Aza Mivadiky amy Vadinao

Jehovah mivolan̈a fa atsika tsy tokony hivadiky amy namantsika. (Salamo 18:25) Ten̈a ilain̈y koa zen̈y amy vadian̈a, fotony olo fivadiany koa mifampatoky, iro hahay hifankatia fo.

Maro olo izioty mivadiky amy vadiny. Izikoa tokantran̈onao tsy tianao ho takany raha karaha zen̈y, misy raha aroe tsy maintsy ataonao.

1 VADINAO FO ATAOVA TEN̈A NAMAN̈A

KORAN̈INY BAIBOLY: ‘Anaro mila mahay tsarabe raha ten̈a maventy.’ (Filipianina 1:10) Vadian̈a io an̈isany raha ten̈a maventy amy fiain̈ana, ke tsy tokony hatao soma.

Tiany Jehovah anao hikarakara vadinao ndreky ‘hangala hafizany fiain̈ana’ miaraka aminany. (Mpitoriteny 9:9) Volan̈iny amy Baibly ao koa fa anao mila mizaha raha mahatsara vadinao fo, ke han̈ano raha mamparavoravo izy. (1 Korintianina 10:24) Ataova raha ahitany vadinao fa anao ten̈a tia izy ndreky man̈aja izy.

AKORY AN̈ANOVAN̈A ZEN̈Y?

• Manokàna fotoan̈a hiarahan̈a amy vadinao. Aza man̈ano raha hafa amy fotoan̈a io

• Izikoa fa mivolan̈a, aza atao “ninaka” fa ataova “nintsika”

2 TANDREMA FONAO

KORAN̈INY BAIBOLY: “Zay lelahy tsy voly mizaha man̈angy, ke mila hiaraka aminany, efa nijangajanga tan̈aty fonany edy izy.” (Matio 5:28) Ke izikoa olo araiky mieritreritry mila olo hafa, efa mivadiky amy vadiny edy izy.

Jehovah mivolan̈a fa atsika mila miaro fontsika. (Ohabolana 4:23; Jeremia 17:9) Dikanizen̈y, atsika mila mifidy raha zahavantsika. (Matio 5:29, 30) Atsika mila man̈ano karaha Joba. Izy tapakevitry tsy hizaha man̈angy hafa foeky. (Joba 31:1) Aza man̈eky foeky hizaha sary veta- veta. Aza mifankazatra loatra aminolo tsy vadinao.

AKORY AN̈ANOVAN̈A ZEN̈Y?

• Ataova hitanolo jiaby fa tsisy olo tianao mandilatra vadinao

• Raha koa fa hitanao mety handrobaka tokantran̈onao, ialà malaky