Ukuhamba Ngokwemiyalelo KaYehova
“Ndiyalele, Yehova, indlela yakho, ndihambe ngenyaniso yakho; yibandakanye intliziyo yam ukuba ndiloyike igama lakho.”—INDUMISO 86:11.
1, 2. Yintoni eshukumisela amaNgqina kaYehova ukuba angavumi ukwamkela igazi?
“MHLAWUMBI amaNgqina kaYehova achanile ngokungazamkeli iimveliso zegazi, kuba kuyinyaniso ukuba izinto eziliqela ezinokubangela izifo zinokudluliselwa ngegazi elitofelweyo.”—iphephandaba lantsuku zonke lezamayeza laseFransi iLe Quotidien du Médecin, kaDisemba 15, 1987.
2 Kusenokwenzeka ukuba abathile abafunda loo mazwi bavakalelwa kukuba lithamsanqa nje into yokuba amaNgqina kaYehova ebengalwamkeli utofelo-gazi kude kudala ngaphambi kokuba kwaziwe ukuba luyingozi kwaye lubulala kangakanani. Kodwa indlela amaNgqina kaYehova alijonga ngayo igazi ayenzekanga ngamabona-ndenzile, kwaye kungengomthetho owayilwa lihlelo elithile elingaqhelekanga, yaye ikhondo lawo alizange libangelwe naluloyiko lokuba igazi alikhuselekanga. Kunoko, amaNgqina awalamkeli igazi ngenxa yokuzimisela kwawo ukuhamba ngokumthobela uMyaleli wawo Ozukileyo—uThixo.
3. (a) UDavide wavakalelwa njani ngokuxhomekeka kwakhe kuYehova? (b) UDavide wakhangela phambili kuwuphi umphumo ngenxa yokuba wayekholose ngoThixo?
3 UKumkani uDavide, owayeziva exhomekeke kuThixo, wayezimisele ukuba afundiswe nguye aze ‘ahambe enyanisweni yakhe.’ (INdumiso 86:11) UDavide wakha wacetyiswa kwathiwa ukuba wayekuphepha ukuba netyala legazi emehlweni kaThixo, ‘umphefumlo wakhe wawunokubotshwa esiqhumeni sabaphilileyo kuYehova.’ (1 Samuweli 25:21, 22, 25, 29) Njengokuba abantu babezibophelela izinto ezixabisekileyo ukuze bazikhusele baze bazilondoloze, ngoko ubomi bukaDavide babunokukhuselwa buze bulondolozwe nguThixo. Esamkela eli cebiso lobulumko, uDavide akazange azame ukuzisindisa ngemigudu yobuqu kodwa wakholosa ngaLowo wayengumthombo wobomi bakhe: “Uya kundazisa umendo wobomi; ebusweni bakho yinzaliseko yemivuyo; ekunene kwakho yimihlali ngonaphakade.”—INdumiso 16:11.
4. Kwakutheni ukuze uDavide afune ukufundiswa nguYehova?
4 Eneso simo sengqondo, uDavide akazange avakalelwe kukuba yena ngokobuqu wayenokukhetha imithetho kaThixo esebenzayo okanye ekwakufuneka ithotyelwe. Isimo sengqondo awayenaso yayisesokuthi: “Ndiyalele [“ndifundise,” NW], Yehova, indlela yakho, ndikhaphe emendweni othe tye.” “Ndiyalele, Yehova, indlela yakho, ndihambe ngenyaniso yakho; yibandakanye intliziyo yam ukuba ndiloyike igama lakho.” (INdumiso 27:11; 86:11, 12) Maxa wambi ukuhamba enyanisweni kaThixo kusenokubonakala kungelula okanye kusenokuthetha ukuzincama okukhulu, kodwa uDavide wafuna ukufundiswa indlela echanileyo aze ahambe kuyo.
Ukufundiswa Ngegazi
5. Yintoni ekumele ukuba uDavide wayeyazi ngendlela uThixo alijonga ngayo igazi?
5 Kuhle ukuphawula ukuba ukususela ebukhwenkweni, uDavide wayeyifundisiwe imbono kaThixo ngegazi, mbono leyo eyayingeyomfihlelo engokonqulo. Xa uMthetho wawufundelwa abantu, uDavide umele ukuba wakuva oku: “Umphefumlo wenyama usegazini wona. Mna ndaninika lona esibingelelweni, ukuba kucanyagushelwe imiphefumlo yenu; kuba igazi eli licamagusha ngomphefumlo. Ngenxa yoko ndithe koonyana bakaSirayeli, Makungabikho namnye umphefumlo kuni odla igazi; nomphambukeli ophambukele phakathi kwenu makangalidli igazi.”—Levitikus 17:11, 12; Duteronomi 4:10; 31:11.
6. Yintoni eyayibangela ukuba kuhlale kukho imfuneko yokuba abakhonzi bakaThixo bafundiswe ngegazi?
6 Logama nje uThixo wayesasebenzisa amaSirayeli njengebandla labantu bakhe, abo babefuna ukumkholisa kwakufuneka bathobele imiyalelo engegazi. Ngaloo ndlela izizukulwana ngezizukulwana zamakhwenkwe namantombazana angamaSirayeli ayewufumene loo myalelo. Kodwa ngaba loo myalelo unjalo wawuya kuqhubeka emva kokuba uThixo amkele ibandla lamaKristu, elibumba libe “ngamaSirayeli kaThixo”? (Galati 6:16) Kakade kunjalo. Imbono kaThixo ngegazi ayizange iguquke. (Malaki 3:6) Isalelo sakhe sokungasetyenziswa kakubi kwegazi sabakho ngaphambi kokuba umnqophiso woMthetho usebenze, yaye saqhubeka emva kokuba uMthetho ubhangisiwe.—Genesis 9:3, 4; IZenzo 15:28, 29.
7. Kutheni ukufundiswa nguThixo ngegazi kubalulekile kuthi?
7 Ukuhlonela igazi kuyinto ebalulekileyo kumaKristu. Bambi basenokubuza bathi: ‘Ngaba oko asikokuzibaxa izinto?’ Kanti, yintoni enokubaluleka kumaKristu ngaphezu kwedini likaYesu? Yaye umpostile uPawulos wabhala: “Esinayo sikuye [uYesu] inkululeko ngokuhlawulelwa ngegazi lakhe, ukuxolelwa ke kweziphoso zethu, ngokobutyebi bobabalo lwakhe.” (Efese 1:7) IThe Inspired Letters, eguqulelwe nguFrank C. Laubach, iyiguqulela ngolu hlobo le ndinyana: “Igazi likaKristu lasihlawulela ibe ngoku singabakhe.”
8. “Isihlwele esikhulu” sixhomekeke njani egazini ukuze sizuze ubomi?
8 Bonke abanethemba lokusinda ‘kwimbandezelo enkulu’ esemnyango baze banandiphe iintsikelelo zikaThixo kumhlaba oyiparadisi baxhomekeke kwigazi likaYesu elaphalalayo. ISityhilelo 7:9-14 siyabachaza size sithi ngoko kuya kwenzeka kubo: “Aba ngabaphumayo embandezelweni enkulu, bazihlamba iingubo zabo ezinde, bazenza mhlophe egazini leMvana.” Phawula indlela okuchazwe ngayo oku. Asithi aba basindileyo kwimbandezelo enkulu baye ‘bamkela uYesu’ okanye ‘banokholo kuye,’ nangona ezi ngokuqinisekileyo iziinkalo ezibalulekileyo. Sithetha okungakumbi size sithi baye “bazihlamba iingubo zabo ezinde, bazenza mhlophe egazini [likaYesu].” Oko kungenxa yokuba igazi lakhe linexabiso lentlawulelo.
9. Kutheni ukuthobela uYehova ngegazi kungumbandela onzulu kangaka?
9 Ukuba noxabiso ngeli xabiso kuyawanceda amaNgqina kaYehova azimisele ukungalisebenzisi kakubi igazi, kwanokuba ugqirha ngokunyaniseka uthi kubalulekile ukuba kutofelwe igazi. Usenokukholelwa kwelokuba iingenelo ezisenokuzuzwa zingakumbi kuneengozi ezingokwempilo ezihambisana negazi. Kodwa kumKristu kukho ingozi enzulu ngakumbi angenakuyityeshela, ingozi yokulahlekelwa yinkoloseko kaThixo ngokuvuma ukusebenzisa kakubi igazi. UPawulos wakha wathetha ngabo bathi ‘ngabom benze isono emveni kokuba belufumene ulwazi oluchanileyo lwenyaniso.’ (NW) Kutheni isono esinjalo sasinzulu? Kuba umntu onjalo “umnyathelele phantsi uNyana kaThixo, walibalela ekuthini liyinqambi igazi lomnqophiso athe wangcwaliswa ngalo.”—Hebhere 9:16-24; 10:26-29.
Ukunceda Abanye Bayazi Le Miyalelo
10. Luxhaswa yintoni uzimiselo lwethu lokulizila igazi?
10 Thina balixabisayo idini likaYesu lentlawulelo senza kakuhle ukungasenzi isono, silinyathelela phantsi ixabiso elisindis’ ubomi legazi lakhe. Sakuba siwucingisisile lo mbandela, siyaqonda ukuba umbulelo ongazenzisiyo kuThixo ngobomi ufanele usishukumisele ukuba singakuvumi nakuphi na ukulalanisa kwimithetho yakhe yobulungisa, esiqinisekileyo ukuba yanikelwa ukuze kulungelwe thina—ukulungelwa kwethu kwethuba elide. (Duteronomi 6:24; IMizekeliso 14:27; INtshumayeli 8:12) Noko ke, kuthekani ngabantwana bethu?
11-13. Bambi abazali abangamaKristu banayiphi imbono ephosakeleyo ngabantwana babo negazi, yaye ngoba?
11 Nangona abantwana bethu beziintsana okanye bebancinane kakhulu ukuba bangaqonda, uYehova uThixo usenokubagqala njengabacocekileyo nabamkelekileyo ngesizinzi sozinikelo lwethu. (1 Korinte 7:14) Ngoko liyinyaniso elokuba iimveku kwintsapho yamaKristu zisenokuba azikaqondi yaye azikalwenzi ukhetho olungokuthobela umthetho kaThixo ongegazi. Noko ke, ngaba senza okusemandleni ethu ukuzifundisa ngaloo mbandela ubalulekileyo? Abazali abangamaKristu bafanele bakucingisise nzulu oko, kuba bambi abazali banesimo sengqondo esiyimpazamo ngabantwana babo negazi. Kubonakala ukuba bambi bavakalelwa kukuba abanagunya lingako xa abantwana babo abasakhulayo betofelwa igazi. Yintoni ebangela le mpazamo?
12 Kumazwe amaninzi kukho imithetho okanye amaziko karhulumente okukhusela abantwana abangakhathalelwayo nabaxhatshazwayo. Asikuba abantwana bamaNgqina kaYehova abakhathalelwa okanye bayaxhatshazwa xa abazali begqiba kwelokuba oonyana neentombi zabo zingatofelwa igazi, kwangaxeshanye becela ukuba kusetyenziswe ezinye iindlela ezinokufumaneka zonyango lwezamayeza lwezi mini. Naxa sikujonga ngokwezamayeza oku, asikokungakhathali okanye ukuxhaphaza, ekubeni kukho iingozi ezaziwayo zonyango lotofelo-gazi. Kukusetyenziswa kwelungelo lokuhlola iingozi ezibandakanyekileyo kuze emva koko kukhethwe unyango.a Ukanti, abasebenzi bezonyango abathile baye babhenela kumalungiselelo angokwasemthethweni ukuze bafumane igunya lokunyanzelisa utofelo-gazi olungafunwayo.
13 Bambi abazali, beqonda ukuba kusenokuba lula ngabasebenzi bezonyango ukufumana inkxaso yenkundla ukuze batofele igazi emntwaneni, basenokuvakalelwa kukuba umcimbi ungaphaya kwamandla abo, besithi akukho nto abazali banokuyenza okanye ekufuneka bayenze. Hayi indlela okuyimpazamo ngayo oku!—IMizekeliso 22:3.
14. UDavide noTimoti bafundiswa njani kwasebutsheni babo?
14 Siye saphawula ukuba uDavide wafundiswa ngendlela kaThixo ukususela ebutsheni. Oko kwamxhobisela ukuba ubomi abujonge njengesipho esivela kuThixo yaye azi ukuba igazi limela ubomi. (Thelekisa eyesi-2 kaSamuweli 23:14-17.) UTimoti wayifundiswa “kwasebuntwaneni” indlela uThixo acinga ngayo. (2 Timoti 3:14, 15) Akuvumi na ukuba kwanaxa uDavide noTimoti babengaphantsi kobudala bobuntu obukhulu obungokwasemthethweni namhlanje, bamele ukuba babekwazi ukuzithethelela kakuhle kwiimbambano ezibandakanya ukuthanda kukaThixo? Ngokufanayo, nokuba kusasele ithuba elide ngaphambi kokuba afikelele exabisweni, amaKristu aselula namhlanje afanele afundiswe ngeendlela zikaThixo.
15, 16. (a) Yiyiphi imbono eye yakho kwiindawo ezithile ngokuphathelele amalungelo abantwana? (b) Yintoni eyakhokelela ekubeni omnye oselula atofelwe igazi?
15 Kwiindawo ezithile lowo ugqalwa njengomntwana oqolileyo osephantsi kweliso labazali unikwa amalungelo afanayo nalawo abantu abadala. Ngokusekelwe kubudala okanye ekucingeni ngendlela yobuntu obukhulu, okanye zombini, oselula usenokugqalwa njengoqole ngokwaneleyo ukuba angazenzela ezakhe izigqibo kwimicimbi yonyango lwezamayeza. Kwanalapho oku kungengomthetho, iijaji okanye amagosa asemthethweni asenokuyijonga nzulu iminqweno yoselula okwaziyo ukusichaza ngokucacileyo isigqibo sakhe esingqongqo ngegazi. Kwelinye icala, xa oselula engakwazi ukuzichaza ngokucacileyo nangendlela eqolileyo iinkolelo zakhe, inkundla isenokuvakalelwa kukuba ifanele igqibe ngoko kulungileyo, njengoko ibiya kwenjenjalo kwimeko yosana.
16 Omnye umfana wayemana efundisisa iBhayibhile abuye ayeke kangangeminyaka kodwa engabhaptizwa. Nangona kwakusele iiveki ezisixhenxe ngaphambi kokuba afikelele kubudala obububo bokuba afumane “ilungelo lokwala unyango lwezamayeza ngokwakhe,” isibhedlele esasimnyangela umhlaza safuna ukuxhaswa yinkundla ukuze simtofele igazi ngokuchasene neminqweno yakhe neyabazali bakhe. Ijaji eyayinenyameko yambuza ngeenkolelo zakhe ngegazi yaza yambuza imibuzo elula, njengamagama eencwadi ezintlanu zokuqala zeBhayibhile. Lo mfana akazange azazi yaye engazange akwazi nokunikela ubungqina obeyisayo bokuba wayesiqonda isizathu sokuba wayengavumi ukulamkela igazi. Kulusizi ukuthi, ijaji yayalela ukuba atofelwe igazi, isithi: “Ukungavumi [kwakhe] ukuvumela utofelo-gazi akusekelwanga ekuziqondeni kakuhle iinkolelo zakhe ezingokonqulo.”
17. Kukuphi ukuma okwathatyathwa yintombazana eneminyaka eli-14 ubudala ngokutofelwa igazi, ngawuphi umphumo?
17 Umphumo usenokwahluka kumntwana ophantsi kwegunya labazali nofundiswe kakuhle ngeendlela zikaThixo kwaye ohamba ngokukhutheleyo enyanisweni Yakhe. UmKristu oselula ngakumbi wayekwanolu hlobo lunqabileyo lomhlaza. Le ntombazana nabazali bayo babeluqonda yaye belwamkela unyango lwamachiza ezi mini olwalunikelwa yingcali kwisibhedlele esithile esaziwayo. Sekunjalo, oku kwasiwa enkundleni. Ijaji yabhala: “UD.P. unikele ubungqina bokuba uya kumelana nokutofelwa igazi nangayiphi na indlela anokukwazi ngayo. Ukutofelwa igazi ukugqale njengokuhlaselwa komzimba wakhe ibe ukufanisa nokudlwengula. Wacela iNkundla ukuba iluhlonele ukhetho lwakhe yaye imvumele aqhubeke enyangwa [esibhedlele] ngaphandle kokutofelwa igazi okugunyaziswe yiNkundla.” Imfundiso yobuKristu awayeyifumene yamnceda ngeli xesha linzima.—Bona ibhokisi.
18. (a) Intombazana ethile eyayigula yakujonga njani ukutofelwa igazi? (b) Ijaji yagqiba kwelithini ngokunyangwa kwayo?
18 Intombazana eneminyaka eli-12 ubudala yayinyangelwa isifo seleukemia (ukuba ninzi kweekopasile ezimhlophe egazini). Iziko loonontlalo-ntle lawusa enkundleni lo mcimbi ukuze itofelwe igazi ngesinyanzelo. Ijaji yaqukumbela yathi: “UL. uyixelele le nkundla ngokucacileyo yaye ngokwezibakala ukuba, ukuba kukhe kwazanywa ukutofelwa igazi kuye, uya kukulwa oko ngamandla akhe onke. Uthe, kwaye ndiyamkholelwa, uya kukhala aze enze umzamo wokuzisusa ezo zixhobo zokutofelwa igazi engalweni yakhe yaye uya kuzama ukulichitha elo gazi kwisingxobo esijinga phezu komandlalo wakhe. Andivumi ukukhupha umyalelo oya kubangela lo mntwana abe kulo ngxaki . . . Kulo mguli, unyango olucetywa sisibhedlele lunyanga esi sifo ngengqiqo engokwenyama kuphela. Aluzifikeleli iimfuno zakhe ezingokweemvakalelo neenkolelo zakhe ezingokonqulo.”
Bazali—Fundisani Kakuhle
19. Yiyiphi imbopheleleko ekhethekileyo abazali abafanele bayiphumeze kubantwana babo?
19 Amava anjalo anesigidimi esinamandla kubazali abanqwenela ukuba bonke ezintsatsheni zabo baphile ngokuvisisana nomthetho kaThixo ongegazi. Esinye isizathu esabangela uAbraham wangumhlobo kaThixo sasikukuba uThixo wayesazi ukuba lo solusapho wayeya ‘kubawisela umthetho abantwana bakhe, nendlu yakhe emva kwakhe, bagcine indlela kaYehova, benze ubulungisa.’ (Genesis 18:19) Ngaba abafanele benjenjalo nabazali abangamaKristu namhlanje? Ukuba ungumzali, ngaba uyabafundisa abantwana bakho abathandekayo ukuba bahambe ngendlela kaYehova ukuze bahlale ‘bekulungele ukuziphendulela kumntu wonke obuzayo ngalo ithemba elingaphakathi kubo, benobulali noloyiko’?—1 Petros 3:15.
20. Yintoni ngokuyintloko esifanele sifune ukuba abantwana bethu bayazi baze bayikholelwe ngegazi? (Daniyeli 1:3-14)
20 Nangona kuya kuba yinto elungileyo ukuba abantwana bethu bazi ngeengozi zezifo nezinye iingozi ezibandakanyekileyo kutofelo-gazi, ukufundisa abantwana bethu ngomthetho kaThixo ogqibeleleyo ngokusisiseko akuthethi ukuzama ukubenza baloyike igazi. Ngokomzekelo, ukuba ijaji ibuza intombazana isizathu sokuba ingafuni ukutofelwa igazi ize iphendule ithi icinga ukuba igazi lineengozi kwaye liyoyikeka, ubuya kuba yintoni umphumo? Ijaji isenokugqiba kwelokuba ayikakhuli ngokwaneleyo kwaye yoyika ngokugqithiseleyo, kanye njengokuba ibiya koyika ukukhutshwa ithunjana kangangokuba ikhale ize ingaluvumi olu tyando kwanabazali bayo abavakalelwa kukuba luyilungele. Ngaphezu koko, ngaphambilana siphawule ukuba isizathu esiphambili sokuba amaKristu akwale ukutofelwa igazi asikuko ukuba igazi lingcolile kodwa sikukuba lixabisekile kuThixo wethu noMniki-Bomi. Abantwana bethu bafanele bakwazi oko, kwanokuba iingozi ezingokwezonyango elisenokuba nazo igazi kuphela ziyakuxhasa ukuma kwethu okungokonqulo.
21. (a) Yintoni abazali abafanele bayiqonde ngabantwana babo nembono yeBhayibhie ngegazi? (b) Abazali banokubanceda njani abantwana babo ngokunxulumene negazi?
21 Ukuba unabantwana, ngaba uqinisekile ukuba bayavumelana nekhondo elisekelwe eBhayibhileni kumbandela wotofelo-gazi yaye banako ukulicacisa? Ngaba ngokwenene bakholelwa ukuba eli khondo likukuthanda kukaThixo? Ngaba beyisekile kukuba ukwaphula umthetho kaThixo kuya kuba nzulu kangangokuba kuya kulibeka emngciphekweni ithemba lomKristu lokufumana ubomi obungunaphakade? Abazali abalumkileyo baya kuwuhlolisisa kwakhona lo mbandela nabantwana babo, enoba basebancinane kakhulu okanye sele beza kuba ngabantu abakhulu. Abazali basenokuba namaxesha okuqhelisela apho umntwana ngamnye ajamelana nemibuzo esenokubuzwa yijaji okanye ligosa lasesibhedlele. Injongo asikokwenza lo uselula acengceleze iingongoma okanye iimpendulo. Okubaluleke ngakumbi kukuba bayazi into bona abayikholelwayo, nesizathu soko. Kambe ke, xa kuthethwa ityala enkundleni, abazali okanye abanye basenokunikela inkcazelo engeengozi zegazi nangezinye iindlela zonyango ezifumanekayo. Kodwa kusenokwenzeka ukuba eyona nto ijaji okanye igosa eliya kufuna ukuyazi xa lithetha nabantwana bethu kukuba bayiqonda ngendlela yobuntu obukhulu na imeko yabo nezinye iindlela ezisenokusetyenziswa kwanokuba banayo na imilinganiselo neenkolelo ezizezabo.—Thelekisa eyesi-2 yooKumkani 5:1-4.
22. Unokuba yintoni umphumo ohlal’ uhleli wokufundiswa kwethu nguThixo ngegazi?
22 Sonke ngabanye sifanele siyiqonde imbono kaThixo ngegazi size sibambelele kuyo ngokungenakushukunyiswa. ISityhilelo 1:5 simchaza uKristu njengalowo ‘usithandayo, wasikhulula ezonweni zethu ngelilelakhe igazi.’ Kuphela kungokwamkela ixabiso legazi likaYesu esinokuthi sizuze ukuxolelwa izono zethu ngokupheleleyo nangonaphakade. AmaRoma 5:9 ngokucacileyo athi: “Kokukhona sigwetyelwe nje ngegazi lakhe, siya kusindiswa ngaye kuyo ingqumbo.” Ngoko, hayi indlela ekububulumko ngayo ukuba thina nabantwana bethu siyalelwe nguYehova ngalo mbandela size sizimisele ukuhamba ngendlela yakhe ngonaphakade!
[Umbhalo osemazantsi]
a Bona ethi Igazi Linokubusindisa Njani Ubomi Bakho?, epapashwe yiWatch Tower Bible and Tract Society of Pennsylvania, iphepha 21-2, 28-31.
Iingongoma Eziphambili Zemfundiso
◻ Sifanele sibe nayiphi imbono ngokufundiswa nguYehova?
◻ Kutheni kubaluleke kangaka ukutho-bela umthetho kaThixo ongegazi?
◻ Kutheni kubalulekile ukuba ulutsha lukwazi ukuzichaza ngokucacileyo nangokungenakugungqiswa iinkolelo zalo ngegazi?
◻ Abazali abangamaKristu banokubanceda njani abantwana babo bawazi kakuhle umthetho kaYehova ongegazi?
[Ibhokisi ekwiphepha 17]
INKUNDLA YACHUKUMISEKA
Sathini isigqibo senkundla ngokuphathelele uD.P., okhankanywe kwisiqendu 17?
“INkundla ichukumiseke ngokwenene bubulumko, lulungelelwano, undiliseko nokuba namandla kwalo uselula noneminyaka eli-14 elinesiqingatha ubudala. Usenokuba ebedandathekiswe sisibakala sokuba unesifo esibulalayo . . . Sekunjalo, ibingumntu oselula oqolileyo obenikela ubungqina eNkundleni. Ubonakele ebucingisise kakuhle ubunzima ajamelene nabo. Ebebakho kuzo zonke izihlandlo zodliwano-ndlebe, wavumelana nendlela eyayicetywa yonyango, wazakhela indlela yena njengomntu aya kujamelana ngayo nolu celo mngeni lwezonyango, kwaye waya kule Nkundla enesicelo esichukumisayo esithi: hlonelani isigqibo sam . . .
“Ukongezelela ekubeni ngoqolileyo kwakhe, uD.P. unikele izizathu ezaneleyo zokuba le Nkundla isihlonele isigqibo sakhe. Ngokomoya, ngokwengqondo, ngokokuziphatha nangokweemvakalelo uya kwenzakala ukuba kusetyenziswe unyango oluquka utofelo-gazi. Le Nkundla iya kuluhlonela ukhetho lwakhe lwendlela yonyango.”
[Umfanekiso okwiphepha 16]
Ijaji okanye intsumpa yesibhedlele isenokufuna ukwazi oko umKristu oselula ngokwenene akukholelwayo, nesizathu soko