FOTOKEVITRY MAVENTY HITA ATO | INO RAHA HAN̈AMPY ANAO HO TIA MAMAKY BAIBOLY?
Nan̈ino Anao Tokony Hamaky Baiboly?
“Sambarako sarotro azo mare raha koran̈iny Baiboly io.”—Jovy
“Sambarako mampaempaka mamaky Baiboly.”—Queennie
“Zaho nahita habezany Baiboly io, zaho fa tsy tihamaky edy.”—Ezekiel
Asa anao mba nieritreritry karaha zen̈y koa momba famakian̈a Baiboly? Aminolo maro, mampadekorazy iro mamaky Baiboly. Fa tsy han̈ano karaha zen̈y ndraiky anao izikoa hainao fa Baiboly hampasambatra anao ndreky han̈ampy anao hanan̈a fiain̈ana mahafapo. Avio, izikoa hainao karakory hitiavanao mamaky Baiboly, mety ho tianao fo hamaky izio. Zahava hely baka ino aby hatsaran̈a ho azonao, anao koa mamaky Baiboly.
Zahava raha nikoran̈inolo, iro koa fa nanomboko namaky Baiboly.
Ezekiel, tsaikilelahy 20 taon̈o nivolan̈a: “Zaho taloha mira olo mitondra tomobily kanefa tsy hay aby tany himboan̈a. Fa zaho koa fa namaky Baiboly, nanjary nisy dikany fiain̈ananaka. Misy torohevitry tsara ilaiko amy fiain̈ana isanandra ao.”
Frieda, tsaiky man̈angy 20 taon̈o koa nivolan̈a: “Zaho somary mafimafy loha zay. Fa zaho koa fa namaky Baiboly, zaho nahavita nifehy ten̈a fo. Zaho izioty nahazo kamarady maro, fotony zaho efa tsy sarotiny.”
Eunice, man̈angy 50 taon̈o ndraiky nivolan̈a: “Nankatsara toetrinaka izio, ke nahavy zaho niala raha ratsy nahazatra zaho.”
Famakian̈a Baiboly io afaka man̈ampy anao hanan̈a fiain̈ana tsaratsarany izioty, karaha nindro olo aby namaky Baiboly io ndreky olo antapitrisany koa. (Isaia 48:17, 18) Fa an̈abony raha jiaby, anao koa mamaky Baiboly, anao 1) hahay hanapakevitry, 2) hahazo kamarady tsara, 3) tsy hiady sain̈y be loatra, avio 4) hahay ny marin̈y momba Zan̈ahary. Zen̈y raha ten̈a tsara. Baka amy Zan̈ahary iro torohevitry amy Baiboly ao, safe tsy hanen̈iny foeky anao koa man̈araka izio. Zan̈ahary tsy man̈amia jery ratsy atsika foeky.
Ke ten̈a tsara izikoa anao mikomansy mamaky Baiboly. Karakory tokony hataonao baka hahavitanao zen̈y? Karakory hataonao baka anao ho tia mamaky Baiboly?