Ngaba Kubalulekile Ukufumana Iimpendulo?
“Niya kuyazi inyaniso, yaye inyaniso iya kunikhulula.”—YOHANE 8:32.
IBHAYIBHILE iqulethe inyaniso enokusikhulula kwiinkolelo ezididayo okanye ezilahlekisayo eziphathelele uYesu. Ngaba inomsebenzi into esiyikholelwayo ngaye? Ewe, kubalulekile ukukholelwa kuYesu. Oku kubalulekile kuYehova, nakuYesu yaye kufanele kube njalo nakuthi.
● Kutheni oku kubalulekile nje kuYehova? Ngamafutshane, singathi kungenxa yokuba “uThixo uluthando.” (1 Yohane 4:8) UYehova ufuna sihlale ngokonwaba ngonaphakade. UYesu wathi: “UThixo walithanda kakhulu ihlabathi [lonke uluntu] kangangokuba wanikela ngoNyana wakhe okuphela kwamzeleyo, ukuze wonk’ ubani obonisa ukholo kuye . . . abe nobomi obungunaphakade.” (Yohane 3:16) UThixo wathumela uNyana wakhe ukuba azokuba nguMkhululi yaye asivulele nendlela yokuphila ngonaphakade kwiParadesi esemhlabeni, ngokuvumelana nenjongo Yakhe yantlandlolo. (Genesis 1:28) UThixo uyakunqwenela ukubanika ubomi obungunaphakade abo bafunda inyaniso ngoNyana wakhe baze benze ngokuvumelana nayo.—Roma 6:23.
● Kutheni oku kubalulekile nje kuYesu? Naye uYesu uyaluthanda uluntu. Wabonakalisa uthando lokuzincama ngokusifela. (Yohane 15:13) Wayeqonda kakuhle ukuba ulungiselela ekuphela kwendlela esa elusindisweni. (Yohane 14:6) Ngaba imele isothuse into yokuba uYesu anqwenele ukubona abaninzi kangangoko kunokwenzeka bexhamla kwidini lakhe lentlawulelo? Kungeso sizathu kanye le nto uYesu wathuma abalandeli bakhe bokwenene ukuba bayo kufundisa abantu emhlabeni wonke ngokuthanda kukaThixo nenjongo yakhe.—Mateyu 24:14; 28:19, 20.
● Kutheni oku kubalulekile nje nakuthi? Khawucinge nje okomzuzwana ngezona zinto zibalulekileyo kuwe—impilo nentsapho yakho. Ngaba ulangazelela ukuba wena nabo ubathandayo nibe nempilo entle nobomi obungcono? UYehova esebenzisa uYesu uvulele wena nabo ubathandayo ithuba lokuba nifumane impilo egqibeleleyo nobomi obungenasiphelo kumhlaba omtsha, ekungekho zintlungu nakubandezeleka kuwo. (INdumiso 37:11, 29; ISityhilelo 21:3, 4) Ngaba uyakunqwenela oku? Ukuba kunjalo, kukho okuthile omele ukwenze.
Khawuphinde uqwalasele la mazwi esibhalo acatshulweyo kunye nomxholo athi: “Niya kuyazi inyaniso, yaye inyaniso iya kunikhulula.” Inyani ngoYesu nendima yakhe ekuzalisekiseni injongo kaThixo inokusikhulula kolona hlobo lobukhoboka lugqwesileyo—isono nokufa. Ukuze uyixhamle loo nkululeko, kufuneka “uyazi inyaniso.” Kutheni ungakhe uzame ukwazi okungakumbi ngenyaniso nendlela wena nabo ubathandayo eninokuzuza ngayo kuyo? AmaNgqina kaYehova angakuvuyela ukukunceda.