Akory Hanombohan̈a Izy?

Ino raha han̈ampy anao ho tia mamaky Baiboly ndreky hahazo hatsaran̈a baka amy zen̈y? Ty misy sosokevitry dimy nan̈ampy olo maro:

Fidiana tsarabe tany hamakianao izio. Mitadiava tany mangin̈y tsarabe. Tsy ho hisy panabataba anao ke ho amy raha vakinao ao fo jerinao jiaby. Ataova lerany tsarabe hazavan̈a ndreky tsiko.

Manàn̈a toetsain̈y tsara. Baiboly io baka amy Babantsika andan̈itry an̈y. Hahazo hatsaran̈a maro anao izikoa man̈ano karaha tsaiky von̈ono mare hianatra amy babany ten̈a tia izy in̈y. Adosoa an̈aty jerinao foeky fankaratsianolo Baiboly io, baka Zan̈ahary hampianatra anao tsarabe.​—Salamo 25:4.

Mivavaha antsendriky isaka alohany hamaky Baiboly. Baiboly io Volan̈a Zan̈ahary, ke mila fan̈ampian̈a baka aminany atsika izikoa tiantsika hazava amintsika raha volan̈iny. Izy nampan̈anten̈a fa han̈amia “fan̈ahy masin̈y lan̈iany olo mangataka zen̈y aminany.” (Lioka 11:13) Fan̈ahy masin̈y io han̈ampy anao hahatakatra hevitry Zan̈ahary. Hazava aminao “ndray hevitry lalin̈iny Zan̈ahary” izikoa fa mandeha fotoan̈a.​—1 Korintianina 2:10.

Mifen̈a hahatakatra hevitriny raha vakinao. Aza milomoay koa fa mamaky, fa aleva onon̈o raha vakinao. Iritrireta: ‘Ino aby toetrinolo voakoran̈a amy raha vakiko ty? Akory mety han̈arehako izy ty amy fiain̈ananaka?’

Manàn̈a tanjon̈o mazava tsarabe. Raha ten̈a mahatsara anao antsendriky ianara. Ohatra, mety ataonao tanjon̈o hahay raha maromaro momba Zan̈ahary, na hahaitsara toetry, na hanjary lelahy tia vady na man̈angy man̈aja vady. Fidiana amy zay tapany amy Baiboly ao mety han̈ampy anao hanakatra tanjon̈onao aby io.a

Han̈ampy anao hanomboko famakian̈a Baiboly iro sosokevitry dimy aby io. Akory fo basy hahavy vakiteninao ho tsara tsarabe? Misy sosokevitry momba zen̈y amy lahatsoratra fan̈araka.