Imibuzo Evela Kubafundi

Ngaba amaNgqina kaYehova ayazamkela iinxalenye ezithile zegazi?

Le mpendulo ilandelayo ingumongo woko kwakushicilelwe kwinkupho kaJuni 15, 2000.

Impendulo esisiseko yethi amaNgqina kaYehova akalamkeli igazi. Sikholelwa ngamandla kwinto yokuba umthetho kaThixo ophathelele igazi awunakuhlaziywa ukuze uvumelane neembono eziguqukayo. Noko ke, kuphakama imibuzo emitsha kuba igazi ngoku linokwahlula-hlulwa libe ziincindi ezine eziphambili nezinye iincindi eziphuma kuzo. Xa esenza isigqibo enoba uyazamkela na ezo ncindi, umKristu ufanele ajonge ngaphaya kweengenelo neengozi zempilo. Eyona nto amele ayixhalabele koko iBhayibhile ikuthethayo kunye nomphumo osenokubakho kulwalamano lwakhe noThixo uSomandla.

Ezona zinto zisisiseko zilula gqitha. Ukuze uyibone loo nto, qwalasela oko kuthethwa yiBhayibhile, yimbali nezonyango kulo mba.

UYehova uThixo waxelela ukhokho wethu uNowa ukuba igazi limele liphathwe njengento ekhethekileyo. (Genesis 9:3, 4) Kamva, imithetho kaThixo eyayisiya kumaSirayeli yayibonisa ubungcwele begazi: “Nawuphi na umntu wendlu kaSirayeli okanye umphambukeli . . . othi adle naluphi na uhlobo lwegazi, ndowuchasa ngokuqinisekileyo loo mphefumlo udle igazi.” Xa wayenokungawamkeli umthetho kaThixo, umSirayeli wayenokosulela abanye; ngenxa yoko, uThixo wongezelela esithi: “Ndiwunqumle phakathi kwabantu bakowawo.” (Levitikus 17:10) Kamva, kwintlanganiso eyayiseYerusalem, abapostile namadoda amakhulu bamisela umyalelo wokuba simele ‘sikhwebuke kwigazi.’ Ukwenjenjalo kubaluleke ngokufanayo nokuzikhwebula ekuziphatheni okubi ngokwesini nakunqulo-zithixo.—IZenzo 15:28, 29.

Kusenokuba kwakuthetha ntoni ‘ukuzikhwebula’ ngelo xesha? AmaKristu ayengalityi igazi, enoba liseshushu okanye lijiyile; yaye ayengayityi nenyama yesilwanyana esingophiswanga. Ezinye izinto ezazingavumelekanga kukutya okunegazi, njengesoseji eyenziwe ngegazi. Ukutya igazi ngayo nayiphi na indlela kwezi kwakuya kuba kukwaphula umthetho kaThixo.—1 Samuweli 14:32, 33.

Inkoliso yabantu bamandulo isenokuba yayingakuchasanga ukutya igazi, njengoko sinokubona kwiincwadi zikaTertullian (zenkulungwane yesibini neyesithathu yeXesha Eliqhelekileyo). Xa wayephendula izityholo zobuxoki zokuba amaKristu ayelitya igazi, uTertullian wakhankanya izizwe ezithile ezazisenza izivumelwano ngokungcamla igazi. Kwakhona wathi “xa kusenziwa umboniso kwibala lemidlalo, [abanye] abanonxano olukhatshwa kukubawa babelikhongozela liseshushu igazi labo banetyala . . . belisebenzisa njengeyeza lesifo sokuwa.”

Oko (kwanokuba amaRoma athile ayekwenza ngezizathu zempilo) kwakuphosakele kumaKristu: “Asifaki nkqu nelezilwanyana igazi ekutyeni kwethu okuqhelekileyo,” wabhala esitsho uTertullian. AmaRoma ayesebenzisa ukutya okunegazi ukuze avavanye ingqibelelo yamaKristu okwenyaniso. UTertullian wongezelela wathi: “Nanku ke ngoku umbuzo endinibuza wona, yenzeka njani into yokuba, nithi niqinisekile [ukuba amaKristu] alichase ngandlela zonke igazi lezilwanyana, nicinge ukuba anyolukele igazi labantu?”

Namhlanje, bambalwa abantu abanokucinga ukuba imithetho kaThixo uSomandla ibandakanyekile xa ugqirha ecebisa ukuba batofelwe igazi. Ngoxa ngokuqinisekileyo amaNgqina kaYehova efuna ukuqhubeka ephila, sizimisele ukuthobela umthetho kaYehova ngokuphathelele igazi. Ithetha ntoni loo nto kwimibandela yezonyango kule mihla?

Njengoko ukutofelwa kwegazi elipheleleyo kwakusiya kuqheleka emva kweMfazwe Yehlabathi II, amaNgqina kaYehova abona ukuba kwakungqubana nomthetho kaThixo—ibe sisakholelwa kuloo nto nangoku. Ukanti imibandela yezonyango iye yatshintsha njengoko ixesha lihamba. Namhlanje, ubukhulu becala akusatofelwa igazi elipheleleyo kodwa kutofelwa enye yeencindi eziphambili eziyila igazi: (1) iiseli ezibomvu; (2) iiseli ezimhlophe; (3) iiplatelets (4) neplasma (serum), inxalenye elulwelo. Kuxhomekeka kwimeko yomguli, oogqirha basenokuncomela ukuba afakwe iiseli ezibomvu, iiseli ezimhlophe, iiplatelets okanye iplasma. Ukutofelwa ezi ncindi ziphambili eziyila igazi kwenza ukuba umlinganiselo omnye wegazi ukwazi ukwabelwa abaguli abangakumbi. AmaNgqina kaYehova akholelwa ukuba ukwamkela igazi elipheleleyo okanye iincindi ezine eziphambili kukwaphula umthetho kaThixo. Okuphawulekayo kukuba, ukuwuthobela kwawo lo myalelo weBhayibhile kuye kwawakhusela kwiingozi ezininzi, kuquka izifo ezinjengehepatitis noGawulayo, ezinokungena ngegazi.

Noko ke, ekubeni kusenokufunyanwa ezinye iincindi kwezo ncindi ziphambili zegazi, kuvela imibuzo ephathelele neencindi ezifumane kwiincindi eziphambili zegazi. Zisetyenziswa njani ezo ncindi, yaye umKristu ufanele aqwalasele ntoni xa esenza izigqibo ngokuphathelele zona?

Igazi lintsonkothile. Kwaneplasma—ama-90 ekhulwini yayo engamanzi—inentaphane yeencindi zamadlala, iityuwa, iienzymes, nezondlo ezinjengezimbiwa neswekile. Kwakhona iplasma ikwaqulethe iiproteni ezinjengealbumin, izinto ezenza igazi linqume kunye nezibulala-buhlungu ezilwa izifo. Iingcali ziyazikhetha iiproteni ezininzi zeplasma zize zizisebenzise. Ngokomzekelo, iclot­ting factor VIII enqumisa igazi iye yatofelwa kubantu abanesifo sokopha, abopha msinya. Okanye xa umntu echanabeke kwizifo ezithile, oogqirha basenokumtofela igamma globulin, efumaneka kwiplasma yegazi labantu elinamandla okulwa nezifo. Nezinye iiproteni zeplasma ziyasetyenziswa kwezonyango, kodwa ezi zikhankanywe ngasentla zibonisa indlela incindi ephambili yegazi (iplasma) enokwahlulahlulwa ngayo ukuze kufunyanwe ezinye iincindi.a

Kanye njengokuba kwiplasma kusenokufumaneka iincindi eziliqela, nezinye iincindi eziyila igazi (iiseli ezibomvu, iiseli ezimhlophe neeplatelets) zinokwahlulahlulwa kuze kuzo kufumaneke ezinye iincindi. Ngokomzekelo, kwiiseli ezimhlophe kusenokufunyanwa ii-interferons neeinterleukins, ezisetyenziswa ukunyanga izifo ezithile ezosulelayo neendidi zomhlaza. Kwiiplatelets kunokufunyanwa imichiza yokupholisa amanxeba. Kwaye kuvela namanye amayeza abandakanya (ubuncinane ekuqaleni) izinto ezihluzwe kwiincindi eziyila igazi. Olo nyango asikokutofelwa kwezo ncindi eziyila igazi; ludla ngokubandakanya ezinye iincindi. Ngaba umKristu ufanele azamkele ezi ncindi ezisetyenziswa kwezonyango? Asinakutsho. IBhayibhile ayinikeli zinkcukacha, ngoko umKristu ufanele azenzele isigqibo esixhaswa sisazela sakhe phambi kukaThixo.

Amanye asenokwala nantoni na ethatyathwe kwigazi (kwaneencindi ezitofelwa ukuze kukhuselwe umzimba kwizifo okwexeshana). Leyo yindlela awuqonda ngayo umyalelo kaThixo othi ‘zikhwebule kwigazi.’ Aqiqa ngelithi umthetho wakwaSirayeli wawusithi igazi lesidalwa lalimele ‘liphalazelwe emhlabeni.’ (Duteronomi 12:22-24) Inxulumene njani ke le nkalo nalo mba? Kaloku, ukuze kufunyanwe igamma globulin, ulwelo lokunqumisa igazi nezinye izinto, kuye kufuneke ukuba kufunyanwe igazi lize lahlulahlulwe. Ngenxa yoko, amanye amaKristu awawamkeli loo mayeza, kanye njengokuba engakwamkeli ukutofelwa igazi elipheleleyo okanye iincindi zalo ezine eziphambili. Isigqibo sawo esixhaswa zizazela zawo sifanele sihlonelwe.

Amanye amaKristu enza isigqibo esahlukileyo. Nawo akakuvumi ukutofelwa igazi elipheleleyo okanye iiseli ezibomvu, iiseli ezimhlophe, iiplatelets okanye iplasma. Ukanti asenokuvuma ukuba ugqirha awanyange ngencindi ethatyathwe kwiincindi eziphambili eziyila igazi. Nalapha kusenokubakho ukwahlukana kwezimvo. Omnye umKristu usenokukwamkela ukutofelwa igamma glob­ulin, kodwa usenokukwamkela okanye angakwamkeli ukutofelwa nantoni na enencindi yeeseli ezibomvu okanye ezimhlophe. Phofu ke, yintoni esenokubangela amanye amaKristu agqibe kwelokuba azamkele iincindi zegazi?

Inqaku elithi “Imibuzo Evela Kubafundi” leMboniselo kaJuni 1, 1990, lathi iiproteni zesiyilelo-gazi (iinxalenye) ziyahamba zisuka kwigazi lebhinqa elikhulelweyo ziye kwinkqubo yegazi eyahlukileyo yemveku engekazalwa. Ngaloo ndlela umama udlulisela ii-immunoglobulins kumntwana wakhe, ukuze akwazi ukulwa izifo. Kwelinye icala, njengoko iiseli ezibomvu zemveku zifikelela esiphelweni sobomi bazo, inxalenye yazo ethwala ioksijini iyahlulahlulwa. Inxalenye yazo iba yibilirubin, enqumla iplacenta iye kumama ize ikhutshwe kunye nezinto ezilahlwa ngumzimba wakhe. Amanye amaKristu asenokugqiba ngelithi ekubeni iincindi zegazi zinokudluliselwa komnye umntu ngale ndlela yemvelo, anokuyamkela incindi yegazi efumaneka kwiplasma yegazi okanye yeeseli.

Ngaba isibakala sokuba iimbono kunye nezigqibo ezixhaswa zizazela zisenokungafani sithetha ukuba lo mba uyinto nje engenamsebenzi? Akunjalo. Ngumbandela onzulu lo. Kodwa ke ikho indlela esisiseko yokuwenza lula. Le nkcazelo ingasentla ibonisa ukuba amaNgqina kaYehova akalamkeli igazi elipheleleyo nelahluliweyo laba ziincindi eziphambili eziyila igazi. IBhayibhile iyalela amaKristu ukuba ‘azikhwebule kwizinto ezibingelelwe kwizithixo nasegazini nakuhenyuzo.’ (IZenzo 15:29) Ngaphezu koko, xa kufikelelwa kumbandela wayo nayiphi na incindi efumaneka kwiincindi eziphambili eziyila igazi, emva kokuba eye wacingisisa ngenyameko nangomthandazo, umKristu ngamnye umele azenzele isigqibo esixhaswa sisazela sakhe.

Abantu abaninzi baya kulwamkela naluphi na unyango olubonakala lubanceda ngokukhawuleza, kwanonyango olwaziwayo ukuba lunokuba yingozi empilweni, njengolu lweencindi zegazi. UmKristu onyanisekileyo uzabalazela ukuba nembono ephangaleleyo nelungeleleneyo engapheleliselwanga kwimiphumo enokubakho emzimbeni kuphela. AmaNgqina kaYehova ayayixabisa imigudu eyenziwayo yokunikela unyango olusemgangathweni, kwaye acingisisa nzulu ngeengozi nangeengenelo zalo naluphi na unyango. Noko ke, xa kufikelelwa kwiimveliso zegazi, acingisisa nzulu ngoko uThixo akuthethayo nangolwalamano lwawo noMniki-bomi wethu.—INdumiso 36:9.

Hayi indlela ekuyintsikelelo ngayo ukuba umKristu abe nentembelo efana neyomdumisi, owabhala esithi: “UYehova uThixo ulilanga nekhaka; unikela ubabalo nozuko. UYehova akayi kubandeza nantoni na elungileyo kwabo bahamba ngokungenamposiso. Owu Yehova . . . , unoyolo umntu okholosa ngawe”!—INdumiso 84:11, 12.

[Umbhalo osemazantsi]

[Ibhokisi ekwiphepha 31]

IMIBUZO EKUCETYISWA UKUBA UYIBUZE UGQIRHA

Ukuba uza kwenziwa utyando okanye uza kunyangwa ngendlela ebandakanya igazi, buza:

Ngaba bonke abasebenzi balapha esibhedlele ababandakanyekileyo bayazi ukuba, njengomnye wamaNgqina kaYehova, ndiyalela ukuba ndingatofelwa gazi (enoba liphelele, okanye ziiseli ezibomvu, iiseli ezimhlophe, iiplatelets, okanye iplasma) phantsi kwazo naziphi na iimeko?

Ukuba kunokusetyenziswa iyeza elenziwe ngeplasma, iiseli ezibomvu okanye ezimhlophe, okanye ii-“platelets,” buza:

Ngaba eli yeza lenziwe ngenye yeencindi ezine eziphambili eziyila igazi? Ukuba kunjalo, ngaba ungandichazela ukuba lenziwe ngantoni?

Lingakanani iyeza elenziwe ngegazi eliza kufakwa kum, kwaye liza kufakwa njani?

Ukuba isazela sam siyandivumela ukuba ndiyamkele le ncindi, ziziphi iingozi zempilo endinokujamelana nazo?

Ukuba isazela sam asivumi ukuba ndiyamkele le ncindi, yiyiphi enye indlela yonyango esenokusetyenziswa?

Emva kokuba ndiye ndayicingisisa le nto, ndikwazise nini ngesigqibo sam?