Indoda Nomfazi—Ngamnye Unendima Yakhe Ebalulekileyo
UYEHOVA UTHIXO waqala wadala uAdam, walandelisa ngoEva. Ngaphambi kokuba kudalwe uEva, uAdam wayesele enezinto azaziyo ngobomi. Ngelo xesha, uYehova wamnika imiyalelo ethile. (Genesis 2:15-20) Ethethela uThixo, uAdam kwafuneka adlulisele loo miyalelo kumfazi wakhe. Isengqiqweni into yokuba wayeza kukhokela kuzo zonke izinto eziphathelele unqulo.
Eli lungiselelo likho nakwibandla lamaKristu, ngoko kuya kusinceda ukulihlolisisa. Umpostile uPawulos wathi: “Andimvumeli umfazi ukuba . . . asebenzise igunya endodeni, kodwa makathi cwaka. Kuba kwayilwa uAdam kuqala, kwaza kwalandela uEva.” (1 Timoti 2:12, 13) Oku akuthethi kuthi umfazi umele abe sisimumu kwiintlanganiso zebandla lamaKristu. Ukuthula kwakhe kuthetha ukuba akaphikisani nendoda, ajongele phantsi ukumiselwa kwayo, okanye azame ukufundisa ibandla. Ngamadoda anikwe umsebenzi wokongamela nokufundisa ibandla, bona abafazi baba negalelo elikhulu kwiintlanganiso zebandla ngokufaka isandla ngeendlela ezahlukahlukeneyo.
Esenza siqonde indima yamadoda nendima yabafazi kwilungiselelo likaThixo, umpostile uPawulos wathi: “Kuba indoda ayiphumi mfazini, kodwa ngumfazi ophume endodeni . . . Ngaphandle koko, eNkosini akubikho mfazi ngaphandle kwendoda kungabikho nandoda ngaphandle komfazi [akakho ongaxhomekanga komnye]. Kuba kanye njengoko umfazi ephuma endodeni, ngokunjalo nendoda ibakho ngomfazi; kodwa zonke izinto ziphuma kuThixo.”—1 Korinte 11:8-12.
Abafazi Baxhamla Amalungelo Amahle
KuMthetho owanikwa amaSirayeli nguThixo, abafazi babenamalungelo amaninzi yaye babenenkululeko yokuwasebenzisa xa kufanelekile. Ngokomzekelo, IMizekeliso 31:10-31 ithetha ‘ngomfazi ofanelekileyo’ othenga izinto ezintle aze ayenzele izambatho ezingayiwayo indlu yakhe. “Wenza kwanezambatho zangaphantsi aze azithengise”! (Indinyana 13, 21-24) ‘Njengeenqanawa zomrhwebi,’ lo mfazi uyifunela okona kutya kuphambili, kwanokuba oko kuthetha ukuya kukufuna kude. (Indinyana 14) “Ucinga ngentsimi aze ayizuze” emva koko “utyala isidiliya.” (Indinyana 16) Ekubeni “ukurhweba kwakhe kulungile,” ufumana inzuzo kwimisebenzi yakhe. (Indinyana 18) Ngaphandle ‘kokondela ihambo yendlu yakhe’ esi sikhuthali somfazi owoyika uYehova sizinikele nasekuncedeni abanye. (Indinyana 20, 27) Yiloo nto eqhwatyelwa izandla nje!—Indinyana 31.
Imithetho kaYehova awayinikela ngoMoses yayisenza abafazi babe nethuba elaneleyo lokukhula ngokomoya. Ngokomzekelo, kuYoshuwa 8:35, sifunda oku: “Akuzange kubekho nalinye ilizwi kuwo onke uMoses awayewayalele uYoshuwa angazange alifunde ngokuvakalayo ngaphambi kwalo lonke ibandla lakwaSirayeli, kunye nabafazi nabantwana nabaphambukeli ababehamba phakathi kwabo.” Ithetha ngombingeleli uEzra, iBhayibhile ithi: “Wawuzisa umthetho phambi kwebandla lamadoda nelabafazi nelabo banengqiqo ngokwaneleyo yokuphulaphula, ngosuku lokuqala lwenyanga yesixhenxe. Waqhubeka ewufunda ngokuvakalayo phambi kwendawo yembutho ephambi kweSango Lamanzi, ukususela ekuthini qheke kwemini kwada kwasemini emaqanda, phambi kwamadoda nabafazi nabo banengqiqo; yaye iindlebe zabo bonke abantu zaziphulaphule incwadi yomthetho.” (Nehemiya 8:2, 3) Abafazi babezuza koko kufundwa koMthetho. Babesibakho kwimibhiyozo yonqulo. (Duteronomi 12:12, 18; 16:11, 14) Eyona nto ibalulekileyo, mandulo kwaSirayeli abafazi babesiba nolwalamano lobuqu noYehova uThixo bekwazi ukuzithandazela kuye.—1 Samuweli 1:10.
Ngenkulungwane yokuqala yeXesha Eliqhelekileyo, abafazi aboyika uThixo baba nelungelo lokuba ngabalungiseleli bakaYesu. (Luka 8:1-3) Omnye umfazi wathambisa intloko neenyawo zakhe kwisidlo sangokuhlwa esasiseBhethani. (Mateyu 26:6-13; Yohane 12:1-7) Abafazi bakho phakathi kwabo wabonakala kubo uYesu emva kokuvuswa kwakhe. (Mateyu 28:1-10; Yohane 20:1-18) Emva kokuba enyukele ezulwini, kwakukho “nabafazi abathile noMariya unina kaYesu,” kwiqela labamalunga ne-120 ababehlanganisene kunye. (IZenzo 1:3-15) Ngokuqinisekileyo abaninzi okanye bonke abo bafazi babekwigumbi eliphezulu eYerusalem ngomhla wePentekoste yowama-33 C.E., xa kwathunyelwa umoya oyingcwele baza ngokungummangaliso abafundi bakaYesu bathetha ngeelwimi ezahlukahlukeneyo.—IZenzo 2:1-12.
Amadoda nabafazi babephakathi kwabo babona ukuzaliseka kwesiprofeto sikaYoweli 2:28, 29, njengoko sacatshulwayo ngumpostile uPetros ngomhla wePentekoste esithi: “[Mna Yehova] ndiya kuthululela inxalenye yomoya wam phezu kwalo lonke uhlobo lwenyama, ibe baya kuprofeta oonyana benu neentombi zenu . . . Yaye kwanaphezu kwamakhoboka am naphezu kwamakhobokakazi am ndiza kuthulula inxalenye yomoya wam ngaloo mihla.” (IZenzo 2:13-18) Kangangethuba elithile emva kwePentekoste yowama-33 C.E., abafazi abangamaKristu baqhubeka befumana izipho zomoya. Babethetha ngeelwimi zasemzini, beprofeta, bethetha inyaniso yeZibhalo.
Kwincwadi yakhe eyayisiya kumaKristu aseRoma, umpostile uPawulos uthetha kakuhle ‘ngoFibhi udade wethu,’ emncoma kuwo. Uphinda athethe ngoTrifena noTrifosa, esithi ‘ngabafazi abasebenza nzima eNkosini.’ (Roma 16:1, 2, 12) Nakuba aba bafazi babengenalungelo lokuba ngabaveleli kwibandla lamaKristu okuqala, bekunye nabanye abafazi baxhamla ilungelo lokukhethwa nguThixo ukuze babe ngamadlelane noNyana wakhe, uYesu Kristu kuBukumkani basezulwini.—Roma 8:16, 17; Galati 3:28, 29.
Namhlanje abafazi aboyika uThixo banelungelo elingathethekiyo. INdumiso 68:11 ithi, “NguYehova onikela eli lizwi; abafazi abavakalisa iindaba ezilungileyo bangumkhosi omkhulu.” Bamele banconywe gqitha abo bafazi. Ngokomzekelo, ubuchule babo bokufundisa kwizifundo zeBhayibhile zasekhaya benze abaninzi bamkela iimfundiso eziyinyaniso nezimkholisayo uThixo. Bamele banconywe gqitha abafazi abangamaKristu atshatileyo abanceda abantwana babo ukuze babe ngamaKristu ngoxa bexhasa abayeni babo abaneembopheleleko ezininzi zebandla. (IMizekeliso 31:10-12, 28) Nawo amabhinqa angatshatanga anendima ebalulekileyo kwilungiselelo likaThixo, ibe amadoda angamaKristu axelelwa ukuba ‘abongoze abafazi abakhulu njengoonina, amabhinqa amancinane njengoodade wawo enobunyulu bonke.’—1 Timoti 5:1, 2.
Izabelo Ezahlukeneyo Zendoda
Amadoda angamaKristu anikwe indima ebalulekileyo nguThixo ibe amele ayiphumeze. UPawulos wathi: “Ndifuna nazi ukuba intloko yayo yonke indoda nguKristu; intloko yomfazi yindoda; intloko kaKristu nguThixo.” (1 Korinte 11:3) Nayo indoda inentloko—uKristu. Enyanisweni, indoda iyaphendula kuKristu noThixo. UThixo ulindele ukuba indoda ilawule ngothando. (Efese 5:25) Oku bekunjalo ukususela ekuqaleni kokubakho kwabantu.
IBhayibhile ibonisa ukuba uThixo ebenika indoda izabelo ngokuvumelana nobuntloko bayo. Ngokomzekelo, uYehova wayalela indoda enguNowa ukwakha umkhombe ukuze kusindiswe abantu kuNogumbe. (Genesis 6:9–7:24) Indoda uAbraham yathenjiswa ukuba zonke iintsapho nezizwe zomhlaba zaziya kuzisikelela ngembewu yayo. Usingaye waloo mbewu nguYesu Kristu. (Genesis 12:3; 22:18; Galati 3:8-16) UThixo wamisela indoda uMoses ukuba ikhokele amaSirayeli aphume eYiputa. (Eksodus 3:9, 10, 12, 18) NguMoses owanikwa imithetho eyaziwa ngokuba ngumnqophiso woMthetho, okanye uMthetho kaMoses. (Eksodus 24:1-18) Bonke ababhali beBhayibhile babengamadoda.
NjengeNtloko yebandla lamaKristu, uYesu “wanikela izipho ezingabantu [amadoda].” (Efese 1:22; 4:7-13) Xa wayechaza iimfaneleko zabaveleli, uPawulos wabhekisela emadodeni. (1 Timoti 3:1-7; Tito 1:5-9) Ngenxa yoko amabandla amaNgqina kaYehova akhokelwa ngabaveleli abangamadoda, okanye abadala, nangamadoda amiselweyo azizicaka zolungiselelo. (Filipi 1:1, 2; 1 Timoti 3:8-10, 12) Ngamadoda kuphela afanele abe ngabelusi kwibandla lamaKristu. (1 Petros 5:1-4) Noko ke, njengokuba sekutshiwo, abafazi banamalungelo angathethekiyo abawanikwe nguThixo.
Bavuyiswa Yindima Yabo
Xa efeza indima ayinikwe nguThixo aye onwabe gqitha amadoda nabafazi. Xa amadoda nabafazi bexelisa umzekelo kaKristu nebandla lakhe, kubakho ulonwabo emtshatweni. UPawulos wathi: “Madoda, qhubekani nibathanda abafazi benu, kanye njengokuba noKristu walithandayo ibandla waza wazinikela ngenxa yalo . . . Ngamnye wenu makamthande umfazi wakhe njengoko ezithanda.” (Efese 5:25-33) Amadoda amele asebenzise ubuntloko bawo, kungekhona ngokuzingca, kodwa ngothando. Ibandla likaKristu alibunjwa ngabantu abafezekileyo. Ukanti, uYesu uyalithanda ibe uyalinyamekela. Nayo ke, indoda engumKristu imele imthande ize imnyamekele umfazi wayo.
Yena umfazi ongumKristu ‘umele abe nentlonelo enzulu ngendoda yakhe.’ (Efese 5:33) Kule nkalo, umele ajonge umzekelo webandla. Eyabase-Efese 5:21-24 ithi: “Thobelanani ngokoyika uKristu. Abafazi mabathobele amadoda abo njengakuyo iNkosi, ngenxa yokuba indoda iyintloko yomfazi wayo njengokuba noKristu eyintloko yebandla, njengoko yena engumsindisi walo mzimba. Enyanisweni, njengoko ibandla limthobela uKristu, ngoko mabenjenjalo nabafazi kumadoda abo kuyo yonk’ into.” Nakuba kunokukhe kube nzima nje emfazini ukuthobela indoda yakhe maxa wambi, oku “kufanelekile eNkosini.” (Kolose 3:18) Kuya kuba lula ukuzithoba endodeni yakhe xa ekhumbula ukuba ukholisa iNkosi uYesu Kristu.
Kwanokuba indoda yakhe ayingomKristu njengaye, umfazi umele abuthobele ubuntloko bayo. Umpostile uPetros uthi: “Nina bafazi, wathobeleni amadoda enu, ukuze kuthi, nokuba kukho kuwo angalithobeliyo ilizwi, azuzeke ngaphandle kwelizwi ngenxa yehambo yabafazi bawo, kuba eye angamangqina okuzibonela ehambo yenu enyulu ndawonye nentlonelo enzulu.” (1 Petros 3:1, 2) USara, owayehlonela indoda yakhe uAbraham, wajizekwa ngelungelo lokuzala uIsake waza ke wangukhokhokazi kaYesu Kristu. (Hebhere 11:11, 12; 1 Petros 3:5, 6) Abafazi abaziphatha njengoSara baya kuvuzwa nakanjani na nguThixo.
Kubakho uxolo nemvisiswano xa amadoda nabafazi befeza indima abayinikwe nguThixo. Oku kuzisa ulwaneliseko nolonwabo. Ngaphezulu, ukuthobela iZibhalo kwenza ngamnye aphathwe ngesidima esimfaneleyo ngokwendawo abekwe kuyo kwilungiselelo likaThixo.
[Ibhokisi ekwiphepha 7]
Indlela Abavakalelwa Ngayo Ngendima Abayinikwe NguThixo
USusan uthi, “Umyeni wam ubusebenzisa ngothando nobubele ubuntloko bakhe. Siyazixubusha izigqibo, ibe uthi akugqiba ngento emele yenziwe nemele ingenziwa, ndazi ukuba oko kuluncedo kum. Ilungiselelo likaYehova kubafazi abangamaKristu lindenza ndonwabe nomtshato wethu womelele. Sisondelelene gqitha yaye siyancedisana ukuze siphumeze usukelo esinalo lwezinto zokomoya.”
Umfazi ogama linguMindy uthi: “Indima uYehova ayabele abakhonzi bakhe ababhinqileyo sisiqinisekiso sokuba uyasithanda. Ndivakalelwa kukuba ukuhlonela umyeni wam nokumxhasa kwimisebenzi yakhe yebandla yeyona ndlela ndibonisa ngayo umbulelo endinawo kuYehova ngeli lungiselelo.”
[Imifanekiso ekwiphepha 5]
Ngokuvisisana nelungelo lobuntloko eyanikwa lona indoda, uThixo wanika uNowa, uAbraham noMoses izabelo ezahlukahlukeneyo
[Umfanekiso okwiphepha 7]
“Abafazi abavakalisa iindaba ezilungileyo bangumkhosi omkhulu”