Ihlabathi Elingenamasela

KWENZEKA ngephanyazo. Indoda enxibe kakuhle yabek’ umkhono wekati entloko kuAntônioa phambi kwekhaya lakhe eSão Paulo, eBrazil, yafuna ngenkani izitshixo neempepha zenqwelo-mafutha yakhe, yaza yaphel’ emehlweni naloo nqwelo-mafutha.

ERio de Janeiro, amadoda amane axhobe af’ amacala ahlasela indoda egama linguPaulo, phambi kwentombazana yayo eneshumi leminyaka ubudala. Bandula ke, emva kokuba bebeqhube baya ekhayeni lakhe, aba baphangi bangena baza beba konke ababekufuna, bezalisa iinqwelo-mafutha zikaPaulo ezimbini. Besongela umfazi kaPaulo ngokumbulala, bamthabatha nomqeshwa njengabathinjwa babasa kwivenkile yamatye anqabileyo kaPaulo ephakathi edolophini, abathi kuyo bathabatha yonke into enexabiso. Noko ke, ngokungalindelekanga, loo masela atsala umnxeba kamva, echaza apho iinqwelo-mafutha azishiye khona.

Hayi indlela ekudimaza ngayo ukuphangwa imali nezinto ozisebenzele nzima! Nangona uAntônio okanye uPaulo bengazanga bathabathele umthetho ezandleni zabo, abanye bayakwenza oko. Basenokulibulala okanye balenzakalise kanobom isela, okanye basenokuphulukana nobomi babo. Ngokomzekelo, xa omnye oselula waxhwila iwotshi yalo, elinye ibhinqa laseBrazil elalivethe iqaqa lakhupha umkhono wekati kwibhegi yalo laza ladubula eli sela, lalibulala. Waba yintoni umphumo? IO Estado de S. Paulo inikela le ngxelo: “Abantu ababebukele eso siganeko basincoma isimo sengqondo selo bhinqa lingaziwayo, yaye akukho namnye owafuna ukunceda abakwantsasana ngokulichaza.” Nangona elilangazelela ihlabathi elingenamasela, amaKristu awaziphindezeleli njengoko elo bhinqa lenzayo. Ekubeni impindezelo iyekaThixo, athobela amazwi akwiMizekeliso 24:19, 20 athi: “Musa ukuvutha ngumsindo ngabenzi bobubi, ungabamoneli abangendawo; kuba umenzi wobubi akayi kuba nakamva.”

Kodwa yintoni onokuyenza ukuba uyahlaselwa? Isiganeko esenzeka eRio de Janeiro sibonisa indlela ekubaluleke ngayo ukuhlala uzolile. Omnye umKristu, uHeloísa, wayehamba ngoduladula esiya kuqhuba isifundo seBhayibhile. Amadoda amabini aqalisa ukuphanga abo babekhwele kuduladula. Xa efika kwisikhululo sikaduladula apho wayeza kuhla khona, uHeloísa wawaxelela ukuba wayengomnye wamaNgqina kaYehova yaye wayesiya kuqhuba isifundo seBhayibhile. Wawabonisa iBhayibhile yakhe nencwadi yokuyifundisisa. Ngaphandle kokumphanga, la masela amvumela ukuba ehle. Noko ke, omnye owayekhwele apho awazange amvumele ukuba ehle. Kamva umqhubi waloo dula-dula wathi akazange akhe ayibone into enjengaleyo.

URegina naye wahlala ezolile xa amadoda amabini axhobileyo amyalela ukuba angene kwinqwelo-mafutha yakhe. Ewabonisa umbhalo wakhe wobuqu wephephancwadi uVukani!, uRegina wanikela ubungqina. Ekubeni aba baphangi babetyhwatyhwa, wabacela ukuba bavule kwindawo agcina kuyo iilekese kwinqwelo-mafutha. Kodwa besakubona iikhasethi zeeKingdom Melodies, baqalisa ukuphulaphula loo mculo. Besiba nobuhlobo ngakumbi, aba baphangi bagqiba kwelokuba bamshiye uRegina bengamenzakalisanga kuhola wendlela, bemqinisekisa ukuba wayeya kufumana umntu onobubele oza kumnceda. Emva kokuba ehambe imizuzu elishumi, wangena kwenye indlu, kodwa umnini waloo ndlu akazange alikholelwe ibali lakhe, esithi: “Akukho nto ibonakalisa ukuba ubuhlaselwe; uzole gqitha.”

Nangona ixhoba lisenokuba alenzakalanga emzimbeni, amava anjalo ahlasimlis’ umzimba anokubangela imiphumo enzulu kamva. IO Estado de S. Paulo inikela le ngxelo: ‘Ixhoba lisenokuziva linganqabiseki, liwacaphukele amalungu entsapho okanye abo bazama ukulinceda, lingakwazi ukuthemba abanye, lifune ngamaxesha onke ukuba zonke izinto zilungiselelwe kakuhle nangokweenkcukacha, livakalelwe kukuba ihlabathi lizele kokungekho sikweni.’ Ngokuchasene noko, ixhoba elithembela ngoYehova uThixo amaxesha amaninzi kusenokwenzeka lisinde kuloo mava lingenzakelanga emzimbeni nangokweemvakalelo. Sekunjalo, ngaba akuvumi ukuba bekuya kuba yintsikelelo ukuba bekungekho lwaphulo-mthetho okanye nantoni na ebangela uloyiko?

“Lowo Ubayo Makangabi Seba”

Nangona abaninzi bekhetha ukuphila ngendlela yabo yokubawa, iLizwi likaThixo liye lanceda amasela aguqula iminqweno yawo nobuntu bawo. (Efese 4:23) Enenjongo yokwenene ebomini, esekelwe eBhayibhileni, athobela amazwi athi: “Ilungile intwana encinane enobulungisa, ngaphezu kolungiselo oluninzi olukunye nokungesesikweni.” (IMizekeliso 16:8) UCláudio ubalisa oku: “Phantse bonke entsatsheni yakowethu babengamaNgqina, kodwa mna andizange ndikuphulaphule konke ababekuthetha ngoYehova nangeenjongo zakhe. Ndibuya kuhambo oluphantse lube [ziikhilomitha ezingama-2 000] ndiqhuba ilori ebiweyo, kwafuneka ndidlule kwiindawo ezininzi apho amapolisa ayehlola khona iinqwelo-mafutha. Kusenjalo ndaqonda ukuba ndandifanele ndibuguqule ubomi bam. Ndandikhe ndazama ukukwenza oko kodwa andizange ndiphumelele. Ngeli xesha ndaqalisa ukucinga ngezalamane zam ezazingamaNgqina kaYehova nangendlela ezahluke ngayo, zinovuyo, zonwabile yaye zinoxolo.” Ngenxa yoko, uCláudio waqalisa ukufundisisa iLizwi likaThixo, wahlukana neziyobisi nabahlobo bakhe bangaphambili, waza waba ngumlungiseleli ongumKristu.

Kwanabanye ngoku bayawathobela amazwi athi: “Musani ukukholosa ngokudla abantu, ningazenzi into engeyanto ngento exhakamfuliweyo.” (INdumiso 62:10) Emva kwesigwebo sokuvalelwa entolongweni ngenxa yokuzama ukubulala umntu ebudeni bokuphanga, uJosé, owayekhotyokiswe ziziyobisi nowayekwangumthengisi wazo, wangenelwa kufundisiso lweBhayibhile nomlanya wakhe. Wayeka ukusebenzisa nokuthengisa iziyobisi yaye ngoku uliNgqina elinenzondelelo.

Sekunjalo, ubuntu obutsha abubikho ngamabona-ndenzile okanye ngommangaliso. UOscar, owayebandakanyeke ngokunzulu kwiziyobisi nasebuseleni, ubalisa oku: “Ndandithandaza ngokusuka entliziyweni kuYehova ngokokude umgangatho ngokufuthi ubonakale ngathi lichibi elincinane ngenxa yeenyembezi zam ezininzi.” Ewe, ukongezelela ekufundisiseni iLizwi likaThixo ngenkuthalo, ngokuzingisileyo, kufuneka umthandazo osuk’ entliziyweni. Phawula ubulumko kulo mthandazo: “Musa ukundinika ubuhlwempu nobutyebi; ndihlafunise isonka endisimiselweyo; hleze ndihluthe, ndikhanyele, ndithi, Ngubani na uYehova? Hleze ndihlwempuzeke, ndibe, ndilicukuceze igama likaThixo wam.”—IMizekeliso 30:8, 9.

Ukuzingca kufanele kuthatyathelw’ indawo luthando lokwenene: “Lowo ubayo makangabi seba; kanye ke makabulaleke esebenza okulungileyo ngezandla zakhe, ukuze abe nako ukwabela osweleyo.” (Efese 4:28) Njengakwimeko yamaKristu enkulungwane yokuqala awayesakuba ‘ngamasela okanye amabawa,’ uYehova, ngentlawulelo kaYesu Kristu, ngenceba uyabaxolela abo baguqukayo. (1 Korinte 6:9-11) Hayi indlela esithuthuzela ngayo isibakala sokuba nokuba besifudula sinjani na, sinokuyiguqula indlela esiphila ngayo size sifumane inkoliseko kaThixo!—Yohane 3:16.

Unqabiseko Kwihlabathi Elitsha LikaThixo

Khawube nomfanekiso-ngqondweni womhlaba ongenamasela. Ubungasayi kufuna inkqubo exabisa imali eninzi yokuqinisekisa ukugcinwa komthetho yeejaji, amagqwetha, amapolisa neentolongo! Umhlaba ubuya kuba lihlabathi eliphumelelayo apho wonk’ ubani ebeya kuhlonela abanye nezinto zabo! Ngaba oku kubonakala kuyintsom’ emini? Ngaba ngokwenene uThixo uya kungenelela kwimicimbi yabantu aze aphelise ukuchas’ umthetho? Siyakumema ukuba uhlolisise ubungqina bokuba iBhayibhile iliLizwi likaThixo nokuba iziprofeto zayo zinokuthenjwa. Uya kufumana isizathu esibambekayo sokuba nethemba lokuba iinguqulelo zikufuphi. Akukho bani unokuthintela uThixo ekuziseni isiqabu esithenjiswe bonke abo bathanda ubulungisa: “Musa ukuzivuthisa ngomsindo ngabenzi bobubi; musa ukubamonela abenzi bobugqwetha. Ngokuba baya kusikwa kamsinyane njengengca, babune njengohlaza oluphumayo.” (INdumiso 37:1, 2) Loo mazwi abhalwa kude kudala aza kuzaliseka ngokupheleleyo kungekudala.

UBukumkani bukaThixo buya kuphelisa unxunguphalo nobubi, obubangela ukuphelelwa lithemba nokungaqiniseki. Akukho bani uya kuswela nto, azive ecinezelekile ukuba ebe. Isiprofeto sisiqinisekisa ngoku: “Makubekho intabalala yengqolowa ezweni, ise encotsheni yeentaba; ukuqhama kwayo makurhashaze njengeLebhanon; mabatyatyambe emizini yabo njengemifuno yomhlaba.” (INdumiso 72:16) Ngokwenene, kwiParadisi ebuyiselweyo, akukho nto iya kuphazamisana noxolo lwabantu abamaziyo nabamnqulayo uThixo wokwenyaniso.—Isaya 32:18.

Onjani wona umvuzo okuya kuba nguwo oko ngenxa yokuxhathisa iindlela zeli hlabathi libawayo! IMizekeliso 11:19 ithi: “Ubulungisa obububo busingisa ebomini; ophuthuma ububi usingisa ekuzibulaleni kwakhe.” Ewe, emva kokuba kunqunyulwe abangendawo, akukho bani uya kuba nesizathu sokoyikela ubomi bakhe okanye izinto zakhe. INdumiso 37:11 isinika esi sithembiso: “Ke bona abalulamileyo baya kulidla ilifa ilizwe, baziyolise ngobuninzi boxolo.”

[Umbhalo osemazantsi]

[Ibhokisi ekwiphepha 5]

Ukujamelana Nobukho Bobusela

EKHAYA—Ekubeni amasela esenokuqhekeza enoba usekho ekhaya okanye akukho, gcina iingcango zivaliwe yaye zitshixiwe. Iingcali zincomela ukuba ube nealarm okanye inja yokulinda. Xelela ummelwane omthembileyo xa uza kuhamba uye kwikhefu. Hlala uzolile—abaphangi benza izinto ngokungxama, ngokungalindelekanga, yaye basenokukuguqula ngokukhawuleza oko bebekucebile besoyika. Ukuba ungomnye wamaNgqina kaYehova bachazele oko uze uzame ukunikela ubungqina. Usenokukwazi ukubenza babe nobuhlobo okanye uvelwano. Musa ukuxhathisa ngaphandle kokuba uhlaselwa emzimbeni.

ESIDLANGALALENI—Kuphaphele ukuphawula ukuba kukho umntu okulandelayo. Hamba phakathi kwindledlana yeenyawo. Ziphephe izitrato ezimnyama nezingenabantu. Gcina isipaji okanye izinto zakho ezixabisekileyo zinqabisekile. Hamba ngokukhawuleza ngokungathi uleqa kwindawo ethile. Kuphephe ukunxiba iimpahla ezixabisa imali eninzi okanye izinto ezikhazimlayo ezenziwe ngamatye anqabileyo. Xa iimeko zinyanzelisa hamba nomnye umntu xa usiya kuthenga. Phatha imali efunekayo kuphela, uyifake kwiipokotho okanye kwiindawo ezahlukahlukeneyo.

KWINQWELO-MAFUTHA—Ukuba “ukuqweqwediswa kweenqwelo-mafutha” kuyinto exhaphakileyo kummandla okuwo, musa ukuhlala kwinqwelo-mafutha yakho emisiweyo. Xa usiya kwanaxa ubuya emsebenzini sebenzisa iindlela ezahlukeneyo. Hamba ngendlela enqabiseke ngakumbi, kwanokuba ibonakala inde ngandlel’ ithile. Ngaphambi kokuba umise, jonga ukuba akukho nto ibonakala inonyawo lwemfene kusini na. Kuphephe ukuvula indawo engasemva yokufaka umthwalo kwinqwelo-mafutha kummandla ongenabantu. Musa ukushiya izinto ezixabisekileyo zibonakala kwinqwelo-mafutha. Ityathanga elitshixiweyo elibonakalayo okanye esinye isixhobo sokuthintela amasela sisenokuwadimaza amasela angenabuchule kangako.

[Ibhokisi ekwiphepha 6]

“Ningaziqwebeli ubutyebi emhlabeni, apho konakalisa inundu nomhlwa, nalapho amasela agqobhozayo ebe; ziqwebeleni ke ubutyebi emazulwini, apho kungonakalisi nundu namhlwa, nalapho amasela angagqobhoziyo ebe.”—Mateyu 6:19, 20