Areha Raha Volan̈iny Jesosy Pitariky Atsika

1. Ino ma sitrapôny Jehovah amy zioty?

TIANY Zan̈ahary hambara aminolo amy tany jiaby vaovao momba Fanjakan̈anany. (Mar. 13:10; 1 Tim. 2:3, 4) Asany Jehovah izio; matomboko mare asa io ke zen̈y nahavy izy nanendry Zanany ten̈a tiany hitariky izio. Mety matoky atsika fa ho vitany Jesosy erakany itiavany Jehovah izy asa fitorian̈a io, alohany haviany farany. Ino antony? Fotony tsisy olo mahay mitariky asa io mandilatra Jesosy.​—Mat. 24:14.

2. Ino raha ho hitantsika ato?

² Hizahavantsika ato akory ataony Jesosy mampiasa “panompo atokisan̈a ndreky mahadiniky raha” han̈amezan̈a hanin̈y arapan̈ahy. Hidinihintsika ato koa fomba handaminany panompo io olo pan̈aradia Jesosy ndreky fomba handaminan̈a asa fitorian̈a mbala tsiary nisy karaha izy amy tantara. (Mat. 24:45) Farany, ho hitantsika ino raha mety ataontsika tsiaraikiaraiky hanohanan̈a Jesosy ndreky panompo atokisan̈a io.

JESOSY MITARIKY ASA FITORIAN̈A

3. Ino fahifan̈a namezany Jehovah i Jesosy?

³ Nan̈ino atsika matoky fa ten̈a Jesosy marin̈y mitariky asa fitorian̈a? Mamaly zen̈y raha nivolan̈iny Jesosy tamy pianatranany tsy nivadiky, taminiro tamy bongo araiky ta Galilia, taloha heliny izy hanonga tandan̈itry. Ho izy tamindro: “Fahifan̈a jiaby andan̈itry an̈y ndreky ambony tany eto efa namian̈a zaho.” Zahava amy zay baka raha nivolan̈iny man̈araka: “Mandihana, ataova pianatra olo baka amy firenena jiaby.” (Mat. 28:18, 19) Ke ankoatrany raha hafa, namezan̈a fahifan̈a hitariky asa fitorian̈a koa i Jesosy.

4. Nan̈ino atsika matoky fa mbala mitariky asa fitorian̈a fo i Jesosy ziska iziô?

⁴ Jesosy nivolan̈a fa asa fitorian̈a ndreky fan̈anaovan̈a pianatra io hatao amy “firenena jiaby”, ke izy hiaraka aminolo pan̈aradia izy fo “isanandra, firaka amy farany donia ty.” (Mat. 28:20) Hita tsarabe baka amy volan̈anany aby io fa mbala mitariky asa fitorian̈a fo izy, firaka amy zioty.

5. Akory hahavy atsika ho an̈isanolo man̈atanteraka faminanian̈a amy Salamo 110:3?

⁵ Navozo ma Jesosy tsao tsy ho ampy olo han̈ano asa fitorian̈a io, amy tapany farany aminy andra farany zioty? Tsy zen̈y foeky! Hainy fa ho tanteraka fo faminanian̈a nambarany panoratra salamo ty: ‘Aminy andra handihanany tafikinao hiady, iro olonao aby io ho avy antsitrapô han̈ampy tafiky io.’ (Sal. 110:3) Ke izikoa anao mba an̈isanolo man̈ano asa fitorian̈a io, dikanizen̈y anao manohan̈a Jesosy ndreky panompo atokisan̈a, salakady man̈atanteraka faminanian̈a io. Mandeha mare asa io, fa ndray zen̈y, tsy maintsy misy fo problemo.

6. Ino an̈isany mankasarotro asany pitory vaovao tsara momba Fanjakan̈any Zan̈ahary?

⁶ Fanoheran̈a an̈isany raha araiky mankasarotro asany pitory momba Fanjakan̈any Zan̈ahary. Mankaratsy fanompoan̈a ataontsika mare pivadipinoan̈a, ndreky pitondra fivavahan̈a, avio iro pan̈ano pôlitìky aby io, ke maro olo avoafitaka. Ke izikoa lafamìntsika, jiranintsika, ndreky olo miaraka miasa amintsika mino fankaratsian̈a io, iro mety tsy han̈aomba atsika hanompo Jehovah ndreky hitory. Mety handombolombo ndraiky fanoheran̈a amy tany sasany, fotony iro fahavalontsika aby io masaky masiaka ndreky manafiky foeky, avio samborindro iro piaramanompo amintsika aby an̈y, baka io gadraindro. Tsy gaga foeky atsika maharen̈y zen̈y, fotony Jesosy efa nan̈ambara karaha ty: “Anaro ho halany firenena jiaby, baka aminy an̈aranaka.” (Mat. 24:9) Ke raha jiaby mavoa atsika zen̈y porofo fa ankasitrahiny Jehovah atsika. (Mat. 5:11, 12) Baka amy Satana aby fanoheran̈a jiaby zen̈y. Ndray zen̈y, izy tsy honohono mahadin̈y angovony Jesosy foeky! Ke ho vitantsika fo han̈ambara vaovao tsara io amy tany jiaby misy olo, fotony Jesosy man̈ampy atsika. Zen̈y raha hidinihintsika iziô.

7. Akory ahitan̈a fa tanteraka raha koran̈iny Apokalypsy 14:6, 7?

⁷ Ino koa raha hafa manahiran̈a atsika izikoa fa mitory? Samby isany fivolan̈ana ampiasainolo itoriantsika. Ndray zen̈y, nan̈amia toky atsika i Jesosy tamy fahitan̈a hitany apostoly Jaona, fa tsy tamban̈a hahavitantsika hitory vaovao tsara erantany raha zen̈y. (Vakia Apokalypsy 14:6, 7.) Ary zen̈y ankitin̈y raha misy iziô, fotony miezaka atsika mitady hevitry harin̈esanolo farany maro hafatra momba Fanjakan̈a io. Amy fomba akory? Misy amy volan̈a mandeha 1 000 iro lahatsoratra miôrin̈y amy Baiboly amy sitintsika jw.org ao, ke olo erantany afaka mamaky izio. Nikeny Filankevipitantan̈ana koa handikan̈a boky Mankafiza Fiain̈ana Tsisy Farany! amy volan̈a mandilatra 700. Izio lastiô boky ten̈a fampiasaintsika izikoa fa mampianatra olo Baiboly. Maro koa video natao ninolo maren̈iny, ke mahazo hanin̈y arapan̈ahy fo iro. Olo jamba ndraiky mahazo boky ndreky gazety amy soratra braille. Hitantsika baka amy zen̈y fa tanteraka ankitin̈y faminanian̈any Baiboly. ‘Olo baka amy fivolan̈ana jiaby misy erantany’ iziô mianatra “volan̈a madio”, tsy ino zen̈y fa ny marin̈y amy Baiboly ao. (Zak. 8:23; Zef. 3:9) Tsy ho vita raha jiaby zen̈y izikoa tsy i Jesosy Kristy, piandraikitry mahay io, mitariky atsika.

8. Ziska iziô, ino vokatrany asa fitorian̈a ataontsika?

⁸ Izioty, misy olo mandilatra 8 000 000 baka amy tany 240 mifandray amy fandaminan̈any Jehovah. Mandilatra folo arivo koa olo atao batisa isaka taon̈o! Kanefa toetry tsara ifen̈andro pianatra vaovao aby io hanan̈ana ny ten̈a raha maventy mandilatra iro konty aby io, fotony iro misikin̈y “toetry vaovao.” (Kol. 3:8-10) Maro tamindro io nanjary madio fitondranten̈a, tsy kafiry, vôly man̈avakavaka ndreky efa tsy mafana fô amy fitiavan̈a tanindrazan̈a eky. Tanteraka koa faminanian̈a koran̈iny Isaia 2:4, fotony iro olo maro be aby io iziô efa ‘tsy mianatra ady eky.’ Man̈ampy olo han̈aton̈o Zan̈ahary atsika, izikoa fa mifen̈y mare misikin̈y toetry vaovao. Zen̈y fomba an̈aboahantsika fa man̈araka taridalan̈any Kristy Jesosy piandraikitrintsika io atsika. (Jaona 13:35; 1 Pet. 2:12) Raha jiaby zen̈y tsy raha navinavy ho azy! Amezany Jesosy atsika zay fan̈ampian̈a ilaintsika.

JESOSY NANENDRY PANOMPO

9. Izikoa zahan̈a Matio 24:45-47, ino raha hiboaka amy fotoan̈any farany?

⁹ Vakia Matio 24:45-47. Jesosy efa nivolan̈a fa amy fotoan̈any farany, izy hanendry “panompo atokisan̈a ndreky mahadiniky raha” han̈amia hanin̈y arapan̈ahy vahoakany Jehovah. Haintsika baka amy zen̈y fa ten̈a maresaka asany panompo io amy zioty. Nan̈ino atsika mivolan̈a zen̈y? Jesosy piandraikitrintsika io mampiasa lelahy voahosotro vitsivitsy, baka vahoakany Zan̈ahary ndreky olo lian̈a amy fahamarin̈ana hahazo “hanin̈y” arapan̈ahy “amy fotoan̈a mety.” Iro lelahy aby io tsy mihevitry iro tômpiny finoan̈anolo hafa foeky. (2 Kor. 1:24) Mifanohitry amy zen̈y aby, man̈eky iro fa i Jesosy Kristy ‘pitariky ndreky pitondra’ vahoakany Jehovah.​—Isaia 55:4.

10. Aia amindro boky aby amy sary io nahavy anao resy lahatra fa man̈araka lalan̈a mengo amy fiain̈ana tsisy farany anao?

¹⁰ Rango taminy 1919, panompo atokisan̈a ndreky mahadiniky raha efa nan̈aboaka boky isankarazany, han̈ampian̈a olo lian̈a hahita ny marin̈y amy Volan̈a Zan̈ahary ndreky hianatra izio. Taminy 1921, panompo io nan̈aboaka boky Harpiny Zan̈ahary (fransay). Izio man̈ampy olo hahay fampianaran̈a fôtotro amy Baiboly. Izikoa fa nandeha fotoan̈a, nisy boky hafa koa naboaka. Aia amindro boky aby ty nan̈ampy anao hahay Babantsika andan̈itry an̈y ndreky ho tia izy: “Aoka Andriamanitra no ho Fantatra fa Marina”, Ny Fahamarinana Izay Mitarika ho Amin’ny Fiainana Mandrakizay, Azonao Atao ny Hiaina Mandrakizay ao Amin’ny Paradisa eto An-tany, Fahalalana Izay Mitarika ho Amin’ny Fiainana Mandrakizay, Ino ma Raha Ten̈a Ampianariny Baiboly?, Ino Raha Mety Ampianariny Baiboly Atsika?, va boky vaovao Mankafiza Fiain̈ana Tsisy Farany!? Navy tamy fotoan̈a nilavantsika izy tsarabe iro boky jiaby io.

11. Nan̈ino ma atsika mila hanin̈y arapan̈ahy aby?

¹¹ Tsy olo vaovao fo mila mahay fahamarin̈ana lalin̈y momba Jehovah ndreky Baiboly, fa atsika jiaby. Karaha ty nisoratiny apostoly Paoly: ‘Hanin̈y mahery natao ninolo matotro.’ Nivolan̈a koa izy fa hahay “han̈avaka ny tsara ndreky ratsy” atsika, izikoa atsika man̈araka raha ianarantsika amy Baiboly ao. (Heb. 5:14) Mahairatsy fo fitondranten̈anolo amy zioty, ke mety ho sarotro amintsika mare han̈araka fitsipikiny Jehovah momba fitondranten̈a. Kanefa, ataony Jesosy raha hahaizantsika raha tokony hataontsika baka atsika hanan̈a finoan̈a matanjaka fo. Mahazo toromariky amy Volan̈a Zan̈ahary atsika. Mampiasa panompo atokisan̈a ndreky mahadiniky raha koa Jesosy, hikarakara ndreky handrasa hanin̈y arapan̈ahy.

12. Akory an̈amezantsika voninahitry an̈aran̈a Zan̈ahary, karaha nataony Jesosy?

¹² Karaha Jesosy, miezaka atsika man̈amia voninahitry an̈aran̈a Zan̈ahary, erakany fandanja izy. (Jaona 17:6, 26) Ohatra iziô taminy 1931, atsika nanomboko nikahian̈a taminy an̈aran̈a Vavolombelon̈o Jehovah. Baka amy Baiboly nangalan̈a izio. Ten̈a raha maventy amintsika an̈aran̈a Zan̈ahary, ke tiantsika izikoa baka aminy an̈aran̈a io ahaizanolo atsika. (Isaia 43:10-12) Rango tamy fanjava Oktobra tamy taon̈o io, an̈aran̈a Zan̈ahary naboaka tamy fôn̈ony nimerô tsiaraikiaraiky tamy gazety Tilikambo Fiambesan̈a. Nampody tamy plasy tokony hisy izy koa an̈aran̈a io amy Soratra Masina​—Fandikan-tenin’ny Tontolo Vaovao. Kanefa tsy karaha zen̈y foeky raha ataony Fivavahan̈a Miaboko Kristianin̈y aby io. Iro foeky nan̈adoso an̈aran̈a Zan̈ahary io aminy ankamaraozany Baiboly nadikandro!

JESOSY MANDAMIN̈Y OLO PAN̈ARADIA IZY

13. Nan̈ino anao resy lahatra fa mampiasa “panompo atokisan̈a ndreky mahadiniky raha” i Jesosy amy zioty? (Jaona 6:68)

¹³ Jesosy nanangana fandaminan̈a miavaka ambony tany eto, baka ho maro olo han̈iry hanompo Jehovah. Akory an̈anaovany zen̈y? Izy mampiasa “panompo atokisan̈a ndreky mahadiniky raha.” Akory fahitanao fandaminan̈a io? Mety hitovy hevitry aminy apostoly Petera donko anao. Karaha ty ho izy tamy Jesosy: ‘Han̈aia koa ma zahay? Anao manan̈a volan̈any fiain̈ana mandrakizay.’ (Jaona 6:68) Miniminia hely baka! Ôtrizay mety ho taia tany nisy atsika, izikoa atsika tsy nifandray tamy fandaminan̈any Jehovah? Izio ampiasainy Kristy baka atsika hahazo zay raha ilaintsika tsy hivadihan̈a amy Zan̈ahary. Ampiofan̈iny koa atsika beky ho vitantsika tsara fanompoan̈antsika. Tsy zen̈y fo fa, ampiany koa atsika hisikin̈y “toetry vaovao”, amy zen̈y Jehovah ravoravo amintsika.​—Efes. 4:24.

14. Ino hatsaran̈a nazonao tan̈atiny fotoan̈any valan̈aretin̈y COVID-19, nohony anao an̈isany fandaminan̈any Jehovah?

¹⁴ Man̈amia toromariky feno fahendrena koa i Jesosy, lera atsika an̈atiny fotoan̈a sarotro. Izikoa fa nanomboko valan̈aretin̈y COVID-19, nahaihitantsika fo fa ten̈a mahatsara atsika man̈araka iro toromariky aby io. Maro olo very hevitry, ke ndray raha sambôrindro tsy haindro. Jesosy ndraiky tsy karaha zen̈y. Nataony fo raha hazahoantsika toromariky mazava hiarovan̈a ain̈intsika. Ohatra iziô, atsika nampirisihin̈y han̈ano kasibosy ndreky han̈aja elan̈elan̈a, izikoa fa mandeha amy tany maro olo. Nampatsiarôvin̈y koa antipan̈ahy fa tokony hifandray matetiky aminolo jiaby an̈ivony fiangonan̈a iro, sady hifen̈y hahay raha ilaindro beky iro ho salama tsara ndreky ho tsara fihavanan̈a amy Jehovah fo. (Isaia 32:1, 2) Nahazo toromariky fan̈ampiny ndreky fankahirezan̈a koa atsika baka amy vaovao farany baka amy Filankevipitantan̈ana.

15. Tan̈atiny valan̈aretin̈y, ino toromariky nazontsika momba fivorian̈a ndreky fitorian̈a, baka io ino vokatranizen̈y?

¹⁵ Nahazo toromariky mazava tsarabe mikasiky fomba ivorian̈a ndreky itorian̈a koa atsika, tan̈atiny fotoan̈any valan̈aretin̈y. Betibety atsika efa nanomboko nivory ndreky nan̈ano fivoriambe baka tamy vidéconférence. Komansy nitory amy taratasy ndreky amy telefaony koa atsika, ary efa presky zen̈y fo fomba nan̈anaovantsika fanompoan̈a. Nitahy ezaka nataontsika ma Jehovah? Zen̈y ke. Maro sampan̈a nan̈ano tatitry fa nitombo mare hamaraozany pitory amindro an̈y. Ndray izy aby, maro pitory manan̈a fitantaran̈a mankahery tan̈atiny fotoan̈a io.​—Zahava “Jehovah Mitahy Asa Fitorian̈a Ataontsika.”

16. Ino raha atokisantsika?

¹⁶ Misy olo mihevitry fa efa mahazo loatra fitandreman̈a nataony fandaminan̈a, tan̈atiny fotoan̈any valan̈aretin̈y. Kanefa ny raha misy, amy fotoan̈any tsarabe toromariky azontsika. Mahita zen̈y aby atsika jiaby. (Mat. 11:19) Ten̈a be fitiavan̈a i Jesosy izikoa fa mitariky vahoakanany. Matoky atsika fa, ndray ino ndray ino raha hiboaka aminy amaray, Jehovah ndreky Zanany ten̈a tiany io tsy hiala atsika foeky.​—Vakia Hebreo 13:5, 6.

17. Ino raha tsapanao, anao koa fa mieritreritry fa i Jesosy piandraikitrintsika?

¹⁷ Ravoravo atsika fotony Jehovah mitariky atsika! Fandaminan̈a misy atsika tsy avosaratsarakany kolontsain̈y ndreky tany favian̈a, baka io fivolan̈ana. Mahazo hanin̈y arapan̈ahy mahampy tsarabe atsika, salakady voaofan̈a tsara hankefa asa fitorian̈a. Ampianarin̈y atsika tsiaraikiaraiky koa karakory atao misikin̈y toetry vaovao ndreky hifankatia fo. Raha jiaby zen̈y mahavy atsika mirehareha manan̈a Jesosy, piandraikitrintsika!