sithobele lo ‘mthetho’ uthi: “Lowo umthandayo uThixo umele amthande nomzalwana wakhe.”
Ngubani Oloyisayo Ihlabathi?
12. Ekubeni simthanda uThixo, luluphi olunye uthando ebesiya kulindelwa ukuba sibe nalo?
12 Ngokulandelayo uYohane usibonisa oko ngenene kuthethwa kukumthanda uThixo. (Funda eyoku-1 kaYohane 5:1-5.) Okokuqala, umpostile uphuhlisa elokuba “bonke abakholwayo ukuba uYesu unguye uKristu” (uMesiya, okanye uMthanjiswa kaYehova) “bazwele nguThixo,” okanye baye bazalwa ngomoya nguYehova. Ngaphezu koko, bonke abathanda uMzali, uYehova, bathanda nabani na “lowo uzelweyo nguye.” Ewe, bonke abantwana bakaThixo abathanjisiweyo bayamthanda yaye bebeya kulindelwa ukuba bathandane. Uthando lobuzalwana olunjalo lukwaluphawu ‘lwesihlwele esikhulu’ ‘sezinye izimvu’ esinethemba lasemhlabeni.—Yohane 10:16; ISityhilelo 7:9.
13. (a) Kutheni le nto imithetho kaThixo ‘ingenzima’ kuthi? (b) ‘Siloyisa njani ihlabathi’?
13 ‘Siyazi ukuba siyabathanda abantwana bakaThixo xa sukuba simthanda uThixo ibe siyigcina nemithetho yakhe.’ Enyanisweni, ‘ukumthanda uThixo kuthetha ukuba siyayigcina imithetho yakhe.’ Ekubeni sithanda uThixo nobulungisa, sivuyiswa kukugcina imithetho yakhe. UYohane uthi loo mithetho “ayinzima” kuthi “kuba konke okuzelweyo nguThixo kuyaleyisa ihlabathi.” ‘Ukonke’ usenokubhekisela kumandla avela kuThixo ‘okuloyisa ihlabathi,’ okanye ukuloyisa ibutho labantu elingenabulungisa nezihendo zalo zokwaphula imithetho kaYehova. (Yohane 16:33) ‘Uloyiso oluloyisayo ihlabathi’ ‘kukukholwa kwethu’ kuThixo, kwiLizwi lakhe nakuNyana wakhe. Ukuba ‘siyakholwa ukuba uYesu unguNyana kaThixo,’ ‘siyaloyisa ihlabathi’ ngokuchasa ukucinga kwalo okuphosakeleyo neendlela zalo zokuziphatha okubi nangokugcina imithetho kaThixo.
14. (a) UYesu weza njani “ngamanzi”? (b) UYesu wabonakaliswa njani enguNyana kaThixo ‘ngegazi’? (c) Umoya oyingcwele ‘ungqina’ njani ngoYesu Kristu?
14 Ekubeni ukukholelwa kuYesu kubaluleke kangaka ukuze ‘sibe ngaboyisi behlabathi,’ uYohane unikela ubungqina obanikelwa ngoKristu ‘ngamangqina amathathu.’ (Funda eyoku-1 kaYohane 5:6-8.) Okokuqala uYohane uthi uYesu ‘weza ngamanzi.’ Xa uYesu wabhaptizwa emanzini ukufuzisela ukuzinikela kwakhe kuThixo, uYehova wathi: “Lo nguNyana wam oyintanda, endikholisiweyo nguye.” (Mateyu 3:17) Kwakhona uKristu wabonakaliswa “ngegazi” elaphalala ekufeni kwakhe njengentlawulelo ukuba unguNyana kaThixo. (1 Timoti 2:5, 6) Ngaphezu koko, uYohane uthi, “umoya [oyingcwele] ke ungulo ungqinayo, ngokuba umoya uyiyo inyaniso.” Ukwehlela komoya kuYesu ngexesha lokubhaptizwa kwakhe kwamngqina enguNyana kaThixo. (Mateyu 3:16; Yohane 1:29-34) Umoya kaYehova wamnceda uYesu ukuba aphumeze uthumo lwakhe aze enze nemisebenzi yamandla. (Yohane 10:37, 38; IZenzo 10:38) Ngomoya, uThixo wabangela kwabakho ubumnyama obungaqhelekanga, unyikimo lomhlaba, nokukrazuka komkhusane wetempile xa uYesu wathi wafa, kwandula ke kwangaloo moya mnye uThixo wamvusa.—Mateyu 27:45-54.
15. Ngawaphi la ‘mangqina mathathu’?
15 Ngaloo ndlela “bathathu abo bangqinayo” ukuba uYesu unguNyana kaThixo. Aba (1) ngumoya oyingcwele, (2) ngamanzi uYesu awabhaptizwa ngawo noko akumelayo (ukuzinikela kwakhe kuYehova), (3) negazi elaphalalayo ekufeni kwakhe njengentlawulelo. Aba bathathu “bayavumelana” ekunikeleni ubungqina bokuba uYesu unguNyana kaThixo, lowo simele sibe nokholo lokwenyaniso kuye ukuba siza kuzuza ubomi obungunaphakade.—Thelekisa iDuteronomi 19:15.
Ubungqina Obunikelwa NguThixo
16. UYehova ubunikele njani ubungqina ngoYesu?
16 UThixo uye wanikela ubungqina ngoNyana wakhe. (Funda eyoku-1 kaYohane 5:9-12.) “Ukuba ubungqina babantu [abangafezekanga] siyabamkela [njengobuyinyaniso njengokuba ngokuqhelekileyo sisenza encokweni nasenkundleni], ubungqina bukaThixo bungaphezulu.” (Yohane 8:17, 18) Ekubeni ‘uThixo engenakuxoka,’ sinokuthembela ngokwenene ‘kubungqina abunikeleyo ngoNyana wakhe.’ Yaye uYehova uye wathi uYesu Kristu unguNyana wakhe. (Tito 1:2; Mateyu 3:17; 17:5) Ngaphezu koko, nguThixo owabangela loo ‘mangqina mathathu,’ oko kukuthi, umoya Wakhe oyingcwele, amanzi ekwabhaptizwa ngawo uYesu negazi likaYesu elaphalalayo.
17. Yiyiphi ekuphela kwendlela ekunokwenzeka ngayo ukuzuzwa kosindiso?
17 “Lowo ukholwayo kuye uNyana kaThixo unabo ubungqina ngaphakathi kwakhe,” okanye “kuye,” kuba bonke ubungqina bumeyisela kwelokuba uYesu unguNyana kaThixo. Kodwa “lowo ungakholwayo nguye uThixo” njengengqina elithembekileyo ngokuphathelele uNyana Wakhe umenza uYehova abonakale elixoki. Kakade ke, ubungqina obunikelweyo bobokuba “uThixo usinike ubomi obungunaphakade, yaye obo bomi bukuye uNyana wakhe.” Kuphela kungokukholelwa kuYesu njengoNyana kaThixo ekuya kuthi ukusindiselwa kubomi obungunaphakade kube nokwenzeka. (Yohane 11:25, 26; 14:6; 17:1-3) Ngoko “lowo unaye uNyana” ngokukholelwa kuye unesibabalo sobomi obungunaphakade. (Yohane 20:31) Kodwa “obu bomi” abuyi kunanditshwa nguye nabani na ongakholelwayo ukuba uYesu unguNyana kaThixo.
Umthandazo Uyasebenza!
18. Kwakutheni ukuze uYohane abhale “ezi zinto”?
18 Ngokulandelayo uYohane unikela injongo esisiseko yencwadi yakhe yaye uxubusha umthandazo. (Funda eyoku-1 kaYohane 5:13-15.) Uye wabhala “ezi zinto” ukuze kwaziwe ‘ukuba sinobomi obungunaphakade.’ Le yinkolelo yethu njengabo bakholelwayo ‘kwigama’ loNyana kaThixo. (Thelekisa eyoku1 kaYohane 3:23.) Yaye abawexuki, abangengobethu, abanakulutshabalalisa olo kholo.—1 Yohane 2:18, 19.
19. (a) Ngokweyoku-1 kaYohane 5:14, 15, yiyiphi “intembelo” esinayo kuThixo? (b) Ziziphi ezinye zezinto esinokuzithandazela ngokufanelekileyo?
19 KuThixo ‘sinentembelo,’ okanye ‘ukungafihlisi,’ kangangokuba nantoni na esiyicelayo kuye emthandazweni “ngokokuthanda kwakhe, uyasiva.” Ngokufanelekileyo sithandazela izinto ezinjengokuzukiswa kwegama likaYehova, umoya wakhe, ubulumko bokuhlonel’ uThixo, nokuhlangulwa kongendawo. (Mateyu 6:9, 13; Luka 11:13; Yakobi 1:5-8) Yaye “siyazi ukuba sinazo izinto ezicelwayo, esizicelileyo kuye,” ‘uMphulaphuli wemithandazo.’—INdumiso 65:2.
20, 21. (a) Sisiphi “isono esingasingisi kufeni”? (b) Kutheni kuphosakele nje ukuthandazela ‘isono esisingisa ekufeni’?
20 Ngokulandelayo uYohane uthetha ngomthandazo nangeendidi ezimbini zesono. (Funda eyoku-1 kaYohane 5:16, 17.) “Isono esingasingisi ekufeni” asisosono sangabom, yaye bekungayi kuba yinto ephosakeleyo ukuthandazela ukuba umenzi wobubi oguqukayo axolelwe. (IZenzo 2:36-38; 3:19; Yakobi 5:13-18) Kodwa bekuya kuba yinto ephosakeleyo ukuthandazela ‘isono esisingisa ekufeni’ kuba esi sisono sangabom nxamnye nomoya oyingcwele, ekungenakwenzeka ukuba ubani axolelwe ngaso. (Mateyu 12:22-32; Hebhere 6:4-6; 10:26-31) Aboni abanjalo baya eGehena, batshatyalaliswe ngonaphakade ‘ekufeni kwesibini.’ (ISityhilelo 21:8; Mateyu 23:15) Ngoko ngoxa uYehova enguMgwebi wokugqibela, asifuni kuzibeka engozini yokungamkholisi ngokuthandazela umoni xa ubungqina bubonisa ukuba unetyala ‘lesono sangabom esisingisa ekufeni.’
21 Ngenxa yoko, “ukuba umntu [ingakumbi umdala othanjiswe ngomoya] ubona umzalwana wakhe esona isono esingasingisi kufeni [“kukufa kwesibini”], wocela, uThixo amnike ubomi [umoni],” emsindisa kwintshabalalo engunaphakade. Kakade ke, “konke ukungalungisi sisono,” okanye ukusilela kuphawu oluthile ngokuphathelele imilinganiselo kaThixo yobulungisa. “Kukho sono singasingisi khona ekufeni” kuba sibangelwa kukungafezeki kwethu, siyaguquka, yaye isono sigutyungelwa lidini likaKristu.
Iimbalasane Zencwadi KaYohane
22. Ngubani ‘ongamchukumisiyo’ umKristu onyanisekileyo, yaye umntu onjalo unokuthandazela ntoni ngentembelo?
22 Ngoku uYohane ushwankathela iingongoma ezisisiseko zencwadi yakhe. (Funda eyoku-1 kaYohane 5:18-21.) Bonke “abazelwe nguThixo” njengamaKristu athanjiswe ngomoya “aboni.” UYesu Kristu, “lowo wazalwayo nguThixo” ngomoya oyingcwele, ‘uyamgcina, yaye ongendawo [uSathana] akamchukumisi.’ UmKristu ethanjisiweyo nonyaniseke ngolo hlobo unokuthandaza ngentembelo ukuba ahlangulwe kongendawo yaye, ‘ngekhaka lokholo,’ unokusinda kwingozi yokomoya ‘yeentolo ezivuthayo’ zikaSathana.—Mateyu 6:13; Efese 6:16.
23. ‘Ihlabathi lilele njani kongendawo’?
23 Ekubeni abathanjisiweyo benobungqina bokuba bangoonyana bokomoya bakaYehova, banokuthi, “SingabakaThixo.” Isibakala sokuba benokholo kuKristu yaye bengasiqheliseli isono singqina ukuba bangabantwana bakaThixo abo uSathana angakwazanga ‘ukubachukumisa.’ “Ihlabathi [ibutho labantu elingemalungisa] liphela lilele kongendawo,” uSathana uMtyholi. (Efese 2:1, 2; ISityhilelo 12:9) Ihlabathi liphantsi kwempembelelo engendawo kaSathana nolawulo lwakhe, alenzi naliphi na ilinge lokuphuncuka khon’ ukuze lenze ukuthanda kukaThixo.
24. UYesu uye ‘wasinika ingqondo’ ukusa kuwuphi umkhamo?
24 Abefundisi bobuxoki abathile bavakalisa ukuba uKristu akazange eze esenyameni. (2 Yohane 7) Kodwa ubungqina obunikelwe kule ncwadi benza uYohane akwazi ukuthi, “Siyazi ukuba uNyana kaThixo ufikile.” (1 Yohane 1:1-4; 5:5-8) Ngaphezu koko, uYesu “wasinika ingqondo,” okanye “amandla engqondo” ukuze “simazi oyinyaniso,” simqonde ngokwamabakala uThixo. (Mateyu 11:27) Ngoko “sikuye oyinyaniso [uYehova uThixo], kuye uNyana wakhe uYesu Kristu.”—Thelekisa uYohane 17:20, 21.
25. NjengamaKristu, sinokusisebenzisa njani isiluleko esikweyoku-1 kaYohane 5:21?
25 Abo bakuThixo oyinyaniso, uYehova, enoba ngabentsalela ethanjisiweyo okanye ‘ngabezinye izimvu,’ bafuna ukumkholisa ngazo zonke iindlela. Kodwa izilingo zokubandakanyeka kunqulo lwezithixo zazikho kwinkulungwane yokuqala, kwanjengokuba zikho namhlanje. Ngoko ngokufanelekileyo uYohane uqukumbela incwadi yakhe ngesiluleko sobuzali esithi: “Bantwanana, zigcineni kuzo izithixo.” NjengamaKristu, asiqubudi kwimifanekiso eqingqiweyo. Kwakhona siyazi ukuba bekuya kuba yinto ephosakeleyo ukubeka thina, uyolo, okanye nayiphi na enye into endaweni kaThixo. (2 Timoti 3:1, 2, 4) Yaye ukuzahlulela kwethu kuye akuquki ukunqula kwethu “irhamncwa” lezobupolitika “nomfanekiso” walo. (ISityhilelo 13:14-18; 14:9-12) Ngoko sinembono yokukholisa uBawo wethu wasezulwini neyokuzuza isipho sobomi obungunaphakade, masibambelele kwisigqibo sethu sokuphepha konke ukunqula izithixo, singaze sikuvumele kutshabalalise ulwalamano lwethu oluxabisekileyo noYehova ngoYesu Kristu.
Uncedo Oluhlala Luhleli
26. Ziziphi ezinye zeembalasane eziphawulekayo zeyokuQala kaYohane?
26 Incwadi yokuqala ephefumlelweyo kaYohane yawanceda amaKristu okuqala ukuba akuphephe ukunqula izithixo. Yawenza akwazi ukujongana nobuxoki babawexuki, yaye iphumeza injongo efanayo nanamhlanje. Ngokomzekelo, ingqina ukuba uYesu Kristu waphila njengomntu waza wafa ‘njengesicamagushelo’ sezono. Le ncwadi ichaza “umchasi-kristu” yaye iyabahlula abantwana bakaThixo kwabo bakaMtyholi. Ibonisa indlela yokucikida “oomoya” ukuze sibone enoba ngabakaYehova na. Ngaphezu koko, amazwi kaYohane aseyisela kwelokuba “uThixo uluthando,” nokuba ukholo lokwenyaniso luyaloyisa ihlabathi, nakwelokuba uYehova uyayiva imithandazo yamangqina akhe anyanisekileyo.
27. Incwadi yokuqala kaYohane ephefumlelwe ngokobuthixo inokusinceda kweziphi iindlela?
27 Xa sijongene nezihendo zeli hlabathi, hayi indlela ekububulumko ngayo ukuhlala sikhumbula isilumkiso sikaYohane nxamnye nokuthanda ihlabathi! Ukuba iiyantlukwano zobuqu zinokuthintela ulwalamano lwethu namakholwa athile angoowethu, amazwi ompostile anokusikhumbuza ukuba sinokuzingqina simthanda uThixo ngokubonakalisa uthando lobuzalwana. Ngoncedo lobuthixo nangokusebenzisa isiluleko sikaYohane, sinokukuphepha ukuqhelisela isono yaye sinokulondoloza ukholo oloyisa ihlabathi. Ngoko masibonakalise umbulelo wethu ngale ncwadi iphefumlelweyo njengoko sihlala sihamba ekukhanyeni kobuthixo, siqhubeka siphila ngokwabantwana bakaThixo, yaye sihlala sibonakalisa uthando nokholo ukusa kuzuko loBawo wethu osezulwini, uYehova.
Ubungaphendula Njani?
◻ Ukuba siyamthanda uYehova, oku kufanele kuiuchaphazele njani ulwalamano lwethu namakholwa angoowethu?
◻ ‘Sinokuloyisa njani ihlabathi’?
◻ Ngawaphi ‘amangqina amathathu’ angqina ngoNyana kaThixo?
◻ Ngokuphathelele umthandazo, yiyiphi “intembelo” esinokuba nayo?
◻ EyokuQala kaYohane inokusinceda ngaziphi iindlela?
[Amagama acatshuliweyo akwiphepha 22]
Ekubeni uYehova wasithandayo ngoxa sasingaboni, ‘sinyanzelekile ukuba sithandane’
[Amagama acatshuliweyo akwiphepha 23]
Ukukholelwa kwethu kuThixo, kwiLizwi lakhe, nakuNyana wakhe okuphela kwamzeleyo kusenza sikwazi ‘ukuloyisa ihlabathi’
[Umfanekiso okwiphepha 25]
Umoya oyingcwele, amanzi awabhaptizwa ngawo uYesu, igazi lakhe elaphalalayo noYehova banikela ubungqina bokuba uYesu Kristu unguNyana kaThixo