Ukholo Lwethu Lusishukumisela Ukuba Senze Imisebenzi Emihle
1 Ukholo lwashukumisela uNowa, uMoses noRahabhi ukuba benze imisebenzi ethile. UNowa wakha umkhombe. UMoses wancama ubutofotofo bebhotwe likaFaro. URahabhi wavuma iintlola zagob’ ityholo kwakhe waza wathobela imiyalelo yazo, ngaloo ndlela wasindisa intsapho yakhe. (Heb. 11:7, 24-26, 31) Yiyiphi imisebenzi emihle ukholo lwethu olusishukumisela ukuba siyenze?
2 Ukushumayela: Ukholo lusishukumisela ukuba sithethe ngoThixo wethu obalaseleyo nenjongo yakhe yokuba sizuze ulonwabo olungenasiphelo. (2 Kor. 4:13) Maxa wambi sisenokuba mathidala ukushumayela. Kodwa xa ‘sibeka uYehova phambi kwethu rhoqo,’ siyomelezwa yaye asoyiki nto. (INdu. 16:8) Ngaloo ndlela ukholo lwethu lusishukumisela ukuba sishumayele iindaba ezilungileyo kwizalamane zethu, kubamelwane, kwabo sisebenza nabo, kwabo sifunda nabo nabanye, nanini na kuvela ithuba.—Roma 1:14-16.
3 Ukuhlanganisana: Ukubakho rhoqo ezintlanganisweni ngomnye umsebenzi omhle obangelwa lukholo. Njani? Kubonisa ukuba seyisekile kukuba uYesu uphakathi kwethu ngomoya oyingcwele kaThixo xa sisezintlanganisweni zamaKristu. (Mat. 18:20) Kubonisa ukuba sinqwenela ‘ukuva oko umoya ukutshoyo kuwo amabandla.’ (ISityhi. 3:6) Siyithabatha nzulu imfundiso esiyifumanayo kuba ngenxa yokholo siyaqonda ukuba sifundiswa nguMyaleli wethu Ozukileyo, uYehova.—Isa. 30:20.
4 Ukhetho Esilwenzayo: Ukweyiseka zizinto ezingabonakaliyo kusishukumisela ukuba sizibeke kwindawo yokuqala izinto zokomoya. (Heb. 11:1) Oku kudla ngokuthetha ukuncama amaqithi-qithi ahamba namaqhuzu athile. Ngokomzekelo, umdala wancama umsebenzi onomvuzo oncumisayo kuba wawuza kumenza aphoswe ziintlangano, abe kude nentsapho yakhe aze ayeke ukuba nguvulindlela. Ngamana nathi ngokufanayo singathembela koko iBhayibhile isiqinisekisa kona kokuba uYehova akayi kubashiya abo ‘baqhubeka befuna kuqala ubukumkani nobulungisa bakhe.’—Mat. 6:33.
5 Abanye bayayibona impembelelo yokholo ebomini bethu. Liyinyaniso elokuba ukholo lwethu lwaziwa emhlabeni wonke. (Roma 1:8) Ngamana singabonisa ngemisebenzi yethu emihle ukuba ukholo lwethu luphilile.—Yak. 2:26.