Imisebenzi Eyandisiweyo Ngexesha Lobukho BukaKristu
“Uya kuthi ke ukumkani kwabangasekunene kwakhe, Yizani, nina nisikelelweyo nguBawo, nibudle ilifa ubukumkani obalungiselwa nina kwasekusekweni kwehlabathi.”—MATEYU 25:34.
1. Ipa·rou·siʹa kaKristu ifana ngayiphi indlela ‘nemihla kaNowa’?
UBUKHO bukaKristu—isiganeko ekudala silindelwe! Ixesha elifana ‘nemihla kaNowa,’ uYesu awathetha ngayo ngokuphathelele ‘ukuqosheliswa kwale nkqubo yezinto,’ lafika ngonyaka we-1914. (Mateyu 24:3, 37, NW) Kodwa ubukho bukaKristu, okanye ipa·rou·siʹa, yayiya kuthetha ntoni kwintsalela ethanjisiweyo ‘yomkhonzi othembekileyo noqondayo’? (Mateyu 24:45) Kaloku, kwakuya kuthetha ukuba kufuneka besebenze ngenkuthalo ngakumbi njengabathwali bokukhanya! Kwakuseza kwenzeka izinto ezimangalisayo! Kwakuza kuqalisa umsebenzi wokuhlanganisa ongazange ubonwe.
2. Kukuphi ukucocwa okuye kwenzeka ukuzalisekisa uMalaki 3:1-5?
2 Noko ke, la maKristu athanjisiweyo kwakufuneka acocwe kuqala. Njengokuba uMalaki 3:1-5 wayexele kwangaphambili, uYehova uThixo ‘nomthunywa wakhe womnqophiso,’ uYesu Kristu, beza kuhlola itempile yokomoya entwasahlobo ngowe-1918. Umgwebo wawuza kuqalisa “ngendlu kaThixo.” (1 Petros 4:17) UMalaki 3:3 waxela kwangaphambili: “[UYehova] uya kuhlala ke engumnyibilikisi, engumcoci wesilivere, abacoce oonyana bakaLevi, abahluze njengegolide, nanjengesilivere.” Yayilixesha lokunyibilikisa nokucoca.
3. Kutheni kwakubalulekile ukuba kubekho ukucocwa ngokomoya?
3 Ngokutyhubela eli xesha lomgwebo, elafikelela kwincopho ngowe-1918, intsalela yodidi lomkhonzi yacocwa kungcoliso lwehlabathi nolonqulo. Sasiyintoni isizathu sokuba uYehova enze oko? Sasikukuba kwakubandakanyeke itempile yakhe yokomoya. Elo lilungiselelo elifana netempile lokunqula uYehova ngesizinzi sedini lokucamagusha likaYesu Kristu. UYehova wayefuna itempile yakhe ibe kwimeko ecocekileyo ukuze xa abanquli abaninzi abanamathemba asemhlabeni bengeniswa kuyo, bayifumane iyindawo oluhlonelwayo kuyo ulongamo lwakhe lwendalo iphela, indawo elingcwaliswayo kuyo igama lakhe, indawo ethotyelwayo kuyo imithetho yakhe yobulungisa. Ngaloo ndlela, babeya kumxabisa uYehova baze bathelele ekwaziseni iinjongo zakhe ezizukileyo.
Amalungelo Ongezelelekileyo
4, 5. (a) Umbuzo owabuzwa nguYesu Kristu ucel’ umngeni njani kuye ngamnye wodidi lomkhonzi namhlanje? (b) Lifanele liqondwe ngayiphi indlela ibinzana elithi ‘umkhonzi othembekileyo noqondayo’ nelithi “abendlu”? (c) Luluphi uthumo uYesu awalunika umkhonzi?
4 Ngowe-1919 udidi lomkhonzi olucociweyo lwalunokukhangela phambili kwimisebenzi eyandayo. Emva phayaa ngowe-1914, uYesu Kristu, iNkosi yabo, wayefumene uBukumkani basezulwini. Xa wabuyela kwabo basebenza endlwini yakhe ukuze ahlole bonke “abendlu,” wayevathiswe indili yasebukhosini, awayengenayo xa wayelapha emhlabeni. Wafumana ntoni? Ngaba udidi lomkhonzi lwaluxakekile lunyamekela izilangazelelo zeNkosi? Njengoko kubhalwe kuMateyu 24:45-47, uYesu wabuza umbuzo ocel’ umngeni kuye ngamnye waba bafundi bathanjisiweyo ukuba ahlolisise uzinikelo lwakhe lobuqu kuMesiya kaYehova: “Ngubani na ke loo mkhonzi uthembekileyo, uqondayo, eyathi inkosi yakhe yammisa phezu kwabendlu yayo, ukuze abanike ukudla ngexesha elifanelekileyo? Unoyolo loo mkhonzi, iya kuthi yakufika inkosi yakhe imfumane esenjenjalo. Inene ndithi kuni, iya kummisa phezu kwayo yonke impahla yayo.”
5 Ngokwendlela uYesu awamchaza ngayo umkhonzi othembekileyo noqondayo, kucacile ukuba ayinakuba ngumntu omnye. Hayi, kodwa ichaza ibandla likaKristu elithembekileyo nelithanjisiweyo xa lilonke, njengeqela. Abendlu ngabalandeli abathanjisiweyo bakaKristu njengabantu ngabanye. UYesu wayesazi ukuba wayeza kubathenga aba balandeli bathanjisiweyo ngegazi lakhe, ngoko ngokufanelekileyo wabhekisela kubo xa bebonke njengomkhonzi wakhe. EyokuQala kwabaseKorinte 7:23 ithi ngabo: “Nathengwa [ithetha ngabo bonke] ngexabiso; musani ukuba ngamakhoboka abantu.” UYesu wathuma udidi lwakhe lomkhonzi ukuba lukhanyise ukukhanya kwalo ukuze lutsale yaye lwenze abanye abafundi nokuba londle abendlu yakhe ngokuqhubekayo lubanika ukudla kwabo kokomoya ngexesha elifanelekileyo.
6. Umkhonzi wavuzwa njani ngenxa yokuhlola kukaYesu?
6 Ukususela ngexesha lokuqalisa kobukho bukaKristu ukusa ngowe-1918, udidi lomkhonzi, nangona lwalungathandwa lutshutshiswa, yaye kukho nokungaqondwa kwezinto okuthile, lwaluzama ukunikela ukudla ngexesha elililo kwabendlu. INkosi yafumana oko xa yaqalisa uhlolisiso lwayo. INkosi uYesu yakholiswa koku, yaza yathi ngowe-1919 lunoyolo olo didi lomkhonzi othembekileyo. Umkhonzi wafumana wuphi umvuzo ovuyisayo ngenxa yokwenza oko iNkosi yakhe yayimmisele ukukwenza? Ukunyuselwa! Ewe, wanikwa iimbopheleleko ezingakumbi ekuhambiseleni phambili izilangazelelo zeNkosi yakhe. Kaloku, ekubeni ngoku iNkosi yayinguKumkani wasezulwini, impahla yayo esemhlabeni yayixabiseke ngakumbi.
7, 8. (a) Iyintoni “yonke impahla” yeNkosi? (b) Yintoni efunekayo kumkhonzi ekuveleleni le mpahla?
7 Ngoko, iyintoni “yonke impahla yayo”? Ezi zizo zonke izinto zokomoya eziye zaba zezikaKristu ezisemhlabeni nezinxulumene negunya lakhe njengoKumkani wasezulwini. Ngokuqinisekileyo oku kwakuquka uthumo lokwenza abafundi bakaKristu, kunye nelungelo elizukileyo lokuba ngabameli boBukumkani bukaThixo obumiselweyo kuzo zonke iintlanga zomhlaba.
8 Ngenxa yoku kunyuselwa kodidi lomkhonzi ukuba lube ngabaveleli bayo yonke impahla yeNkosi kwafuneka lunikele ixesha nengqalelo engakumbi ekubeni umsebenzi woBukumkani wenziwe luze, ewe, lulungiselele amaziko amakhudlwana aloo msebenzi. Ngoku lwalunentsimi enkulu ngakumbi ukuba luyisebenze—elimiweyo liphela.
Ukuhlanganisa Izimvu
9. Kuye kwenzeka ntoni ngenxa yokwandiswa kwemisebenzi yomkhonzi?
9 Ngoko, ngokuthobela, udidi lomkhonzi othembekileyo noqondayo kaKristu lwayandisa imisebenzi yalo. Waba yintoni umphumo? Abokugqibela be-144 000 elithanjisiweyo bahlanganiswa. Wandula umbono kaYohane okwiSityhilelo 7:9-17 wenzeka ngokwenene ngendlela echwayitisayo nevuyis’ intliziyo. Ngokukodwa ukususela ngowe-1935, udidi lomkhonzi belunandipha ukubona ukuzaliseka ngokuthe ngcembe kwalo mbono. Siphuma emhlabeni wonke, “isihlwele esikhulu” esizizigidi ngoku sithontelana kwiintendelezo zetempile kaYehova yokomoya njengabanquli bakhe. Isithunywa sikaYehova saxelela uYohane ukuba kwakungekho mntu unako ukusibala esi sihlwele sikhulu. Oko kuthetha ukuba inani labantu udidi lomkhonzi oluza kubazisa kwitempile kaYehova yokomoya aliqingqwanga. Logama nje indlela isavulekile, umsebenzi wokubahlanganisa uya kuqhubeka.
10. Umkhonzi ubandakanyeke kowuphi umsebenzi wothando namhlanje?
10 Udidi lomkhonzi othembekileyo lunembopheleleko enzima yokunyamekela “ezinye izimvu” eziqhubeka zisanda, lusazi ukuba aba babumvu abaphuma kuzo zonke iintlanga bayathandeka eNkosini, uYesu. Eneneni bangumhlambi wayo. (Yohane 10:16; IZenzo 20:28; 1 Petros 5:2-4) Ngoko ngenxa yothando ngeNkosi nangezimvu, udidi lomkhonzi ngovuyo lunyamekela iintswelo zokomoya zesihlwele esikhulu.
11-13. Ngawaphi amagqabaza afanelekileyo awenziwa ngowayesakuba ngumongameli weWatch Tower Society ngokuphathelele umsebenzi womkhonzi?
11 Ewe, eyona nxalenye inkulu yomsebenzi wokuthwala ukukhanya womkhonzi ubandakanya ukuhlanganiswa kwaba balawulwa basemhlabeni boBukumkani bukaThixo. Exubusha ngemisebenzi ehlala isanda yomkhonzi othembekileyo, uF. W. Franz, owayesakuba ngumongameli weWatch Tower Society, ngaphambi nje kokufa kwakhe ngoDisemba 1992 wathi:
12 “UYesu Kristu ebesoloko eyisebenzisa ngendlela eya imangalisa ngokumangalisa intlangano, le minyaka ingama-99 yobomi bam. Asingomntu owalathisa intlangano, kodwa kumele ukuba yiNkosi uYesu Kristu. Kuba iye yasebenza ngendlela ezuke nemangalisa ngakumbi kunokuba sasicinga ukuba iya kwenjenjalo. Namhlanje sinentlangano esasazeke kulo lonke ihlabathi. Iyasebenza kuMntla weIkhweyitha nakuMzantsi weIkhweyitha, eMpuma naseNtshona. Mnye kuphela umntu onokuba wenze olu lwando luphawulekayo—nguNyana kaThixo, owalathisa udidi lomkhonzi othembekileyo noqondayo. Ebephumeza iimbopheleleko zakhe, yaye lowo ngunobangela wolu lwando luzukileyo silubonileyo.
13 “Lo msebenzi awenziwa ngumntu omnye. Sinentlangano yobuthixo, yaye isebenza ngendlela yobuthixo, ngendlela eyalathiswa nguThixo. Akukho mntu, nditsho nomseki weWatch Tower Bible and Tract Society, onokuthi okanye ekunokuthiwa nguye oye wabangela oku kuye kwenziwa emhlabeni wonke. Ndingathi nje kuyamangalisa.” Ngaba abo besihlwele esikhulu xa bebonke abavumelani ngeentliziyo ziphela naloo mazwi kaMzalwan’ uFranz ongasekhoyo? Ewe, kakade, banombulelo ongazenzisiyo ngemisebenzi eyandisiweyo yomkhonzi othembekileyo.
Abalawulwa BoBukumkani
14, 15. (a) UYesu wayebonisa ntoni kumzekeliso weetalente (Mateyu 25:14-30)? (b) Ngokufanelekileyo, yintoni elandelayo emva koko kuMateyu isahluko 25?
14 KuMateyu isahluko 25, umzekeliso kaYesu wezimvu neebhokhwe uchaza lo msebenzi mkhulu wokuhlanganisa abalawulwa basemhlabeni boBukumkani bukaThixo. Kumzekeliso ongaphambi kwawo, umzekeliso weetalente, uYesu ubonisa ukuba abafundi abathembekileyo abanethemba lokulawula naye kuBukumkani bakhe basezulwini bamele basebenzele ukwandisa impahla yakhe yasemhlabeni. Ngoko, ngokufanelekileyo, kumzekeliso olandelayo, uYesu ubonisa oko kufunekayo kwabo bafuna ukuba ngabalawulwa boBukumkani bakhe basezulwini.
15 Phawula amazwi akhe akuMateyu 25:31-33: “Xa ke athe wafika uNyana woMntu esebuqaqawulini bakhe, enazo zonke izithunywa ezingcwele, ngelo xa uya kuhlala phezu kwetrone yobuqaqawuli bakhe; zihlanganiswe phambi kwakhe zonke iintlanga, abahlule abanye kwabanye, njengokuba umalusi ezahlula izimvu ezibhokhweni; athi zona izimvu azimise ngasekunene kwakhe, athi kodwa zona iibhokhwe azimise ngasekhohlo.”
16. Zihlanganiswa njani iintlanga yaye bahlulwa njani abantu?
16 UYesu wafika esebuqaqawulini ngowe-1914. Yena, nazo zonke izithunywa zakhe, bahlasela baza bakhupha zonke iintshaba zakhe eziziidemon ezulwini. Okulandelayo kulo mzekeliso wakhe kusinceda siqonde ukuba ukuhlala kukaYesu kwitrone yobuqaqawuli kufuzisela ukuhlala ngenjongo yokugweba ebudeni bobukho bakhe. Ukuhlanganiswa kwazo zonke iintlanga phambi kwakhe kuthetha ukuba, ngokufuziselayo, uYesu unikwa zonke iintlanga njengomhlambi wakhe. Ngumhlambi ekuxubene izimvu neebhokhwe kuwo. Ngoxa kumhlambi wokoqobo kusenokuthabatha inxalenye yosuku ukwahlula izimvu ezibhokhweni, ukwahlulwa kwabantu abanenkululeko yokuzikhethela emhlabeni wonke kuthabatha ixesha elidana. Oku kungenxa yokuba bahlulwa ngokwekhondo lesenzo lomntu ngamnye.
17. Kutheni namhlanje le meko imele ijongwe nzulu ngabo bonke abantu?
17 Kulo mzekeliso, uMalusi onguKumkani umisa ababumvu ngasekunene kwakhe aze abanjengeebhokhwe abamise ngasekhohlo. Icala langasekunene lingqineka likukufumana umgwebo olungileyo—ubomi obungunaphakade. Icala langasekhohlo lisisigwebo esibuhlungu—eso sentshabalaliso kanaphakade. Uzimiselo lukaKumkani kulo msebenzi lunemiphumo enzulu.
18. Kutheni ukungabonakali koKumkani kungathetheleli namnye?
18 Ukungabonakali koNyana womntu olawulayo ngexesha lobukho bakhe, okanye ipa·rou·siʹa, akuthetheleli namnye. Namhlanje abaninzi ngakumbi ababumvu bathelela udidi lomkhonzi ekuvakaliseni iindaba ezilungileyo zoBukumkani bukaThixo emhlabeni wonke, bekhanyisa ukukhanya kwabo. Ngokwenene, ukunikela kwabo ubungqina kufikelele nakwezona mbombo zikude zomhlaba.—Mateyu 24:14.
19. Ziziphi iimpawu zodidi lwezimvu eziboniswe kumzekeliso wezimvu neebhokhwe?
19 Kutheni uMalusi onguKumkani evuza udidi lwezimvu ngekamva elisikelelekileyo? Kungenxa yokuwuxhasa kwabo ngentliziyo iphela umsebenzi wokushumayela uBukumkani nobubele ababubonakalisa kubazalwana bakhe abathanjisiweyo, nto leyo uYesu ayigqala njengeyenziwe kuye. Ngoko ke, uNyana womntu ongukumkani uthi kubo: “Yizani, nina nisikelelweyo nguBawo, nibudle ilifa ubukumkani obalungiselwa nina kwasekusekweni kwehlabathi.”—Mateyu 25:34; 28:19, 20.
Ukunceda UKumkani
20, 21. Bubuphi ubungqina obunikelwa zizimvu bokuba zimela uBukumkani?
20 Phawula ukuba xa uKumkani emema ezi zimvu ukuba ziwudle ilifa ummandla womhlaba woBukumkani bukaThixo, ziyamangaliswa. Zimbuze oku: ‘Nkosi, sakwenzela nini zonke ezi zinto?’ Aziphendule athi: “Inene ndithi kuni, Ekubeni nenjenjalo nakumnye waba bazalwana bam bangabona bancinane, nenjenjalo nakum.” (Mateyu 25:40) Xa uYesu wabonakala kuMariya waseMagadala ngomhla wokuvuswa kwakhe, wathetha ngabazalwana bakhe bokomoya xa wathi kuye: “Yiya kubazalwana bam.” (Yohane 20:17) Ebudeni bobukho bakhe obungabonakaliyo, uYesu unentsalela encinane kuphela yabazalwana bakhe bokomoya abali-144 000 abasesenyameni emhlabeni.
21 Ekubeni uYesu engabonakali emazulwini, aba bantu babumvu abazenzi kuye ngokuthe ngqo ezi zinto zothando. Bambona esetroneni yakhe ngamehlo abo okholo kuphela. UYesu uyayixabisa yonke imigudu abayenzayo bencedisa abazalwana bakhe bokomoya, abaya kuba ziindlalifa kunye naye emazulwini. Okwenziwa kubazalwana bakhe ukubalela ekuthini kwenziwa kuye ngokobuqu. Ababumvu benza okulungileyo kubazalwana bakaKristu ngenxa yokuba beqonda ukuba bangabazalwana bakhe. Bayaqonda ukuba abazalwana bakaYesu bokomoya bangabameli boBukumkani bukaYehova, yaye bafuna ukunikela ubungqina obubambekayo bokuba bamela uBukumkani kunye nabo.
22. Udidi lwezimvu luvuzwa njani? (Thelekisa ISityhilelo 7:14-17.)
22 UYehova wabona kwangaphambili ukuba olu didi lunjengezimvu lwaluya kuvela ngeli xesha lobukho boNyana wakhe, yaye ulugcinele umvuzo omangalisayo! Isihlwele esikhulu siya kuzidl’ ilifa iintsikelelo zoxolo apha emhlabeni ebudeni boLawulo Lwewaka Leminyaka olonwabisayo loKumkani kaYehova, uYesu Kristu.
23. Kungaziphi iindlela ezithi izimvu zincede ngazo abazalwana boKumkani?
23 Xa siqwalasela iziprofeto zeBhayibhile ezisebenza ngexesha lobukho bukaKristu, nomzekeliso kaYesu wezimvu neebhokhwe, sibona ntoni? Sibona oku: Umntu akabi yomvu elilungisa phambi koThixo noKumkani wakhe kuba nje esuke engazi yaye kwazenzekela ukuba enze okulungileyo kubazalwana boKumkani bokomoya. Abo bodidi lwezimvu bayakwazi abakwenzayo, nangona bengamboni ngamehlo abo enyama uKumkani olawulayo. Bazabalazela ukunceda abazalwana boKumkani kungekhona ngezinto eziphathekayo kuphela kodwa nangokomoya. Njani? Ngokubancedisa ekushumayeleni iindaba ezilungileyo zoBukumkani bukaThixo nasekuqhubeni izifundo zeBhayibhile zokwenza abafundi bakaKristu. Ngaloo ndlela, namhlanje kukho abathwali bokukhanya abavakalisa uBukumkani bukaThixo abangaphezu kwezigidi ezine.
Imisebenzi Eyandisiweyo
24. Kukuphi ukubulaleka ngothando okwenze udidi lomkhonzi abona bantu bonwabileyo emhlabeni namhlanje?
24 Makhe sibale eminye imisebenzi emininzi emihle yodidi lomkhonzi othembekileyo. Okokuqala, udidi lomkhonzi lumiselwe phezu kwayo yonke impahla yeNkosi—izilangazelelo zayo zoBukumkani emhlabeni—yaye le mpahla iyaqhubeka isanda. Okwesibini, olo didi alondli abendlu kuphela kodwa nesihlwele esikhulu esiqhubeka sisanda ngokudla kokomoya. Okwesithathu, udidi lomkhonzi luyakhokela ekusasazeni ukukhanya koBukumkani. Okwesine, imisebenzi eyandayo yalo yanda kakhulu kumsebenzi wokuhlanganisa isihlwele esikhulu sezinye izimvu, sisiziswa kwitempile kaYehova yokomoya. Okwesihlanu, udidi lomkhonzi, luxhaswa ngentliziyo iphela ngababumvu, lulungiselela izakhiwo ezandisiweyo ukuze kulungelelaniswe amasebe emhlabeni wonke, kwanekomkhulu eliseUnited States. Ukubulaleka ngothando okunjalo kulwenze udidi lomkhonzi lwangabona bantu bonwabileyo emhlabeni namhlanje, yaye luye lwenza izigidi zabanye abantu nazo zonwaba. Bonke aba babulela uYehova uThixo noYesu Kristu, abaye balathisa imisebenzi eyandayo yomkhonzi oqondayo!
25. Izimvu zisenokuqhubeka ziluxhasa njani udidi lomkhonzi, zinaliphi ithemba?
25 Ngoku udidi lomkhonzi lusebenza ngamandla kunanini na ngaphambili lusenza imisebenzi yalo oluyinikwe nguThixo. Ixesha eliseleyo ngaphambi kokuqhambuka ‘kwembandezelo enkulu’ seliphelile! (Mateyu 24:21) Hayi indlela ekubaluleke ngayo ukuba aba bazizimvu zikaThixo bahlale benenkoliseko kwicala elingasekunene loMalusi onguKumkani! Ngoko ke, ngenzondelelo sonke masiqhubeke simxhasa umkhonzi othembekileyo noqondayo. Kungokwenza oku kuphela ekuya kuthi ngaminazana ithile engekude bonke ababumvu bakwazi ukuva la mazwi avuyisayo: “Yizani, nina nisikelelweyo nguBawo, nibudle ilifa ubukumkani obalungiselwa nina kwasekusekweni kwehlabathi.”
Ngaba Unokuphendula?
◻ Kukuphi ukugweba kokuqala okulandela ukubekwa kukaKumkani etroneni?
◻ UMateyu 24:45-47 uye wazaliseka njani kumaxesha anamhlanje?
◻ Ngokuphathelele imisebenzi eyandisiweyo, yintoni olunombulelo kakhulu ngayo udidi lomkhonzi nesihlwele esikhulu?
◻ UMateyu 25:34-40 uzaliseka njani ebudeni bepa·rou·siʹa?
[Umfanekiso okwiphepha 16]
Inkosi inikela yonke impahla yayo kumkhonzi othembekileyo
[Umfanekiso okwiphepha 18]
UYesu uhleli kwitrone yakhe yobuqaqawuli ukuze agwebe uluntu